மன்னார் படுகையில் எண்ணெய், எரிவாயு: 9 டிரில்லியன் கன அடி வளம் இலங்கை பொருளாதாரம் மேம்பட உதவுமா?

இலங்கையின் மேற்கு கடற்பகுதியில் அமைந்துள்ள மன்னார் படுகையில் எண்ணெய் மற்றும் இயற்கை எரிவாயு அகழ்வாராய்ச்சியைத் தீவிரப்படுத்தும் நோக்கில், நான்கு பிரதான ஆழ்கடல் ஆய்வுத் தொகுதிகளுக்கான 'SL2026-01' சர்வதேச ஏலச் சுற்றை இலங்கை பெட்ரோலிய அபிவிருத்தி அதிகார சபை அதிகாரபூர்வமாகத் தொடங்கியுள்ளது.

சுமார் 33,964 சதுர கிலோமீட்டர் பரப்பளவைக் கொண்ட இந்த ஆழ்கடல் ஆய்வு மண்டலத்தில் சர்வதேச முதலீடுகளை ஈர்ப்பதே இதன் முதன்மை நோக்கம்.

இருப்பினும், இலங்கை அரசாங்கம் தனது சொந்த நிதியில் புதிதாக எந்தவொரு ஆழ்கடல் துளையிடல் ஆய்வுகளையும் தற்போதைக்கு மேற்கொள்ளவில்லை எனவும், மாறாக, 1967 முதல் 2019 வரை பல்வேறு கட்டங்களில் சேகரிக்கப்பட்ட இருபரிமாண மற்றும் முப்பரிமாண நிலநடுக்கவியல் தரவுகள் மற்றும் 2011இல் 'கெய்ர்ன்' நிறுவனம் சேகரித்த கிணற்றுத் தரவுகளை, நவீன செயற்கை நுண்ணறிவு மற்றும் மேம்படுத்தப்பட்ட மென்பொருள்கள் மூலம் மறுஆய்வு செய்தே, ஹைட்ரோகார்பன் இருக்க வாய்ப்புள்ள நான்கு பிரதான தொகுதிகள் வரைபடமாக்கப்பட்டுள்ளன.

சுமார் 2 பில்லியன் பீப்பாய்கள் மசகு எண்ணெய் மற்றும் 9 டிரில்லியன் கன அடி இயற்கை எரிவாயு வளம் இருப்பதாகக் கணிக்கப்பட்டுள்ள இப்பகுதியில், 100 மீட்டரில் இருந்து 3,000 மீட்டர் வரையிலான ஆழ்கடல் களங்களில் பன்னாட்டு எண்ணெய் நிறுவனங்கள் மூலம் பல நூறு மில்லியன் டொலர் முதலீடுகளை ஈர்ப்பதற்காக லண்டன் மற்றும் கோலாலம்பூரில் முதலீட்டாளர் மாநாடுகளை நடத்த இலங்கை அரசு திட்டமிட்டுள்ளது.

பொருளாதார நெருக்கடியில் தவிக்கும் இலங்கைக்கு இந்த ஆழ்கடல் வளம் புதிய நம்பிக்கையை ஏற்படுத்தியிருந்தாலும், பழைய தரவுகளின் அடிப்படையில் சர்வதேச முதலீடுகளை ஈர்ப்பதில் உள்ள சவால்கள், பிராந்தியத்தில் நிலவும் புவிசார் அரசியல் போட்டிகள் மற்றும் சூழலியல் அச்சங்கள் குறித்துப் பல்வேறு கேள்விகள் எழுந்துள்ளன.

50% வெற்றி விகிதம்: புவியியல் வல்லுநர்களின் பார்வை

"உலகளவில் எண்ணெய் மற்றும் எரிவாயு ஆய்வுகளுக்காக வெட்டப்படும் கிணறுகளில் 10 முதல் 15 சதவிகிதமானவை மட்டுமே வெற்றியடைகின்றன. ஆனால், இலங்கையின் மன்னார் படுகையில் தோண்டப்பட்ட 4 சோதனைக் கிணறுகளில் இரண்டு கிணறுகளில் உயர்தர இயற்கை எரிவாயு கண்டறியப்பட்டு 50% வெற்றி விகிதம் கிடைத்துள்ளது" என பேராதனைப் பல்கலைக் கழகத்தின் முன்னாள் துணை வேந்தரும், பிரபல புவியியல் அறிஞருமான பேராசிரியர் அதுல சேனாரத்ன பிபிசி தமிழிடம் தெரிவித்தார்.

"கடந்த 1960கள் மற்றும் 70களில் மேற்கொள்ளப்பட்ட துளையிடல்கள் 700 மீட்டருடன் நிறுத்தப்பட்ட நிலையில், 3,000 மீட்டர் (3 கி.மீ.) ஆழத்தில் பில்லியன் கணக்கான ஆண்டுகள் பழமையான பாறை அடுக்குகளுக்கு இடையே மிக உயர்தர வாயுப் படிவுகள் இருப்பது உறுதி செய்யப்பட்டுள்ளது. இது நாட்டின் ஆற்றல் நெருக்கடிக்கு உள்நாட்டிலேயே தீர்வு காண்பதோடு, பொருளாதாரத்தை உயர்த்த மிகப் பெரிய வாய்ப்பாக அமையும்," என்றும் அவர் தெரிவித்தார்.

அத்துடன், இலங்கையில் பெட்ரோலிய தொழில்நுட்பத்திற்குத் தேவையான பயிற்சி பெற்ற புவியியலாளர்களும் தொழில்நுட்ப அதிகாரிகளும் பேராதனைப் பல்கலைக் கழகம் வாயிலாகத் தயாராக இருப்பதாகவும் அவர் சுட்டிக்காட்டினார்.

கெய்ர்ன் நிறுவனம் விட்டுச் சென்ற தடம் மற்றும் அறிவியல் சான்றுகள்

இலங்கையின் மன்னார் வளைகுடாவில் எண்ணெய் மற்றும் இயற்கை எரிவாயு இருப்பதற்கான ஆய்வுகள் 1960களிலேயே தொடங்கப்பட்டுவிட்ட போதிலும், ஆழ்கடலில் துளையிட்டு இயற்கை எரிவாயு படிவுகள் இருப்பதைக் கண்டுபிடித்து உறுதி செய்த முதல் நிறுவனம் இந்தியாவின் 'கெய்ர்ன் இந்தியா' அமைப்பின் துணை நிறுவனமான 'கெய்ர்ன் லங்கா'.

கடந்த 2011ஆம் ஆண்டு ஆகஸ்ட் மாதம் மன்னார் படுகையில் ஆழ்கடல் சோதனைக் கிணறு வெட்டும் பணிகளைத் தொடங்கிய கெய்ர்ன் நிறுவனம், கடல் மட்டத்திலிருந்து சுமார் 4,300 மீட்டர் (14,000 அடி) ஆழத்தில் இயற்கை எரிவாயு படிவுகள் கண்டுபிடிக்கப்பட்டுள்ளதாக அதிகாரபூர்வமாக அறிவித்தது.

இந்தக் கண்டுபிடிப்பின் 'டொராடோ' (Dorado) மற்றும் 'பாராகுடா' (Barracuda) கிணறுகளில் மேற்கொள்ளப்பட்ட சோதனைகளில், நாள் ஒன்றுக்கு 2.8 மில்லியன் கன அடி இயற்கை எரிவாயு பாய்ந்தது உறுதி செய்யப்பட்டது. இதன் மூலம் இலங்கை கடற்பகுதியில் பயன்படக்கூடிய ஹைட்ரோகார்பன் வளம் இருப்பது முதல்முறையாக அறிவியல்பூர்வமாக உறுதியானது.

இருப்பினும், அன்றைய காலகட்டத்தில் கண்டறியப்பட்ட குறைந்த அளவிலான எரிவாயுவை வணிக ரீதியாகத் தோண்டியெடுத்துச் சந்தைப்படுத்துவது லாபகரமானதாக இருக்காது எனக் கணக்கிடப்பட்டதாலும், உலக சந்தையில் மசகு எண்ணெய் விலை கடுமையாக வீழ்ச்சியடைந்த காரணத்தாலும், சுமார் 150 மில்லியன் டொலர் முதலீட்டிற்குப் பின்னர் 2015ஆம் ஆண்டில் கெய்ர்ன் நிறுவனம் தனது உரிமத்தைக் கைவிட்டு இலங்கையில் இருந்து வெளியேறியது.

மன்னார் படுகை குறித்து 2017ஆம் ஆண்டு புவியியல் ஆய்வாளர் ரத்னாயக்க மற்றும் குழுவினர் வெளியிட்ட சர்வதேச ஆய்வு அறிக்கையின்படி, 2011இல் வெட்டப்பட்ட 'டொராடோ' மற்றும் 'பாராகுடா' கிணறுகளின் கடலடி பாறை மாதிரிகளை ஆய்வு செய்ததில், அங்குள்ள பாறை அடுக்குகள் ஹைட்ரோகார்பன் மற்றும் மசகு எண்ணெயை உருவாக்கும் 'வெப்ப முதிர்ச்சி நிலையை' அடைந்துள்ளது அறிவியல்பூர்வமாக உறுதி செய்யப்பட்டுள்ளது.

குறிப்பாகப் பிந்தைய கிரெடேசியஸ் காலத்தைச் சேர்ந்த சேற்றுப் பாறைகளில் உயர்தர இயற்கை எரிவாயு மற்றும் எண்ணெய் உருவாகக்கூடிய கரிமப் பொருட்கள் பெருமளவில் காணப்படுவதாக அந்த ஆய்வு சுட்டிக்காட்டுகிறது.

வரலாற்றுத் தோல்விகளும் புதிய அரசின் முயற்சியும்

இலங்கையில் மன்னார் வளைகுடா கடல் பகுதியில் ஹைட்ரோகார்பன் மற்றும் எண்ணெய் வளங்கள் இருப்பதைக் கண்டறியும் முயற்சிகள் நீண்ட வரலாற்றுப் பின்னணியைக் கொண்டவை.

கடந்த 1967-68 காலப் பகுதியிலும், 1973-1974ஆம் ஆண்டுகளிலும் முதல்கட்ட ஆய்வுகள் மேற்கொள்ளப்பட்டன. அதைத் தொடர்ந்து 1975 முதல் 1985 வரையிலும், பின்னர் 2000ஆம் ஆண்டிலும், இறுதியாக 2007-2011 காலப் பகுதியிலும் பல்வேறு கட்டங்களில் ஆழ்கடல் அகழ்வாராய்ச்சிகள் முன்னெடுக்கப்பட்டன. இருப்பினும், முறையான கொள்கைத் திட்டங்கள் இல்லாததாலும், சர்வதேச சூழல்களாலும் இந்த ஆய்வுகள் தொடர்ந்து முன்னெடுக்கப்படாமல் கைவிடப்பட்டன.

கெய்ர்ன் நிறுவனம் வெளியேறிய பின்னரும்கூட, சர்வதேச நிறுவனங்களை ஈர்ப்பதற்கான ஏலச் சுற்றுகளும் அழைப்புகளும் விடுக்கப்பட்ட போதிலும், எந்தவொரு பன்னாட்டு நிறுவனமும் இலங்கையில் முதலீடு செய்ய முன்வரவில்லை என முன்னாள் எரிசக்தி அமைச்சர் சம்பிக்க ரணவக்க பிபிசி தமிழிடம் தெரிவித்தார்.

தமது அரசாங்கங்கள் ஆட்சியில் இருந்த காலத்திலும் இந்த ஆய்வுகளுக்கான முயற்சிகள் முன்னெடுக்கப்பட்ட போதிலும் எதுவும் வெற்றியளிக்கவில்லை என்றார் அவர்.

இந்த நிலையில்தான், தற்போதைய தேசிய மக்கள் சக்தி அரசாங்கம் இந்த விவகாரத்தில் மீண்டும் தீவிர கவனம் செலுத்தி, முறையான சர்வதேச பிரசாரங்கள் மூலம் முதலீடுகளை ஈர்க்கும் புதிய முயற்சியைக் கையிலெடுத்துள்ளது.

'ஏற்கெனவே தெரிந்த கதைதானா?' - எழும் சந்தேகங்கள்

கெய்ர்ன் நிறுவனம் வெளியேறிய பின்னர், மன்னார் படுகையின் அகழ்வாராய்ச்சிப் பணிகள் பல ஆண்டுகளாக முடங்கிக் கிடந்தன. தற்போதைய சர்வதேச ஏலச் சுற்று குறித்து எதிர்க்கட்சிகளும் துறைசார் வல்லுநர்களும் சில சந்தேகங்களை எழுப்புகின்றனர்.

முன்னாள் மின் கட்டமைப்பு மற்றும் எரிசக்தி அமைச்சரான உதய கம்மன்பில இதுகுறித்து பிபிசி தமிழிடம் பேசுகையில், "மன்னார் படுகையில் எரிவாயு இருப்பது ஏற்கெனவே உறுதி செய்யப்பட்ட ஒன்றுதான். ஆனால் அதை கடலடியில் இருந்து வெளியே எடுத்து, மின் உற்பத்திக்கோ அல்லது தொழிற்சாலைகளுக்கோ பயன்படுத்தத் தேவையான உள்கட்டமைப்பை உருவாக்குவதற்குப் பல பில்லியன் டொலர்கள் முதலீடு தேவைப்படும். தற்போதைய உலகளாவிய பசுமை ஆற்றல் மாற்றச் சூழலில், சர்வதேச நிறுவனங்கள் ஆழ்கடல் ஹைட்ரோகார்பன் திட்டங்களில் இவ்வளவு பெரிய முதலீட்டைச் செய்ய முன்வருமா என்பதே பிரதான கேள்வி," எனக் குறிப்பிட்டார்.

நிலக்கரிக்கு மாறாக எரிவாயுவைப் பயன்படுத்தி நாட்டின் வலுசக்தி திறன்களைப் பலப்படுத்த வேண்டும் என்ற இலக்கு தமக்கு இருந்ததாகவும், எனினும் அதைத் தொடர்ச்சியாக முன்னெடுக்க முடியாமல் போய்விட்டதாகவும் அவர் தெரிவித்தார்.

இலங்கை கடற்படையின் ஓய்வுபெற்ற சிரேஷ்ட அதிகாரியும் கடல்சார் வரைபடவியலாளருமான ரியர் அட்மிரல் வை. என். ஜெயரத்ன இதுகுறித்து பிபிசி தமிழிடம் பேசியபோது, "இலங்கையில் எண்ணெய் மற்றும் இயற்கை எரிவாயு வளம் இருப்பது 1960களில் இருந்தே அவதானிக்கப்பட்டு வரும் காரணி. எனினும் அப்போதிருந்தே பல்வேறு தரப்பினர் இதை ஆராய்ந்தும் அதில் உறுதியான நம்பிக்கை வைக்கவில்லை," என்றார்.

"ஆரம்பத்தில் சோவியத் ஒன்றியம் தீவிரமான ஆய்வுகளை முன்னெடுத்து நான்கு சோதனைக் கிணறுகளில் கனிமங்கள் இருக்கலாம் எனக் கண்டறிந்த பின்னர், இந்தியாவின் தலையீட்டில் இறுதியாக ஆய்வுகள் முன்னெடுக்கப்பட்டன. அது உறுதிப்பட்ட போதிலும், இந்த வளம் வர்த்தகரீதியாக எந்தளவுக்குக் கைகொடுக்கும் என்ற சந்தேகம் நிலவியதால் சாதகமான முடிவுகளை எடுக்க யாரும் முன்வரவில்லை. இப்போதும் அரசாங்கம் சர்வதேச ஏலச் சுற்றை அறிவித்துள்ள போதிலும், இதில் சாத்தியமான பதில் கிடைக்குமா என்பது சந்தேகமே. ஏனெனில் இதற்காக அதிக முதலீடு தேவைப்படுவதோடு, அது வர்த்தக நலன்களைப் பெற்றுக் கொடுக்குமா என்பதும் கேள்விக்குறியாகவே உள்ளது," எனத் தெரிவித்தார்.

அரசாங்கத்தின் அதிகாரபூர்வ நிலைப்பாடு

அரசாங்கத்தின் நிலைப்பாடு குறித்து பிபிசி தமிழிடம் பேசிய அமைச்சரவை பேச்சாளர் அமைச்சர் நளிந்த ஜயதிஸ்ஸ, "இலங்கையின் மன்னார் வளைகுடா பகுதியில் எண்ணெய் வளம் இருப்பது குறித்துத் தொடர்ந்து கவனம் செலுத்தப்பட்டு வருகிறது. சில சந்தர்ப்பங்களில் ஆய்வுகள் முன்னெடுக்கப்பட்ட போதிலும், உரிய முறையில் திட்டமிட்ட வேலைத் திட்டங்கள் முன்னெடுக்கப்பட்டிருக்கவில்லை," எனக் குறிப்பிட்டார்.

"ஆனால், எமது அரசாங்கம் இந்த விஷயத்தில் அதிக கவனம் செலுத்தி வருகிறது. இதன் முதல்கட்டமாக, இலங்கை பெட்ரோலிய கூட்டுத் தாபனம், இலங்கை பெட்ரோலிய அபிவிருத்தி அதிகார சபை ஆகியவற்றுடன் இணைந்து இந்த சர்வதேச ஏலச் சுற்றை நாம் அறிவித்துள்ளோம். அடுத்த ஆண்டு பிப்ரவரி முதலாம் வாரம் வரை இந்த சர்வதேச ஏலச் சுற்று திறந்திருக்கும். மேலும், சர்வதேச முதலீடுகளை ஈர்க்கும் வகையில் இந்த ஆண்டின் இறுதிக்குள் லண்டன், கோலாலம்பூர் ஆகிய நகரங்களில் பிரத்யேக முதலீட்டாளர் மாநாடுகளை நடத்துவதற்கும் திட்டமிடப்பட்டுள்ளது," எனத் தெரிவித்தார்.

மேலும், "ஆய்வுகளை மேற்கொள்ளும்போது மிகவும் கவனமாகவும், அப்பகுதியின் இயற்கைச் சூழல் எந்தவிதத்திலும் பாதிக்கப்படாத வகையிலும், குறிப்பாக மன்னார் பிரதேச மீனவர் சமூகத்தைப் பாதிக்காத வகையிலும் பணிகளை முன்னெடுக்க வேண்டுமென வலியுறுத்தியுள்ளோம். இயற்கைக்கு உகந்த தீர்மானங்களை எடுக்க வேண்டுமென்பதில் அரசாங்கம் உறுதியாக உள்ளது. யுத்தத்தால் பாதிக்கப்பட்ட பிரதேசங்களில் ஒன்றான மன்னார் மாவட்டத்தில் மீன்பிடியைத் தவிர வேறு முக்கிய வாழ்வாதாரம் இல்லை என்பதால், மீனவர்கள் விடயத்தில் கூடிய கவனம் எடுக்கப்படும்," என்றார்.

"எண்ணெய் ஆய்வுகளைத் தொடங்குவதற்கு முன்னர் இதற்கான வலுவான சட்டமொன்றை உருவாக்க வேண்டும், அதன் பின்னரே ஆய்வுக்கான அனுமதியை வழங்க வேண்டுமென்ற நிலைப்பாட்டில் உள்ளோம். நீதி அமைச்சுடன் இதுகுறித்து கலந்துரையாடி அரசாங்கம் சரியான முடிவுகளை எடுக்கும்," என்றும் அமைச்சர் நளிந்த ஜயதிஸ்ஸ கூறினார்.

இந்திய பெருங்கடலின் புதிய 'சதுரங்கம்'

இலங்கையின் இந்த ஆழ்கடல் ஏலச் சுற்று வெறும் பொருளாதார நடவடிக்கை மட்டுமல்ல, அது இந்திய பெருங்கடலில் நடக்கும் வல்லரசுகளுக்கு இடையிலான புவிசார் அரசியல் போட்டியுடன் நெருங்கிய தொடர்புடையது என வல்லுநர்கள் சுட்டிக்காட்டுகின்றனர்.

மன்னார் ஆய்வுத் தொகுதிகள் இந்திய எல்லைக்கு மிக அருகில் அமைந்துள்ளன. தங்கள் தெற்கு எல்லைப் பாதுகாப்பை உறுதி செய்யவும், இப்பகுதியில் அந்நிய நாடுகளின் ராணுவ பிரசன்னத்தை தவிர்க்கவும் இந்தியா தீவிர கவனம் செலுத்தும் என்பதைச் சுட்டிக்காட்டும் ரியர் அட்மிரல் ஜெயரத்ன, இந்த விவகாரத்தை இந்தியா கூர்ந்து நோக்குவதாகக் கூறினார்.

"இருப்பினும், இந்தியா நேரடியாக எண்ணெய் மற்றும் எரிவாயு அகழ்வு நடவடிக்கைகளில் ஈடுபடுமா என்பது சந்தேகமே. வேறு ஏதேனும் நிறுவனங்கள் இங்கு அகழ்வு மற்றும் சுத்திகரிப்பில் ஈடுபட்டால் அதை அவதானித்து மாற்று வழிகளில் சிந்திக்கவே இந்தியா முற்படும். நேரடியாக பாரிய முதலீடுகளைச் செய்ய வாய்ப்பில்லை. மேலும், தெற்கு சீனக் கடல் பகுதியிலும் வியட்நாமிலும் இந்தியா அதிக கவனம் செலுத்துவதால், இங்கு நேரடித் தலையீடு குறைவாகவே இருக்கும்," என்று அவர் சுட்டிக்காட்டினார்.

சீனாவின் ஆதிக்கம் குறித்துப் பேசிய அவர், "ஏற்கெனவே அம்பாந்தோட்டை துறைமுகம் மற்றும் கொழும்பு துறைமுக நகரத்தில் காலூன்றியுள்ள சீனா, வட பகுதியில் நேரடியாக நுழைவதற்கான வாய்ப்புகள் குறைவு. சீனாவுக்கு இங்குள்ள வளங்களை ஆக்கிரமிக்கும் நோக்கம் உடனடியாக இருக்கப் போவதில்லை. மேலும், சீனா இங்கு உள்நுழைந்தால் இந்தியாவின் தீவிர கண்காணிப்பும் அழுத்தமும் ஏற்படும் என்பதால், உடனடி சீனா ஆதிக்கம் செலுத்த முன்வராது," என்றார்.

அதேவேளையில், "இந்திய பெருங்கடல் கடல்சார் வணிகப் பாதையைக் கட்டுப்படுத்துவதில் ஆர்வமாக உள்ள அமெரிக்கா, ஆஸ்திரேலியா போன்ற நாடுகள் இந்த நடவடிக்கைகளைக் கண்காணிக்கும். எனினும், துல்லியமான ஆய்வுகளும் ஆதாரபூர்வமான தரவுகளும் இன்றி எந்தவொரு சர்வதேச நாடும் அல்லது நிறுவனமும் மிகப் பெரிய முதலீடுகளைச் செய்ய முன்வராது என்பதே தற்போதைய நிலை" என்றார்.

ஆபத்தில் மன்னார் பவளப் பாறைகளும் மீனவர் வாழ்வாதாரமும்

பொருளாதார மற்றும் அரசியல் கணக்குகளுக்கு அப்பால், மன்னார் வளைகுடா பகுதி உலகளவில் புகழ்பெற்ற 'கடல்சார் பல்லுயிர் மண்டலம்'.

ஆழ்கடலில் துளையிடுதல் மற்றும் ஏதேனும் விபத்து காரணமாக எண்ணெய்க் கசிவு ஏற்பட்டால், அது மன்னார் வளைகுடாவில் உள்ள அரிய வகை பவளப் பாறைகள், கடல் பசுக்கள் (Dugong), திமிங்கிலங்கள் மற்றும் பல்லாயிரக்கணக்கான கடல்வாழ் உயிரினங்களை அழித்துவிடும் என்று சூழலியல் ஆர்வலர்கள் எச்சரிக்கின்றனர்.

"காலநிலை மாற்றத்தால் மாறி வரும் பருவகால நிலைமைகளால் ஏற்கெனவே மன்னார் கடல் பகுதி பாதிக்கப்பட்டுள்ள நிலையில், இத்தகைய ஆழ்கடல் துளையிடல் நடவடிக்கைகள் மிகப் பெரிய பேரழிவை ஏற்படுத்தும்" என்று இலங்கை கடல்சார் உயிரியலாளரும், வட இந்திய பெருங்கடலின் நீலத் திமிங்கிலங்கள் குறித்த ஆய்வின் முன்னோடியுமான கலாநிதி ஆஷா டி வொஸ் பிபிசி தமிழிடம் தெரிவித்தார்.

மன்னார் மாவட்ட கடல் தொழிலாளர் கூட்டுறவுச் சங்கப் பிரதிநிதிகள் இதுகுறித்துப் பேசுகையில், "ஏற்கெனவே எல்லை தாண்டிய இழுவைப் படகுப் பிரச்னையால் எங்கள் வாழ்வாதாரம் கடுமையாகப் பாதிக்கப்பட்டுள்ளது. இப்போது ஆழ்கடல் துளையிடுதல் மற்றும் கப்பல் போக்குவரத்து அதிகரித்தால் எங்கள் மீன்பிடிப் பகுதிகள் மேலும் சுருங்கும். ஏதேனும் சுற்றுச்சூழல் பேரழிவு ஏற்பட்டால் எங்கள் எதிர்காலமே கேள்விக்குறியாகிவிடும்," எனத் தங்கள் அச்சத்தைப் பதிவு செய்தனர்.

கனவா? நிஜமா?

இலங்கை பெட்ரோலிய அபிவிருத்தி அதிகார சபையின் இயக்குநர் நாயகம் நீல் டி சில்வா, "முந்தைய ஆய்வுகளின் தரவுகள் மற்றும் நவீன தொழில்நுட்பத்தின் உதவியுடன் சர்வதேச முதலீட்டாளர்களை ஈர்ப்பதில் நாங்கள் நம்பிக்கையுடன் உள்ளோம். இது இலங்கையை ஆற்றல் சுயச்சார்பு கொண்ட நாடாக மாற்றும்," எனக் குறிப்பிடுகிறார்.

மன்னார் படுகையின் 9 டிரில்லியன் கன அடி இயற்கை எரிவாயு என்பது இலங்கையின் பொருளாதாரத்தை மீட்டெடுக்கும் ஆற்றல் கொண்ட ஒரு வளமான மூலதனம்.

இருப்பினும், சர்வதேச முதலீடுகளை ஈர்ப்பதில் உள்ள சவால்கள், வல்லரசுகளின் புவிசார் அரசியல் போட்டி, சுற்றுச்சூழல் பாதுகாப்பை உறுதி செய்தல் ஆகிய தடைகளைத் தாண்டி, இலங்கை அரசு இந்த இயற்கை வளத்தை எவ்வாறு வெற்றிகரமாகப் பயன்படுத்தப் போகிறது என்பதில்தான் இந்த முயற்சியின் எதிர்காலம் தங்கியுள்ளது.

- இது பிபிசிக்காக கலெக்டிவ் நியூஸ்ரூம் வெளியீடு