'100 முறை கேட்ட பிறகே திருமணம்': விஜய் தேவரகொண்டா - ராஷ்மிகா பற்றிய விவாதங்களுக்கு இருவரும் காட்டமான பதில்

பட மூலாதாரம், karanjohar/INSTA
- எழுதியவர், கமலாதேவி நல்லபனேனி
- பதவி, பிபிசி செய்தியாளர்
- பிரசுரிக்கப்பட்டது
- வாசிக்கும் நேரம்: 6 நிமிடங்கள்
ராஷ்மிகா: நாம் திருமணம் செய்துகொள்ளலாம்...
விஜய் தேவரகொண்டா: சரி... பார்க்கலாம். இப்போது ஏன்?
ராஷ்மிகா: நான் திருமணம் செய்துகொள்ள விரும்புகிறேன்.
விஜய் தேவரகொண்டா: இதே விஷயத்தை நீ என்னிடம் நூறு முறை கேள். அதன் பிறகு நாம் திருமணம் செய்துகொள்ளலாம்.
கரண் ஜோஹர்: உண்மையிலேயே நூறு முறை கேட்டீர்களா?
ராஷ்மிகா: திருமணத்துக்கு முன்பு ஓராண்டு முழுவதும் கேட்டுக்கொண்டே இருந்தேன். தினமும் கேட்டேன்.
சமீபத்தில் விஜய் தேவரகொண்டாவும் ராஷ்மிகா மந்தனாவும் இணைந்து பங்கேற்ற காஃபி வித் கரண் நிகழ்ச்சியில் இடம்பெற்ற இந்த உரையாடலே தற்போது சமூக ஊடகங்களில் பெரும் விவாதத்துக்கு வழிவகுத்துள்ளது.

பட மூலாதாரம், thedeverakonda/Insta
திருமணமாகி இன்னும் ஓராண்டுகூட ஆகாத, ரசிகர்களிடம் பெரும் வரவேற்பைப் பெற்றிருக்கும் ஒரு திரை ஜோடி, தங்களது தனிப்பட்ட வாழ்க்கையைப் பற்றி வெளிப்படையாகப் பேசுவது குறித்த விவாதம் மட்டுமல்ல இது.
திரையுலகில் பல வெற்றிகளைப் பெற்று, நாடு முழுவதும் புகழ்பெற்ற நடிகை ஒருவர், அதே துறையில் பிரபலமாக இருக்கும் நடிகரைத் திருமணம் செய்துகொள்ளச் சம்மதிக்க வைக்கத் திரும்பத் திரும்பக் கேட்க வேண்டியிருந்தது ஏன்? அந்தச் சூழலை அவர் உருவாக்கியது சரியா? காதல் மற்றும் திருமண முன்மொழிவு தொடர்பான முற்றிலும் தனிப்பட்ட விஷயத்தை ஒரு தேசிய அளவிலான நிகழ்ச்சியில் பகிர்ந்துகொள்வது சரியா? இத்தகைய கேள்விகளை முன்வைத்து சமூக ஊடகப் பயனர்கள் கருத்துகளைப் பகிர்ந்து வருகின்றனர்.
இந்த விவரங்களை விஜய் தேவரகொண்டா வெளிப்படுத்தியதால் ராஷ்மிகாவின் மரியாதைக்குப் பாதிப்பு ஏற்பட்டதா? விஜய் கூறியதன் உண்மையான பொருள் என்ன? இறுதியில், இருவருக்கும் இடையிலான காதலின் ஆழம் உலகத்துக்கே தெரியவந்துள்ளதா? காதல் மற்றும் திருமண விஷயத்தில் ராஷ்மிகா பலவீனமானவராகத் தோன்றுகிறாரா எனப் பல கோணங்களில் இந்த உரையாடல் விவாதிக்கப்பட்டு வருகிறது.

பட மூலாதாரம், rashmika_mandanna/INSTA
'விஜய் தேவரகொண்டா அவமதிக்கும் வகையில் பேசினாரா?'
நிகழ்ச்சி முழுமையாக ஒளிபரப்பப்படுவதற்கு முன்பே, திருமணம் குறித்து விஜய் தேவரகொண்டாவும் ராஷ்மிகாவும் பேசிய உரையாடலின் ஒரு பகுதி வெளியானது.
அப்போதே தொடங்கிய ட்ரோலிங் மற்றும் விமர்சனங்கள், நிகழ்ச்சி ஒளிபரப்பான பிறகு தீவிரமடைந்தன. தன்னைப் பற்றி கடுமையான விமர்சனங்கள் எழும் என்று தெரிந்திருந்தும் இந்த விஷயத்தைப் பகிர்ந்துகொள்வதாக விஜய் தேவரகொண்டா கூறினார்.
திருமணம் செய்துகொள்ள வேண்டும் என்று ராஷ்மிகாவை நூறு முறை கேட்கச் சொன்னதோடு, அந்த விஷயத்தை அந்நிகழ்ச்சியிலும் வெளிப்படுத்தியதன் மூலம் விஜய் தேவரகொண்டா அவமதிக்கும் வகையில் நடந்துகொண்டதாகவும், தனது ஆணவத்தை வெளிப்படுத்தியதாகவும் சிலர் விமர்சிக்கின்றனர்.
ஒரு உறவில் இருவருக்கு மட்டுமே இடையிலான விஷயங்களை, தேசிய அளவில் ஒளிபரப்பாகும் நிகழ்ச்சியில் இருப்பதைத் தெரிந்துகொண்டே விஜய் வெளிப்படுத்தியதாகச் சிலர் கூறுகின்றனர். ராஷ்மிகாவின் சுயமரியாதையைப் பற்றி அவர் சிந்தித்திருந்தால் இந்த விஷயங்களை அனைவரின் முன்னிலையிலும் கூறியிருக்க மாட்டார் என்றும் அவர்கள் கருத்து தெரிவிக்கின்றனர். ராஷ்மிகா தனது சுயமரியாதையைப் பேண வேண்டும் என்றும் அவர்கள் கூறுகின்றனர்.
ராஷ்மிகா தன்னை நிபந்தனையின்றிக் காதலிக்க வேண்டும் என்று விஜய் விரும்பியதாகவும், அவரது காதலை அவர் அலட்சியமாக எடுத்துக்கொண்டது போன்ற தோற்றம் ஏற்படுவதாகவும் மற்றொரு பயனர் கூறியுள்ளார்.
விஜய் ஆணவத்துடன் நடந்துகொண்டதாகவும், தான் கெட்டவன் அல்ல என்று அவர் கூறியதுகூட சரியான அணுகுமுறை அல்ல என்றும் மற்றொருவர் கருத்து தெரிவித்துள்ளார்.
திருமணத்துக்குச் சம்மதிக்கும் வரை, தனது துணையிடம் நூறு முறை திருமணம் செய்துகொள்ளக் கேட்கச் சொல்வதை நினைத்துப் பார்ப்பதற்கே சங்கடமாக இருப்பதாக மற்றொரு பயனர் கூறியுள்ளார்.

பட மூலாதாரம், Rashmika Mandanna/X.COM
'விஜய் யோசித்துத்தான் முடிவெடுத்தார்'
ராஷ்மிகா மந்தனா, விஜய் தேவரகொண்டாவுடன் மகிழ்ச்சியாக இருக்கிறார் என்றும், அவரே விஜயிடம் திருமணத் திட்டத்தை முன்வைத்தார் என்ற காரணத்துக்காக பெண்ணியவாதிகள் இதற்கு எதிர்ப்பு தெரிவிப்பது சரியல்ல என்று மற்றொரு பயனர் எழுதியுள்ளார்.
'ஆண்தான் முதலில் காதலைத் தெரிவிக்க வேண்டும் என்று பெண்கள் ஏன் காத்திருக்க வேண்டும்? ஒரு பெண் திருமண திட்டத்தை முன்வைப்பதில் என்ன தவறு? சமத்துவம் என்பதே அதுதானே?' என்று அவர் கேள்வி எழுப்பியுள்ளார்.
நிகழ்ச்சியில் விஜய் தெரிவித்த கருத்துகளை சிலர் ஆதரிக்கின்றனர். ராஷ்மிகாவை நூறு முறை கேட்கச் சொன்னதற்கான காரணத்தைக் கவனித்தால், விஜயின் சிந்தனையைப் புரிந்துகொள்ள முடியும் என்று சமூக ஊடகப் பயனர்கள் சிலர் கூறுகின்றனர்.
வாழ்க்கையில் மிக முக்கியமான முடிவை எடுப்பதற்கு முன்பு ஒன்றுக்கு இரண்டு முறை யோசிக்க வேண்டும் என்று பெரியவர்கள் சொல்வார்கள். விஜயும் அந்தக் கொள்கையைத்தான் பின்பற்றியுள்ளார் என்பது அவர்களது கருத்து.
'திருமண முன்மொழிவை ஏற்றுக்கொள்வதற்கு ஒரு பெண் கால அவகாசம் எடுத்துக்கொள்ளலாம் என்றால், ஓர் ஆண் கால அவகாசம் எடுத்துக்கொள்ளக் கூடாதா? விஜயை ஏன் குறிவைக்கிறார்கள்?' என்று பயனர் ஒருவர் கேள்வி எழுப்பியுள்ளார்.
விஜய் ராஷ்மிகாவை அவமதிக்கவில்லை என்றும், இருவரும் இணைந்து ஒரு உறவைத் தேர்ந்தெடுத்துள்ளனர் என்றும் மற்றொரு பயனர் கூறியுள்ளார். ராஷ்மிகாவைப் பாதிக்கப்பட்டவராகச் சித்தரிப்பதை நிறுத்த வேண்டும் என்றும் அவர் தெரிவித்துள்ளார்.
நிகழ்ச்சியில் கரண் ஜோஹர், 'விஜய், ஏன் நூறு முறை?' என்று கேட்டபோது, விஜய் தேவரகொண்டா அளித்த விளக்கம்:
"திருமணம் என்பது மிக முக்கியமான முடிவு. எல்லா தடைகளையும் கடந்து நீடிக்கும் ஓர் உறவை விரும்புபவன் நான். 'நீ என்னைச் சோதிக்கிறாயா?' என்று ராஷ்மிகா கேட்டார். அப்போது எனக்குக் குற்ற உணர்வு ஏற்பட்டது.
ஆனால், நான் என்னையே சோதித்துக்கொண்டிருந்தேன். எங்கள் உறவையும் சோதித்துப் பார்த்துக்கொண்டிருந்தேன்.
அந்தக் கணத்தில் எதிரிலிருப்பவர் மீது மிகுந்த காதல் இருப்பதாகத் தோன்றுகிறது என்பதற்காக மட்டும் திருமணம் செய்துகொள்ளக் கூடாது.
மகிழ்ச்சியாக இருக்கும்போதும், சோகமாக இருக்கும்போதும், தொழிலுக்காக முழு நேரத்தையும் செலவிடும்போதும் அல்லது நடிப்பையே விட்டுவிட்டு வீட்டில் இருக்கும்போதும், வாழ்க்கையின் ஏற்ற இறக்கங்கள் அனைத்திலும் திருமணம் மிக முக்கியமானதாகத் தோன்றினால் திருமணம் செய்துகொள்ள வேண்டும் என்பதுதான் என் மனதில் இருந்தது. அதனால்தான் ராஷ்மிகாவை காத்திருக்கச் செய்தேன்" என்று விஜய் தேவரகொண்டா கூறினார்.
இதே நிகழ்ச்சியில், ஒரு நாள் மட்டும் திருமணம் ஆகாதவராக இருக்க நேர்ந்தால் என்ன செய்வீர்கள் என்று கரண் ஜோஹர் கேட்டார். அதற்குப் பதிலளித்த விஜய், தன்னால் தனியாக இருக்க முடியாது என்றும், ராஷ்மிகாவுடன் வாழப் பழகிவிட்டதாகவும், அவருடன் இருப்பது மிகவும் வசதியாகவும் நிம்மதியாகவும் இருப்பதாகவும் தெரிவித்தார்.

பட மூலாதாரம், rashmika_mandanna/INSTA
'ராஷ்மிகா அப்படிப் பேசியிருக்கக் கூடாது'
விஜய் தேவரகொண்டாவின் கருத்துகளுக்கு பெண்ணியவாதிகள் எதிர்ப்பு தெரிவித்து வருகின்றனர். விஜய் தேவரகொண்டா பாதுகாப்பின்மை உணர்வால் பாதிக்கப்பட்டிருப்பதாக அகில இந்திய பெண்ணியவாதிகள் சங்கத்தைச் சேர்ந்த வி. சுனீதா கருதுகிறார்.
"விஜய் தேவரகொண்டாவுடன் ஒப்பிடும்போது ராஷ்மிகாவின் வெற்றி விகிதம் அதிகம். அப்படிப்பட்ட ஒரு நடிகையைத் தனது மனைவியாக ஏற்றுக்கொள்ள வேண்டுமென்றால், அவருக்குத் தன்னம்பிக்கை இருக்க வேண்டும். அது இல்லாததால்தான் அவர் ராஷ்மிகாவை அத்தனை முறை கேட்கச் செய்திருக்கிறார். இப்போது திருமணத்துக்குப் பிறகும் அந்த விஷயத்தை வெளியில் கூறுகிறார்" என்று சுனீதா கருத்து தெரிவித்துள்ளார்.
திருமணத்துக்குப் பிறகும் பெண்களை முழுமையான கதாநாயகிகளாக ஏற்றுக்கொள்ளும் மனப்பான்மை தெலுங்கு திரையுலகில் இன்னும் உருவாகவில்லை என்றும், இந்த விஷயத்தில் பாலிவுட்டின் நிலை ஓரளவு மேம்பட்டிருப்பதாகவும் அவர் கூறினார்.
"திருமணம் செய்துகொள்ள வேண்டும் என்று ஓராண்டு முழுவதும் விஜயிடம் கேட்டுக்கொண்டிருந்ததாக ராஷ்மிகா கூறியதும் சரியல்ல. ஒரு பெண் தனது தொழிலில் எவ்வளவு வெற்றி பெற்றிருந்தாலும், திருமணம்தான் அவரது இறுதி இலக்கு என்ற தவறான கருத்தை இந்தக் கூற்று சமூகத்துக்கு எடுத்துச் செல்கிறது" என்று சுனீதா விளக்கினார்.
தனக்குப் பிடித்த ஒருவரைத் திருமணம் செய்துகொள்ளுமாறு ஒரு பெண் திரும்பத் திரும்பக் கேட்பதைப் பெண் அதிகாரமளித்தலாகக் கருதுவது தவறு என்றும் அவர் எதிர்ப்பு தெரிவித்துள்ளார்.
தற்காலிக உணர்ச்சிகளின் அடிப்படையில் முடிவெடுக்காமல், நீண்ட காலத்தில் அந்த உறவு எப்படியிருக்கும் என்பதை யோசித்து முடிவெடுக்க வேண்டும் என்று விஜய் தேவரகொண்டா நினைப்பதில் தவறில்லை என்கிறார், பிரபல மருத்துவ மற்றும் மறுவாழ்வு உளவியலாளர் ராதிகா ஆச்சார்யா.
"விஜயின் கருத்துகளை அகந்தை என்ற கோணத்தில் பார்க்கக் கூடாது. ஒருவருக்கொருவர் பிடித்தமான விஷயங்களிலும் பிடிக்காத விஷயங்களிலும் இணைந்து இருக்க வேண்டும் என்று தோன்றும்போது திருமணம் செய்துகொள்ளலாம் என நினைப்பது சரியானதே. அவர்களுடையது மிகவும் முதிர்ச்சியான உறவு. சிந்தனையுடனும் நிலைத்தன்மையுடனும் எடுக்கப்பட்ட முடிவு இது" என்று ராதிகா ஆச்சார்யா கூறினார்.
ராஷ்மிகாவுடன் ஒப்பிடும்போது விஜய் தேவரகொண்டாவின் வாழ்க்கையில் ஏற்ற இறக்கங்கள் அதிகம் இருந்ததாகவும், அதனால்தான் திருமண முடிவை எடுக்க அவர் அதிக காலம் எடுத்துக்கொண்டதாகவும் ராதிகா தெரிவித்தார். இருவரும் தேர்ந்தெடுத்த வாழ்க்கை முறையை இன்றைய தலைமுறையினர் முன்னுதாரணமாக எடுத்துக்கொள்ளலாம் என்றும் அவர் கூறினார்.
"ராஷ்மிகா திருமணம் செய்துகொள்ளுமாறு நூறு முறை கேட்டார் என்பதற்காக, அவர்களுடைய உறவில் ராஷ்மிகாவை பலவீனமானவராகக் கருதக் கூடாது. விஜயின் கருத்துகளை சரியான கோணத்தில் அவரால் புரிந்துகொள்ள முடிந்ததால்தான் ஓராண்டு காத்திருந்தார். இதில் எதிர்மறையான அம்சம் எதுவும் இல்லை" என்று ராதிகா கருத்து தெரிவித்தார்.

பட மூலாதாரம், rashmika_mandanna/INSTA
விஜய் தேவரகொண்டா – ராஷ்மிகா திருமணம் நடந்தது எப்படி?
ராஷ்மிகாவும் விஜய் தேவரகொண்டாவும் முதன்முதலில் 'கீதா கோவிந்தம்' திரைப்படத்தில் இணைந்து நடித்தனர். 2018-ஆம் ஆண்டு வெளியான இந்தப் படத்தைத் தொடர்ந்து, 'டியர் காம்ரேட்' படத்திலும் இருவரும் இணைந்து நடித்தனர். ராஷ்மிகா தெலுங்கு, கன்னடம், இந்தி ஆகிய மொழிப் படங்களில் நடித்துள்ளார்.
'புஷ்பா' திரைப்படத்தின் மூலம் அவர் தேசிய அளவில் புகழ்பெற்று, 'நேஷனல் கிரஷ்' என்று அழைக்கப்பட்டார். இந்த ஆண்டு பிப்ரவரியில் ராஷ்மிகாவுக்கும் விஜய் தேவரகொண்டாவுக்கும் உதய்ப்பூர் அரண்மனையில் திருமணம் நடைபெற்றது.
"100 இல்ல 1000 முறை கூட திருமணம் செய்துகொள்ளும்படி கேட்பேன்" - ராஷ்மிகா
சமூக வலைதளங்களில் நடக்கும் விவாதம் தொடர்பாக நடிகை ராஷ்மிகா தனது சமூகவலைதளப் பக்கத்தில் விளக்கமளித்திருக்கிறார்.
திருமணம் தொடர்பாக முடிவெடுக்க எத்தனை தடவை பேசினார்கள், எவ்வளவு காலம் எடுத்துக்கொண்டார்கள் போன்றவை முக்கியமில்லை. கடைசியில் ஒருத்தரை ஒருத்தர் தேர்ந்தெடுத்தார்களா என்பதுதான் முக்கியம் என்று அவர் தனது அறிக்கையில் கூறியுள்ளார்.
"எனக்கு என்ன வேண்டும் என்பது தெளிவாகத் தெரிந்திருந்தது. அதேபோல, வாழ்க்கையின் நடைமுறை விஷயங்களைப் பற்றி யோசித்து, உறுதியாக முடிவெடுக்க அவருக்கும்(விஜய் தேவரகொண்டா) சிறிது காலம் தேவைப்பட்டது. அதனால் எங்களுடைய காதல் மாறிவிடவில்லை. எங்களைப் பொறுத்தவரை, திருமணம் என்பது ஒரு முன்மொழிவைப் பற்றியோ, முழங்காலில் அமர்ந்து மோதிரம் அணிவிப்பதைப் பற்றியதோ அல்ல. இருவரும் சேர்ந்து ஒரு வாழ்க்கையையும் எதிர்காலத்தையும் உருவாக்குவதுதான் முக்கியம்" என்று தனது அறிக்கையில் தெரிவித்துள்ளார்.
கணவர் விஜய் தேவரகொண்டா மீதான காதல் பற்றியும் ராஷ்மிகா பேசியுள்ளார். "என் கணவர் மீது எனக்கு அளவு கடந்த காதல் இருக்கிறது. அதில் என்ன தவறு? உங்களை அழகாக நேசிக்கும் ஒருவரைக் கண்டுபிடியுங்கள். திருமணத்துக்குப் பின்பும், அவரைப் பார்த்து 'இவரைத்தான் மீண்டும் திருமணம் செய்துகொள்வேன்' என்று சொல்லத் தோன்றும் வகையில் அவர் உங்களை நேசிக்க வேண்டும். திருமணம் செய்துகொள்ளுமாறு விஜய் தேவரகொண்டாவிடம் 100 முறை அல்ல, 1000 முறை கூட புரொப்போஸ் செய்வேன்." என்று அவர் கூறியுள்ளார்.
சொந்தக் கற்பனைகளில் முழுமையாக மூழ்கியிருப்போர்களுக்காக எனக் குறிப்பிட்டு, தன் மீது விமர்சனம் வைத்தவர்களுக்கு அவர் பதிலடி கொடுத்துள்ளார்.
"காதல் எப்படி இருக்க வேண்டும் என்ற உங்கள் கற்பனைக்கு எங்களுடைய காதல் பொருந்தவில்லை என்றால் பரவாயில்லை. உங்களுடைய வாழ்க்கையில் காதல் எப்படி இருக்க வேண்டும் என்று விரும்புகிறீர்களோ, அப்படிப்பட்ட அழகான வாழ்க்கையை நீங்கள் வாழுங்கள். உங்களுடைய மகிழ்ச்சியான தருணங்களுக்கு நான் ஆதரவாக இருப்பேன்" என்றும் அவர் குறிப்பிட்டுள்ளார்.
தனது அறிக்கையில் பெண்ணியம் தொடர்பாகவும் ராஷ்மிகா மந்தனா குறிப்பிட்டுள்ளார். "இன்னொரு பெண்ணின் மீது அக்கறை கொண்டிருப்பதாகக் காட்டிக்கொண்டு ரீல்ஸ் போடுபவர்களே, உங்கள் காதல் குறித்த அறிவுரைகளுக்கு நன்றி. சில ஆண்டுகளுக்கு முன்பு என் வாழ்க்கை மிகவும் கடினமாக இருந்தபோது நீங்கள் என்னுடன் நிற்கவில்லை. அப்போது விஜய்தான் என்னுடன் இருந்தார், தற்போதும் அவர்தான் இருக்கிறார்" எனப் கூறியுள்ளார்.
"என்னைப் பற்றி நீங்கள் என்ன வேண்டுமானாலும் பேசிக்கொள்ளுங்கள். என்னால் அதைத் தாங்கிக்கொள்ள முடியும். ஆனால், என் குடும்பத்தைப் பற்றி எதையும் தெரிந்துகொள்ளாமல் பேசுவதற்குப் பெயர் பெண்ணியம் அல்ல" என்றும் தனது அறிக்கையில் குறிப்பிட்டுள்ளார்.
விஜய் தேவரகொண்டா விளக்கம்
மறுபுறம் விஜய் தேவரகொண்டாவும் இதுதொடர்பாக விளக்கமளித்துள்ளார். தனது பதிவில் "எங்களைப் பற்றிக் கவலைப்படுகிற அனைவருக்கும் ஒன்று சொல்லிக்கொள்கிறேன்: நாங்கள் இருவரும் அளவில்லாத மகிழ்ச்சியுடன் இருக்கிறோம். இந்த உலகமே எங்களுக்கு எதிராக நின்றாலும், நானும் அவளும் ஒன்றாக எதிர்கொள்வோம்." என்று கூறியுள்ளார்.
உண்மையான காதலை மதிப்பவர்களுக்கும், எளிய முறையில் தங்களுக்குப் பிடித்தபடி மகிழ்ச்சியாக வாழ நினைப்பவர்களுக்கும் தனது அன்பான வாழ்த்துகள் என்றும் அவர் தெரிவித்துள்ளார். மற்றவர்களின் வாழ்க்கையை நாகரிகமின்றியும், மதிக்காமலும் விமர்சிக்கும் நபர்கள் எப்படியோ போகட்டும் என்று மிகக் கடுமையான வார்த்தைகளால் தனது எதிர்ப்பைப் பதிவு செய்துள்ளார்.
- இது, பிபிசிக்காக கலெக்டிவ் நியூஸ்ரூம் வெளியீடு
































