புதன் கோளில் 430 டிகிரி வெப்பத்திலும் பனிக்கட்டி இருக்குமா? நீண்ட பயணத்தில் பெபிகொலம்போ கண்டறியப் போவது என்ன?

சூரியக் குடும்பம், புதன், கோள்கள், விண்வெளி, பூமி
    • எழுதியவர், ஃபெர்னாண்டோ டுவார்டே
    • பதவி, பிபிசி உலக சேவை
  • பிரசுரிக்கப்பட்டது
  • வாசிக்கும் நேரம்: 5 நிமிடங்கள்

சூரிய குடும்பத்தின் உள் பகுதியில் எட்டு ஆண்டுகள் பயணம் செய்த பிறகு, பெபிகொலம்போ என்ற விண்கலம் புதன் கோளை (மெர்க்குரி) நெருங்கி வருகிறது. இதுவரை நாம் முழுமையாகப் புரிந்துகொள்ளாத கோள்களில் ஒன்றான புதனை பற்றி ஆய்வு செய்வதே இந்த விண்கலத்தின் நோக்கம்.

சூரிய குடும்பத்தின் மிகச் சிறிய கோளான புதன் குறித்து நன்கு புரிந்துகொள்வதற்காக இதற்கு முன்பும் விஞ்ஞானிகள் அதை நெருங்கிச் செல்ல முயன்றுள்ளனர். நிலவைவிடச் சற்றே பெரியதாக இருக்கும் இந்தக் கோளை அடைவது அவ்வளவு எளிதானதாக இருக்கவில்லை.

எனவே, நவம்பர் மாத இறுதியில் பெபிகொலம்போ புதனை அடையவிருப்பது மிகுந்த எதிர்பார்ப்பை ஏற்படுத்தியுள்ளது.

புதனின் மேற்பரப்பில் பகல் நேரத்தில் பல நூறு டிகிரி செல்சியஸ் வெப்பம் நிலவும் நிலையில், அதன் சில பள்ளங்களில் நீர் பனிக்கட்டியாக இருப்பதாகக் கூறப்படுவது உள்ளிட்ட பல மர்மங்களுக்கு இந்த ஆய்வு விடையளிக்கும் என எதிர்பார்க்கப்படுகிறது.

ஐரோப்பிய விண்வெளி ஆய்வு நிறுவனம், ஜப்பான் விண்வெளி ஆய்வு நிறுவனம் ஆகியவை இணைந்து இந்தத் திட்டத்தைச் செயல்படுத்துகின்றன.

இது "மிகவும் லட்சியமான திட்டம்" என்றும், "இதுவரை மனிதகுலம் கண்டிராத புதன் கோளின் காட்சிகளை வழங்கும்" என்றும் பெபிகொலம்போ திட்டத்தின் மேலாளரான சான்டா மார்டினெஸ் இந்த ஆண்டின் தொடக்கத்தில் தெரிவித்திருந்தார்.

"சூரிய குடும்பத்தைப் பற்றிய நமது புரிதலில் இது ஒரு புதிய அத்தியாயத்தைத் தொடங்கும்" என்றும் அவர் குறிப்பிட்டார்.

சூரியக் குடும்பம், புதன், கோள்கள், விண்வெளி, பூமி
படக்குறிப்பு, பெபிகொலம்போ விண்கலம் 2018ஆம் ஆண்டு பிரெஞ்சு கயானாவில் இருந்து ஏரியான் 5 ராக்கெட் மூலம் விண்ணில் ஏவப்பட்டது.

அருகில் இருந்தும் அடைவது கடினம்

இதுவரை இரண்டு விண்வெளித் திட்டங்கள் மட்டுமே புதன் கோளை நெருங்கிச் சென்று ஆய்வு செய்துள்ளன.

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

நாசாவின் மரைனர் 10 விண்கலம் 1974, 1975 ஆகிய ஆண்டுகளில் மூன்று முறை புதன் கோளைக் கடந்து சென்றது. அதன் பிறகு, 2011ஆம் ஆண்டில் நாசாவின் மெசஞ்சர் விண்கலம் புதனின் சுற்றுப்பாதையை அடைந்து நான்கு ஆண்டுகள் ஆய்வு மேற்கொண்டது.

இதனுடன் ஒப்பிடும்போது, செவ்வாய் கோளை ஆய்வு செய்வதற்காக 50க்கும் மேற்பட்ட விண்வெளித் திட்டங்கள் முன்னெடுக்கப்பட்டுள்ளன. இந்த வேறுபாட்டுக்கு என்ன காரணம்?

"செவ்வாய் கோளில் ஒரு காலத்தில் உயிர்கள் வாழ்ந்திருக்கலாம் அல்லது இப்போதும் உயிர்கள் இருக்கலாம் என்ற சாத்தியக்கூறு இருப்பதால், பொது மக்களும் அரசாங்க பிரதிநிதிகளும் செவ்வாய் போன்ற கோள்கள் மீது அதிக ஆர்வம் காட்டுகின்றனர்," என ஜெர்மன் விண்வெளி மையத்தின் கோளியல் இயற்பியல் பிரிவின் தலைவரான பேராசிரியர் டோரிஸ் ப்ராயர் பிபிசியிடம் கூறினார்.

இதற்கு மற்றொரு காரணமும் இருக்கிறது. புதன் கோளை அடைவது மிகவும் சிக்கலானது. வியாழன், சனி ஆகிய கோள்களைவிட பூமிக்கு அருகில் புதன் இருந்தாலும், அதைச் சென்றடைவது கடினம். இதற்குக் காரணம் அது சூரியனுக்கு மிக அருகில் இருப்பதுதான். அந்தப் பகுதியில் சூரியனின் ஈர்ப்பு விசை மிகவும் வலுவாக இருப்பதால், புதனின் சுற்றுப்பாதைக்குள் நுழைய விரும்பும் விண்கலம் தொடர்ந்து தனது வேகத்தைக் குறைக்க வேண்டியிருக்கும். இல்லையெனில், அது சூரியனை நோக்கி நேரடியாக இழுக்கப்பட்டுவிடும்.

இதற்காக, பெபிகொலம்போ விண்கலம் 2018ஆம் ஆண்டு ஏவப்பட்டது. அதன் பயணப் பாதை பல வளைவுகளையும் திருப்பங்களையும் கொண்டிருந்தது.

எட்டு ஆண்டுகளில் பூமி, வெள்ளி மற்றும் புதன் கோள்களை மொத்தம் ஒன்பது முறை கடந்து செல்லும் வகையில் அதன் பயணப் பாதை அமைக்கப்பட்டது. அந்தக் கோள்களின் ஈர்ப்பு விசையைப் பயன்படுத்தி விண்கலத்தின் வேகத்தைக் குறைப்பதே இதன் நோக்கம். இதன் மூலம் தனது எரிபொருளை அதிகம் செலவிடுவதைத் தவிர்க்க முடியும்.

இந்தத் திட்டத்திற்கு இத்தாலிய பொறியாளரும் கணிதவியலாளருமான கியூசெப்பே "பெபி" கொலம்போவின் பெயர் சூட்டப்பட்டிருப்பது தற்செயலானதல்ல. 1970களில் மரைனர் 10 விண்கலம் புதன் கோளை மூன்று முறை கடந்து செல்ல உதவிய வெள்ளி கோளின் ஈர்ப்பு விசைப் பயணத்தை முதன்முதலில் பரிந்துரைத்தவர் அவர்தான்.

சூரியக் குடும்பம், புதன், கோள்கள், விண்வெளி, பூமி
படக்குறிப்பு, இந்தப் புகைப்படத்தில் கரும்புள்ளியாகக் காணப்படும் புதன் கோள், சூரியனுக்கு மிக அருகில் உள்ள கோளாகும்.

புதனின் மர்மங்கள்

மரைனர் 10 விண்கலம் புதனை நெருங்கிச் சென்றபோதே, அந்தச் சிறிய கோள் பல ஆச்சரியங்களைத் தன்னுள் கொண்டிருப்பது தெரிய வந்தது.

"சூரியனுக்கு அருகில் மிதக்கும் ஒரு சிறிய பாறையைப் போலத்தான் புதன் இருக்கும் என்றும், நிலவியல் செயல்பாடுகளைப் பொறுத்தவரை அது கிட்டத்தட்ட இறந்துபோன கோளாக இருக்கும் என்றும் முன்பு நினைத்தோம்," என்கிறார் பெபிகொலம்போ திட்டத்தின் அறிவியல் செயல்பாட்டு விஞ்ஞானியான முனைவர் மிரேயா லியோன் டசி.

"ஆனால், ஒவ்வொரு விண்வெளித் திட்டமும் புதனை பற்றிய நமது புரிதலை மட்டுமின்றி, ஒட்டுமொத்த சூரிய குடும்பத்தைப் பற்றிய நமது புரிதலையும் மாற்றியமைத்துள்ளது."

புதனின் சில பள்ளங்களில் நீர் பனிக்கட்டியாக மறைந்திருக்கலாம் என்பதற்கான ஆதாரங்களை மெசஞ்சர் விண்கலம் கண்டறிந்தது. நாசாவின் தகவல்படி, புதனின் மேற்பரப்பில் வெப்பநிலை சுமார் 430 டிகிரி செல்சியஸ் வரை உயரக்கூடும். இத்தகைய சூழலில் பனிக்கட்டி இருப்பதற்கான சாத்தியம் கண்டறியப்பட்டது ஆச்சரியமளிக்கும் விஷயம்.

புதன் கோள் எங்கு, எவ்வாறு உருவானது என்பதும் மற்றொரு முக்கியமான மர்மமாக உள்ளது. அதன் மேற்பரப்பில் கண்டறியப்பட்ட சில வேதிப்பொருட்கள், அது தற்போது சூரியனுக்கு இருக்கும் தொலைவில் உருவான கோள் என்பதற்குப் பொருந்தவில்லை என மெசஞ்சர் ஆய்வில் தெரிய வந்தது.

இதனால், புதன் முதலில் தற்போதுள்ள இடத்தைவிட வெகு தொலைவில், ஒருவேளை செவ்வாய் கோள் இருக்கும் பகுதியில் உருவாகியிருக்கலாம் என்று சில விஞ்ஞானிகள் கருதுகின்றனர். பல பில்லியன் ஆண்டுகளுக்கு முன்பு ஒரு பெரிய விண்பொருளுடன் மோதிய பிறகு, அது தற்போதைய சுற்றுப்பாதைக்கு நகர்ந்திருக்கலாம் என்றும் அவர்கள் சந்தேகிக்கின்றனர். அந்த மோதலில் இளம் பூமியுடன்கூட புதன் மோதியிருக்கலாம் என்பது ஒரு சாத்தியக்கூறு.

இந்த மோதலால் புதனின் வெளிப்புற மேலோட்டுப் பகுதி சிதறியிருக்கலாம். அதன் உட்புறத்தில் ஒப்பீட்டளவில் மிகப்பெரிய மையப் பகுதி இருப்பதற்கும் இதுவொரு விளக்கமாக இருக்கலாம்.

புதன் கோளில் 430 டிகிரி வெப்பத்திலும் பனிக்கட்டி இருக்குமா? நீண்ட பயணத்தில் பெபிகொலம்போ கண்டறியப் போவது என்ன?

மேலும், பூமியைத் தவிர சூரிய குடும்பத்தின் உள் பகுதியில் காந்தப்புலத்தைக் கொண்டுள்ள ஒரே கோள் புதன் மட்டுமே. கோளின் அளவைக் கணக்கில் கொண்டால், அதற்கு காந்தப்புலம் இருக்கக்கூடாது என்பதே கோட்பாட்டுரீதியான எதிர்பார்ப்பு.

புதன் கோள் படிப்படியாகச் சுருங்கி வருவது குறித்தும் விஞ்ஞானிகள் கூடுதல் தகவல்களை அறிய விரும்புகின்றனர்.

இந்த ஆண்டு வெளியான ஓர் ஆய்வின்படி, கடந்த 450 கோடி ஆண்டுகளாக புதன் குளிர்ச்சியடைந்து வருவதால் அதன் அகலம் சுமார் 23 கிலோமீட்டர் குறைந்திருக்கலாம். இது முந்தைய மதிப்பீடுகளைவிட அதிகம்.

"புதன் கோளைப் பற்றி இன்னும் விடை காணப்படாத பல கேள்விகள் உள்ளன," என்கிறார் பெபிகொலம்போ திட்டத்தில் பணியாற்றும் இத்தாலிய தேசிய வானியற்பியல் நிறுவனத்தின் (ஐஎன்ஏஎஃப்) கோளியல் நிலவியலாளர் வாலென்டினா கலூஸ்ஸி.

மேலும், "தங்களது விண்வெளித் திட்டம் அவற்றுக்கான பதில்களை வழங்கும்" எனத் தான் நம்புவதாகவும் அவர் கூறினார்.

இரண்டு ஆய்வுக் கலன்கள்

பெபிகொலம்போ விண்கலம் உண்மையில் மூன்று முக்கியப் பகுதிகளைக் கொண்டது. மெர்க்குரி டிரான்ஸ்ஃபர் மாட்யூல் (எம்டிஎம்) என்பது உந்துவிசை வழங்கும் கலனாகும். பூமியிலிருந்து புதன் கோளை நோக்கிய 990 கோடி கிலோமீட்டர் பயணத்தில் மற்ற இரண்டு ஆய்வுக் கலன்களையும் இது சுமந்து சென்றது.

தனது பணியை நிறைவு செய்ததைத் தொடர்ந்து, செப்டம்பர் மாத தொடக்கத்தில் எம்டிஎம் மற்ற பகுதிகளில் இருந்து பிரிந்தது.

சூரியக் குடும்பம், புதன், கோள்கள், விண்வெளி, பூமி
படக்குறிப்பு, ஒரே நேரத்தில் இரண்டு ஆய்வுக் கலன்களைப் பயன்படுத்தி புதன் கோளை ஆராயும் முதல் விண்வெளித் திட்டம் பெபிகொலம்போ ஆகும்.

மீதமுள்ள இரண்டு ஆய்வுக் கலன்களான ஐரோப்பிய விண்வெளி ஆய்வு நிறுவனத்தின் மெர்க்குரி பிளானட்டரி ஆர்பிட்டர், ஜப்பான் விண்வெளி ஆய்வு நிறுவனத்தின் மெர்க்குரி மேக்னட்டோஸ்பெரிக் ஆர்பிட்டர் ஆகியவை நவம்பர் 21ஆம் தேதி புதனின் சுற்றுப்பாதைக்குள் நுழையும் என எதிர்பார்க்கப்படுகிறது.

அதன் பிறகு, இரண்டரை வாரங்கள் கழித்து அவை ஒன்றிலிருந்து மற்றொன்று பிரியும். ஐரோப்பிய ஆய்வுக் கலன் புதனின் மேற்பரப்புக்கு அருகில் சுற்றி வரும். அதன் மூலம் மேற்பரப்பில் உள்ள கனிமங்களை ஆய்வு செய்வது, நிழல் படர்ந்த பள்ளங்களில் பனிக்கட்டி இருக்கிறதா எனத் தேடுவது, கோளின் உட்புற மையப்பகுதியை ஆராய்வது உள்ளிட்ட பணிகள் மேற்கொள்ளப்படும்.

ஜப்பானிய ஆய்வுக் கலன் புதனைவிட உயரமான சுற்றுப்பாதையில் பயணிக்கும். புதனின் காந்தப்புலம், மின்னூட்டம் கொண்ட துகள்கள், தூசுகள் உள்ளிட்டவற்றைக் கண்காணிப்பது அதன் பணியாக இருக்கும்.

இரண்டு ஆய்வுக் கலன்களையும் பயன்படுத்துவதன் மூலம் இதுவரை இல்லாத அளவுக்கு விரிவான ஆய்வுகளை மேற்கொள்ள முடியும் என விஞ்ஞானிகள் கூறுகின்றனர். திட்டமிட்டபடி அனைத்தும் நடைபெற்றால் மட்டுமே இது சாத்தியமாகும்.

கடுமையான சூழல்

புதனை சென்றடைவது மட்டுமே இந்தத் திட்டத்தின் சவாலாக இருக்கவில்லை. அந்தக் கோளில் செயல்படுவதிலும் மிகப்பெரிய தொழில்நுட்ப சவால்கள் உள்ளன.

பூமியுடன் ஒப்பிடும்போது, புதனில் சூரிய ஒளியின் தீவிரம் பத்து மடங்கு அதிகம். இது விண்கலத்தில் உள்ள நுண்ணிய கருவிகளைச் சேதப்படுத்தும் அபாயத்தை ஏற்படுத்துகிறது.

பகல் நேரத்தில் வெப்பநிலை 430 டிகிரி செல்சியஸ் அல்லது அதற்கும் அதிகமாகவும், இரவு நேரத்தில் மைனஸ் 180 டிகிரி செல்சியஸாகவும் இருக்கும். எனவே, தேவைக்கேற்ப ஆய்வுக் கலன்களை வெப்பத்தில் இருந்தும் கடும் குளிரில் இருந்தும் பாதுகாக்கும் வழிகளைப் பொறியாளர்கள் கண்டறிய வேண்டியிருந்தது. ஆனால், இதுபோன்ற சூழலிலும் ஆய்வு மேற்கொள்ள முடியும் என்பதை நாசாவின் மெசஞ்சர் திட்டம் ஏற்கெனவே நிரூபித்துள்ளது.

அமெரிக்காவின் அந்த விண்வெளித் திட்டம் விண்வெளி ஆய்வில் ஒரு முக்கிய மைல்கல்லாக அமைந்தது. தற்போது பெபிகொலம்போ திட்டம், இரண்டு நவீன ஆய்வுக் கலன்களையும் மேம்பட்ட கருவிகளையும் பயன்படுத்தி, மெசஞ்சர் திட்டம் விடையளிக்காமல் விட்டுச் சென்ற முக்கியக் கேள்விகளுக்கு விடை காண முயல்கிறது.

சூரியக் குடும்பம், புதன், கோள்கள், விண்வெளி, பூமி
படக்குறிப்பு, கடந்த 2021ஆம் ஆண்டு புதன் கோளைக் கடந்து சென்றபோது, பெபிகொலம்போ விண்கலம் எடுத்த படம்.

மெசஞ்சர் விண்கலம் புதனின் வடக்குப் பகுதியை மிக விரிவாக ஆய்வு செய்தது.

"பெபிகொலம்போ விண்கலம் புதனின் தெற்குப் பகுதி குறித்தும் அதே அளவிலான தகவல்களை வழங்கும்," என்கிறார் மெசஞ்சர் திட்டத்தின் துணை அறிவியல் திட்ட மேலாளரான முனைவர் டெபோரா டொமிங்கு.

புதனின் எஞ்சியுள்ள மர்மங்களை அவிழ்ப்பதுடன், நட்சத்திரங்களுக்கு மிக அருகில் சுற்றி வரும் கோள்களின் சுற்றுப்பாதைகள் குறித்து ஆய்வு செய்வதற்கான வாய்ப்பையும் வானியலாளர்கள் இந்தத் திட்டத்தில் பார்க்கின்றனர். மற்ற நட்சத்திர மண்டலங்களிலும் இதுபோன்ற அமைப்பில் பல கோள்கள் கண்டறியப்பட்டுள்ளன. உதாரணமாக, அவற்றின் மேற்பரப்பிலும் நீர் பனிக்கட்டி இருக்குமா?

துரதிர்ஷ்டவசமாக, அவை நம்மிடம் இருந்து வெகு தொலைவில் இருப்பதால் அவற்றை விரிவாக ஆய்வு செய்வது சாத்தியமில்லை.

எனவேதான், நமது சூரிய குடும்பத்தில் உள்ள கோள்களை ஆராய்வது மிகவும் முக்கியம் என்கிறார் டொமிங்கு. இந்த ஆய்வில் பெபிகொலம்போ திட்டம் முக்கியப் பங்களிப்பை வழங்க முடியும் என்றும் அவர் கூறுகிறார்.

"வேறு எங்காவது உயிர்கள் இருப்பதைக் கண்டறிவதுதான் நமது மிகப்பெரிய இலக்கு, இல்லையா? ஆனால், அதற்காக உயிர்கள் உருவாகியிருப்பது நமக்குத் தெரிந்த ஒரே இடமான நமது சூரியக் குடும்பத்தை முதலில் நாம் புரிந்துகொள்ள வேண்டும்."

- இது, பிபிசிக்காக கலெக்டிவ் நியூஸ்ரூம் வெளியீடு