You’re viewing a text-only version of this website that uses less data. View the main version of the website including all images and videos.
ਅੰਕਿਤ ਬਾਲਿਆਨ: ਹਰਿਆਣਵੀ ਕਲਾਕਾਰ ਕੌਣ ਸਨ, ਜਿਨ੍ਹਾਂ ਦਾ ਯੂਪੀ ਦੇ ਜਿਮ ਦੇ ਬਾਹਰ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ
- ਲੇਖਕ, ਦਿਲਨਵਾਜ਼ ਪਾਸ਼ਾ
- ਰੋਲ, ਬੀਬੀਸੀ ਪੱਤਰਕਾਰ
- ਪ੍ਰਕਾਸ਼ਿਤ
- ਪੜ੍ਹਨ ਦਾ ਸਮਾਂ: 8 ਮਿੰਟ
ਪੱਛਮੀ ਉੱਤਰ ਪ੍ਰਦੇਸ਼ ਦੇ ਹਰਿਆਣਾ ਨਾਲ ਲਗਦੇ ਜ਼ਿਲ੍ਹੇ ਸ਼ਾਮਲੀ ਵਿੱਚ ਬੁੱਧਵਾਰ ਦੇਰ ਸ਼ਾਮ ਹਰਿਆਣਵੀ ਗੀਤਾਂ ਵਿੱਚ ਦਿਸਣ ਵਾਲੇ ਕਲਾਕਾਰ ਅੰਕਿਤ ਬਾਲਿਆਨ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ।
ਸ਼ਾਮਲੀ ਪੁਲਿਸ ਮੁਤਾਬਕ ਚਾਰ ਹਮਲਾਵਰ ਦੋ ਮੋਟਰਸਾਈਕਲਾਂ 'ਤੇ ਆਏ ਸਨ।
ਇਹ ਘਟਨਾ ਸ਼ਹਿਰ ਦੇ ਕੋਤਵਾਲੀ ਖੇਤਰ ਵਿੱਚ ਇੱਕ ਜਿਮ ਕੋਲ ਹੋਈ। ਅੰਕਿਤ ਬਾਲਿਆਨ ਜਿਮ ਤੋਂ ਪਰਤ ਕੇ ਆਪਣੀ ਗੱਡੀ ਵਿੱਚ ਬੈਠ ਰਹੇ ਸੀ ਜਦੋਂ ਉਨ੍ਹਾਂ 'ਤੇ ਹਮਲਾ ਹੋਇਆ।
ਸ਼ਾਮਲੀ ਪੁਲਿਸ ਦੇ ਐੱਸਪੀ ਨਰਿੰਦਰ ਪ੍ਰਤਾਪ ਸਿੰਘ ਮੁਤਾਬਕ, "ਹਮਲਾਵਰਾਂ ਨੇ ਕਈ ਗੋਲੀਆਂ ਚਲਾਈਆਂ ਅਤੇ ਫਰਾਰ ਹੋ ਗਏ। ਹਮਲਾਵਰਾਂ ਨੂੰ ਫੜਨ ਲਈ ਪੁਲਿਸ ਦੀਆਂ ਕਈ ਟੀਮਾਂ ਗਠਿਤ ਕੀਤੀਆਂ ਗਈਆਂ ਹਨ, ਕੁਝ ਟੀਮਾਂ ਨੂੰ ਹਰਿਆਣਾ ਵੀ ਭੇਜਿਆ ਗਿਆ ਹੈ।"
ਕਤਲ ਦੀ ਇਸ ਘਟਨਾ ਤੋਂ ਬਾਅਦ ਦੇਰ ਰਾਤ ਇੰਸਟਾਗ੍ਰਾਮ 'ਤੇ ਇਸ ਘਟਨਾ ਦੀ ਜ਼ਿੰਮੇਵਾਰੀ ਲੈਣ ਦਾ ਦਾਅਵਾ ਕਰਦਿਆਂ ਇੱਕ ਪੋਸਟ ਕੀਤਾ ਗਿਆ।
ਇੰਸਟਾਗ੍ਰਾਮ 'ਤੇ ਪੋਸਟ ਕਰਨ ਵਾਲੇ ਵਿਅਕਤੀ ਨੇ ਖ਼ੁਦ ਦੇ ਗੋਗੀ ਗੈਂਗ ਨਾਲ ਜੁੜੇ ਹੋਣ ਦਾ ਦਾਅਵਾ ਕੀਤਾ ਹੈ। ਪੁਲਿਸ ਨੇ ਇਸ ਪੋਸਟ ਦਾ ਵੀ ਨੋਟਿਸ ਲਿਆ ਹੈ।
ਉੱਤਰ ਪ੍ਰਦੇਸ਼ ਦੇ ਸ਼ਾਮਲੀ ਵਿੱਚ ਕੀ ਹੋਇਆ?
ਘਟਨਾ ਵਾਲੀ ਥਾਂ ਤੋਂ ਕਰੀਬ ਦਸ ਕਿਲੋ ਮੀਟਰ ਦੂਰ ਬੰਤੀਖੇੜਾ ਪਿੰਡ ਦੇ ਰਹਿਣ ਵਾਲੇ ਅੰਕਿਤ ਬਾਲਿਆਨ ਰੋਜ਼ ਦੀ ਤਰ੍ਹਾਂ ਜਿਮ ਲਈ ਸ਼ਾਮਲੀ ਆਏ ਸੀ। ਸ਼ਾਮ 6 ਵਜ ਕੇ 55 ਮਿੰਟ 'ਤੇ ਉਹ ਜਿਵੇਂ ਹੀ ਆਪਣੀ ਗੱਡੀ ਦੇ ਨੇੜੇ ਪਹੁੰਚੇ, ਪਹਿਲਾਂ ਤੋਂ ਘਾਤ ਲਗਾਈ ਬੈਠੇ ਚਾਰ ਹਮਲਾਵਰਾਂ ਨੇ ਗੋਲੀਆਂ ਚਲਾ ਦਿੱਤੀਆਂ।
ਘਟਨਾ ਤੋਂ ਤੁਰੰਤ ਬਾਅਦ ਕੁਝ ਵੀਡੀਓ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੇ ਗਏ ਹਨ ਜਿਨ੍ਹਾਂ ਵਿੱਚ ਲੋਕ ਅੰਕਿਤ ਬਾਲਿਆਨ ਨੂੰ ਚੁੱਕ ਕੇ ਗੱਡੀ ਵਿੱਚ ਰੱਖਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਪੁਲਿਸ ਦੇ ਪਹੁੰਚਣ ਜਾਂ ਕਿਸੇ ਨੂੰ ਫੜਨ ਦੀ ਕੋਸ਼ਿਸ਼ ਕਰਨ ਤੋਂ ਪਹਿਲਾਂ ਹੀ ਹਮਲਾਵਰ ਦੋ ਮੋਟਰਸਾਈਕਲਾਂ 'ਤੇ ਫਰਾਰ ਹੋ ਗਏ।
ਸਥਾਨਕ ਪੱਤਰਕਾਰ ਪੰਕਜ ਕੁਮਾਰ ਮੁਤਾਬਕ, ਅੰਕਿਤ ਬਾਲਿਆਨ ਦੇ ਕਤਲ ਦੀ ਖਬਰ ਫੈਲਦੇ ਹੀ ਲੋਕ ਇਕੱਠੇ ਹੋ ਗਏ ਅਤੇ ਹਾਈਵੇਅ ਜਾਮ ਕਰ ਦਿੱਤਾ। ਕਈ ਘੰਟੇ ਤੱਕ ਅੰਕਿਤ ਦੇ ਪਰਿਵਾਰਕ ਮੈਂਬਰਾਂ ਅਤੇ ਸਮਰਥਕਾਂ ਨੇ ਹਾਈਵੇਅ ਜਾਮ ਰੱਖਿਆ ਅਤੇ ਹਮਲਾਵਰਾਂ ਦੀ ਜਲਦੀ ਗ੍ਰਿਫਤਾਰੀ ਦਾ ਭਰੋਸਾ ਮਿਲਣ ਬਾਅਦ ਰਸਤਾ ਖੋਲ੍ਹਿਆ ਜਾ ਸਕਿਆ।
ਜਿਮ ਸੰਚਾਲਕ ਰਵੀ ਸ਼ਰਮਾ ਮੁਤਾਬਕ, ਅੰਕਿਤ ਬਾਲਿਆਨ ਰੋਜ਼ਾਨਾ ਜਿਮ ਆਉਂਦੇ ਸੀ ਅਤੇ ਬੁੱਧਵਾਰ ਨੂੰ ਵੀ ਕਰੀਬ ਸਾਢੇ ਚਾਰ ਵਜੇ ਉਹ ਜਿਮ ਪਹੁੰਚੇ ਸੀ।
ਰਵੀ ਸ਼ਰਮਾ ਮੁਤਾਬਕ, "ਵਰਕਆਊਟ ਤੋਂ ਬਾਅਦ ਜਿਵੇਂ ਹੀ ਉਹ ਜਿਮ ਤੋਂ ਨਿਕਲ ਕੇ ਕਾਰ ਕੋਲ ਪਹੁੰਚੇ, ਉਨ੍ਹਾਂ 'ਤੇ ਹਮਲਾ ਹੋ ਗਿਆ।"
ਮੇਰਠ ਜ਼ੋਨ ਦੇ ਕਈ ਸੀਨੀਅਰ ਪੁਲਿਸ ਅਧਿਕਾਰੀ ਵੀ ਮੌਕੇ 'ਤੇ ਪਹੁੰਚੇ।
ਪੰਕਜ ਕੁਮਾਰ ਮੁਤਾਬਕ ਇਕੱਠੇ ਹੋਏ ਲੋਕ ਕਾਨੂੰਨ ਵਿਵਸਥਾ 'ਤੇ ਸਵਾਲ ਚੁੱਕ ਰਹੇ ਸੀ ਅਤੇ ਹਮਲਾਵਰਾਂ ਦੇ ਐਨਕਾਊਂਟਰ ਦੀ ਮੰਗ ਕਰ ਰਹੇ ਸੀ।
ਕੌਣ ਸੀ ਅੰਕਿਤ ਬਾਲਿਆਨ ?
ਸ਼ਾਮਲੀ ਦੇ ਬਾਬਰੀ ਇਲਾਕੇ ਦੇ ਬੰਤੀਖੇੜਾ ਪਿੰਡ ਦੇ ਰਹਿਣ ਵਾਲੇ ਅੰਕਿਤ ਬਾਲਿਆਨ ਕਬੱਡੀ ਖਿਡਾਰੀ ਵੀ ਰਹੇ ਹਨ। ਪਰਿਵਾਰਕ ਮੈਂਬਰਾਂ ਮੁਤਾਬਕ, ਉਨ੍ਹਾਂ ਨੇ ਪੈਰ ਵਿੱਚ ਫਰੈਕਚਰ ਹੋਣ ਬਾਅਦ ਕਬੱਡੀ ਖੇਡਣਾ ਛੱਡ ਦਿੱਤਾ ਸੀ।
ਪਰਿਵਾਰਕ ਜੀਆਂ ਮੁਤਾਬਕ, ਅੰਕਿਤ ਬਾਲਿਆਨ ਚਾਰ ਭੈਣ ਭਰਾਵਾਂ ਵਿੱਚੋਂ ਤੀਜੇ ਨੰਬਰ ਵਾਲੇ ਸਨ। ਵੱਡੀਆਂ ਦੋ ਭੈਣਾਂ ਦਾ ਵਿਆਹ ਹੋ ਚੁੱਕਿਆ ਸੀ।
ਅੰਕਿਤ ਬਾਲਿਆਨ ਦਾ ਵਿਆਹ ਇੱਕ ਅਧਿਆਪਕਾ ਨਾਲ ਹੋਇਆ ਹੈ। ਅੰਕਿਤ ਦੇ ਪਿਤਾ ਸਤਬੀਰ ਸਿੰਘ ਫੌਜ ਤੋਂ ਰਿਟਾਇਰਡ ਹਨ ਅਤੇ ਹੁਣ ਪਿੰਡ ਵਿੱਚ ਖੇਤੀ ਕਰਦੇ ਹਨ।
ਅੰਕਿਤ ਬਾਲਿਆਨ ਦੇ ਪਿੰਡ ਵਿੱਚ ਪਹੁੰਚੇ ਰਿਪੋਰਟਰ ਪੰਕਜ ਕੁਮਾਰ ਮੁਤਾਬਕ, "ਸ਼ੁਰੂਆਤੀ ਦਿਨਾਂ ਵਿੱਚ ਅੰਕਿਤ ਬਾਲਿਆਨ ਪਿੰਡ ਵਿੱਚ ਹੀ ਮੋਬਾਈਲ ਫੋਨ ਦੀ ਦੁਕਾਨ ਚਲਾਉਂਦੇ ਸੀ, ਪਰ ਕੁਝ ਵੱਖਰਾ ਕਰਨ ਦਾ ਸੁਫਨਾ ਲੈ ਕੇ ਸਾਲ 2016 ਵਿੱਚ ਇੱਥੋਂ ਦਿੱਲੀ ਚਲੇ ਗਏ ਜਿੱਥੇ ਉਨ੍ਹਾਂ ਨੇ ਬੈਚਲਰ ਆਫ ਫ਼ਿਜ਼ੀਕਲ ਐਜੁਕੇਸ਼ਨ ਦੀ ਪੜ੍ਹਾਈ ਪੂਰੀ ਕੀਤੀ।"
ਹਾਲਾਂਕਿ ਇਸ ਤੋਂ ਬਾਅਦ ਉਹ ਸਾਲ 2018 ਵਿੱਚ ਹਰਿਆਣਾ ਚਲੇ ਗਏ ਅਤੇ ਸੋਨੀਪਤ ਵਿੱਚ ਰਹਿਣ ਲੱਗੇ ਸੀ ਅਤੇ 2025 ਤੱਕ ਉੱਥੇ ਹੀ ਰਹੇ। ਉਹ ਉੱਥੇ ਮਿਊਜ਼ਿਕ ਵੀਡੀਓਜ਼ ਵਿੱਚ ਐਕਟਿੰਗ ਕਰਨ ਲੱਗੇ। ਇੱਕ ਸਾਲ ਪਹਿਲਾਂ ਉਨ੍ਹਾਂ ਦਾ ਵਿਵਾਦ ਹੋਇਆ ਸੀ ਜਿਸ ਦੇ ਚਲਦੇ ਤਕਰੀਬਨ ਛੇ ਮਹੀਨੇ ਤੋਂ ਉਹ ਹਰਿਆਣਾ ਵਿੱਚ ਨਹੀਂ ਗਏ ਸਨ। ਸ਼ਾਮਲੀ ਪੁਲਿਸ ਨੇ ਵੀ ਇਸ ਵਿਵਾਦ ਦੀ ਪੁਸ਼ਟੀ ਕੀਤੀ ਹੈ।
ਅੰਕਿਤ ਦੇ ਪਰਿਵਾਰਕ ਮੈਂਬਰਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਦਾ ਹਰਿਆਣਾ ਦੇ ਕੁਝ ਗਾਇਕਾਂ ਨਾਲ ਵੀ ਵਿਵਾਦ ਹੋਇਆ ਅਤੇ ਉਨ੍ਹਾਂ ਤੋਂ ਰੰਗਦਾਰੀ ਵੀ ਮੰਗੀ ਗਈ ਸੀ। ਹਾਲਾਂਕਿ ਅੰਕਿਤ ਵੱਲੋਂ ਇਸ ਸਬੰਧ ਵਿੱਚ ਪੁਲਿਸ ਨੂੰ ਕੋਈ ਸ਼ਿਕਾਇਤ ਨਹੀਂ ਦਿੱਤੀ ਗਈ ਸੀ।
ਵਿਵਾਦਤ ਗੀਤਾਂ ਨਾਲ ਮਿਲੀ ਪਛਾਣ
ਸ਼ਾਮਲੀ ਵਿੱਚ ਪੈਦਾ ਹੋਏ ਅੰਕਿਤ ਬਾਲਿਆਨ ਨੇ ਪਿਛਲੇ ਕੁਝ ਸਾਲਾਂ ਵਿੱਚ ਹਰਿਆਣਵੀ ਮਿਊਜ਼ਿਕ ਇੰਡਸਟਰੀ ਵਿਚ ਆਪਣੀ ਜਗ੍ਹਾ ਅਤੇ ਪਛਾਣ ਬਣਾ ਲਈ ਸੀ।
ਜਿਨ੍ਹਾਂ ਗੀਤਾਂ ਵਿੱਚ ਉਹ ਦਿਖੇ, ਉਨ੍ਹਾਂ ਦੇ ਬੋਲ ਵਿਵਾਦਤ ਸੀ ਪਰ ਇਨ੍ਹਾਂ ਨਾਲ ਉਹ ਪੱਛਮੀ ਉੱਤਰ ਪ੍ਰਦੇਸ਼ ਅਤੇ ਹਰਿਆਣਾ ਵਿੱਚ ਜਾਣਿਆ ਪਛਾਣਿਆ ਚਿਹਰਾ ਬਣ ਗਏ।
ਉਨ੍ਹਾਂ ਦੇ ਗਾਣਿਆਂ ਵਿੱਚ ਕੋਰਟ, ਗੋਲੀ, ਆਰਡਰ, ਬਦਮਾਸ਼ ਜਿਹੇ ਸ਼ਬਦ ਪ੍ਰਮੁਖਤਾ ਨਾਲ ਸਨ।
ਉਹ ਪਹਿਲੀ ਵਾਰ ਚਰਚਾ ਵਿੱਚ ਆਪਣੇ ਗੀਤ 'ਭਰੀ ਕੋਰਟ ਮੇਂ ਗੋਲੀ ਮਾਰੇਂਗੇ' ਨਾਲ ਆਏ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਦਾ ਗੀਤ 'ਏਕ ਖਟੋਲਾ ਜੇਲ ਕੇ ਭੀਤਰ' ਵੀ ਕਾਫ਼ੀ ਚਰਚਿਤ ਹੋਇਆ। ਇਨ੍ਹਾਂ ਦੋਹਾਂ ਹੀ ਗਾਣਿਆਂ ਦੇ ਯੂਟਿਊਬ 'ਤੇ ਸਾਢੇ ਪੰਜ ਕਰੋੜ ਤੋਂ ਜ਼ਿਆਦਾ ਵਿਊਜ਼ ਹਨ।
ਉਨ੍ਹਾਂ ਨੇ ਹਰਿਆਣਾ ਦੇ ਮਸ਼ਹੂਰ ਗਾਇਕ ਮਾਸੂਮ ਸ਼ਰਮਾ ਨਾਲ ਵੀ ਕਈ ਵੀਡੀਓ ਬਣਾਈਆਂ ਹਨ। ਅੰਕਿਤ ਬਾਲਿਆਨ ਦੇ ਜ਼ਿਆਦਾਤਰ ਗੀਤ ਗੈਂਗਸਟਰ ਕਲਚਰ ਅਤੇ ਅਪਰਾਧ ਦੀ ਦੁਨੀਆਂ ਨਾਲ ਜੁੜੇ ਸਨ।
ਇੰਸਟਾਗ੍ਰਾਮ 'ਤੇ ਉਨ੍ਹਾਂ ਦੇ ਕਰੀਬ ਪੰਜ ਲੱਖ ਫੌਲੋਅਰਜ਼ ਸਨ। ਜੋ ਆਖ਼ਰੀ ਰੀਲ ਉਨ੍ਹਾਂ ਨੇ ਬੁੱਧਵਾਰ ਨੂੰ ਸ਼ੇਅਰ ਕੀਤੀ ਸੀ ਉਸ ਵਿੱਚ ਵੀ ਉਨ੍ਹਾਂ ਨੇ ਕਿਹਾ ਸੀ, "ਮਰਡਰ ਮਾਰ ਦੇ ਸੜਕ ਕੇ ਉਪਰ, ਜੋ ਖਟਕੇਗਾ ਵੋ ਭਟਕੇਗਾ।"
ਹਰਿਆਣਵੀ ਗੀਤਕਾਰ ਐਸ.ਕੇ ਮੁਜਾਦਪੁਰੀਆ ਮੁਤਾਬਕ, "ਅੰਕਿਤ ਬਾਲਿਆਨ ਨੇ ਜ਼ਿਆਦਾਤਰ ਗੀਤ ਗੈਂਗਸਟਰ ਕਲਚਰ 'ਤੇ ਬਣਾਏ ਹਨ ਅਤੇ ਇੱਕ ਤਰ੍ਹਾਂ ਉਨ੍ਹਾਂ ਦੇ ਗੀਤਾਂ ਨੇ ਨੌਜਵਾਨਾਂ ਨੂੰ ਵੀ ਪ੍ਰਭਾਵਿਤ ਕੀਤਾ।"
ਮੁਜਾਦਪੁਰੀਆ ਨੇ ਇਹ ਵੀ ਕਿਹਾ, "ਹਰਿਆਣਾ ਮਿਊਜ਼ਿਕ ਇੰਡਸਟਰੀ ਦੇ ਬਦਮਾਸ਼ੀ ਕਲਚਰ ਨਾਲ ਜੁੜੇ ਗਾਣੇ ਭਾਵੇਂ ਹੀ ਜ਼ਿਆਦਾ ਚਰਚਾ ਵਿੱਚ ਰਹੇ ਹੋਣ ਪਰ ਹਰਿਆਣਾ ਮਿਊਜ਼ਿਕ ਸਿਰਫ਼ ਗੈਂਗਸਟਰ ਕਲਚਰ ਤੱਕ ਸੀਮਤ ਨਹੀਂ ਹੈ।"
ਅੰਕਿਤ ਬਾਲਿਆਨ ਮਿਊਜ਼ਿਕ ਵੀਡੀਓਜ਼ ਵਿੱਚ ਲੀਡ ਐਕਟਰ ਵਜੋਂ ਵੀ ਦਿਖਦੇ ਸੀ। ਜਿਨ੍ਹਾਂ ਗਾਣਿਆਂ ਤੋਂ ਉਹ ਚਰਚਿਤ ਹੋਏ ਉਨ੍ਹਾਂ ਵਿੱਚ ਕੋਈ ਬੋਲ ਗੀਤਕਾਰ ਰਾਹੁਲ ਪੁੱਠੀ ਨੇ ਲਿਖੇ ਹਨ।
ਅੰਕਿਤ ਬਾਲਿਆਨ ਨਾਲ ਜੁੜੇ ਰਹੇ ਲੋਕਾਂ ਨੇ ਬੀਬੀਸੀ ਨੂੰ ਦੱਸਿਆ ਹੈ ਕਿ ਉਹ ਸੋਨੀਪਤ ਅਤੇ ਰੋਹਤਕ ਦੇ ਆਲੇ ਦੁਆਲੇ ਜ਼ਿਆਦਾ ਸਰਗਰਮ ਸਨ ਪਰ ਪਿਛਲੇ ਕੁਝ ਸਮੇਂ ਤੋਂ ਉੱਤਰ ਪ੍ਰਦੇਸ਼ ਦੇ ਸ਼ਾਮਲੀ ਜ਼ਿਲ੍ਹੇ ਦੇ ਆਪਣੇ ਜੱਦੀ ਪਿੰਡ ਵਿੱਚ ਰਹਿ ਰਹੇ ਸਨ।
ਮੁਜਾਦਪੁਰੀਆ ਮੁਤਾਬਕ, "ਅੰਕਿਤ ਬਾਲਿਆਨ ਦੇ ਗਾਣੇ ਗੈਂਗਸਟਰ ਕਲਚਰ ਤੱਕ ਹੀ ਸੀਮਤ ਸਨ, ਹਰਿਆਣਾ ਮਿਊਜ਼ਿਕ ਇੰਡਸਟਰੀ ਲਈ ਉਨ੍ਹਾਂ ਦਾ ਇਹੀ ਕੰਟ੍ਰੀਬਿਊਸ਼ਨ ਹੈ। ਉਹ ਮਿਊਜ਼ਕ ਵੀਡੀਓ ਵਿੱਚ ਮਾਡਲਿੰਗ ਕਰਦੇ ਸੀ। ਹਰਿਆਣਾ ਵਿੱਚ ਸਟੇਜ ਸ਼ੋਅ ਦਾ ਜੋ ਕਲਚਰ ਹੈ, ਉਹ ਉਸ ਤੋਂ ਦੂਰ ਰਹਿੰਦੇ ਸੀ।"
ਪਰਿਵਾਰਕ ਜੀਅ ਕੀ ਕਹਿ ਰਹੇ ਹਨ?
ਅੰਕਿਤ ਬਾਲਿਆਨ ਦੇ ਕਤਲ ਤੋਂ ਬਾਅਦ ਪਰਿਵਾਰ ਨੇ ਕਿਹਾ ਹੈ ਕਿ ਉਨ੍ਹਾਂ ਦੀ ਕਿਸੇ ਨਾਲ ਦੁਸ਼ਮਣੀ ਨਹੀਂ ਸੀ।
ਅੰਕਿਤ ਬਾਲਿਆਨ ਦੇ ਪਿਤਾ ਸਤਬੀਰ ਬਾਲਿਆਨ ਨੇ ਕਿਹਾ, "ਉਨ੍ਹਾਂ ਦਾ ਕਿਸੇ ਨਾਲ ਝਗੜਾ ਨਹੀਂ ਸੀ, ਉਹ ਹਰਿਆਣਾ ਜਾਂਦਾ ਸੀ ਅਤੇ ਗਾਣੇ ਬਣਾਉਂਦਾ ਸੀ, ਪੁਲਿਸ ਨੇ ਸਾਨੂੰ ਭਰੋਸਾ ਦਿੱਤਾ ਹੈ ਕਿ ਉਹ ਜਲਦੀ ਹੀ ਦੁੱਧ ਦਾ ਦੁੱਧ ਤੇ ਪਾਣੀ ਦਾ ਪਾਣੀ ਕਰ ਦੇਣਗੇ ਅਤੇ ਅਪਰਾਧੀਆਂ ਨੂੰ ਗ੍ਰਿਫ਼ਤਾਰ ਕਰਨਗੇ।"
ਸਥਾਨਕ ਰਿਪੋਰਟਰ ਪੰਕਜ ਕੁਮਾਰ ਮੁਤਾਬਕ, ਬਾਲਿਆਨ ਜ਼ਿਲ੍ਹਾ ਪੰਚਾਇਤ ਦੀ ਚੋਣ ਲੜਨ ਦੀ ਤਿਆਰੀ ਵੀ ਕਰ ਰਹੇ ਸਨ। ਹਾਲਾਂਕਿ ਉਨ੍ਹਾਂ ਦੇ ਸਹੁਰੇ ਵਿਕਰਮ ਬਾਲਿਆਨ ਮੁਤਾਬਕ ਇਸ ਦਾ ਉਨ੍ਹਾਂ ਦੇ ਕਤਲ ਨਾਲ ਕੋਈ ਸਬੰਧ ਨਹੀਂ ਹੈ। ਸ਼ਾਮਲੀ ਪੁਲਿਸ ਨੇ ਵੀ ਉਨ੍ਹਾਂ ਦੇ ਕਤਲ ਦੇ ਸਿਆਸਤ ਨਾਲ ਜੁੜੇ ਹੋਣ ਦੀ ਸੰਭਾਵਨਾ ਤੋਂ ਇਨਕਾਰ ਕੀਤਾ ਹੈ।
ਪਰਿਵਾਰਕ ਮੈਂਬਰਾਂ ਨੇ ਪੁਲਿਸ ਅਤੇ ਕਾਨੂੰਨ ਵਿਵਸਥਾ 'ਤੇ ਵੀ ਸਵਾਲ ਚੁੱਕੇ ਹਨ। ਅੰਕਿਤ ਬਾਲਿਆਨ ਦੇ ਛੋਟੇ ਭਰਾ ਵਿੱਕੀ ਨੇ ਕਿਹਾ, "ਪੁਲਿਸ ਹਰ ਚੈਕਿੰਗ ਕਰਦੀ ਹੈ, ਬਾਵਜੂਦ ਇਸ ਦੇ ਚਾਰ ਹਮਲਾਵਰ ਆਏ ਗੋਲੀਆਂ ਮਾਰੀਆਂ ਅਤੇ ਫਰਾਰ ਹੋ ਗਏ। ਘਟਨਾ ਵਾਲੀ ਥਾਂ ਕੋਤਵਾਲੀ ਤੋਂ ਇੱਕ ਕਿੱਲੋਮੀਟਰ ਦੂਰ ਵੀ ਨਹੀਂ ਹੈ, ਅਜਿਹਾ ਕਿਵੇਂ ਹੋ ਗਿਆ?"
ਹਰਿਆਣਾ ਨਾਲ ਕਤਲ ਦਾ ਕਨੈਕਸ਼ਨ?
ਸ਼ਾਮਲੀ ਪੁਲਿਸ ਅੰਕਿਤ ਬਾਲਿਆਨ ਦੇ ਕਤਲ ਨੂੰ ਹਰਿਆਣਾ ਨਾਲ ਜੋੜ ਕੇ ਦੇਖ ਰਹੀ ਹੈ।
ਐੱਸਪੀ ਨਰਿੰਦਰ ਪ੍ਰਤਾਪ ਸਿੰਘ ਨੇ ਦੱਸਿਆ, "ਜੋ ਵਾਹਨ ਸਨ ਉਨ੍ਹਾਂ ਦਾ ਮੂਵਮੈਂਟ ਹਰਿਆਣਾ ਵੱਲ ਹੋਇਆ ਹੈ। ਸਾਨੂੰ ਲੱਗ ਰਿਹਾ ਹੈ ਕਿ ਇਸ ਕਤਲ ਦਾ ਕਨੈਕਸ਼ਨ ਹਰਿਆਣਾ ਨਾਲ ਹੈ। ਸਾਡੀ ਐੱਸਓਜੀ ਅਤੇ ਸਰਵੀਲੈਂਸ ਟੀਮ ਹਰਿਆਣਾ ਵਿੱਚ ਹੈ ਅਤੇ ਉੱਥੋਂ ਦੇ ਅਧਿਕਾਰੀਆਂ ਨਾਲ ਲਗਾਤਾਰ ਸੰਪਰਕ ਵਿੱਚ ਹੈ।"
ਪੁਲਿਸ ਨੇ ਦਾਅਵਾ ਕੀਤਾ ਹੈ ਕਿ ਜਾਂਚ ਦੌਰਾਨ ਜੋ ਸ਼ੁਰੂਆਤੀ ਇਨਪੁਟ ਮਿਲੇ ਹਨ ਉਨ੍ਹਾਂ ਵਿੱਚ ਕੁਝ ਗੈਂਗਸਟਰਾਂ ਦੇ ਨਾਮ ਵੀ ਸਾਹਮਣੇ ਆ ਰਹੇ ਹਨ।
ਨਰਿੰਦਰ ਪ੍ਰਤਾਪ ਸਿੰਘ ਨੇ ਦੱਸਿਆ, "ਸਾਨੂੰ ਹਰਿਆਣਾ ਪੁਲਿਸ ਤੋਂ ਵੀ ਕੁਝ ਇਨਪੁਟ ਮਿਲੇ ਹਨ। ਗੈਂਗ ਦੇ ਲੋਕਾਂ ਦੇ ਕੁਝ ਨਾਮ ਵੀ ਸਾਹਮਣੇ ਆਏ ਹਨ। ਸਾਡੀਆਂ ਟੀਮਾਂ ਉੱਥੇ ਗਈਆਂ ਹੋਈਆਂ ਹਨ ਅਤੇ ਬਹੁਤ ਜਲਦੀ ਪੁੱਛਗਿੱਛ ਤੋਂ ਬਾਅਦ ਮੁਲਜ਼ਮਾਂ ਨੂੰ ਪਛਾਣ ਕੇ ਗ੍ਰਿਫ਼ਤਾਰ ਕੀਤਾ ਜਾਵੇਗਾ।"
ਪੁਲਿਸ ਨੇ ਸੋਸ਼ਲ ਮੀਡੀਆ 'ਤੇ ਗੋਗੀ ਗਰੁੱਪ ਦੇ ਨਾਮ ਤੋਂ ਕੀਤੀ ਗਈ ਪੋਸਟ ਦਾ ਵੀ ਨੋਟਿਸ ਲਿਆ ਹੈ ਅਤੇ ਇਸ ਨੂੰ ਵੀ ਜਾਂਚ ਵਿੱਚ ਸ਼ਾਮਲ ਕੀਤਾ ਹੈ। ਪੁਲਿਸ ਮੁਤਾਬਕ, ਜਿਸ ਆਈਡੀ ਤੋਂ ਪੋਸਟ ਹੋਈ ਹੈ ਉਹ ਹਾਲ ਹੀ ਵਿੱਚ ਬਣੀ ਹੈ।
ਨਰਿੰਦਰ ਪ੍ਰਤਾਪ ਸਿੰਘ ਨੇ ਦੱਸਿਆ, "ਰਾਤ ਕਰੀਬ ਢਾਈ ਵਜੇ ਇੰਸਟਾਗ੍ਰਾਮ 'ਤੇ ਗੋਗੀ ਗਰੁੱਪ ਦੇ ਨਾਮ ਤੋਂ ਇੱਕ ਪੋਸਟ ਆਈ ਸੀ। ਉਸ ਵਿੱਚ ਵਿਅਕਤੀ ਨੇ ਕਤਲ ਦੇ ਕਾਰਨ ਬਾਰੇ ਦਾਅਵਾ ਕੀਤਾ ਹੈ। ਅਸੀਂ ਉਸ ਪੋਸਟ ਦਾ ਵੀ ਨੋਟਿਸ ਲਿਆ ਹੈ ਅਤੇ ਉਸ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।"
ਪੁਲਿਸ ਮੁਤਾਬਕ, ਜਾਂਚ ਦੌਰਾਨ ਸੋਸ਼ਲ ਮੀਡੀਆ 'ਤੇ ਕਈ ਹੋਰ ਵੀਡੀਓ ਵੀ ਸਾਹਮਣੇ ਆਏ ਹਨ। ਐੱਸਪੀ ਨੇ ਕਿਹਾ, "ਫੇਸਬੁੱਕ 'ਤੇ ਕਈ ਅਜਿਹੇ ਵੀਡੀਓ ਵੀ ਸਾਹਮਣੇ ਆ ਰਹੇ ਹਨ, ਜਿਨ੍ਹਾਂ ਵਿੱਚ ਕੁਝ ਲੋਕ ਕਤਲ ਦੀ ਜ਼ਿੰਮੇਵਾਰੀ ਲੈਣ ਅਤੇ ਮ੍ਰਿਤਕ ਦੇ ਨਾਲ ਗਾਲੀ ਗਲੌਚ ਹੋਣ ਨੂੰ ਲੈ ਕੇ ਗੱਲਾਂ ਕਰ ਰਹੇ ਹਨ। ਇਨ੍ਹਾਂ ਸਾਰੇ ਤੱਥਾਂ ਨੂੰ ਅਸੀਂ ਜਾਂਚ ਵਿੱਚ ਸ਼ਾਮਲ ਕਰ ਰਹੇ ਹਾਂ।"
ਪੁਲਿਸ ਦਾ ਕਹਿਣਾ ਹੈ ਕਿ ਘਟਨਾ ਤੋਂ ਬਾਅਦ ਇਲੈਕਟ੍ਰਾਨਿਕ ਸਬੂਤ ਵੀ ਜੁਟਾਏ ਜਾ ਰਹੇ ਹਨ। ਐੱਸਪੀ ਨੇ ਕਿਹਾ, "ਸਾਡੇ ਕੋਲ ਜੋ ਸਾਰੇ ਇਲੈਕਟ੍ਰਾਨਿਕ ਐਵੀਡੈਂਸ ਹਨ, ਉਨ੍ਹਾਂ ਨੂੰ ਲੈ ਕੇ ਅਸੀਂ ਕੰਮ ਕਰ ਰਹੇ ਹਾਂ। ਇਸ ਤੋਂ ਇਲਾਵਾ ਸਾਡੇ ਕੋਲ ਕੁਝ ਬਹੁਤ ਹੀ ਕ੍ਰੈਡੀਬਲ ਇਨਪੁਟਸ ਵੀ ਹਨ, ਜਿਨ੍ਹਾਂ ਦੇ ਅਧਾਰ 'ਤੇ ਕਾਰਵਾਈ ਚੱਲ ਰਹੀ ਹੈ।"
ਪੁਲਿਸ ਨੇ ਇਹ ਵੀ ਕਿਹਾ ਹੈ ਕਿ ਇਸ ਘਟਨਾ ਤੋਂ ਪਹਿਲਾਂ ਅੰਕਿਤ ਬਾਲਿਆਨ ਜਾਂ ਉਨ੍ਹਾਂ ਦੇ ਪਰਿਵਾਰ ਵੱਲੋਂ ਕੋਈ ਸ਼ਿਕਾਇਤ ਪੁਲਿਸ ਨੂੰ ਨਹੀਂ ਮਿਲੀ ਸੀ।
ਵਾਇਰਲ ਗਾਣੇ ਦੇ ਆਲੇ-ਦੁਆਲੇ ਜਾਂਚ
ਅੰਕਿਤ ਬਾਲਿਆਨ ਦੇ ਕਤਲ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਕੀਤੇ ਗਏ ਪੋਸਟ ਵਿੱਚ ਕਿਹਾ ਗਿਆ ਹੈ, "ਇਹ ਜੋ ਅੱਜ ਸ਼ਾਮਲੀ ਵਿੱਚ ਅੰਕਿਤ ਬਾਲਿਆਨ ਦਾ ਕਤਲ ਹੋਇਆ ਹੈ, ਇਸ ਦੀ ਪੂਰੀ ਜ਼ਿੰਮੇਵਾਰੀ ਮੈਂ ਭੋਲੂ ਸ਼ਾਹਪੁਰੀਆ(ਸੋਨੀਪਤ) ਲੈਂਦਾ ਹਾਂ। ਇਹ ਸਾਡੇ ਦੁਸ਼ਮਣਾਂ ਦਾ ਸਾਥ ਦਿੰਦਾ ਸੀ। ਸਾਡੇ ਗੋਗੀ ਭਰਾ ਦੇ ਨਾਲ ਹੋਈ ਘਟਨਾ 'ਤੇ ਇਸ ਨੇ ਗਾਣਾ ਬਣਾਇਆ ਸੀ। ਸਾਡੇ ਦੁਸ਼ਮਣਾਂ ਦਾ ਅਪਰਾਧਿਕ ਕੰਮਾਂ ਵਿੱਚ ਸਾਥ ਦਿੰਦਾ ਸੀ।"
ਜਤੇਂਦਰ ਗੋਗੀ ਦਿੱਲੀ ਦਾ ਇੱਕ ਚਰਚਿਤ ਗੈਂਗਸਟਰ ਸੀ ਜਿਸ ਦਾ ਕੋਰਟ ਪਰਿਸਰ ਵਿੱਚ ਵਕੀਲਾਂ ਦੇ ਕੱਪੜੇ ਪਹਿਨ ਕੇ ਆਏ ਹਮਲਾਵਰਾਂ ਨੇ 2021 ਵਿੱਚ ਕਤਲ ਕਰ ਦਿੱਤਾ ਸੀ।
ਜਤੇਂਦਰ ਗੋਗੀ ਦੀ ਗੈਂਗਸਟਰ ਟਿੱਲੂ ਤਾਜਪੁਰੀਆ ਨਾਲ ਪੁਰਾਣੀ ਰੰਜਿਸ਼ ਸੀ। ਬਾਅਦ ਵਿੱਚ 2023 ਵਿੱਚ ਟਿੱਲੂ ਤਾਜਪੁਰੀਆ ਦਾ ਤਿਹਾੜ ਜੇਲ੍ਹ ਦੇ ਅੰਦਰ ਕਤਲ ਕਰ ਦਿੱਤਾ ਗਿਆ ਸੀ।
ਸ਼ਾਮਲੀ ਪੁਲਿਸ ਮੰਨ ਰਹੀ ਹੈ ਕਿ ਕਤਲ ਦਾ ਇੱਕ ਕਾਰਨ ਇਸ ਗੀਤ ਦੇ ਬੋਲ ਵੀ ਹੋ ਸਕਦੇ ਹਨ।
ਐੱਸਪੀ ਨਰਿੰਦਰ ਪ੍ਰਤਾਪ ਸਿੰਘ ਨੇ ਕਿਹਾ, "ਹੁਣ ਤਕ ਦੀ ਜਾਂਚ ਵਿੱਚ ਸਿਆਸੀ ਕੁਨੈਕਸ਼ਨ ਬਿਲਕੁਲ ਸਾਹਮਣੇ ਨਹੀਂ ਆਇਆ ਹੈ। ਪੂਰਾ ਮਾਮਲਾ ਹਰਿਆਣਾ ਨਾਲ ਕਨੈਕਟਡ ਲਗਦਾ ਹੈ। ਸਾਨੂੰ ਲਗਦਾ ਹੈ ਜੋ ਗਾਣਾ ਵਾਇਰਲ ਹੋਇਆ ਸੀ, ਕਹਾਣੀ ਕੁਝ ਕੁਝ ਉਸੇ ਦੇ ਆਲੇ-ਦੁਆਲੇ ਘੁੰਮ ਰਹੀ ਹੈ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ