ஆணுறுப்பை பெரிதாக்கும் 'ஃபில்லர்' சிகிச்சையில் அபாயம் இருந்தும் இவர்கள் செய்வது ஏன்?

ஆஜேசன் ஒரு 'கோக் கேன்' போன்ற தோற்றத்தை விரும்பவில்லை. இது, அதிகப்படியான ஃபில்லர் மூலம் பெரிதாக்கப்பட்டு, குட்டையான, தடிமனான குளிர்பான கேன் போலத் தோற்றமளிக்கும் ஆணுறுப்பை குறிக்கும் ஒரு புனைப்பெயர்.

"சிலர் மிகவும் எல்லை மீறிச் செல்கிறார்கள்," என்று மான்செஸ்டரில் நாங்கள் சந்தித்தபோது ஜேசன் என்னிடம் கூறினார்.

அவரது சிகிச்சையானது அவரது ஆணுறுப்பின் தடிமனை 16% அதிகரித்தது. அவரும் அவரது துணையும் இந்த முடிவில் மிகவும் மகிழ்ச்சியாக இருப்பதாகவும், இது அவருக்கு "தன்னம்பிக்கையை அதிகரித்துள்ளதாகவும்" ஜேசன் கூறுகிறார்.

"எல்லாம் இன்னும் சாதாரணமாகவே செயல்படுகிறது," ஆனால் இப்போது "அந்தக் கூடுதல் சிறிய அகலத்துடன்" என்று ஜேசன் விளக்குகிறார்.

எத்தனை ஆண்கள் ஆணுறுப்பு ஃபில்லர்களை பெறுகிறார்கள் என்பது தெரியவில்லை. உதடு ஃபில்லர்களை போலன்றி, அவற்றின் பிரபலத்தை பொதுவெளியில் எளிதாகக் காண முடியாது. இதற்கான ஒழுங்குமுறைகள் குறைவாகவே உள்ளன, எத்தனை சிகிச்சைகள் மேற்கொள்ளப்படுகின்றன என்பதற்கான அதிகாரப்பூர்வ பதிவும் இல்லை, ஏனெனில் கிட்டத்தட்ட யார் வேண்டுமானாலும் இந்த சிகிச்சையை வழங்கத் தொடங்கலாம்.

கடந்த குளிர்கால ஒலிம்பிக்கின்போது, ஆணுறுப்பு ஃபில்லர்கள் ஒரு விசித்திரமான சதிக் கோட்பாட்டின் ஒரு பகுதியாகவும் மாறின. ஆண் பனிச் சறுக்கு வீரர்கள் தங்கள் ஆணுறுப்புகளைப் பெரிதாக்க ஃபில்லர்களை பயன்படுத்துவதாகவும், அதன் மூலம் தங்கள் உடைகளின் பரப்பளவை அதிகரிக்கச் செய்து, அவர்கள் மேலும் தொலைவு குதிக்க முடியும் என்றும் வதந்திகள் பரவின.

ஆனால், இந்தச் செயல்முறையில் கடுமையான அபாயங்கள் இருக்கலாம். தவறாகச் செய்யப்பட்ட சிகிச்சைகள் காரணமாக ஆண்களின் ஆணுறுப்பு கருப்பாக மாறியதாலும், தோல் 'உதிரத்' தொடங்கியதாலும், அவர்கள் அவசர சிகிச்சைப் பிரிவுக்குச் சென்றுள்ளனர். பிரிட்டிஷ் சிறுநீரக அறுவை சிகிச்சை நிபுணர்கள் சங்கமும் இந்தச் செயல்முறைகள் குறித்து ஆண்களை எச்சரித்துள்ளது.

அப்படியானால், ஆண்கள் ஏன் ஆணுறுப்பு ஃபில்லர்களை தேர்வு செய்கிறார்கள்? அதனால் ஏற்படும் அபாயங்கள் என்ன? ஆணுறுப்பு ஃபில்லர் சிகிச்சையில் அபாயம் இருந்தும் ஆண்கள் அதனை செய்வது ஏன்?

ஆணுறுப்பின் அளவை அதிகரிக்க ஃபில்லர் சிகிச்சையை ஏன் செய்துகொள்ள முடிவு செய்தார் என்பது குறித்து ஜேசன் பிபிசியிடம் வெளிப்படையாகப் பேசினார். ஆனால், அவர் தனது அடையாளத்தை வெளிப்படுத்திக் கொள்ள விரும்பவில்லை.

தனது ஆணுறுப்பின் நீளம் குறித்து அவருக்குத் திருப்தி இருந்த போதிலும், "சிறிது சீரான தன்மையையும்" (symmetry) கூடுதல் தடிமனையும் பெற்று, "அழகான, சமச்சீரான தோற்றத்தை" அடைய அவர் விரும்பினார்.

"அதில் ஏதோ குறை இருப்பதாக நீங்கள் உணர்ந்தால், அதைச் சரிசெய்து கொள்வதில் என்ன தவறு?" என்று ஜேசன் கேட்கிறார்.

பல்வேறு வழிமுறைகளை ஓராண்டு காலம் பரிசீலித்த பிறகு, அறுவை சிகிச்சை செய்து கொள்வதில்லை என்று அவர் முடிவு செய்தார். அதற்குப் பதிலாக, 'ஹையலூரோனிக் அமிலம்' (hyaluronic acid) எனப்படும் தற்காலிக ஃபில்லர் முறையைத் தேர்ந்தெடுத்தார். இதன் மூலம், சிகிச்சையின் முடிவு பிடிக்காவிட்டாலும், அந்த ஃபில்லர் "காலப்போக்கில் தானாகவே கரைந்துவிடும்" என்ற நிலை இருந்தது.

தனது ஆண்மையை நிரூபிப்பதற்காக இந்த முடிவை எடுக்கவில்லை என்று கூறிய ஜேசன், "ஆணுறுப்பின் அளவுதான் ஓர் ஆணின் பெருமையை அல்லது ஆண்மையைத் தீர்மானிக்கிறது' என்ற கருத்தை நான் ஏற்பதில்லை" என்று கூறியதுடன், மாறாக ஆண்கள் எப்படித் தோற்றமளிக்க வேண்டும் என்பது குறித்த சமூகத்தின் எதிர்பார்ப்புகள் மாறிவிட்டதாக அவர் நம்புகிறார்.

"பெண்கள் மட்டுமல்ல, ஆண்களும் தங்களை நவீன மாற்றங்களுக்கு ஏற்ப மாற்றிக் கொள்ள வேண்டியுள்ளது.

"உண்மையில் சமூகம் மாறிக் கொண்டிருக்கிறது. ஊடகங்கள் இந்த விஷயங்களை சித்தரிக்கும் விதம் இப்போது அன்றாட வாழ்வில் பெரும் தாக்கத்தை ஏற்படுத்துவதாக நான் நினைக்கிறேன்," என்று அவர் கூறுகிறார்.

"எங்கு சென்றாலும், மிகச் சிறந்த தோற்றம் கொண்ட ஒருவரையேனும் பார்க்காமல் இருக்க முடிவதில்லை என்ற நிலை உள்ளது."

ஆணுறுப்பின் அளவை அதிகரிக்கும் சிகிச்சைகளை வழங்கும் மருத்துவமனைகளின் இணையதளங்கள், தங்கள் உடல் அமைப்பு குறித்து ஏற்கெனவே தாழ்வு மனப்பான்மை அல்லது பாதுகாப்பற்ற உணர்வு கொண்ட ஆண்களை ஈர்ப்பதற்காக, "உங்கள் ஆணுறுப்பின் அளவைக் கண்டு நீங்கள் கூச்சப்படுகிறீர்களா?" என்பது போன்ற கேள்விகளைப் பயன்படுத்துகின்றன.

ஆணுறுப்பின் அளவை அதிகரிக்கவோ அல்லது அதன் தோற்றத்தை மாற்றவோ பல வழிகள் உள்ளன. இதில் அறுவை சிகிச்சை மற்றும் அறுவை சிகிச்சை அல்லாத முறைகள், அத்துடன் ஊசி மூலம் செலுத்தக்கூடிய பல்வேறு பொருட்கள் ஆகியவை அடங்கும்.

'ஹையலூரோனிக் அமிலம்' எனப்படும் மிகவும் பொதுவான முறை ஜெல் போன்ற பொருளை ஊசி மூலம் செலுத்துவதாகும். உதடுகளின் அளவை அதிகரிக்கப் பயன்படுத்தப்படும் ஃபில்லர்களிலும் இதுவே முக்கியப் பொருளாக உள்ளது.

ஹையலூரோனிக் அமிலம் என்பது மனித உடலில் இயற்கையாகவே காணப்படும் ஒரு வகை சர்க்கரை மூலக்கூறு. இது நீரை ஈர்த்துத் தக்கவைத்துக் கொள்ளும் தன்மை கொண்டதால், சில நேரங்களில் "ஈரப்பதத்தை ஈர்க்கும் காந்தம்" என்றும் அழைக்கப்படுகிறது.

மருத்துவர் ஜாவேத் ஹுசைன், கிரேட்டர் மான்செஸ்டரின் ப்ரெஸ்ட்விச் பகுதியில் உள்ள தனது மருத்துவமனையில் ஓர் ஆண்டுக்கும் மேலாக ஆணுறுப்பு ஃபில்லர் (penis filler) சிகிச்சைகளை வழங்கி வருகிறார்.

அழகுசீரமைப்புச் சிகிச்சைகள் துறைக்கு மாறுவதற்கு முன்பு ஹுசைன் ஒரு மருத்துவராகப் பயிற்சி பெற்றவர். இருப்பினும், தற்போதைய விதிகளின்படி, ஆணுறுப்பு ஃபில்லர் சிகிச்சைகளைச் செய்வதற்கு ஒருவருக்கு மருத்துவப் பயிற்சி இருக்க வேண்டிய அவசியமில்லை.

இந்த சிகிச்சைக்கான தேவை அதிகரித்து வருவதாக அவர் கூறுகிறார். இருபதுகளின் மத்தியில் உள்ளவர்கள் உள்பட பல்வேறு வயது ஆண்களுக்கு அவர் சிகிச்சை அளித்துள்ளார். அவரது வயதான நோயாளி ஒருவருக்கு 72 வயதாகிறது.

சிகிச்சைக்கு முன், நோயாளிகள் தங்கள் உடல்நலம், சிகிச்சைக்கான காரணம், எதிர்பார்க்கப்படும் முடிவுகள் மற்றும் சாத்தியமான அபாயங்கள் குறித்த ஆலோசனைகளைப் பெறுகிறார்கள்.

சிகிச்சையின் போது, ஆணுறுப்பின் மேல் பகுதி மற்றும் இரு பக்கங்கள் என மூன்று இடங்களில் 'ஹையலூரோனிக் அமிலம்' செலுத்தப்படுகிறது. 'கானுலா' எனப்படும் மெல்லிய குழாய் மூலம் இந்த ஃபில்லர் செலுத்தப்படுகிறது. இது ஆணுறுப்பின் அடிப்பகுதியில் நுழைந்து அதன் தண்டுப் பகுதி வழியாகச் செல்கிறது.

பின்னர், ஃபில்லர் சீராகப் பரவும் வகையில் மென்மையாக மசாஜ் செய்யப்படுகிறது. நோயாளிகள் வீட்டிலும் இதைத் தொடர்ந்து செய்யுமாறு அறிவுறுத்தப்படுகிறார்கள்.

இந்த சிகிச்சைக்கு 3,500 பவுண்டுகள் வரை செலவாகலாம். ஆணுறுப்பின் தடிமனை 10% முதல் 20% வரை அதிகரிக்க முடியும் என்றும், இதன் பலன்கள் பொதுவாக ஆறு முதல் ஒன்பது மாதங்கள் வரை நீடிக்கும் என்றும் ஹுசைன் கூறுகிறார்.

ஆனால் இதில் சில அபாயங்களும் உள்ளன. வலி, சிராய்ப்பு, ஃபில்லர் சீரற்ற முறையில் பரவுதல் போன்றவை குறைவான தீவிரத்தன்மை கொண்ட சிக்கல்களாக இருக்கலாம். தொற்று ஏற்படுவது போன்ற சிக்கல்கள் மிகவும் தீவிரமானவையாக அமையலாம். ஃபில்லர்களை பயன்படுத்தும் எந்தவொரு சிகிச்சையிலும் இத்தகைய அபாயங்கள் ஏற்பட வாய்ப்புள்ளது.

ஆணுறுப்பு விறைப்புத் தன்மைக்குத் தேவையான முக்கிய திசுக்கள் மற்றும் ரத்த நாளங்களைச் சேதப்படுத்தும் அபாயமும் இதில் உள்ளது.

அறுவை சிகிச்சை நிபுணர்களிடையே கவலையை ஏற்படுத்தியுள்ள ஒரு சிகிச்சையை வழங்குவதில் உங்களுக்கு தயக்கம் ஏதும் இல்லாமல் இருப்பது எப்படி என்று கேட்கப்பட்டபோது, அவர்களின் கவலைகளைத் தான் "முழுமையாகப் புரிந்துகொள்வதாக" ஹுசைன் கூறுகிறார்.

அந்தக் கவலை அல்லது தயக்கம் என்பது சரியான நோக்கத்தில் இருந்தே எழுவதாகக் கூறிய அவர், அதேநேரம், இதற்கான சான்றுகள் பெருகி வருவதாகவும் நல்ல பலன் கிடைப்பதாகவும் குறிப்பிட்ட அவர், "இதனால் ஒரு நன்மையும் இருப்பதாக" கூறினார்.

ஏதேனும் சிக்கல் ஏற்பட்டால் அதற்கான "உடனடி செயல் திட்டம்" தன்னிடம் இருப்பதாக ஹுசைன் கூறுகிறார். இதில் 'ஃபில்லர்' எனப்படும் நிரப்பியை விரைவாகக் கரைக்கக்கூடிய மருந்துகள் அடங்கும். "நல்ல வேளையாக, அவற்றை நாங்கள் பயன்படுத்த வேண்டிய சூழல் இதுவரை ஏற்படவில்லை" என்று அவர் கூறுகிறார். இருப்பினும், பிபிசி இதைத் தனிப்பட்ட முறையில் உறுதிப்படுத்த முடியவில்லை.

இருப்பினும், வேறு ஓரிடத்தில் செய்துகொண்ட சிகிச்சையில் "மிக மோசமான பாதிப்புக்கு" உள்ளான பிறகு, உதவி கேட்டுத் தன்னை அணுகிய ஒரு நோயாளி பற்றி ஹுசைன் நினைவுகூர்ந்தார்.

தவறான வகை 'ஃபில்லர்' பயன்படுத்தப்பட்டதாகவும், அதனால் "ஆணுறுப்பின் தண்டுப் பகுதி கருப்பாக மாறத் தொடங்கி இருந்ததாகவும்" அவர் கூறுகிறார். அந்த சிகிச்சையானது ஆணுறுப்பின் ரத்த நாளங்களைச் சேதப்படுத்தியதால், தோல் திசுக்கள் இறந்துபோகும் நிலை (skin necrosis) ஏற்பட்டிருந்தது. அந்த நபர் உடனடியாக அவசர சிகிச்சைப் பிரிவுக்கு அனுப்பி வைக்கப்பட்டார்.

மான்செஸ்டரில் உள்ள தேசிய சுகாதார சேவையின் ஆண்கள் நல மருத்துவர் (andrologist) மற்றும் சிறுநீரக அறுவை சிகிச்சை நிபுணரான பேராசிரியர் வைபவ் மோட்கில், தவறான முறையில் செய்யப்பட்ட சிகிச்சைகளுக்குப் பிறகு மருத்துவமனைக்கு வந்த ஆண்களுக்கு சிகிச்சை அளித்துள்ளார்.

"அப்படிப்பட்ட பாதிப்பு ஏற்படும்போது, அது நோயாளிக்கு மிகுந்த மனவேதனையைத் தரக் கூடியதாக அமைவதாக," கூறினார்.

"தோல் திசுக்கள் இறந்துபோகும் நிலை (skin necrosis) ஏற்பட்ட ஆண்களை நான் பார்த்திருக்கிறேன். இதில் தோலின் ஒரு பகுதி இறந்து, மிகவும் கருப்பாக மாறி, பின்னர் உதிர்ந்துவிடும்," என்று அவர் நினைவுகூர்ந்தார்.

"ஆண்கள் 'இது மிகச் சிறப்பாக இருக்கும்' என்று நினைத்துச் செல்கிறார்கள், ஆனால் சிகிச்சைக்குப் பிறகு அவர்கள் சென்றபோது இருந்ததை விட அதிக அதிருப்தியுடன் வெளியே வரக்கூடும்."

தனது உண்மையான பெயரை வெளியிட விரும்பாத அலெக்ஸ் என்பவர், வேறு வகையான ஆணுறுப்பு பெரிதாக்கும் சிகிச்சைக்காக ஜெர்மனிக்கு சென்றார்.

ஆணுறுப்பை இடுப்பு எலும்புடன் இணைக்கும் தசைநாரை (ligament) வெட்டி, ஆணுறுப்பை நீளமாகத் தோற்றமளிக்கச் செய்யும் அறுவை சிகிச்சையை அவர் செய்துகொண்டார். மருத்துவர்கள் அவரது உடலில் இருந்தே சில கொழுப்பு செல்களை எடுத்து, ஆணுறுப்பைப் பெரிதாக்குவதற்காக அதனுள் செலுத்தினர்.

அறுவை சிகிச்சைக்குப் பிறகு கண்விழித்தபோது, அலெக்ஸ் கடுமையான வலியால் அவதிப்பட்டார், அவரால் எழுந்து நிற்கக்கூட முடியவில்லை.

"எனக்குக் கடுமையான சிராய்ப்புகள் ஏற்பட்டன, என் தொடையின் மேல் பகுதி முழுவதும் மஞ்சள் நிறமாக மாறியது. சுமார் ஒரு மாத காலத்திற்கு என்னால் சரியாக நடக்க முடியவில்லை," என்று அலெக்ஸ் கூறுகிறார்.

பின்னர் மோட்கிலின் மருத்துவமனையில் அலெக்ஸுக்கு சிகிச்சை அளிக்கப்பட்டது. இறுதியில் அவர் குணமடைந்துவிட்டதாகத் தெரிவிக்கப்பட்டது. "பலருக்கு இந்த அதிர்ஷ்டம் கிடைப்பதில்லை. நான் தப்பித்தேன்," என்று அவர் கூறுகிறார்.

"ஆரம்பத்தில் இருந்தே எனது ஆணுறுப்பு சிறிதாக இருக்கவில்லை" என்பது தனக்குத் தெரியும் என்று கூறும் அலெக்ஸ், ஆனால் பெரிய ஆணுறுப்புதான் "ஆண்மைக்குரியது, சிறந்தது" என்று சமூகம் மற்றும் ஆபாசப் படங்கள் தன்னை நம்ப வைத்துவிட்டதாகக் குறிப்பிடுகிறார்.

எத்தனை ஆணுறுப்பு பெரிதாக்கும் சிகிச்சைகள் மேற்கொள்ளப்படுகின்றன என்பதைக் காட்டும் அதிகாரப்பூர்வ தரவுகள் எதுவுமில்லை. ஆனால், இணைய தேடல்கள், விளம்பரங்கள், சமூக ஊடகங்கள் அனைத்தும் "இந்த எண்ணிக்கை அதிகரித்து வருவதையே சுட்டிக் காட்டுவதாக" மோட்கில் கூறுகிறார்.

இது இந்த சிகிச்சைகளுக்கு எதிராக அறிவுறுத்தும் புதிய பரிந்துரைகளை வெளியிட, பிரிட்டிஷ் சிறுநீரக அறுவை சிகிச்சை நிபுணர்கள் சங்கத்தைத் தூண்டியுள்ளது.

"நாங்கள் சமீபத்தில் வெளியிட்ட வழிகாட்டுதலின்படி, இதற்கான சான்றுகள் மிகவும் குறைவாக இருப்பதால், இந்த சிகிச்சைகள் எதையும் மேற்கொள்ள நாங்கள் பரிந்துரைக்க முடியாது," என்றார் மோட்கில்.

இந்த வழிகாட்டுதல், 3,750 ஆண்களை உள்ளடக்கிய 36 ஆய்வுகளை மதிப்பாய்வு செய்தது. ஆனால், இந்த சிகிச்சைகளின் "பாதுகாப்புத் தன்மையை" தெளிவாகப் புரிந்துகொள்ள இன்னும் போதுமான சான்றுகள் இல்லை என்று அது கூறியது.

ஃபில்லர்கள் ஆணுறுப்பை எவ்வாறு பாதிக்கின்றன என்பது குறித்த நீண்ட காலத் தகவல்கள் இல்லாதது ஒரு சிக்கலாகும். உதடு ஃபில்லர்களை போலவே, இந்த சிகிச்சையைச் செய்வதற்கு முறையான தகுதிகள் எதுவும் தேவையில்லை என்பதும் ஒரு கவலையாக உள்ளது.

இந்த சிகிச்சைகளை முழுமையாகத் தடை செய்வது "ஒருவேளை மிகவும் கடுமையானதாக இருக்கும்" என்று மோட்கில் கூறுகிறார். ஆனால், அவை தொடர்ந்து வழங்கப்பட்டால், இந்தத் துறைக்கு "மிகப்பெரிய அளவில் ஒழுங்குமுறை தேவை" என்றும் அவர் கூறுகிறார்.

ஆணுறுப்பு ஃபில்லர் சிகிச்சைகளைப் பதிவு செய்வதற்கும், நீண்ட காலத் தரவுகளைச் சேகரிப்பதற்கும் ஒரு தேசிய பதிவேடு வேண்டும் என்று அவர் விரும்புகிறார். இந்த சிகிச்சையை மேற்கொள்வதா வேண்டாமா என முடிவெடுப்பதற்கு முன், அதனால் ஏற்படக்கூடிய அபாயங்களையும் நன்மைகளையும் ஆண்கள் புரிந்துகொள்ள இது உதவும்.

மான்செஸ்டரில், தனது சிகிச்சையின் முடிவுகளில் மகிழ்ச்சி அடைவதாகவும், தற்போது பயன்படுத்தப்படும் ஃபில்லர்களின் விளைவு குறைந்தவுடன் மீண்டும் இந்த சிகிச்சையைச் செய்துகொள்ளப் போவதாகவும் ஜேசன் கூறுகிறார்.

- இது, பிபிசிக்காக கலெக்டிவ் நியூஸ்ரூம் வெளியீடு