174 பேரை காப்பாற்றிய இந்திய விமானி பற்றி சர்வதேச ஊடகங்கள் கூறுவது என்ன?

இந்திய விமானி ஸ்மித் மச்சார், இஸ்ரேல் நோக்கிச் சென்ற ஃப்ளைதுபை விமானம் விபத்துக்கு உள்ளாவதைத் தடுத்து காப்பாற்றியதற்காக நாயகனாகப் போற்றப்படுகிறார். உலகம் முழுவதும் உள்ள ஊடகங்களில் ஸ்மித் மச்சார் பாராட்டப்பட்டு வருவதுடன், அவரது வாழ்க்கையின் ஒவ்வோர் அம்சமும் ஆராயப்பட்டு வருகிறது.

விமானப் போக்குவரத்து என்பது ஸ்மித்தின் சிறு வயது கனவுகளில் ஒன்றாக ஒருபோதும் இருந்ததில்லை என்று ராய்ட்டர்ஸ் செய்தி முகமை தனது செய்தியில் தெரிவித்துள்ளது.

"மச்சார் தனது குடும்பத்தின் ஜவுளித் தொழிலை எடுத்து நடத்த வேண்டுமென்ற எண்ணத்தில் இருந்தார். ஆனால், 19 வயதில் அவருக்கு விமானப் போக்குவரத்து மீது ஆர்வம் ஏற்பட்டது. இது அவரது தாயாருக்கு மிகுந்த அதிர்ச்சியை ஏற்படுத்தியது. ஆயிரக்கணக்கான மணிநேரம் விமானங்களை இயக்கிய பிறகும், விமானப் போக்குவரத்து மீதான மச்சாரின் காதல் காக்பிட்டுக்கு உள்ளேயே இருக்கிறது. தரையில் இருப்பவர்களிடம் அதைப் பற்றிப் பேசுவதை அவர் தவிர்க்கிறார்" என்று ராய்ட்டர்ஸ் குறிப்பிட்டுள்ளது.

புதன் கிழமை, அந்த விமானம் தபூக் நகருக்கு திருப்பிவிடப்பட்டது. இஸ்ரேல் அதிகாரிகளின் கூற்றுப்படி, துணை விமானி நடுவானில் மச்சாரை தாக்க முயன்றதாகவும், 174 பேரை ஏற்றிச் சென்ற விமானத்தை விபத்துக்குள்ளாக்க முயன்றதாகவும் கூறப்படுகிறது.

"மும்பையைச் சேர்ந்த மச்சார், ரத்தம் சிந்த காக்பிட் தரையில் கிடந்தபோது, காக்பிட் கதவைத் திறப்பதற்கான வெளியீட்டு அமைப்பைச் செயல்படுத்த முடிந்தது. பின்னர் பயணிகளும் விமானப் பணியாளர்களும் துணை விமானியை கட்டுப்படுத்தினர். பயணிகளாக அந்த விமானத்தில் பயணித்த ஃப்ளைதுபையை சேர்ந்த இரு விமானிகள் விமானக் கட்டுப்பாட்டைக் கையில் எடுத்து அதை சௌதியில் தரையிறக்க உதவினர்" என்று ராய்ட்டர்ஸ் தெரிவித்துள்ளது.

போயிங் 737 விமானத்தை இயக்குவதில் அனுபவம் வாய்ந்த கேப்டன் மச்சார், கிட்டத்தட்ட 15 ஆண்டுகளாக நீடிக்கும் தனது பணிக் காலத்தில் சுமார் 9,750 மணிநேரம் விமானத்தை இயக்கியுள்ளார். இருப்பினும், அவர் விமானத் துறைக்குள் மிகவும் தாமதமாகவே நுழைந்ததாகவும் கூறப்படுகிறது.

விமானி ஆக வேண்டுமென சிறு வயதில் கனவு காணவில்லை

"இந்தக் காலகட்டத்தில் இருக்கும் பல விமானிகளைப் போலன்றி, விமானப் போக்குவரத்து என்பது எனது சிறுவயதுக் கனவு அல்ல. என் வாழ்க்கையில் மிகவும் தாமதமாகத்தான் அது வந்தது" என்று 2025ஆம் ஆண்டு ஜலக் மேத்தாவின் யூட்யூப் சேனலுக்கு அளித்த பேட்டியில் மச்சார் கூறினார்.

பள்ளிப் படிப்புக்குப் பிறகு, குடும்பத் தொழிலைத் தொடர்ந்து நடத்த வேண்டுமென்ற நோக்கில் ஜவுளிப் பொறியியல் படிப்பில் சேர்ந்தார். பின்னர், மும்பையிலுள்ள வெலிங்கர் மேலாண்மை நிறுவனத்தில் நிர்வாகம் படித்தார். 19 வயதில், விமானப் போக்குவரத்து தொடர்பான கருத்தரங்கு ஒன்றின் மூலம் விமானப் பயணம் குறித்த உலகத்தை அவர் அறிந்துகொண்டார்.

அந்தப் பேட்டியில் அவர், "அங்குதான் விமானப் போக்குவரத்து மீதான என் ஆர்வம் உண்மையில் தொடங்கியது. ஆரம்பத்தில் இந்தத் தொழிலை தேர்வு செய்வது குறித்து எனது தாயார் மிகவும் கவலைப்பட்டார்" என்று கூறினார்.

"தாமதம் எனது பிரச்னையல்ல. விமானத்தில் இருப்பவர்கள் பாதுகாப்பாக வெளியேற வேண்டும் என்பதுதான் எனக்கு முக்கியம். நான் காக்பிட்டை விட்டோ அல்லது விமானத்தை விட்டோ வெளியேறும்போதோ, நான் ஒரு விமானி என்பது யாருக்கும் தெரிய வேண்டாமென விரும்புகிறேன். விமானப் போக்குவரத்து குறித்துப் பேசவும் விரும்பவில்லை. நான் சீருடையை அணிந்தவுடன், வேறு எந்தப் பேச்சுக்கும் இடமில்லை. உங்கள் வேலையைச் செய்ய வேண்டும், அதை முடிக்க வேண்டும். காக்பிட்டை விட்டு வெளியேறியதும் அவ்வளவுதான். அதைப் பற்றிச் சிந்திப்பதை நிறுத்திவிட வேண்டும். இப்போது வேறு ஒருவருக்கு நீங்கள் தேவைப்படுகிறீர்கள். குழந்தைகள் இருக்கிறார்கள். அவர்கள் உங்களுடன் விளையாட விரும்புகிறார்கள்" என்றார்.

"மச்சார் " நியூசிலாந்தில் 18 மாதங்கள் பயிற்சி பெற்றார். எனது முன்னாள் மாணவர் இந்தக் கடினமான சூழ்நிலையை மிகச் சிறப்பாகக் கையாண்டதில் நான் மகிழ்ச்சியடைகிறேன் என்று, ஸ்மித்தின் முன்னாள் பயிற்சியாளரும் மெயின்லேண்ட் ஏர் நிறுவனத்தைச் சேர்ந்தவருமான பிலிப் கீன், நியூசிலாந்து செய்தி இணையதளமான ஆர்என்இசட்-க்கு தெரிவித்தார்.

"அவரது உடலில் அந்தக் கத்தி குத்தப்பட்டிருந்த நிலையிலும், அவர் அந்தச் சூழ்நிலையைத் தன்னால் முடிந்த மிகச் சிறந்த முறையில் கையாண்ட விதம் குறித்துப் படித்ததில் நான் மிகவும் மகிழ்ச்சி அடைந்தேன்" என்று கீன், ஆர்என்இசட்-ன் 'செக்பாயின்ட்' நிகழ்ச்சியிடம் கூறினார்.

முன்னதாக, நியூசிலாந்து ஹெரால்டு செய்தித்தாளிடம் மச்சாரை பற்றி பேசிய கீன், அவரை சற்றே சுறுசுறுப்பான மற்றும் சராசரிக்கும் மேலான விமானி என்று விவரித்திருந்தார். "இது முற்றிலும் பயமுறுத்தக்கூடியது. அவர் இன்னும் உயிருடன் இருக்கிறார் என்பது ஒரு முக்கியமான விஷயம். அது மிக அதிக உயரத்தில் இருந்து கீழே விழுந்து கொண்டிருந்தது. விமானம் உடைந்து போகாமல் இருந்தது நல்ல விஷயம். அந்த விமானிகள் அதைச் சிறப்பாகக் கையாண்டனர்," என்று அவர் கூறினார்.

ஸ்மித்துடன் மின்னஞ்சல் மூலம் தொடர்பில் இருந்ததாக கீன் தெரிவித்தார். நியூசிலாந்துக்கான இஸ்ரேல் தூதர் அலோன் ரோத், விமானம் பாதுகாப்பாகத் தரையிறங்கியது ஒரு அற்புதம் என்றே கூறலாம் எனக் கூறினார். குறிப்பாக, ஏற்பட்ட சேதத்தின் அளவை கருத்தில் கொள்ளும்போது இது குறிப்பிடத்தக்கது என்றும் அவர் தெரிவித்தார்.

"தாக்குதல் நடத்திய நபரை வெளியேற்றிய இஸ்ரேலியர், காக்பிட் கருவிகளைக் கட்டுப்பாட்டுக்குள் கொண்டு வந்து, சுமார் 20,000 அடி உயரத்தில் இருந்த விமானம் ஒரு நிமிடத்தில் வேகமாக கீழே இறங்குவதைத் தடுத்தார்" என்று ரோத் கூறினார்.

"அதனால், விமானம் விபத்துக்குள்ளாகுவதற்கு சில விநாடிகள் மட்டுமே இருந்தன. படுகாயமடைந்த நிலையிலும், விமானத்தில் இருந்த மற்றவர்கள் உதவுவதற்காக காக்பிட் கதவைத் திறக்க முடிந்த விமானி ஸ்மித் மச்சாரின் துணிச்சலை நான் பாராட்டுகிறேன்" என்று அவர் கூறினார்.

ஒரு கர்ப்பிணிப் பெண் 'பிரசவ வலி வருவதாக' கூறியபோது...

பிலிப் கீன் அமெரிக்க செய்தி ஒளிபரப்பு நிறுவனமான சிஎன்என்-க்கு கூறுகையில், "அவர் எப்போதும் மகிழ்ச்சியான இளைஞராக இருந்தார். மிகவும் கடினமாக உழைத்தார்" என்றார்.

"அவருக்கென்று தனித்துவமான புன்னகை இருந்தது. அவர் மிகவும் மகிழ்ச்சியான மனிதர்" என்று டுனெடினை சேர்ந்த மெயின்லேண்ட் ஏர் நிறுவனத்தின் தலைமைச் செயல் அதிகாரியான கீன் கூறினார்.

புதன்கிழமை நடந்த சம்பவத்திற்கு முன்பு, 15 ஆண்டுகளுக்கும் மேலான தனது விமானப் பயண அனுபவத்தில் அவர் எதிர்கொண்ட மிகவும் வித்தியாசமான சம்பவங்களில் ஒன்று, விமானத்தில் குழந்தை பிறந்த சம்பவமாகும். விமானத்தில் இருந்த ஒரு பெண்ணுக்கு பிரசவ தேதி இன்னும் வராத நிலையில், அவருக்குப் பிரசவ வலி ஏற்பட்டதாக மிச்சார் 'போனா-ஃபைட் பேன்டர்' பாட்காஸ்டில் தெரிவித்தார்.

"ஏழு முதல் 10 நிமிடங்களுக்குள், 'கேப்டன், இப்போது குழந்தை பிறக்கப் போகிறது' என்று அந்தப் பெண் கூறத் தொடங்கியதாக" அவர் கூறினார்.

இதையடுத்து, அருகிலுள்ள விமானத் தளம் மற்றும் பாதுகாப்பாக விமானத்தைத் தரையிறக்குவதற்கான சூழ்நிலைகள் குறித்து தானும் முதல் அதிகாரியும் தகவல்களைச் சேகரிக்கத் தொடங்கியதாக மச்சார் கூறினார்.

"அனைத்து விமானத் தளங்களிலும் வானிலை நிலவரத்தைச் சரிபார்த்து, நடைமுறையில் எது சாத்தியம் என்பதைத் தீர்மானித்தோம். எங்களிடம் ஆறு அல்லது ஏழு நிமிடங்கள் இருந்தன. திடீரென அடுத்த சில நிமிடங்களில், 'விமானத்தில் ஒரு குழந்தை இருக்கிறது' என்று எங்களுக்கு அழைப்பு வந்தது. தாயும் குழந்தையும் நலமாக இருந்தனர்" என்று அவர் கூறினார்.

நியூசிலாந்தில் இருந்து துபைக்குச் சென்ற ஃப்ளைதுபை விமானத்தில் மச்சாரின் துணிச்சல் குறித்த செய்தி வெளியானதைத் தொடர்ந்து, அவருக்குப் பயிற்சியளித்த முன்னாள் பயிற்சியாளர் கீன், தான் ஒரு காலத்தில் பயிற்சி அளித்த அந்த இளைஞரைப் பாராட்டினார்.

"இது உண்மையிலேயே குறிப்பிடத்தக்க சாதனை" என்று அவர் சிஎன்என்-க்கு தெரிவித்தார். "ஒரு சில விநாடிகளில் விமானத்தில் இருந்த அனைவரும் உயிரிழந்திருக்கக்கூடும். அதிர்ஷ்டவசமாக, அவர் கதவைத் திறக்க முடிந்தது. அதிர்ஷ்டவசமாக, அவரால் தாக்குப் பிடித்து அனைவரின் உயிரையும் காப்பாற்ற முடிந்தது. மேலும் அரை நிமிடம் கடந்திருந்தால், எல்லாம் முடிந்திருக்கும்" என்றார்.

"நான் அவரைப் பற்றி மிகவும் பெருமைப்படுகிறேன். அந்தச் சூழ்நிலையை அவர் கையாண்ட விதம் குறித்து மிகவும் பெருமைப்படுகிறேன். இறுதியில் எல்லாம் நல்லபடியாக முடிந்தது மகிழ்ச்சியாக இருக்கிறது" என்று அவர் கூறினார்.

"இரண்டு பிள்ளைகளின் தந்தையான 39 வயது ஸ்மித் மச்சார், இந்தத் தாக்குதலில் படுகாயம் அடைந்தார். தாக்குதலுக்குப் பிறகு விமானத்தின் உள்ளே ஒரு கோரமான காட்சி வெளிப்பட்டது. விமானியின் அறை முழுவதும் இரத்தம் சிதறிக்கிடந்தது, மேலும் படுகாயம் அடைந்த விமானி தரையில் கிடந்தார்" என சிஎன்என் செய்தி வெளியிட்டது.

விமானப் பயணத்தின் போது ஸ்மித்துக்கு சிகிச்சை அளித்த மருத்துவர்

விமானத்தில் பயணித்து, மச்சாருக்கு சிகிச்சையளிக்க உதவிய பல் மருத்துவரான ஷோட்டா மூசாயேவ், மச்சார் அதிக இரத்தத்தை இழந்து பலத்த காயமடைந்திருந்ததாக சிஎன்என்-னிடம் தெரிவித்தார்.

"இன்னும் சில கணங்கள் நாம் காத்திருந்திருந்தால், அவரை இழந்திருப்போம் என்று நான் நினைக்கிறேன். அவரது இரத்த அழுத்தம் மிக வேகமாக குறைந்தது, அவர் திடீரென மயங்கி விழுந்தார், மேலும் எங்கும் இரத்தம் இருந்தது" என்று அவர் கூறினார்.

அவர்களின் வீரம் "9/11 போன்ற ஒரு துயரச் சம்பவம் நிகழ்வதைத் தடுக்க உதவியது" என்று இஸ்ரேலியப் பிரதமர் பெஞ்சமின் நெதன்யாகு சிஎன்என்-னிடம் தெரிவித்தார்.

வியாழக்கிழமையன்று இஸ்ரேல் ராணுவ வானொலியிடம் பேசிய ஷோட்டா மூசாயேவ், "விமானத்தின் காக்பிட் முழுவதும் இரத்தத்தால் நிரம்பியிருந்தது. மச்சாரின் கழுத்திலும் கைகளிலும் கடுமையான காயங்கள் ஏற்பட்டிருந்தன. கத்தித் தாக்குதலில் கேப்டனின் இடது கை கிட்டத்தட்ட இரண்டாக வெட்டப்பட்டிருந்தது.

மச்சாரின் நாடித்துடிப்பு குறைந்து அவர் மயக்கமடையத் தொடங்கியபோது, ​​மாற்று விமானிகளை விமானத்தை முடிந்தவரை விரைவாகத் தரையிறக்குமாறு நாங்கள் கேட்டுக்கொண்டோம்.

அதற்குள், அந்த விமானிகள் விமானத்தின் கட்டுப்பாட்டை எடுத்துக்கொண்டனர். சவூதி அரேபியாவின் வடமேற்கில் உள்ள தபூக் நகரில் விமானம் தரையிறங்கியது," என்று கூறினார்.

அவர் சொன்னார், "அவரால் இஸ்ரேல் வரையிலான முழுப் பயணத்தையும் மேற்கொண்டிருக்க முடிந்திருக்கும் என்று நான் நினைக்கவில்லை. அவர் வாழ விரும்பினார், சாக விரும்பவில்லை.

ஒருவேளை நான் பிழைக்கவில்லை என்றால், என் பிள்ளைகளுக்கு ஒரு செய்தி அனுப்புமாறு கேப்டன் என்னிடம் கூறினார். நான் அவர்களிடம், 'கடவுள் உங்களுடன் இருக்கிறார், பிரார்த்தனை செய்யுங்கள். எல்லாம் சரியாகிவிடும். நாங்கள் உங்களுடன் இருக்கிறோம்' என்று சொன்னேன்."

"ஒரு இஸ்ரேலிய அதிகாரியின் கூற்றுப்படி, துணை விமானி ஓமன் குடிமகன் ஆவார். சௌதி அதிகாரிகள் அவரிடம் விசாரணை நடத்துவார்கள் என்று நெதன்யாகு கூறினார்" என பிரிட்டிஷ் செய்தித்தாளான ஃபைனான்சியல் டைம்ஸ் செய்தி வெளியிட்டது.

"துணை விமானி ஒரு பயங்கரவாதியாகவோ அல்லது மனநிலை பிறழ்ந்தவராகவோ இருந்திருக்கலாம், அவர் விமானியைத் தாக்கியுள்ளார் என்று தெரிகிறது" என அமெரிக்க அதிபர் டொனால்ட் டிரம்ப் ஓவல் அலுவலகத்தில் செய்தியாளர்களிடம் தெரிவித்தார்.

இந்தச் சம்பவம் குறித்து ஓமன் அதிகாரிகள் கருத்து எதுவும் தெரிவிக்கவில்லை, மேலும் துணை விமானி தாக்கியதற்கான காரணமும் உடனடியாகத் தெரியவில்லை.

- இது, பிபிசிக்காக கலெக்டிவ் நியூஸ்ரூம் வெளியீடு