வாயுத் தொல்லை, மலச்சிக்கல், அல்சர் ஏற்படுகிறதா? குடல் ஆரோக்கியம் குறித்து 10 கேள்வி – பதில்கள்

பட மூலாதாரம், Getty Images
- எழுதியவர், பிரியங்கா திமான்
- பதவி, பிபிசி செய்தியாளர்
- பிரசுரிக்கப்பட்டது
- வாசிக்கும் நேரம்: 7 நிமிடங்கள்
பலரும் வாயுத் தொல்லை, அமிலத்தன்மை, மலச்சிக்கல், வயிற்றுத் தொற்று போன்ற பிரச்னைகளால் அவதிப்படுகின்றனர். ஆனால், இதற்கு உணவுப் பழக்கங்கள் மட்டும்தான் காரணமா? அல்லது நமது குடல் ஆரோக்கியமும் இதற்கு முக்கியக் காரணமாக இருக்குமா?
சமீபகாலமாக குடல் ஆரோக்கியம் குறித்து அதிகம் பேசப்பட்டு வருகிறது.
இந்தக் கட்டுரையில் குடல் ஆரோக்கியம் என்றால் என்ன, குடல் ஆரோக்கியம் பாதிக்கப்படுவதற்கான காரணங்கள் என்ன, ஆரோக்கியமான குடலுக்கும் ஆரோக்கியமற்ற குடலுக்கும் இடையிலான வேறுபாட்டை எவ்வாறு கண்டறிவது என்பதைப் புரிந்துகொள்ள முயற்சிக்கலாம்.
இரைப்பை குடலியல் மற்றும் கல்லீரல் நோய் நிபுணர் மருத்துவர் அஜய் குமார் தற்போது டெல்லியில் உள்ள பிஎல்கே மேக்ஸ் மருத்துவமனையில் பணியாற்றி வருகிறார். அவர் இதுதொடர்பான கேள்விகளுக்கு பதிலளித்துள்ளார்.

கேள்வி: குடல் ஆரோக்கியம் என்றால் என்ன? குடல் ஆரோக்கியம் பாதிக்கப்படுவதற்கான காரணங்கள் என்ன?
பதில்: இப்போதெல்லாம் 'கட்' (Gut) என்ற வார்த்தை மிகவும் பிரபலமாகி வருகிறது. இது ஓர் ஆங்கிலச் சொல். ஆரம்பத்தில் இதை நாம் 'கட் ஃபீலிங்' என்ற சொல்லுடன் தொடர்புப்படுத்திப் புரிந்துகொள்வோம். 'இது என்னுடைய உள்ளுணர்வு' என்று சொல்வோம். சில நேரங்களில், 'உங்களுக்கு தைரியம் இருந்தால் ஏதாவது செய்து பாருங்கள்' என்றும் கூறுவோம். ஆனால், இப்போது நாம் பேசுவது 'கட்' பற்றி. அதாவது, குடல்கள்.
உணவு உள்ளிட்ட அனைத்தும் இந்தப் பாதை வழியாகவே மேலிருந்து கீழ்நோக்கிச் செல்கின்றன. இதைத்தான் ஆங்கிலத்தில் 'கட்' என்று அழைக்கிறோம்.
நமது முழு குடல் பாதையும் இப்போது 'கட்' என்ற பெயரில் பரவலாக அறியப்படுகிறது. நாமும் அதைப் பற்றித்தான் பேசுகிறோம்.
காலப்போக்கில், 'கட் ஃபீலிங்', தைரியம் போன்ற வார்த்தைகளைத் தாண்டி, இப்போது 'மூளை - குடல் தொடர்பு' பற்றியும் பேசத் தொடங்கியிருக்கிறோம். குடலுக்கும் மூளைக்கும் இடையிலான தொடர்பையும் ஆராய்கிறோம். இது மிகவும் சுவாரசியமான விஷயம்.
கேள்வி: ஆரோக்கியமான குடலுக்கும் ஆரோக்கியமற்ற குடலுக்கும் இடையிலான வேறுபாட்டை எப்படிக் கண்டறிவது?
பதில்: ஒருவருக்கு ஆரோக்கியமான குடல் இருக்கிறதா, இல்லையா என்பதை முக்கியமாக அவருக்கு ஏற்படும் அறிகுறிகளை வைத்தே கண்டறிய முடியும்.
ஒருவருக்கு தனது குடல் ஆரோக்கியமாக இல்லை என்று ஏன் தோன்றுகிறது? அடிக்கடி ஏப்பம் வருவது, சாப்பிட்ட பிறகு வயிறு கனமாக இருப்பது, நெஞ்செரிச்சல் அல்லது வயிறு உப்புசம் ஏற்படுவது போன்றவை இதற்குக் காரணமாக இருக்கலாம்.
வாயு வெளியேறுவதிலும் பிரச்னைகள் இருக்கலாம். இவை அனைத்தும் ஆரோக்கியமற்ற குடலுடன் தொடர்புடைய அறிகுறிகள்.
இவை தவிர, ஒருவருக்கு மனநிலை சரியில்லாமல் இருப்பது, தூக்கம் பாதிக்கப்படுவது அல்லது உடலில் ஆற்றல் இல்லாமல் இருப்பது போன்றவற்றையும் சில நேரங்களில் குடல் ஆரோக்கியத்துடன் தொடர்புபடுத்திப் பார்க்கின்றனர்.
உண்மையில், 'ஆரோக்கியமற்ற குடல்' என்பது ஒரு குறிப்பிட்ட நோயின் பெயர் அல்ல. அறிகுறிகளின் அடிப்படையில்தான் இவ்வாறு குறிப்பிடப்படுகிறது. அதன் பிறகுதான் அந்த அறிகுறிகளுக்கான காரணம் கண்டறியப்படுகிறது.

பட மூலாதாரம், Getty Images
கேள்வி: பலரும் தங்களுக்குக் குடல் ஆரோக்கியம் சரியில்லை என்று கூறுகின்றனர். இதற்கான காரணம் என்ன?
பதில்: இதற்குப் பல காரணங்கள் இருக்கலாம். குடல் செயல்பாட்டில் ஏற்படும் பாதிப்புகள் காரணமாக, பல்வேறு அறிகுறிகள் தோன்றலாம். உதாரணமாக, வயிறு உப்புசம், வாயுத் தொல்லை, அமிலத்தன்மை, புளித்த ஏப்பம், மலச்சிக்கல் அல்லது அடிக்கடி மலம் கழிக்கச் செல்வது போன்றவை ஏற்படலாம்.
இவற்றைத் தவிர, மிகவும் பொதுவான ஓர் அறிகுறி என்னவென்றால், மலம் கழித்த பிறகும் வயிறு முழுமையாகக் காலியாகவில்லை என்ற உணர்வு ஏற்படுவதுதான். மலம் கழித்திருந்தாலும் வயிறு சுத்தமாகவில்லை என்று சிலர் உணர்வார்கள். இவை அனைத்தும் ஆரோக்கியமற்ற குடலுடன் தொடர்புடைய அறிகுறிகள்.
இதற்குப் பல காரணங்கள் இருக்கலாம். மருத்துவ அறிவியல் அடிப்படையில் பார்த்தால், அமிலத்தன்மை தொடர்பான பிரச்னைகளாக இருக்கலாம். உதாரணமாக, வயிற்றுப் புண் (Ulcer), உணவுக்குழாய் அழற்சி அல்லது இரைப்பை அழற்சி போன்றவை காரணமாக இருக்கலாம்.
சில நேரங்களில் குடலின் இயக்கம் மெதுவாகிவிடலாம். எரிச்சல் கொண்ட குடல் நோய்க்குறி என்பதும் பொதுவாகக் காணப்படும் ஒரு பாதிப்பாகும்.
இவை தவிர, ஆரம்பத்தில் இதேபோன்ற அறிகுறிகளை வெளிப்படுத்தக்கூடிய சில தீவிரமான நோய்களும் உள்ளன.
இந்தப் பிரச்னைகளுக்கு இடையிலான வேறுபாட்டைக் கண்டறிந்து, எந்த நோயாளிக்கு என்னென்ன பரிசோதனைகள் தேவை என்பதைத் தீர்மானிப்பதுதான் மருத்துவருக்கு இருக்கும் சவால்.
எனவே, குடல் ஆரோக்கியம் பாதிக்கப்படுவதற்கு ஒரே ஒரு காரணமோ அல்லது குறிப்பிட்ட ஒரு நோயோ கிடையாது.

பட மூலாதாரம், Getty Images
கேள்வி: குடல் ஆரோக்கியத்தைப் பாதுகாக்க என்னென்ன உணவுகளைச் சாப்பிட வேண்டும்? எவற்றைத் தவிர்க்க வேண்டும்?
பதில்: முதலில், நமது உணவு ஆரோக்கியமானதாக இருக்க வேண்டும். இதில் இரண்டு விஷயங்கள் முக்கியம். ஒன்று, என்ன சாப்பிடுகிறோம் என்பது; மற்றொன்று, எப்படிச் சாப்பிடுகிறோம் என்பது.
முதலில் உணவு உண்ணும் நேரத்தைப் பற்றிப் பார்ப்போம். சரியான நேரத்தில் உணவு சாப்பிடுவது முக்கியம்.
ஒரு நாளைக்கு மூன்று முக்கிய உணவு வேளைகள் இருக்க வேண்டும். இடையில் சிறிய அளவில் சிற்றுண்டியும் எடுத்துக்கொள்ளலாம்.
இரவில் தூங்கச் செல்வதற்கு குறைந்தது இரண்டு முதல் மூன்று மணி நேரத்துக்கு முன்பே உணவைச் சாப்பிட்டுவிட வேண்டும்.
சாப்பிட்ட உடனே படுத்துக்கொள்ளக் கூடாது என்பதும் மிகவும் முக்கியம்.
அதிகமாகச் சாப்பிடுவதும் நல்லதல்ல. குறைந்த அளவில் அடிக்கடி உணவு சாப்பிடுவது சிறந்தது. உணவில் எவ்வளவு வகையான உணவுகள் இடம்பெறுகின்றனவோ, அவ்வளவு நல்லது. இதைச் சாப்பிடக்கூடாது, அதைச் சாப்பிடக்கூடாது என்று அதிகமான கட்டுப்பாடுகளை விதித்துக்கொள்ளக் கூடாது. அதுவும் ஒரு பிரச்னையாக மாறலாம்.
நமது உணவுப் பழக்கத்தில் பால், தயிர், பாலாடைக்கட்டி மற்றும் பிற பால் பொருள்கள் இடம்பெற்றுள்ளன. இவற்றுடன் பருப்பு வகைகள், கொண்டைக்கடலை, ராஜ்மா, சோயாபீன்ஸ் போன்றவற்றையும் சாப்பிட வேண்டும்.
பழங்கள் மற்றும் காய்கறிகளில் நார்ச்சத்து உள்ளது. நார்ச்சத்து நமது உடலுக்கு நல்லது. பல்வேறு நோய்களிலிருந்து நம்மைப் பாதுகாக்கிறது. மலச்சிக்கல் ஏற்படுவதையும் தடுக்கிறது. போதுமான அளவு தண்ணீர் குடிக்க வேண்டும். உடலில் நீர்ச்சத்துக் குறைபாடு ஏற்படக்கூடாது.
கேள்வி: இப்போது பசையம் (Gluten) உள்ள உணவுகளைச் சாப்பிடக் கூடாது என்ற பழக்கம் அதிகரித்து வருகிறது. உண்மையில், பசையம் ஒவ்வாமை ஏற்படுவதற்குக் காரணமான குறிப்பிட்ட நோய் ஏதேனும் உள்ளதா?
பதில்: தற்போது பசையம் ஒவ்வாமை என்பது ஒரு நவநாகரிகப் பழக்கம்போல மாறிவிட்டது. பலரும் எந்தப் பரிசோதனையும் செய்துகொள்ளாமல் கோதுமை சாப்பிடுவதை நிறுத்திவிடுகின்றனர்.
பசையம் அல்லது கோதுமை ஒவ்வாமை உள்ளவர்களுக்கு 'சீலியாக் நோய்' என்ற பாதிப்பு ஏற்படுகிறது.
இதைக் கண்டறிய ரத்தப் பரிசோதனைகள் செய்யப்படுகின்றன. எண்டோஸ்கோபி மற்றும் திசுப் பரிசோதனைகளும் மேற்கொள்ளப்படுகின்றன. சந்தேகம் இருந்தால் மரபணுப் பரிசோதனைகளும் செய்யப்படுகின்றன.
இந்த நோய் இருப்பது உறுதிசெய்யப்பட்டால், நோயாளி தனது வாழ்நாள் முழுவதும் கோதுமையைத் தவிர்க்க வேண்டும்.
சிறுதானியங்கள் எப்போதுமே சிறந்தவை. நமது பாரம்பரிய உணவில் கம்பு, சோளம் போன்ற தானியங்கள் இடம்பெற்றிருந்தன.
இவற்றையும் நமது உணவில் சேர்த்துக்கொள்ள வேண்டும். அதேசமயம், சில உணவுகளைத் தவிர்க்கவும் வேண்டும். அதிக எண்ணெய் மற்றும் பொரித்த உணவுகளைச் சாப்பிடக்கூடாது. இனிப்புகளையும் அதிகமாகச் சாப்பிடுவதைத் தவிர்க்க வேண்டும்.
மசாலாப் பொருள்களையும் அளவுக்கு அதிகமாகப் பயன்படுத்தக்கூடாது. அசைவ உணவுகளைப் பொறுத்தவரை, சிவப்பு இறைச்சியில் நார்ச்சத்து கிடையாது. எனவே, சிவப்பு இறைச்சி சாப்பிடுபவர்கள் அதனுடன் அதிக அளவில் சாலட் மற்றும் பழங்களைச் சேர்த்துக்கொள்ள வேண்டும். மீன் நல்ல உணவு. கோழி இறைச்சியையும் சாப்பிடலாம். ஆனால், தோலை நீக்கிவிட்டுச் சாப்பிட வேண்டும்.
கேள்வி: வயிற்றுப் புண் என்றால் என்ன? அதற்கு எவ்வாறு சிகிச்சை அளிக்கப்படுகிறது?
பதில்: உடலின் உட்புறப் படலத்தில் ஏற்படும் புண்ணைத்தான் அல்சர் என்கிறோம். உடலின் ஏதாவது ஒரு பகுதியில் காயம் ஏற்பட்டால் அங்கு புண் உருவாகும் அல்லவா? அதுவும் அல்சர் என்றே அழைக்கப்படுகிறது.
குடல் தொடர்பாக அல்சர் பற்றிப் பேசும்போது, பொதுவாக அதை 'பெப்டிக் அல்சர்' என்று குறிப்பிடுகிறோம். இது அமிலத்தன்மையுடன் தொடர்புடையது. பெரும்பாலும் இரைப்பை மற்றும் சிறுகுடலின் தொடக்கப் பகுதியான டியோடினத்தில் ஏற்படுகிறது.
இரைப்பையில் ஏற்படும் புண்களை நாம் எப்போதும் சந்தேகத்துடனேயே அணுகுவோம். ஏனெனில், அது புற்றுநோயாக இருப்பதற்கான வாய்ப்பை முதலில் நிராகரிப்பது அவசியம்.
புற்றுநோயும் அல்சரை ஏற்படுத்தக்கூடும்.
இதன் முக்கிய அறிகுறிகளில் வயிற்றில் எரிச்சல் ஏற்படுவதும் ஒன்று. வெறும் வயிற்றில் எரிச்சல் ஏற்பட்டால், அது டியோடினத்தில் ஏற்பட்ட புண்ணாக இருக்கலாம் என்று கருதுவோம். உணவு சாப்பிட்ட பிறகு எரிச்சல் ஏற்பட்டால், அது இரைப்பைப் புண்ணாக இருக்கலாம் என்று கருதுவோம்.
பிரச்னை தீவிரமடைந்தால் ரத்தக்கசிவும் ஏற்படலாம்.
மலம் கருப்பாக வெளியேறுவது, மலம் கழிக்கும்போது ரத்தம் வருவது, ரத்த வாந்தி எடுப்பது ஆகியவையும் இதன் அறிகுறிகளாகும்.
அல்சர் இரைப்பையின் முழு உட்புறப் படலத்தையும் சேதப்படுத்தினால், துளை ஏற்படலாம். இதனால் வயிறு முழுவதும் தொற்று பரவக்கூடும்.
சில நேரங்களில் அல்சர் காரணமாக உணவு செல்லும் பாதை குறுகி அடைப்பு ஏற்படலாம். இதை 'பைலோரிக் ஸ்டெனோசிஸ்' என்று அழைக்கிறோம். இவை அனைத்தும் அல்சருடன் தொடர்புடைய பாதிப்புகளாகும்.
இவை தவிர, 'ரிஃப்ளக்ஸ் ஈசோஃபஜைட்டிஸ்' என்ற பாதிப்பும் உள்ளது. கடந்த 30 முதல் 40 ஆண்டுகளில் இந்தப் பிரச்னை கணிசமாக அதிகரித்துள்ளது.
இதில், இரைப்பையில் உள்ள அமிலம் வழக்கத்தைவிட அதிகமாக உணவுக்குழாய் நோக்கி மேலே வருகிறது. இந்த அமிலம் உணவுக்குழாயைச் சென்றடையும்போது அங்குள்ள திசுக்களைச் சேதப்படுத்துகிறது. இதைத்தான் ரிஃப்ளக்ஸ் ஈசோஃபஜைட்டிஸ் என்கிறோம்.
பல நோயாளிகளுக்கு அல்சரோ அல்லது புண்ணோ இருக்காது. இருப்பினும், இதேபோன்ற அறிகுறிகள் காணப்படும். இதை 'செயல்பாட்டுக் கோளாறால் ஏற்படும் செரிமானப் பிரச்னை' என்று அழைக்கிறோம்.

பட மூலாதாரம், Getty Images
கேள்வி: அல்சர் பாதிப்பு உள்ளவர்கள் வயிறு தொடர்பாக என்னென்ன விஷயங்களில் கவனம் செலுத்த வேண்டும்?
பதில்: மிக முக்கியமானது சரியான நேரத்தில் உணவு சாப்பிடுவது. அதிக காரம் மற்றும் எண்ணெய் நிறைந்த உணவுகளைத் தவிர்க்க வேண்டும். குறைந்த அளவில் அடிக்கடி உணவு சாப்பிட வேண்டும்.
இரண்டு விஷயங்களை முற்றிலும் தவிர்க்க வேண்டும். முதலாவது, வலி நிவாரண மாத்திரைகள்
வலி நிவாரண மாத்திரைகள் அல்சரை ஏற்படுத்தக்கூடும். ஏற்கெனவே அல்சர் உள்ளவர்களுக்கு ரத்தக்கசிவு போன்ற சிக்கல்களையும் ஏற்படுத்தலாம்.
இரண்டாவது, புகைப்பிடித்தல். அல்சர் பாதிப்பு உள்ளவர்களுக்குப் புகைப்பிடித்தல் மிகவும் தீங்கு விளைவிக்கும்.
இது அல்சர் குணமடைவதைத் தடுக்கிறது. மேலும், ரத்தக்கசிவு போன்ற சிக்கல்கள் ஏற்படும் அபாயத்தையும் அதிகரிக்கிறது.
எனவே, புகைப்பிடித்தல் மற்றும் வலி நிவாரண மருந்துகளைத் தவிர்க்க வேண்டும். இருப்பினும், பாராசிட்டமால் பாதுகாப்பானது.

பட மூலாதாரம், Getty Images
கேள்வி: மீண்டும் மீண்டும் வயிற்றுத் தொற்று ஏற்படுவதற்கு என்ன காரணம்?
பதில்: முதலில், ஒவ்வொரு முறையும் வயிற்றுப்போக்கு ஏற்படுவதைத் தொற்று என்று கருதக்கூடாது என்பதைப் புரிந்துகொள்ள வேண்டும்.
தொற்று ஏற்படுவதற்கு முக்கியக் காரணம், உணவு மற்றும் தண்ணீர் மூலம் பரவும் கிருமிகள்தான்.
அசுத்தமான தண்ணீரைக் குடிப்பது, சாலையோர உணவுகளைச் சாப்பிடுவது, சுகாதாரத்தில் கவனம் செலுத்தாமல் இருப்பது, கைகளைக் கழுவாமல் இருப்பது போன்ற காரணங்களால் தொற்று ஏற்படலாம்.
சமையலுக்குப் பயன்படுத்தப்படும் பொருள்களும் தண்ணீரும் சுத்தமாக இருக்க வேண்டும்.
தொற்றைத் தவிர்க்க, சுத்தமான உணவுகளைச் சாப்பிடுவது அவசியம். வெளியில் இருந்து வாங்கி வரும் காய்கறிகள் மற்றும் பழங்களைப் பயன்படுத்துவதற்கு முன்பு சுத்தமான தண்ணீரில் கழுவ வேண்டும்.
உணவை நன்றாகச் சூடுபடுத்திச் சாப்பிடுவதன் மூலம் தொற்று ஏற்படுவதற்கான வாய்ப்பைக் குறைக்கலாம்.
குளிர்ந்த அல்லது பழைய உணவை மீண்டும் சூடுபடுத்தாமல் சாப்பிடுவது தொற்று ஏற்படும் அபாயத்தை அதிகரிக்கலாம்.

பட மூலாதாரம், Getty Images
கேள்வி: மலச்சிக்கல் ஏற்படுவதற்கான காரணங்கள் என்ன? அதைத் தவிர்க்க என்ன செய்ய வேண்டும்?
பதில்: உண்மையில், மலச்சிக்கல் என்பது பொதுவாகக் காணப்படும் ஒரு பிரச்னை. எங்களது மருத்துவமனைக்கு வரும் நோயாளிகளில் தினமும் சுமார் 20 சதவிகிதம் பேர் மலச்சிக்கல் பிரச்னையுடன் வருகின்றனர்.
முதலில், இந்த மலச்சிக்கல் தற்காலிகமானதா என்பதைச் சரிபார்க்க வேண்டும். ஏனெனில், இது அவசர மருத்துவக் கவனம் தேவைப்படும் பிரச்னையாகவும் இருக்கலாம். குடல் அடைப்பு அல்லது புற்றுநோய் போன்ற பாதிப்புகளும் இதற்குக் காரணமாக இருக்கலாம்.
நாள்பட்ட மலச்சிக்கலைப் பொறுத்தவரை, ஒவ்வொரு நோயாளிக்கும் அதன் அறிகுறிகள் வேறுபடலாம்.
சிலருக்கு மலம் கழிக்க வேண்டும் என்ற உணர்வே ஏற்படாது. சிலர் மலம் கழித்த பிறகும் வயிறு முழுமையாகக் காலியாகவில்லை என்று உணர்வார்கள். இன்னும் சிலருக்கு மலம் மிகவும் இறுக்கமாகவும் கடினமாகவும் வெளியேறலாம்.
இவை அனைத்துமே மலச்சிக்கலின் அறிகுறிகளாகக் கருதப்படுகின்றன.
மலச்சிக்கல் ஏற்படுவதில் வாழ்க்கைமுறை மிகவும் முக்கியப் பங்கு வகிக்கிறது.
வாழ்க்கைமுறையில் உடற்பயிற்சி மிகவும் அவசியம். இதனுடன் போதுமான அளவு தண்ணீர் குடிப்பதும், நார்ச்சத்து நிறைந்த உணவுகளைச் சாப்பிடுவதும் முக்கியம்.
அதிக அளவில் தண்ணீர் குடிக்க வேண்டும். நார்ச்சத்து நிறைந்த பச்சைக் காய்கறிகளையும் சாப்பிட வேண்டும்.
ஆனால், தற்போது நாம் மேற்கத்திய வாழ்க்கைமுறை மற்றும் உணவுப் பழக்கங்களை நோக்கி நகர்ந்து வருகிறோம். இதனால், நமது உணவில் நார்ச்சத்தின் அளவு குறைந்து வருகிறது.
மற்றொரு முக்கியமான விஷயம், உங்களது வழக்கமான மலம் கழிக்கும் பழக்கத்தில் மாற்றம் ஏற்படுகிறதா என்பதைக் கவனிக்க வேண்டும்.
சில அறிகுறிகள் 'எச்சரிக்கை அறிகுறிகள்' என்று அழைக்கப்படுகின்றன. இத்தகைய அறிகுறிகள் தென்பட்டால், உடனடியாக மருத்துவரை அணுகிப் பரிசோதனை செய்துகொள்ள வேண்டும்.
மலத்தில் ரத்தம் காணப்படுவது, மலம் கருப்பாக வெளியேறுவது, ஹீமோகுளோபின் அளவு குறைவது, உடல் எடை குறையத் தொடங்குவது அல்லது பசியின்மை ஏற்படுவது ஆகியவை கவலைக்குரிய அறிகுறிகளாகும்.
மேலும், 50 வயதுக்குப் பிறகு வழக்கமான மலம் கழிக்கும் பழக்கத்தில் மாற்றம் ஏற்பட்டாலும் பரிசோதனை செய்துகொள்வது அவசியம்.
இதுபோன்ற சூழல்களில் புற்றுநோய் அல்லது பிற தீவிர நோய்கள் உள்ளனவா என்பதைக் கண்டறிய கொலோனோஸ்கோபி அல்லது எண்டோஸ்கோபி பரிசோதனைகள் தேவைப்படலாம்.
மலச்சிக்கலுக்கான முக்கிய சிகிச்சை, வாழ்க்கைமுறையை மேம்படுத்துவதும் மன அழுத்தத்தைத் தவிர்ப்பதும்தான்.
அதேநேரத்தில், ஆபத்துக்கான அறிகுறிகளை ஒருபோதும் அலட்சியப்படுத்தக் கூடாது. நோயைக் கண்டறிவதில் ஏற்படும் தாமதம் உடலுக்குப் பெரும் பாதிப்பை ஏற்படுத்தக்கூடும்.

பட மூலாதாரம், Getty Images
கேள்வி: வயிற்றுப் பிரச்னைகளில் புரோபயாடிக்குகள் மற்றும் புளிக்கவைக்கப்பட்ட உணவுகளின் பங்கு என்ன?
பதில்: முன்பு, ஆன்டிபயாடிக் மருந்துகளை எடுத்துக்கொள்ளும்போது அவை தீங்கு விளைவிக்கும் பாக்டீரியாக்களை மட்டுமின்றி, நன்மை செய்யும் பாக்டீரியாக்களையும் அழித்துவிடுகின்றன என்ற நம்பிக்கை இருந்தது.
எனவே, இதற்கு உதவியாக புரோபயாடிக்குகளை வழங்குவது குறித்து யோசிக்கப்பட்டது.
பல ஆன்டிபயாடிக் மருந்துகளும் வயிற்றுப்போக்கை ஏற்படுத்துகின்றன. இதைத் தவிர்ப்பதற்காகவும் புரோபயாடிக்குகள் வழங்கப்படுகின்றன.
இப்போது இந்தக் கருத்தை மேலும் விரிவுபடுத்தி, ஆரோக்கியமான குடல் மற்றும் உடல்நலத்துக்காகப் புரோபயாடிக்குகளை எடுத்துக்கொள்ள வேண்டும் என்று கூறப்படுகிறது.
இதுகுறித்து நான் கூற விரும்புவது என்னவென்றால், புரோபயாடிக்குகள் நிறைந்த உணவுகள் நமக்கு நல்லது என்பதை அறிவியலும் ஏற்றுக்கொள்கிறது.
தயிர், மோர், லஸ்ஸி போன்றவை மிகவும் நல்ல உணவுகளாகும். இவற்றை நாம் தினமும் உட்கொள்ள வேண்டும்.
அதேபோல, கீரைகளும் நார்ச்சத்துக்கான சிறந்த ஆதாரமாகும். கீரையும் மக்காச்சோள ரொட்டியும் நமக்கு மிகவும் நல்ல உணவுகள்.
இப்போதெல்லாம் புரோபயாடிக்குகள், புரோபயாடிக் தயிர் மற்றும் இதுபோன்ற பிற பொருள்களின் வணிகமயமாக்கல் அதிகரித்துள்ளது.
இவற்றுக்கும் சில பயன்கள் இருக்கலாம். ஆனால், நமது அன்றாட உணவுப் பழக்கத்தில் இவை கட்டாயம் இடம்பெற வேண்டியவை என்று கூற முடியாது.
நமது அன்றாட உணவு மற்றும் குடிநீர் பழக்கங்களைச் சரியாகப் பராமரித்தாலே போதும். இதுபோன்ற பொருள்களைத் தனியாக எடுத்துக்கொள்ள வேண்டிய அவசியமில்லை.
- இது, பிபிசிக்காக கலெக்டிவ் நியூஸ்ரூம் வெளியீடு
































