காதலில் விழுந்த இவர்கள் 'தாங்கள் உடன்பிறப்புகளா' என்கிற ஐயம் தீர்க்க சட்டத்தை மீறி என்ன செய்தனர்?

"பிரச்னை என்னவென்றால் உங்களின் கொடையாளர் யார் எனத் தெரியாதபோது, அது எல்லோருமாக இருக்கக்கூடும் என நீங்கள் கற்பனை செய்துகொள்ளலாம்."

தனது உயிரியல் தந்தையைத் தேடி வந்த பிரான்ஸைச் சேர்ந்த ஆர்த்தர் கெர்மல்வெசென் கூறும் வரிகள் இவை.

விந்து கொடையாளர் மூலம் பிறந்த ஆர்த்தர் கெர்மல்வெசெனுக்கு அவர் சென்ற இடமெல்லாம் யாரேனும் தன்னுடைய தந்தையாக இருப்பார்களோ என்கிற எண்ணம் இருந்துகொண்டே இருந்தது.

"அது எனது ஆசிரியராக இருக்கக்கூடும், நான் பேருந்தில் சந்தித்த நபராக இருக்கக்கூடும் என கற்பனை செய்துகொண்டேன். எனக்கு மிகவும் கோபமாக இருந்தது, ஏனெனில் இவ்வாறு வாழ்வது சாத்தியமில்லாத ஒன்று," என்று அவர் தெரிவிக்கிறார்.

வயது வந்த பிறகு, பாரிஸைச் சேர்ந்த, மற்றுமொரு விந்து கொடையாளருக்குப் பிறந்த ஆட்ரே என்பவரை காதலிக்கத் தொடங்கிய பிறகு இந்தக் கேள்வி இன்னும் அதிக முக்கியத்துவம் வாய்ந்ததாக மாறியது.

அவர்கள் சந்தித்துக் கொண்ட தருணத்தை ஆட்ரே "முதல் சந்திப்பிலே காதல்" எனக் குறிப்பிடுகிறார். ஆனால், இந்தத் தொடர்பு ஒரு காதல் சார்ந்த ஈர்ப்பா அல்லது மரபணு ரீதியான ஈர்ப்பா?

அவர்கள் பிறந்தபோது பாரீஸில் இரண்டு விந்து வங்கிகள் மட்டுமே இருந்தன. அதோடு பல ஆண்கள் பல முறை விந்து கொடை அளித்துள்ளனர். அதனால் அவர்கள் ஒரு விதத்தில் சகோதரன் - சகோதரியாக இருப்பதற்கான நிஜமான சாத்தியங்கள் இருந்தன.

தங்களின் வாழ்க்கையைத் தொடங்குவதற்கு முன்பாக இருவரும் ஒருவருக்கொருவர் தொடர்புடையவர்களா என்பதைத் தெரிந்துகொள்ள ஆர்த்தர் மற்றும் ஆட்ரே விரும்பினர். ஆனால் பிரான்ஸில் மரபணு பரிசோதனை தொடர்பான சட்டங்கள் மற்றும் கொடையாளர் பெயர் மறைப்பு ஆகியவை அதற்கான விடைகளைக் கண்டடைவதைக் கடினமாக்கின.

பிரான்ஸில் ஒரு ஆராய்ச்சி விஞ்ஞானி, மருத்துவர் அல்லது நீதிபதி மட்டுமே மரபணு பரிசோதனைக்கு உத்தரவிட்டு மேற்பார்வையிட முடியும். மக்கள் வீட்டிலேயே பரிசோதனை செய்யும் கொள்ளும் கருவியை வைத்திருந்தால் 4,200 டாலருக்கும் அதிகமான அபராதம் செலுத்த வேண்டியிருக்கும். அதன் விளைவாக 23அன்ட்மீ, ஆங்க்செஸ்ட்ரி மற்றும் மைஹெரிடேஜ் போன்ற நிறுவனங்கள் தங்களின் பரிசோதனை கருவிகளை பிரான்ஸில் விற்பனை செய்வதில்லை.

1994 முதல் அமலில் இருக்கும் இந்தச் சட்டத்தின் ஆதரவாளர்கள், இது முக்கியமான மரபணு சார்ந்த தரவுகள் வணிக நிறுவனங்களுக்கு கொடுக்கப்படாமல் தடுத்து எதிர்பாராத முடிவுகளால் குடும்ப தகராறுகள் ஏற்படாமல் தடுப்பதாகக் கூறுகின்றனர்.

ஆனால் ஐரோப்பாவில் இத்தகைய பரிசோதனைகளை மேற்கொள்வதை குற்றமாக்கும் ஒரே நாடாக பிரான்ஸ் இருப்பதாக ஆர்த்தர் சுட்டிக்காட்டுகிறார்.

பிரசாரத்தின் மூலம் சந்தித்த இணையர்கள்

ஆட்ரேவின் பெற்றோர் அவர் கொடையாளர் மூலம் தான் பிறந்தார் என்பதைத் தெரிவிக்கும் முன்னரே அவர் உயிரியல் அறவியல் சட்டத்தில் நிபுணத்துவம் பெற்ற வழக்கறிஞராக தேர்ச்சி பெற்றிருந்தார். அதனால் அவர் 30 ஆண்டுகளாக அமலில் இருக்கும், ஒரு கொடையாளரின் மறைவுக்குப் பிறகும் அவரது அடையாளத்தை மறைப்பதற்கான உத்தரவாதத்தை வழங்கும் பிரெஞ்சு சட்டத்தை நன்கு அறிந்திருந்தார்.

ஆனால் அட்ரே அத்தகைய சட்டங்கள் எதுவும் அமலில் இல்லாத 1979-ஆம் ஆண்டு பிறந்தார்.

1994-க்கு முன்பாக கொடையாளர் மூலம் பிறந்தவர்களைத் தேடும்போது தான் அவர் ஆர்த்தரைச் சந்தித்தார். தனது உயிரியல் ரீதியான பூர்வீகத்தைப் பற்றி அதிகம் தெரிந்து கொள்வதற்கான ஆசையை வெளிப்படுத்தி புத்தகம் ஒன்றை ஆர்த்தர் எழுதியுள்ளார்.

தான் வெளிப்படுத்த கஷ்டப்படும் உணர்வுகளை அவர் எவ்வளவு துல்லியமாக வெளிப்படுத்தினார் என்பதைப் பார்த்து ஆச்சரியப்பட்டுப் போனதாக ஆட்ரே கூறுகிறார். இருவருக்கும் அன்பான குடும்பங்கள் இருந்தன. ஆனாலும் அவர்களை உருவாக்க உதவிய அடையாளம் தெரியாத நபர்கள் பற்றிய கேள்விகளை நோக்கி அவர்கள் இழுக்கப்படுவதை இருவருமே உணர்ந்தனர்.

அவர்கள் நேரில் சந்தித்தபோது ஈர்ப்பு மட்டுமல்ல பிரச்னையும் உடனடியாகவே இருந்தது.

அவர்களுக்கு தங்களின் தந்தைகளைப் பற்றி தெரிந்துகொள்ள வேண்டும். ஆனால் அதிகாரத்தில் இருக்கும் யாரும் அதை அவர்களுக்குச் சொல்வதற்கு தயாராக இல்லை.

உண்மைக்கான தேடல்

பல மாத தேடலுக்குப் பிறகு தெற்கு பிரான்ஸில் அவர்கள் ஒரு மருத்துவரைக் கண்டறிந்தனர். அவர் 1,028 டாலர் பெற்றுக் கொண்டு மரபணு பரிசோதனை நடத்தி அவர்கள் இருவரும் ஒருவரோடு ஒருவர் தொடர்பு இல்லாதவர்கள் என்பதைக் கண்டறிந்தார். ஆனால் அவரை நம்ப முடியுமா என்பதில் இருவரும் உறுதியாக இல்லை. "அவர் ஒரு போலி மருத்துவர் என நாங்கள் அஞ்சினோம்," என்கிறார் ஆட்ரே.

வீட்டில் வைத்து பரிசோதனை செய்யும் கருவி மூலம் முடிவுகளைத் தெரிந்து கொள்ளலாம் என்றும் அவர்கள் பரிசீலித்தனர். ஆனால் வழக்கறிஞரான ஆட்ரே சட்டத்திற்கு உட்பட்டு நடக்க வேண்டும் என்பதில் உறுதியாக இருந்தார்.

எனவே 2010 முதல் பிரெஞ்சு அமைப்புக்கு எதிராக பல கட்ட சட்டப்போராட்டங்களை நடத்தினார்.

அவரது கொடையாளர் இன்னும் உயிருடன் இருக்கிறாரா, அப்படியென்றால் அவர் தற்போதும் பெயரை வெளியிட விரும்பாமல் இருக்கிறாரா என அறிந்து கொள்ள அவர் விரும்பினார். அவர் எத்தனை முறை கொடை அளித்துள்ளார்? மற்றும் ஆர்த்தர் அவரின் சகோதரராக இருக்கக்கூடுமா? போன்ற தகவல்களை ஆட்ரே வைத்திருக்க முடியுமா என்கிற கேள்விகள் இருந்தன.

ஆனால் அவரின் அனைத்து முயற்சிகளும் தோல்வியில் முடிந்தன.

2015-இல் பிரான்ஸின் உச்ச நீதிமன்றம் அவரின் இறுதி மேல்முறையீட்டை நிராகரித்தது.

அவர்களின் முதல் குழந்தை பிறப்பதற்கு சற்று முன்பாக அவர்கள் சம்பந்தப்பட்ட கொடையாளர்கள் பற்றி என்ன தகவல்கள் இருக்கும் என்பதை ஆராய ஒரு மருத்துவர் ஒப்புக்கொண்டார். பிரெஞ்சு சட்டத்தின்படி, ஒரு மருத்துவருக்கு அவர்களின் நோயாளிகள் பற்றிய முழுமையான தகவல்கள் இருக்கும், ஆனால் அவற்றை நோயாளிகளிடம் பகிர்ந்து கொள்ள அனுமதியில்லை.

அவர்களின் கொடையாளர்கள் வெவ்வேறு ஆண்டுகளில் பிறந்தவர்கள் என்பதை மருத்துவர் கண்டறிந்தார். எனவே அவர் ஒரே நபராக இருக்க முடியாது. அவர்களின் வாழ்க்கையை மாற்றக்கூடிய இந்தத் தகவலை ஒரு மருத்துவர் விதிகளை மீற ஒப்புக்கொண்டதன் மூலம் மட்டுமே அவர்கள் பெற முடிந்தது.

"இது மிகவும் விசித்திரமானது. ஏனெனில், என்னைப்பற்றி என்னைவிட என் மருத்துவர் அதிகம் தெரிந்துகொள்ள முடியும்," என்கிறார் ஆட்ரே.

இந்தப் புதிய தகவலுடனும், அவர்கள் இருவரும் உறவினர்களாக இருக்கக்கூடுமோ என்கிற கவலை ஆர்த்தருக்கு இருந்து கொணடே இருந்தது, எனவே பல ஆண்டுகள் தவிர்த்த பிறகு இறுதியாக அவர்கள் வீட்டில் பரிசோதனை செய்யும் கருவியைப் பயன்படுத்தினர்.

பிரான்ஸ் விதித்த தடை மக்கள் வீடுகளில் பரிசோதனை மேற்கொண்டதைத் தடுக்க பெரிதாக எதுவுமே செய்யவில்லை என அதற்கு எதிராக பிரசாரம் செய்பவர்கள் வாதிடுகிறார்கள். பத்து லட்சத்துக்கும் அதிகமான பிரெஞ்சு மக்கள் தங்களின் வீடுகளில் பரிசோதனை மேற்கொண்டிருப்பார்கள் என டிஎன்ஏ பாஸ் என்கிற குழு கணக்கிட்டுள்ளது.

பலர் அவற்றைச் சட்டப்பூர்வமாக பெறக்கூடிய நாடுகளில் உள்ள நண்பர்கள் மூலமாகவும் அல்லது அண்டை நாடுகளில் உள்ள தபால் சேவைகளைப் பயன்படுத்தியும் பெறுகின்றனர்.

அந்தப் பரிசோதனை அவர்கள் இருவர் இடையே தொடர்பு இல்லை என்கிற முடிவைக் கொடுத்தது.

தந்தையரை தேடிய பயணம்

டிஎன்ஏ முடிவுகள் விரைவில் பல கதவுகளைத் திறந்தன, 30 ஆண்டுகாலம் தனது தந்தை யாராக இருக்கக்கூடும் என கற்பனை செய்துவந்த ஆர்த்தர் தனது விந்து கொடையாளரை 2017-ஆம் ஆண்டு கிறிஸ்துமஸ் தினத்தன்று தொடர்பு கொண்டார்.

ஆனால் ஆட்ரேவுக்குத் தான் அதிர்ச்சி காத்திருந்தது. அவருடைய டிஎன்ஏ உடன் பொருந்திப் போனவர்களில் அவர் நீதிமன்றத்தில் வாதாடிய சோஃபி என்கிற பெண்ணும் அடங்குவார். இந்த இரண்டு பெண்கள் ஒரே மாதிரியான சட்ட உரிமைகளுக்காகப் போராடி வந்துள்ளனர்.

"நான் நீதிமன்றத்தில் வாதாடிய சோஃபி எனது உயிரியல் சகோதரி என்பதை அறிந்துகொண்டேன்," என்கிறார் ஆட்ரே.

தங்களின் பூர்வீகத்தை அறிந்துகொள்வதற்கான போராடி வந்த கொடையாளர் மூலம் பிறந்த எட்டு வேறு செயற்பாட்டாளர்கள் உடன் ஆட்ரே மற்றும் ஆர்த்தர் டிஎன்ஏ பரிசோதனை மேற்கொண்டனர். 10 பேரில் ஆட்ரே, அவரது சகோதரர் பீட்டர், சோஃபி மற்றும் அவரது சகோதரர் டேவிட் ஆகிய நான்கு பேருக்கு ஒரே கொடையாளர் இருந்தது தெரியவந்தது. இது ஒரே கொடையாளர் இருக்கக்கூடும் என்கிற ஆபத்து எவ்வளவு நிஜமானது என்பதைக் காட்டுகிறது.

'அளவிட முடியாத பரிசு'

பல ஆண்டுகள் கழித்து ஓர் அமெரிக்கருடன் ஏற்பட்ட மரபணு பொருத்தம் தனது கொடையாளரை நோக்கி ஆட்ரேவை அழைத்துச் சென்றது. பிலிப் என்கிற அந்த நபர் ஏற்கெனவே இறந்துவிட்டார்.

ஆட்ரேவின் தாய் இந்தப் பரிசுக்கு நன்றி தெரிவித்து பிலிப்பின் குடும்பத்திற்கு கடிதம் ஒன்றை எழுதியுள்ளார். அதில் அவர் இந்தப் பரிசை "அளவிட முடியாதது" எனக் குறிப்பிட்டுள்ளார்.

ஆட்ரே தான் அந்தப் பரிசு

அவரது குடும்பம் ஆட்ரேவை அழைத்தது. "அனைவரின் கண்களிலும் கண்ணீர் இருந்தது," என நினைவுகூர்கிறார் ஆட்ரே.

ஆட்ரேவின் தந்தை ஒரு கொடையாளர் என்பதை அவருடைய சகோதரி அறிந்திருக்கவில்லை.

இந்தக் கண்டுபிடிப்பு ஆட்ரே பல ஆண்டுகளாக தேடிவந்த விடைகளைக் கொடுத்தது. அவருடைய உயிரியல் குடும்பத்தின் மருத்துவ பின்புலம் பற்றிய தகவல்களை அவர் தெரிந்து கொண்டார். பிலிப்பின் பழைய புகைப்படங்கள் மற்றும் காணொளிப் பதிவுகளை அவர் கண்டார். "என்னால் அவரைப் பார்க்க முடிகிறது, அவர் எப்படி நகர்ந்தார் என்பதைக் காண முடிகிறது, அவருடைய குரலைக் கேட்க முடிகிறது." என்று அவர் தெரிவித்தார்.

ஆட்ரேவின் சட்டப் போராட்டமும் ஆர்த்தரின் புத்தகமும் பிரெஞ்சு கொடையாளர் சட்டங்களில் மாற்றங்களைக் கொண்டு வர வித்திட்டன. ஏப்ரல் 2025-க்குப் பிறகு கொடையாளர் மூலம் பிறக்கும் குழந்தைகள் பெரியவர்கள் ஆன பிறகு அவர்களது கொடையாளர் பற்றிய தகவல்களை தெரிந்துகொள்ள புதிய திருத்தங்கள் அனுமதிக்கின்றன.

தற்போதைக்கு ஐரோப்பாவில் வீட்டிலேயே டிஎன்ஏ பரிசோதனைகள் மேற்கொள்வதை தடை செய்த ஒரு சில நாடுகளில் பிரான்சும் ஒன்றாக உள்ளது.

அதன் பொருள் ஆட்ரேவின் பரந்துபட்ட போராட்டம் தொடரும் என்பதே. "ஒவ்வொரு நபருக்கும் அவருடைய பூர்வீகத்தை தெரிந்துகொள்வதற்கும் தங்களின் வரலாற்றைத் தெரிந்து கொள்வதற்கும் உரிமை இருக்கிறது," என்று கூறி ஒருபுறம் தனது பேச்சை முடித்து, மறுபுறம் தனது சட்டப்போராட்டங்களைத் தொடர ஆயத்தமானார் ஆட்ரே.

பிபிசி ரேடியோ 4-இல் ஒலிபரப்பான தி கிஃப்ட் தொடரில் வந்த ஒரு நிகழ்ச்சியின் அடிப்படையில் இந்தக் கட்டுரை எழுதப்பட்டுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு