ஃப்ளைதுபை விமானத்திற்குள் இந்திய விமானியை தாக்கிய துணை விமானி யார்? பின்னணி பற்றி கசிந்த தகவல்கள்

இஸ்ரேல் பிரதமர் பெஞ்சமின் நெதன்யாகுவின் கூற்றுப்படி, ஃப்ளைதுபை 737 விமானத்தை விபத்துக்குள்ளாக்க முயன்ற விமானி ஓமன் நாட்டைச் சேர்ந்தவர்.

அந்த விமானத்தில் 174 பயணிகள் இருந்தனர். அவர்களில் பெரும்பாலானோர் இஸ்ரேலியர்கள்.

கடுமையான பாதுகாப்புச் சோதனை நடைமுறைகள் இருந்தபோதிலும், அவர் விமானத்தை இயக்குவதற்கான அனுமதியை எவ்வாறு பெற்றார் என்ற கேள்வி இதனால் எழுந்துள்ளது.

ஓமனுக்கும் இஸ்ரேலுக்கும் இடையே தூதரக உறவுகள் இல்லாதபோதிலும், துணை விமானி துபையிலிருந்து டெல் அவிவ் செல்லும் விமானத்தில் எப்படி ஏறினார் என்பதை விளக்குமாறு விமான நிறுவனம் மற்றும் பாதுகாப்பு முகமைகள் மீது அழுத்தம் ஏற்படக் கூடும்.

இரு நாடுகளின் குடிமக்களும் ஒருவர் மற்றொருவரின் நாட்டுக்குச் செல்வதற்கும் கட்டுப்பாடுகள் உள்ளன.

வியாழக்கிழமை ஃபாக்ஸ் நியூஸுக்கு அளித்த பேட்டியில் நெதன்யாகு இந்தத் தகவலைத் தெரிவித்தார்.

சம்பவம் நடந்த மறுநாள் இந்த நேர்காணல் நடைபெற்றது. தாக்குதல் நடத்தியவர் தீவிர இஸ்லாமியக் கொள்கையால் ஈர்க்கப்பட்டவர் என்று நெதன்யாகு கூறினார். அவருக்கு இரானுடன் ஏதேனும் தொடர்பு இருந்ததா என்பதை இப்போது கூறுவது மிக முன்கூட்டியதாகும் என்றும் அவர் எச்சரித்தார்.

"தூதரக உறவுகள் இல்லாத நாடுகளைச் சேர்ந்த விமானிகளுக்கு எங்களிடம் சில கட்டுப்பாடுகள் உள்ளன. அவரால் இந்த நடைமுறைகளை கடந்து செல்ல முடிந்திருக்கிறது. இங்கு ஒரு பாதுகாப்புக் குறைபாடு உள்ளது. விமானிகளை முன்கூட்டியே முழுமையாகச் சரிபார்க்கும் வகையில் ஒரு வழியைக் கண்டறிய வேண்டும்" என்று நெதன்யாகு அந்தப் பேட்டியில் கூறினார்.

அந்த விமானிக்கு இரானுடன் ஏதேனும் தொடர்பு இருந்ததா என்பது குறித்து அமெரிக்கா விசாரித்து வருவதாக அதிபர் டொனால்ட் டிரம்ப் தெரிவித்தார்.

"நாங்கள் தற்போது அது தொடர்பாக விசாரித்து வருகிறோம். நான் கேள்விப்பட்டவரையில் அதற்கான பதில் ஆம் என்பதாக இருக்கிறது. ஆனால், நாங்கள் தற்போது அது தொடர்பாகப் பணியாற்றி வருகிறோம்" என்று வியாழக்கிழமை வெள்ளை மாளிகையில் செய்தியாளர்களிடம் டிரம்ப் கூறினார்.

விமானி எந்த நாட்டைச் சேர்ந்தவர் அல்லது அவரது அடையாளம் குறித்த தகவலை விமான நிறுவனமோ, ஐக்கிய அரபு எமிரேட்ஸ் அரசோ இதுவரை அறிவிக்கவில்லை. தாக்குதலுக்கு உள்ளாகி படுகாயமடைந்த இரண்டாவது விமானி இந்தியர் என்று நெதன்யாகு முன்னதாக தெரிவித்திருந்தார்.

இது குறித்து ஓமன் அரசும் இதுவரை எந்தக் கருத்தையும் தெரிவிக்கவில்லை.

சௌதி அரேபியா என்ன கூறியது?

சௌதி அரேபியாவின் உள்துறை அமைச்சகம் வியாழக்கிழமை வெளியிட்ட அறிக்கையில், ஓமன் நாட்டைச் சேர்ந்தவரும், காயமடைந்த விமானியுமான கேப்டன் ஸ்மித் மச்சார் ஐக்கிய அரபு எமிரேட்ஸுக்கு அனுப்பப்பட்டுள்ளதாகத் தெரிவித்துள்ளது.

சௌதி அரேபிய உள்துறை அமைச்சக அதிகாரி ஒருவர் கூறுகையில், தபூக்கில் விமானம் தரையிறங்கிய பின்னர் இருவரும் மருத்துவமனையில் அனுமதிக்கப்பட்டனர்.

மருத்துவர்கள் அவர்கள் பயணம் செய்யத் தகுதியானவர்கள் என்று தெரிவித்ததைத் தொடர்ந்து, எமிரேட்ஸைச் சேர்ந்த பாதுகாப்புக் குழுவினருடன் அவர்கள் ஐக்கிய அரபு எமிரேட்ஸுக்கு விமானம் மூலம் அழைத்துச் செல்லப்பட்டனர்.

துபையில் இருந்து டெல் அவிவ் சென்ற ஃப்ளைதுபை விமானம் திசை திருப்பப்பட்ட சம்பவம் தொடர்பான ஆரம்பகட்ட விசாரணையில், துணை விமானி, விமானியைத் தாக்கியதாகத் தெரியவந்துள்ளதாக சௌதி அரேபிய உள்துறை அமைச்சகம் வியாழக்கிழமை தெரிவித்தது.

செப்டம்பர் 30 புதன்கிழமை உள்ளூர் நேரப்படி காலை 9:45 மணிக்கு அந்த விமானம் சௌதி அரேபியாவின் தபூக் விமான நிலையத்தில் தரையிறங்கியதாக அமைச்சகம் தெரிவித்துள்ளது.

சௌதி உள்துறை அமைச்சகத்தின் அதிகாரப்பூர்வ வட்டாரம் கூறுகையில், ஐக்கிய அரபு எமிரேட்ஸின் பாதுகாப்புக் குழுவுடன் இணைந்து சௌதி அதிகாரிகள் நடத்திய முதற்கட்ட விசாரணையில், விமானத்துக்குள் தகராறு ஏற்பட்டதும், அதில் துணை விமானி கேப்டனைத் தாக்கியதில் இருவரும் காயமடைந்ததும் தெரியவந்துள்ளது.

"சௌதி அரேபியாவுடன் தொடர்புடைய அதிகாரிகள் மற்றும் ஐக்கிய அரபு எமிரேட்ஸின் பாதுகாப்புக் குழுவினர் பங்கேற்று நடத்திய ஆரம்பகட்ட விசாரணையில், விமானத்தின் துணை விமானி, கேப்டனைத் தாக்கியது தெரியவந்துள்ளது" என்று அமைச்சகம் தெரிவித்தது.

இந்தச் சம்பவத்துக்கு ஏதேனும் பயங்கரவாத நடவடிக்கை அல்லது நோக்கம் காரணமாக இருந்ததா, அல்லது முன்கூட்டியே திட்டமிடப்பட்டதா அல்லது யாரேனும் அறிவுறுத்தியதன் பேரில் நடந்ததா என்பது குறித்து ஐக்கிய அரபு எமிரேட்ஸ் அதிகாரிகள் விசாரணை நடத்தி வருவதாக அந்த நாட்டின் அட்டர்னி ஜெனரல் தெரிவித்துள்ளார்.

ஃப்ளைதுபை எப்ஃஇசட்1073 விமானத்தை விபத்துக்குள்ளாக்க முயன்ற ஓமன் நாட்டைச் சேர்ந்த துணை விமானியை கட்டுப்படுத்தி, அவரை வீழ்த்தியதாகக் கூறப்படும் பயணிகளில் இஸ்ரேலைச் சேர்ந்த யானிவ் ஹயூனும் ஒருவர்.

தாக்குதல் நடத்தியவர் கட்டுப்படுத்தப்பட்டு, கட்டிவைக்கப்பட்ட பின்னர், தனது முயற்சி தோல்வியடைந்ததை உணர்ந்ததும், "என்னைக் கொன்றுவிடுங்கள்" என்று கூறியதாக ஹயூன் தெரிவித்தார்.

விமானத்தில் இருந்தவர்கள் என்ன சொன்னார்கள்?

பல இஸ்ரேலிய பயணிகள் பிரதமர் பெஞ்சமின் நெதன்யாகுவைச் சந்தித்து, விமானத்தை எவ்வாறு காப்பாற்றினார்கள் என்பது குறித்து அவரிடம் தெரிவித்தனர்.

அரசின் செய்தி அலுவலகம் வெளியிட்ட காணொளிக் காட்சியில், காயமடைந்த கேப்டனுக்கு எவ்வாறு சிகிச்சையளித்தார் என்பதை மருத்துவர் ஷோட்டா முசாயேவ் விவரித்தார்.

ஆரம்பத்தில், துணை விமானி கட்டுப்பாடின்றி செயல்படுவதைத் தடுப்பதற்காக, இஸ்ரேலிய பயணிகள் ஹெட்போன் வயரைப் பயன்படுத்தி அவரைக் கட்டிப்போட்டதாக அவர் கூறினார்.

"அவர் ஆங்கிலத்தில், 'என்னைக் கொல்லுங்கள், என்னைக் கொல்லுங்கள்' என்று கத்தினார்" என்று ஹயூன் இடைமறித்துக் கூறினார்.

"அவரது முயற்சி தோல்வியடைந்துவிட்டது என்பதையும், இப்போது அவர் இறக்க விரும்புகிறார் என்பதையும் அது உணர்த்தியது" என்று ஹயூன் கூறினார்.

ஓமன் நாட்டைச் சேர்ந்த துணை விமானி தீவிர இஸ்லாமியக் கொள்கையால் ஈர்க்கப்பட்டிருந்ததாகவும், தாக்குதல் நடத்தியவர் "என்னைக் கொல்லுங்கள், என்னைக் கொல்லுங்கள்" என்று கூறியதாகவும் குறிப்பிட்டு, பிரதமர் நெதன்யாகு இதற்கு முன்பு ஃபாக்ஸ் நியூஸுக்கு அளித்த பேட்டியில் இந்தச் சம்பவம் குறித்து தெரிவித்திருந்தார்.

இவ்வளவு பெரிய பாதுகாப்புக் குறைபாடு எப்படி ஏற்பட்டது?

"தனது கேப்டனைத் தாக்கி, விமானத்தை மிக வேகமாக கீழ்நோக்கி வரச் செய்த ஃப்ளைதுபை விமானி, உலகின் மிகக் கடுமையான விமானப் பாதுகாப்பு அமைப்புகளில் ஒன்றை மீறியுள்ளார். ஆனால், அது எப்படி நடந்தது?" என அமெரிக்க ஊடகமான வால் ஸ்ட்ரீட் ஜர்னல் செய்தி வெளியிட்டது.

ஐக்கிய அரபு எமிரேட்ஸையும் இஸ்ரேலையும் இணைக்கும் இந்த விமானப் பாதை, உலகின் மிகவும் பதற்றமான விமானப் பாதைகளில் ஒன்றாகும்.

மத்திய கிழக்கு பகுதியில் பயணிகள் விமானங்கள் கடத்தப்பட்டது, அவற்றின் மீது தாக்குதல்கள் நடத்தப்பட்டது போன்ற நீண்ட வரலாறு உள்ளது.

இதுபோன்ற தாக்குதல்களைத் தடுப்பதற்காக, இரு நாடுகளும் உலகின் மிக நவீன கண்காணிப்பு தொழில்நுட்பங்களையும் வலுவான உளவுத்துறை வலையமைப்புகளையும் கொண்டுள்ளன.

2001ஆம் ஆண்டு செப்டம்பர் மாதம் 11-ஆம் தேதி அமெரிக்காவில் நடைபெற்ற பயங்கரவாதத் தாக்குதல்கள் மற்றும் பிரெஞ்சு ஆல்ப்ஸ் பகுதியில் ஜெர்மன்விங்ஸ் விமானம் வேண்டுமென்றே விபத்துக்குள்ளாக்கப்பட்ட சம்பவம் ஆகியவற்றை தொடர்ந்து, விமானப் போக்குவரத்து விதிமுறைகள் மீண்டும் மீண்டும் கடுமையாக்கப்பட்டுள்ளன.

"இதையெல்லாம் மீறி, புதன்கிழமை ஒரு விமானி தனது நோக்கத்தை மறைத்து, கத்தியை எடுத்து, சுமார் 170 பேரை ஏற்றிச் சென்ற விமானத்தை மிகக் கடுமையான சரிவில் கீழே இறங்கச் செய்துள்ளார். இதனால் விமானம் நடுவானிலேயே உடைந்து போகும் நிலையை நெருங்கியது" என்று அந்தப் பத்திரிகை தெரிவித்துள்ளது.

"இது நூறு சதவீதம் மிகப்பெரிய பாதுகாப்புத் தோல்வி. ஆனால், இந்தத் தோல்வி எந்த அளவுக்கு பரவலானது, எவ்வளவு தீவிரமானது என்பதுதான் கேள்வி" என்று இஸ்ரேலின் எதிர்காலம் மற்றும் மத்திய கிழக்கில் அதன் நிலைப்பாடு குறித்து புத்தகம் எழுதியுள்ள பாதுகாப்பு மற்றும் உலக அரசியல் ஆய்வாளரான மைக்கேல் ஹோரோவிட்ஸ், வால் ஸ்ட்ரீட் ஜர்னலிடம் தெரிவித்தார்.

இந்தச் சம்பவம் உலக நாடுகளுடனான இஸ்ரேலின் விமானப் போக்குவரத்து தொடர்பிலும், ஐக்கிய அரபு எமிரேட்ஸின் விமானப் போக்குவரத்து மற்றும் சுற்றுலாத் துறை வளர்ச்சி வாய்ப்புகளிலும் தாக்கத்தை ஏற்படுத்தக்கூடும்.

விசாரணை தொடரும் நிலையில், ஃப்ளைதுபை நிறுவனம் இஸ்ரேலுக்கான தனது விமான சேவைகளைத் தற்காலிகமாக நிறுத்தியுள்ளது. இரான் போருடன் தொடர்புடைய ஆபத்துகள் காரணமாக, பல சர்வதேச விமான நிறுவனங்கள் ஏற்கெனவே ஐக்கிய அரபு எமிரேட்ஸ் மற்றும் இஸ்ரேலுக்கான விமான சேவைகளை பல மாதங்களாக நிறுத்தியிருந்தன.

விமானப் பாதுகாப்பு நிறுவனமான ஆஸ்ப்ரே ஃப்ளைட் சொல்யூஷன்ஸ் வெளியிட்ட அறிக்கையில், இந்தச் சம்பவம் பயங்கரவாதத் தாக்குதல் என்பது நிரூபிக்கப்பட்டால், "சமீப ஆண்டுகளில் பயணிகள் விமானத்தை குறிவைத்து நடத்தப்பட்ட மிக முக்கியமான பயங்கரவாத சதியாக இது இருக்கும்" என்று தெரிவித்துள்ளது.

2001ஆம் ஆண்டு செப்டம்பர் மாதம் 11-ஆம் தேதி நடைபெற்ற தாக்குதல்களில், விமானக் கடத்தல்காரர்கள் விமானங்களைக் கட்டுப்பாட்டுக்குள் கொண்டு வந்து, உலக வர்த்தக மையம் மற்றும் பென்டகன் மீது அவற்றை மோதச் செய்தனர். இந்தத் தாக்குதல்களுக்குப் பிறகு, சர்வதேச விமானப் பயண விதிமுறைகளில் மிகப்பெரிய மாற்றங்கள் செய்யப்பட்டன.

விமானத்துக்குள் ஊடுருவ முயற்சிப்பவர்களைத் தடுக்க வலுவான காக்பிட் கதவுகள் அறிமுகப்படுத்தப்பட்டது அதில் முக்கியமான மாற்றமாகும்.

ஆனால், இந்த விதிமுறைகள் பெரும்பாலும் பயணிகளால் ஏற்படக்கூடிய அச்சுறுத்தல்களில் இருந்து விமானங்களைப் பாதுகாப்பதையே மையமாகக் கொண்டிருந்தன. விமானத்துக்குள்ளிருந்தே அச்சுறுத்தலை ஏற்படுத்தக்கூடிய விமானிகள் அல்லது பணியாளர்களால் ஏற்படக்கூடிய ஆபத்துகள் இதில் முதன்மையாகக் கருதப்படவில்லை.

2015-ம் ஆண்டு ஜெர்மன்விங்ஸ் விமான விபத்துக்குப் பிறகு, சில விமானப் போக்குவரத்து ஒழுங்குமுறை அமைப்புகள், காக்பிட்டில் எப்போதும் இரண்டு விமானப் பணியாளர்கள் இருக்க வேண்டும் என்று கட்டாயப்படுத்தின.

அந்த விபத்தில், காக்பிட்டில் இருந்த விமானி ஒருவர், விமானத்தின் கட்டுப்பாட்டை எடுத்துக்கொண்டு, அதை பிரெஞ்சு ஆல்ப்ஸ் மலைப்பகுதியில் வேண்டுமென்றே மோதச் செய்தார். விமானத்தில் இருந்த அனைவரும் உயிரிழந்தனர்.

விமானத்தை விபத்துக்குள்ளாக்கிய விமானி, தற்கொலை எண்ணங்களுக்காக உளவியல் சிகிச்சை பெற்று வந்தார். இதைத் தொடர்ந்து, விமானத் துறை மனநல ஆபத்துகளை எதிர்கொள்வதற்கான வழிகளைத் தொடர்ந்து ஆராய்ந்து வருகிறது.

விமானிகள் பொதுவாக ஆண்டுக்கு குறைந்தது ஒருமுறை மருத்துவப் பரிசோதனைக்கு உட்படுத்தப்பட வேண்டும்.

ஆனால், சில மனநலக் குறைபாடுகள் கண்டறியப்பட்டாலோ அல்லது குறிப்பிட்ட மருந்துகளை எடுத்துக்கொண்டாலோ, அவர்களின் விமானி உரிமம் இடைநிறுத்தப்படலாம்.

இதனால், விமானிகள் தங்களது அறிகுறிகளை மறைத்து, மருத்துவ உதவியை நாடுவதைத் தவிர்க்கக்கூடும் என்ற கவலை எழுந்துள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு