'எப்ஸ்டீன் கொலை செய்யப்பட்டதாக' பிரேத பரிசோதனை படங்களை ஆய்வு செய்த நிபுணர் கூறுவது ஏன்?

பட மூலாதாரம், Rick Friedman/Rick Friedman Photography/Corbis via Getty Images
- எழுதியவர், டாம் மெக்ஆர்தர்
- பதவி, பிபிசி
- பிரசுரிக்கப்பட்டது
- வாசிக்கும் நேரம்: 3 நிமிடங்கள்
இந்தக் கட்டுரையில் சங்கடத்தை ஏற்படுத்தக்கூடிய விவரங்களும், தற்கொலை பற்றிய குறிப்புகளும் இடம்பெற்றுள்ளன.
தண்டனை பெற்ற பாலியல் குற்றவாளியான ஜெஃப்ரி எப்ஸ்டீன் சிறையில் உயிரிழந்தது தற்கொலையால் அல்ல, கொலை செய்யப்பட்டதன் விளைவாக இருக்கலாம் என்று தடயவியல் நிபுணர் ஒருவர் தெரிவித்துள்ளார்.
பிபிசி நியூஸ்நைட் நிகழ்ச்சியிடம் பேசிய பேராசிரியர் மைக்கேல் ஃப்ரீமேன், நியூயார்க் நகர மருத்துவப் பரிசோதகர் அலுவலகத்தின் ஆவணங்களை ஆய்வு செய்த பிறகு, எப்ஸ்டீன் கழுத்து நெரிக்கப்பட்டு கொல்லப்பட்டிருக்கலாம் என்றும், பெரும்பாலும் அவருக்குப் பின்னால் இருந்து கழுத்து நெரிக்கப்பட்டிருக்கலாம் என்றும் தாம் நம்புவதாகக் கூறினார்.
ஆனால், 2019-ஆம் ஆண்டு எப்ஸ்டீனின் உடலைப் பிரேதப் பரிசோதனை செய்த மருத்துவப் பரிசோதகர், அவரது உடலில் காணப்பட்ட காயங்கள் தற்கொலைக்குப் பொருந்துவதாகவும், அவர் கொலை செய்யப்பட்டிருந்தால் எதிர்த்துப் போராடியதற்கான காயங்கள் காணப்பட்டிருக்க வேண்டும் என்றும், அத்தகைய காயங்களுக்கு எந்த ஆதாரமும் இல்லை என்றும் முடிவு செய்திருந்தார்.
சிறுமிகள் உள்ளிட்ட பெண்களைப் பாலியல் சுரண்டலுக்காக அழைத்து வந்தது தொடர்பான விசாரணையை எதிர்நோக்கி இருந்த எப்ஸ்டீன், 2019 ஆகஸ்ட் 10-ஆம் தேதி நியூயார்க்கில் உள்ள சிறையில் உயிரிழந்த நிலையில் கண்டெடுக்கப்பட்டார்.

பட மூலாதாரம், US Department of Justice
எப்ஸ்டீனின் உடல் பிரேதப் பரிசோதனை செய்யப்பட்டபோது, நியூயார்க் நகரத்தின் தலைமை மருத்துவப் பரிசோதகராக டாக்டர் பார்பரா சாம்ப்சன் பதவி வகித்தார்.
எப்ஸ்டீனின் மரணம் தற்கொலை என்றே அவர் முடிவு செய்திருந்தார். இதுகுறித்து முன்பு கருத்து தெரிவித்த அவர், "எப்ஸ்டீனின் மரணத்துக்கான காரணம் மற்றும் அது நிகழ்ந்த விதம் குறித்து நாங்கள் எடுத்த முடிவில் நான் உறுதியாக இருக்கிறேன்" என்று கூறியிருந்தார். இதுகுறித்து கூடுதல் கருத்துகளைக் கேட்டு பிபிசி அவரைத் தொடர்புகொண்டுள்ளது.
அமெரிக்காவில் காவல்துறையினர் காவலில் இருந்தபோது உயிரிழந்தவர்களின் மரணத்துக்கான காரணம் குறித்து விசாரிக்கும் வழக்குகளில், அமெரிக்காவின் பல்வேறு மாகாணங்களின் அரசு வழக்கறிஞர்களுக்கு ஃப்ரீமேன் நிபுணராகப் பணியாற்றியுள்ளார். மின்னசோட்டாவில் ஜார்ஜ் ஃப்ளாய்ட் உயிரிழந்த வழக்கும் அவற்றில் ஒன்று.
திங்கள்கிழமை மாலை லண்டனில் தனது ஆய்வு முடிவுகளை அவர் முன்வைத்தார். அதன் பிறகு, தனது ஆய்வையும் நியூயார்க் நகர மருத்துவப் பரிசோதகர் அலுவலகத்தின் ஆவணங்களையும் அவர் வெளியிட்டார்.
எப்ஸ்டீனின் உடலை ஃப்ரீமேன் நேரில் பார்க்கவில்லை. எப்ஸ்டீனின் சகோதரர் மார்க் எப்ஸ்டீன் அவருக்கு வழங்கிய மருத்துவப் பரிசோதனை அறிக்கையில் இடம்பெற்றிருந்த ஆவணங்கள் மற்றும் புகைப்படங்களின் அடிப்படையிலேயே அவர் தனது முடிவுகளுக்கு வந்துள்ளார். தனது சகோதரர் கொலை செய்யப்பட்டார் என்று மார்க் எப்ஸ்டீன் தொடர்ந்து கூறி வருகிறார்.
தனது ஆய்வு சுயாதீனமானது என்றும், மார்க் எப்ஸ்டீனிடம் இருந்து இதற்காகப் பணம் பெறவில்லை என்றும் ஃப்ரீமேன் கூறினார். அவரது ஆய்வு இதுவரை மற்ற நிபுணர்களால் மதிப்பாய்வு செய்யப்படவில்லை.
எப்ஸ்டீன் தாக்கப்பட்டதற்கான அறிகுறிகள் இருப்பதாகத் தாம் நம்புவதாக பிபிசியிடம் ஃப்ரீமேன் தெரிவித்தார். குறிப்பாக, அவரது இடது தோள்பட்டையில் ஆழமான ரத்தக்கசிவும், முகத்தில் தாக்கப்பட்டதைக் குறிக்கும் வகையிலான காயங்களும் இருந்ததாக அவர் கூறினார்.
கயிறு போன்ற ஒரு பொருளைப் பயன்படுத்தி எப்ஸ்டீனின் கழுத்து நெரிக்கப்பட்டதே ஆதாரங்களுடன் அதிகம் பொருந்துவதாகத் தாம் கருதுவதாக ஃப்ரீமேன் கூறினார். பின்னர், அதே கயிற்றைப் பயன்படுத்தி அவரது உடல் மேல் படுக்கையிலிருந்து தொங்கவிடப்பட்டிருக்கலாம் என்றும் அவர் தெரிவித்தார்.
எப்ஸ்டீனின் கழுத்தில் இருந்த கயிற்றால் ஏற்பட்ட தடத்துக்கு மேலே விரல் நகங்களால் ஏற்பட்ட கீறல்கள் காணப்பட்டதாகவும் ஃப்ரீமேன் கூறினார்.
"இது கழுத்து நெரிக்கப்பட்டதுடன், குறிப்பாகப் பின்னால் இருந்து கழுத்து நெரிக்கப்பட்டதுடன் பொருந்துகிறது. பாதிக்கப்பட்ட நபர் தனது கழுத்தில் இருந்த கயிற்றை அகற்ற முயன்றதையும் இது காட்டுகிறது" என்றார்.
"காயங்களும், உடல் கண்டெடுக்கப்பட்ட விதமும் ஒன்றுக்கொன்று பொருந்தவில்லை. அப்படியானால், எஞ்சியிருக்கும் ஒரே விளக்கம், அவர் கொலை செய்யப்பட்டார் என்பதுதான்" என்றும் அவர் கூறினார்.
ஆனால், எப்ஸ்டீனின் உடலை அப்போது பிரேதப் பரிசோதனை செய்த மருத்துவப் பரிசோதகர் அளித்த தகவலில், அவரது காயங்கள் கழுத்து நெரிக்கப்பட்டுக் கொல்லப்பட்டதைவிட, தூக்கிட்டுத் தற்கொலை செய்துகொண்டதற்கே அதிகம் பொருந்துவதாகவும் அதற்கான அறிகுறிகளைக் கொண்டிருப்பதாகவும் தெரிவித்திருந்தார்.
மேலும், கழுத்து நெரிக்கப்பட்டுக் கொல்லப்பட்டவர்களிடம் பொதுவாகக் காணப்படும் எதிர்த்துப் போராடியதற்கான காயங்கள் எதுவும் எப்ஸ்டீனின் உடலில் இல்லை என்றும் அவர் கூறியிருந்தார்.

பட மூலாதாரம், Getty Images
காவலில் இருந்த ஒருவர் தூக்கிட்டுத் தற்கொலை செய்துகொண்டதாகக் கூறப்படும் வழக்கில், உடலைக் கீழே இறக்குவதற்கு முன்பு அதைப் புகைப்படம் எடுத்திருக்க வேண்டும் என்று தாம் எதிர்பார்த்திருப்பேன் என ஃப்ரீமேன் கூறினார்.
எப்ஸ்டீன் சிறையில் இருந்தபோது நடந்த சம்பவங்கள் குறித்து அமெரிக்க சட்ட விவகாரத் துறை நடத்திய விசாரணை அறிக்கையின்படி, எப்ஸ்டீனைக் கண்ட காவலர் உடனடியாக மற்றொரு சக ஊழியரை உதவிக்கு அழைத்துள்ளார். பின்னர், எப்ஸ்டீனின் உடலைக் கீழே இறக்கி தரையில் கிடத்திவிட்டு, அவரை மீண்டும் உயிர்ப்பிப்பதற்கான முயற்சிகளைத் தொடங்கியுள்ளார்.
எப்ஸ்டீன் உயிரிழப்பதற்கு ஒரு மாதத்திற்கு முன்புதான், அவர் தற்கொலை செய்துகொள்ளும் அபாயம் இருப்பதாகக் கருதி கண்காணிப்பில் வைக்கப்பட்டிருந்தார் என்று அமெரிக்க சட்ட விவகாரத் துறை'அறிக்கை கூறுகிறது.
ஆதாரங்களைத் தாம் விளக்கிய விதம் சரியாக இருந்தால், எப்ஸ்டீனைக் கொன்றது யாராக இருக்கலாம் என்று கேட்கப்பட்டபோது, "அது குறித்து எனக்கு எந்தத் தகவலும் இல்லை" என்று ஃப்ரீமேன் பதிலளித்தார்.
"அது குறித்து எனக்கு எந்தக் கருத்தும் இல்லை. நான் மேற்கொண்ட எந்த விசாரணையின் வரம்புக்குள்ளும் அது வராது" என்றும் அவர் கூறினார்.
தனது கருத்துகள் சதி கோட்பாடுகளைப் போல இருப்பதாகக் கூறப்பட்டபோது, அதற்குப் பதிலளித்த ஃப்ரீமேன், "என் வார்த்தைகளை மட்டும் நம்ப வேண்டாம்; அனைவரும் இதை ஆய்வு செய்து பார்க்கட்டும்." என்றார்.
"கழுத்து நெரிக்கப்பட்டதற்கான அறிகுறிகளைப் பார்க்கிறேன். தூக்கிட்டுத் தற்கொலை செய்துகொண்டிருக்க வாய்ப்பில்லை. இதைச் சொல்வதால் நான் இன்னும் சதி கோட்பாட்டாளர் என்று நீங்கள் கருதினால், நான் எங்கே தவறு செய்திருக்கிறேன் என்று காட்டுங்கள்" என்றும் அவர் கூறினார்.
"அதை ஏற்றுக்கொள்ள நான் தயாராக இருக்கிறேன். நான் ஒரு கல்வியாளர். ஆதாரங்களின் அடிப்படையில் முன்வைக்கப்படும் பிறரது கருத்துகளைக் கேட்பதில் எனக்கு எந்தத் தயக்கமும் இல்லை" என்றார்.

பட மூலாதாரம், Rick Friedman/Corbis via Getty Images
2008-ஆம் ஆண்டு, சிறுமியுடன் பணம் கொடுத்து பாலியல் உறவு கொண்ட குற்றச்சாட்டில் எப்ஸ்டீன் குற்றவாளி எனத் தீர்ப்பளிக்கப்பட்டார். இதையடுத்து, பாலியல் குற்றவாளியாக அவர் பதிவு செய்யப்பட்டார். எனினும் எதிர் தரப்புடன் ஒர் உடன்பாடு எட்டியதன் காரணமாக நீண்டகால சிறைத் தண்டனையிலிருந்து அவர் தப்பினார்.
இதற்கு 11 ஆண்டுகளுக்குப் பிறகு, சிறுமிகளைப் பாலியல் சுரண்டலுக்காகப் பயன்படுத்தும் வலையமைப்பை நடத்தி வந்ததாக எப்ஸ்டீன் மீது குற்றம் சாட்டப்பட்டது. இந்த வழக்கில் விசாரணையை எதிர்நோக்கியிருந்தபோது, 2019-ஆம் ஆண்டு நியூயார்க் நகரில் உள்ள மெட்ரோபாலிட்டன் கரெக்ஷனல் சென்டரில் அவர் உயிரிழந்த நிலையில் கண்டெடுக்கப்பட்டார்.
- இது, பிபிசிக்காக கலெக்டிவ் நியூஸ்ரூம் வெளியீடு
































