ਔਰਤਾਂ ਨੇ ਇਲਜ਼ਾਮ ਲਗਾਏ, ‘ਫਰਾਂਸ ਦੇ ਅਧਿਕਾਰੀ ਨੇ ਸਾਨੂੰ ਨਸ਼ੀਲੀ ਚੀਜ਼ ਦੇ ਕੇ ਕੱਪੜਿਆਂ ਵਿੱਚ ਪਿਸ਼ਾਬ ਕਰਨ ਲਈ ਮਜਬੂਰ ਕੀਤਾ’

ਅਨਾਇਸ ਡੇ ਵੋਸ ਨੇ ਕਿਹਾ, "ਮੈਂ ਬਹੁਤ ਕਮਜ਼ੋਰ ਮਹਿਸੂਸ ਕਰ ਰਹੀ ਸੀ। ਮੈਨੂੰ ਆਪਣੀਆਂ ਲੱਤਾਂ ਮਹਿਸੂਸ ਨਹੀਂ ਹੋ ਰਹੀਆਂ ਸਨ। ਮੈਂ ਡਰੀ ਹੋਈ ਸੀ। ਮੈਨੂੰ ਸਮਝ ਨਹੀਂ ਆ ਰਿਹਾ ਸੀ ਕਿ ਕੀ ਹੋ ਰਿਹਾ ਹੈ।"

ਜੁਲਾਈ 2011 ਦੀ ਗੱਲ ਹੈ, ਆਨਇਸ ਉਸ ਵੇਲੇ 27 ਸਾਲਾਂ ਦੀ ਸੀ ਅਤੇ ਉਸ ਦੀ ਪੈਰਿਸ ਵਿੱਚ ਫਰਾਂਸ ਦੇ ਕਲਚਰਲ ਵਿਭਾਗ ਵਿੱਚ ਨੌਕਰੀ ਲਈ ਇੰਟਰਵਿਊ ਹੋ ਰਹੀ ਸੀ।

ਉਹ ਆਮ ਤੌਰ 'ਤੇ ਕੌਫ਼ੀ ਨਹੀਂ ਪੀਂਦੀ ਸੀ ਪਰ ਜਦੋਂ ਇੰਟਰਵਿਊਰ, ਜੋ ਕਿ ਸੀਨੀਅਰ ਸਿਵਲ ਅਧਿਕਾਰੀ ਕ੍ਰਿਸਚੀਅਨ ਨੇਗਰੇ ਸੀ, ਨੇ ਪੇਸ਼ਕਸ਼ ਕੀਤੀ ਤਾਂ ਉਸ ਨੇ ਨਿਮਰਤਾ ਦਿਖਾਉਂਦਿਆਂ ਸਹਿਮਤੀ ਜਤਾ ਦਿੱਤੀ।

ਅਨਾਇਸ ਨੇ ਬੀਬੀਸੀ ਗਲੋਬਲ ਵੂਮਨ ਨੂੰ ਦੱਸਿਆ, "ਉਸ ਨੇ ਇਹ ਖੁਦ ਬਣਾਈ ਸੀ। ਪਰ ਇਸ ਦਾ ਸਵਾਦ ਬਹੁਤ ਖ਼ਰਾਬ ਸੀ, ਮੈਂ ਤਕਰੀਬਨ ਅੱਧੀ ਕੌਫ਼ੀ ਪੀ ਲਈ।"

ਮੀਟਿੰਗ ਦਫ਼ਤਰ ਵਿਚ ਸ਼ੁਰੂ ਹੋਈ ਪਰ ਕੁਝ ਮਿੰਟਾਂ ਬਾਅਦ ਨੇਗਰੇ ਨੇ ਬਾਹਰ ਚੱਲਣ ਦਾ ਸੁਝਾਅ ਦਿੱਤਾ।

ਜਦੋਂ ਉਹ ਪੈਰਿਸ ਦੀਆਂ ਗਲੀਆਂ ਵਿੱਚ ਘੁੰਮ ਰਹੇ ਸੀ ਅਨਾਇਸ ਨੂੰ ਅਣਜਾਣ ਅਤੇ ਬੇਕਾਬੂ ਤਰੀਕੇ ਨਾਲ ਪਿਸ਼ਾਬ ਜਾਣ ਦੀ ਲੋੜ ਮਹਿਸੂਸ ਹੋਣ ਲੱਗੀ।

ਉਹ ਕਹਿੰਦੇ ਹੈ ਕਿ ਉਸ ਨੇ ਨੇਗਰੇ ਨੂੰ ਦੱਸਿਆ ਕਿ ਉਸ ਨੂੰ ਤੁਰੰਤ ਟਾਇਲਟ ਲੱਭਣ ਦੀ ਲੋੜ ਹੈ।

"ਉਸ ਨੇ ਮੇਰੀਆਂ ਅੱਖਾਂ ਵਿੱਚ ਦੇਖਿਆ ਅਤੇ ਕਿਹਾ, ਓ, ਕੀ ਤੁਹਾਨੂੰ ਪਿਸ਼ਾਬ ਆਇਆ ਹੈ ?"

"ਮੈਂ ਬੱਚੇ ਵਾਂਗ ਮਹਿਸੂਸ ਕੀਤਾ। ਮੈਂ ਸੋਚਿਆ ਇਹ ਬਹੁਤ ਅਜੀਬ ਸੀ ਜਿਸ ਤਰ੍ਹਾਂ ਉਸ ਨੇ ਮੇਰੇ ਵੱਲ ਵੇਖਿਆ, ਉਹ ਬਹੁਤ ਖੁਸ਼ ਦਿਖਾਈ ਦੇ ਰਿਹਾ ਸੀ।"

ਉਹ ਕਹਿੰਦੀ ਹੈ ਕਿ ਉਸ ਨੇ ਸੀਨ ਦਰਿਆ ਦੇ ਪੁਲ ਥੱਲੇ ਇੱਕ ਸਟੋਰੇਜ ਅਲਮਾਰੀ ਦੇ ਦਰਵਾਜ਼ੇ ਵੱਲ ਇਸ਼ਾਰਾ ਕੀਤਾ ਅਤੇ ਕਿਹਾ, 'ਤੁਸੀਂ ਇੱਥੇ ਕਰ ਸਕਦੇ ਹੋ।'

ਹੁਣ ਅਨਾਇਸ ਤਕਰੀਬਨ ਉਨ੍ਹਾਂ 250 ਔਰਤਾਂ ਵਿੱਚੋਂ ਹੈ ਜੋ ਮੰਨਦੀਆਂ ਹਨ ਕਿ ਨੇਗਰੇ ਨੇ 2009 ਤੋਂ 2018 ਵਿਚਕਾਰ ਕਥਿਤ ਘਟਨਾਵਾਂ ਦੌਰਾਨ ਉਨ੍ਹਾਂ ਨੂੰ ਨਸ਼ੀਲੀ ਚੀਜ਼ ਦਿੱਤੀ ਅਤੇ ਉਨ੍ਹਾਂ ਨੂੰ ਕੈਮੀਕਲ ਸਬਮਿਸ਼ਨ ਦੀ ਸਥਿਤੀ ਵਿੱਚੋਂ ਲੰਘਾਇਆ ਜਿੱਥੇ ਕਿਸੇ 'ਤੇ ਕਾਬੂ ਪਾਉਣ ਲਈ ਨਸ਼ਿਆਂ ਦੀ ਵਰਤੋਂ ਕੀਤੀ ਜਾਂਦੀ ਹੈ।

ਕੈਮੀਕਲ ਸਬਮਿਸ਼ਨ ਦਾ ਵਿਚਾਰ ਮੁੱਦਾ ਵਿੱਚ 2024 'ਚ ਸੁਰਖੀਆਂ ਵਿੱਚ ਆਇਆ ਜਦੋਂ ਗੀਸੇਲ ਪੇਲੀਕੌਟ ਦੇ ਪਤੀ ਨੂੰ ਉਸ ਨੂੰ ਨਸ਼ਾ ਦੇ ਕੇ ਅਜਨਬੀਆਂ ਨੂੰ ਉਸ ਦਾ ਰੇਪ ਕਰਨ ਲਈ ਬੁਲਾਉਣ ਦਾ ਦੋਸ਼ੀ ਮੰਨਿਆ ਗਿਆ।

ਉਹ ਕਹਿੰਦੀ ਹੈ, " ਮੈਂ ਘਬਰਾਉਣਾ ਸ਼ੁਰੂ ਹੋ ਗਈ। ਮੈਨੂੰ ਖਿਆਲ ਆ ਰਹੇ ਸਨ ਕਿ ਉਹ ਮੈਨੂੰ ਕਮਰੇ ਵਿੱਚ ਧੱਕਾ ਦੇ ਕੇ ਦਰਵਾਜ਼ਾ ਬੰਦ ਕਰ ਦੇਵੇਗਾ।"

ਇਹ ਮਹਿਸੂਸ ਕਰਨਾ ਬਹੁਤ ਅਜੀਬ ਸੀ। ਅਨਾਇਸ ਨੇ ਜ਼ੋਰ ਦਿੱਤਾ ਕਿ ਉਹ ਇੱਥੋਂ ਚੱਲਣ।

ਉਹ ਟਾਇਲਟ ਵਰਤਣ ਲਈ ਲੂਵਰ ਵੱਲ ਚੱਲ ਪਏ ਪਰ ਉੱਥੇ ਇੱਕ ਯੂਰੋ ਦਾ ਖ਼ਰਚਾ ਸੀ ਅਤੇ ਉਹ ਆਪਣਾ ਪਰਸ ਮੰਤਰਾਲੇ ਦੇ ਦਫ਼ਤਰ ਵਿਚ ਹੀ ਛੱਡ ਆਈ ਸੀ। ਨੇਗਰੇ ਨੇ ਕਿਹਾ ਕਿ ਉਸ ਕੋਲ ਵੀ ਕੈਸ਼ ਨਹੀਂ ਹੈ।

ਪਿਸ਼ਾਬ ਰੋਕਣ ਦੀ ਕੋਸ਼ਿਸ਼ ਵਿਚ ਦਰਦ ਅਤੇ ਬੇਚੈਨੀ ਦੌਰਾਨ ਅਨਾਇਸ ਨੂੰ ਇੱਕ ਕੈਫੇ ਮਿਲਿਆ ਜਿਨ੍ਹਾਂ ਨੇ ਉਸ ਨੂੰ ਟਾਇਲਟ ਵਰਤਣ ਦੀ ਇਜਾਜ਼ਤ ਦੇ ਦਿੱਤੀ।

ਉਹ ਕਹਿੰਦੀ ਹੈ, "ਉਦੋਂ ਤੱਕ ਮੈਂ ਸਰੀਰਕ ਰੂਪ ਵਿੱਚ ਖੁਦ ਨੂੰ ਬਹੁਤ ਕਮਜ਼ੋਰ ਮਹਿਸੂਸ ਕਰਨ ਲੱਗੀ।"

ਜਿਵੇਂ ਹੀ ਉਹ ਬਾਥਰੂਮ ਦੇ ਨੇੜੇ ਪਹੁੰਚੀ ਉਸ ਨੇ ਕਾਬੂ ਖੋਹ ਦਿੱਤਾ ਅਤੇ ਖੁਦ ਨੂੰ ਗਿੱਲਾ ਕਰ ਲਿਆ।

2011 ਦੇ ਉਸ ਸਮੇਂ ਨੂੰ ਯਾਦ ਕਰਦਿਆਂ ਅਨਾਇਸ ਇਸ ਗੱਲ ਤੋਂ ਰਾਹਤ ਮਹਿਸੂਸ ਕਰਦੀ ਹੈ ਕਿ ਜਦੋਂ ਉਸ ਨੇ ਪਿਸ਼ਾਬ ਕੀਤਾ, ਉਹ ਨੇਗਰੇ ਦੀ ਨਜ਼ਰ ਤੋਂ ਪਰ੍ਹੇ ਸੀ। ਉਹ ਕਹਿੰਦੀ ਹੈ, "ਘੱਟੋ ਘੱਟ ਉਸ ਵੇਲੇ ਉਸ ਨੇ ਮੈਨੂੰ ਨਹੀਂ ਦੇਖਿਆ।"

ਉਹ ਦੱਸਦੀ ਹੈ, "ਮੈਂ ਸ਼ੁਕਰਗੁਜ਼ਾਰ ਸੀ ਕਿ ਮੈਂ ਸਿਰਫ਼ ਡਰੈੱਸ ਪਹਿਨੀ ਹੋਈ ਸੀ। ਜੋ ਹੋਇਆ ਉਹ ਲੁਕਾਉਣਾ ਸੌਖਾ ਸੀ।"

ਉਹ ਕਹਿੰਦੀ ਹੈ ਕਿ ਨੇਗਰੇ ਨਾਲ ਤਿੰਨ ਘੰਟੇ ਬਿਤਾਉਣ ਬਾਅਦ ਉਸ ਨੂੰ ਚੱਕਰ ਆਉਣੇ ਸ਼ੁਰੂ ਹੋ ਗਏ ਅਤੇ ਉਹ ਪੂਰੀ ਤਰ੍ਹਾਂ ਥੱਕਿਆ ਮਹਿਸੂਸ ਕਰ ਰਹੀ ਸੀ।

ਉਸ ਨੂੰ ਨੌਕਰੀ ਨਹੀਂ ਮਿਲੀ ਅਤੇ ਨੇਗਰੇ ਬਾਰੇ ਸ਼ੱਕ ਹੋਇਆ ਪਰ ਉਸ ਨੂੰ ਪਤਾ ਨਹੀਂ ਲੱਗ ਰਿਹਾ ਸੀ ਕਿ ਕਿਹੜੀ ਚੀਜ਼ ਨੇ ਉਸ ਨੂੰ ਇੰਨਾ ਅਸਹਿਜ ਮਹਿਸੂਸ ਕਰਵਾਇਆ ਹੈ।

ਅਨਾਇਸ ਨੇ ਮਹਿਸੂਸ ਕੀਤਾ ਕਿ ਇਸ ਘਟਨਾ ਨੇ ਉਸ ਦੇ ਆਤਮ-ਵਿਸ਼ਵਾਸ ਨੂੰ ਸੱਟ ਮਾਰੀ ਅਤੇ ਅਗਲੇ ਸਾਲਾਂ ਦੌਰਾਨ ਉਸ ਨੇ ਘੱਟ ਅਭਿਲਾਸ਼ੀ ਕਰੀਅਰ ਦਾ ਰਸਤਾ ਚੁਣਿਆ।

ਫਿਰ 2019 ਵਿੱਚ ਉਸ ਨੂੰ ਪੁਲਿਸ ਤੋਂ ਇੱਕ ਚਿੱਠੀ ਮਿਲੀ। ਜਦੋਂ ਉਹ ਉਨ੍ਹਾਂ ਨੂੰ ਮਿਲੀ ਤਾਂ ਪਤਾ ਲੱਗਿਆ ਕਿ ਪੁਲਿਸ ਨੂੰ ਸ਼ੱਕ ਸੀ ਕਿ ਉਹ ਵੀ ਉਨ੍ਹਾਂ ਦੋ ਸੌ ਦੇ ਕਰੀਬ ਔਰਤਾਂ ਵਿੱਚੋਂ ਹੋ ਸਕਦੀ ਹੈ ਜਿਨ੍ਹਾਂ ਨੂੰ ਨੌਕਰੀ ਦੀ ਇੰਟਰਵਿਊ ਦੌਰਾਨ ਨੇਗਰੇ ਵੱਲੋਂ ਡਰੱਗ ਦੇਣ ਦਾ ਇਲਜ਼ਾਮ ਹੈ।

ਉਹ ਕਹਿੰਦੀ ਹੈ, "ਮੈਂ ਹੈਰਾਨ ਸੀ। ਪਰ ਮੈਂ ਇਹ ਜਾਣ ਕੇ ਖੁਸ਼ ਸੀ ਕਿ ਮੈਂ ਪਾਗਲ ਨਹੀਂ ਸੀ। ਉਸ ਦਿਨ ਸਚਮੁਚ ਕੁਝ ਵਾਪਰਿਆ ਸੀ।"

ਉਦੋਂ ਤੋਂ ਦਰਜਨਾਂ ਹੋਰ ਪੀੜਤ ਸਾਹਮਣੇ ਆਏ ਹਨ।

ਪੁਲਿਸ ਨੇ ਮੰਨਿਆ ਕਿ ਨੇਗਰੇ ਨੇ ਡਾਇਯੂਰੈਟਿਕਸ ਵਰਤਿਆ ਹੋ ਸਕਦਾ ਹੈ, ਜੋ ਹਾਈ ਬਲੱਡ ਪ੍ਰੈਸ਼ਰ ਜਿਹੇ ਕਈ ਹੋਰ ਮੈਡੀਕਲ ਹਾਲਾਤਾਂ ਵਰਤਿਆ ਜਾਂਦਾ ਹੈ ਅਤੇ ਜਿਸ ਨਾਲ ਜ਼ਿਆਦਾ ਪਿਸ਼ਾਬ ਆਉਣ ਲਗਦਾ ਹੈ।

ਜਿਸ ਦਿਨ ਅਨਾਇਸ ਨੇਗਰੇ ਨੂੰ ਮਿਲੀ ਸੀ ਉਸ ਦੇ ਮਨ ਵਿੱਚ ਖਿਆਲ ਆਇਆ ਸੀ ਕਿ ਸ਼ਾਇਦ ਨੇਗਰੇ ਨੇ ਉਸ ਦੇ ਪੀਣ ਵਾਲੇ ਪਦਾਰਥ ਵਿੱਚ ਕੁਝ ਮਿਲਾ ਦਿੱਤਾ ਸੀ, ਪਰ ਉਸ ਨੇ ਇਹ ਸੋਚ ਕੇ ਗੱਲ ਨੂੰ ਟਾਲ ਦਿੱਤਾ ਕਿ 'ਇਹ ਸੱਭਿਆਚਾਰ ਮੰਤਰਾਲਾ ਹੈ, ਇੱਥੇ ਇਹ ਸੰਭਵ ਨਹੀਂ ਹੈ।'

ਐਕਸਪੈਰੀਮੈਂਟਸ 'ਪੀ'

ਅਨਾਇਸ ਕਹਿੰਦੀ ਹੈ ਕਿ ਪੁਲਿਸ ਨੇ ਉਸ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਨੇਗਰੇ ਦੇ ਕੰਪਿਊਟਰ ਵਿੱਚ ਕਥਿਤ ਪੀੜਤਾਂ ਦੀ ਸ਼ੀਟ ਮਿਲੀ ਹੈ ਜਿਸ ਨੂੰ ਐਕਸਪੈਰੀਮੈਂਟ ਪੀ, ਦਿੱਤਾ ਗਿਆ। ਉਸ ਜ਼ਰੀਏ ਹੀ ਪੁਲਿਸ ਨੇ ਅਨਾਇਸ ਨੂੰ ਲੱਭਿਆ।

ਉਹ ਕਹਿੰਦੀ ਹੈ ਕਿ ਇਸ ਦਸਤਾਵੇਜ਼ ਵਿਚ ਨੋਟ ਕੀਤਾ ਗਿਆ ਹੈ ਕਿ ਔਰਤਾਂ ਇੰਟਰਵਿਊ ਲਈ ਕਿਸ ਸਮੇਂ ਆਈਆਂ, ਕਦੋਂ ਡਰੱਗ ਦਿੱਤਾ ਗਿਆ, ਉਨ੍ਹਾਂ ਨੇ ਕਿੰਨੇ ਸਮੇਂ ਬਾਅਦ ਪਿਸ਼ਾਬ ਕੀਤਾ ਅਤੇ ਉਨ੍ਹਾਂ ਨੇ ਕਿਹੜਾ ਅੰਡਰ ਵੀਅਰ ਪਹਿਨਿਆ ਹੋਇਆ ਸੀ।

ਪਿੱਛੇ ਮੁੜ ਕੇ ਦੇਖਦੀ ਹੈ ਤਾਂ ਅਨਾਇਸ ਹੁਣ ਮੰਨਦੀ ਹੈ ਕਿ ਕੌਫ਼ੀ ਦਾ ਅਜੀਬ ਸਵਾਦ ਡਾਇਯੂਰੈਟਿਕਸ ਕਾਰਨ ਹੀ ਸੀ।

ਇਸ ਸਾਲ ਫ਼ਰਵਰੀ ਵਿੱਚ ਜਾਰੀ ਬਿਆਨ ਵਿਚ ਸਰਕਾਰੀ ਵਕੀਲ ਨੇ ਦੱਸਿਆ ਕਿ ਨੇਗਰੇ ਬਾਰੇ ਜਾਂਚ ਜੂਨ 2018 ਵਿੱਚ ਸ਼ੁਰੂ ਹੋਈ ਸੀ ਜਦੋਂ ਉਸ ਨੂੰ ਇੱਕ ਸਹਿਕਰਮੀ ਨੇ ਟੇਬਲ ਥੱਲਿਓਂ ਇੱਕ ਔਰਤ ਦੀ ਤਸਵੀਰ ਲੈਂਦੇ ਦੇਖਿਆ ਸੀ।

ਉਸ ਨੂੰ ਸ਼ੁਰੂਆਤ ਵਿੱਚ ਸੱਭਿਆਚਾਰਕ ਮਾਮਲਿਆਂ ਦੇ ਖੇਤਰੀ ਡਾਇਰੈਕਟਰ ਦੇ ਅਹੁਦੇ ਤੋਂ ਮੁਅੱਤਲ ਕੀਤਾ ਗਿਆ ਅਤੇ ਬਾਅਦ ਵਿਚ 2019 'ਚ ਸੱਭਿਆਚਾਰ ਵਿਭਾਗ ਤੋਂ ਕੱਢ ਦਿੱਤਾ ਗਿਆ।

ਸਰਕਾਰੀ ਪੱਖ ਨੇ ਕਿਹਾ ਕਿ 2018 ਵਿਚ ਉਸ ਨੇ ਜਾਂਚ ਕਰਤਾਵਾਂ ਨੂੰ ਦੱਸਿਆ ਸੀ ਕਿ ਉਸ ਨੇ ਨੌਕਰੀ ਦੀਆਂ ਇੰਟਰਵਿਊਜ਼ ਦੌਰਾਨ ਔਰਤਾਂ ਲਈ ਅਪਮਾਨਜਕ ਸਥਿਤੀਆਂ ਵਿੱਚ ਪੈਦਾ ਕੀਤੀਆਂ।

ਕਈ ਔਰਤਾਂ ਨੇ ਕਿਹਾ ਕਿ ਜਦੋਂ ਪੁਲਿਸ ਨੇ ਉਨ੍ਹਾਂ ਨਾਲ ਸੰਪਰਕ ਕੀਤਾ ਉਦੋਂ ਉਨ੍ਹਾਂ ਨੂੰ ਅਹਿਸਾਸ ਹੋਇਆ ਕਿ ਉਹ ਪੀੜਤ ਸਨ।

ਕਈ ਔਰਤਾਂ ਅਨਾਇਸ ਅਤੇ ਹੋਰ ਔਰਤਾਂ ਨੂੰ ਮੀਡੀਆ ਰਿਪੋਰਟਾਂ ਵਿੱਚ ਦੇਖ ਕੇ ਅੱਗੇ ਆਈਆਂ।

ਨੇਗਰੇ ਜੋ ਕਿ ਆਪਣੀ ਉਮਰ ਦੇ ਸੱਠਵਿਆਂ ਵਿੱਚ ਹੈ, ਹੁਣ ਨਸ਼ੀਲੀ ਚੀਜ਼ ਦੇਣ, ਨਿੱਜਤਾ ਦਾ ਉਲੰਘਣ ਅਤੇ ਜਿਨਸੀ ਸੋਸ਼ਣ ਦੇ ਦੋਸ਼ਾਂ ਤਹਿਤ ਰਸਮੀ ਜਾਂਚ ਦੇ ਘੇਰੇ ਵਿੱਚ ਹੈ। ਉਹ ਮੁਕੱਦਮੇ ਦੀ ਉਡੀਕ ਕਰ ਰਿਹਾ ਹੈ।

ਬੀਬੀਸੀ ਨੇ ਇਸ ਆਰਟੀਕਲ ਵਿੱਚ ਲਿਖੇ ਇਲਜ਼ਾਮਾਂ ਬਾਰੇ ਵਕੀਲ ਜ਼ਰੀਏ ਨੇਗਰੇ ਤੱਕ ਪਹੁੰਚ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਸ ਨੇ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ।

ਨੇਗਰੇ ਦੇ ਨੋਟ ਵਿੱਚ ਇੱਕ ਹੋਰ ਨਾਮ ਮੈਰੀ-ਹੇਲੇਨ ਬ੍ਰਾਈਸ ਦਾ ਸੀ। ਉਸ ਨੇ 2016 ਵਿੱਚ ਸਟਾਰਸਬਰਗ ਵਿੱਚ ਸੱਭਿਆਚਾਰ ਮੰਤਰਾਲੇ ਵਿੱਚ ਉਸ ਦਾ ਇੰਟਰਵਿਊ ਲਿਆ ਸੀ।

ਉਹ ਕਹਿੰਦੀ ਹੈ ਕਿ ਨੇਗਰੇ ਨੇ ਸੁਝਾਅ ਦਿੱਤਾ ਸੀ ਕਿ ਉਹ ਤਣਾਅ ਵਿੱਚ ਲੱਗ ਰਹੀ ਹੈ ਕਿਉਂ ਨਾ ਬਾਹਰ ਤੁਰ ਕੇ ਗੱਲ ਕਰੀਏ।

ਪਰ ਜਦੋਂ ਉਹ ਕਨਾਲ਼ ਦੇ ਨਾਲ ਨਾਲ ਘੁੰਮ ਰਹੇ ਸੀ ਤਾਂ ਅਨਾਇਸ ਦੀ ਤਰ੍ਹਾਂ ਮੈਰੀ ਨੂੰ ਵੀ ਪਿਸ਼ਾਬ ਕਰਨ ਦੀ ਬੇਕਾਬੂ ਲੋੜ ਮਹਿਸੂਸ ਹੋਈ, ਜਿਸ ਨਾਲ ਉਸ ਨੂੰ ਦਰਦ ਮਹਿਸੂਸ ਹੋਣ ਲੱਗਾ।

ਉਸ ਕਹਿੰਦੀ ਹੈ ਕਿ ਨੇਗਰੇ ਨੇ ਉਸ ਨੂੰ ਦੱਸਿਆ ਕਿ ਉਸ ਨੂੰ ਨੇੜੇ ਹੀ ਇੱਕ ਪਬਲਿਕ ਟਾਇਲਟ ਪਤਾ ਹੈ ਪਰ ਜਦੋਂ ਉਹ ਲੋਕੇਸ਼ਨ 'ਤੇ ਪਹੁੰਚੇ ਤਾਂ ਕੋਈ ਟਾਇਲਟ ਨਹੀਂ ਸੀ।

ਉਹ ਕਹਿੰਦੀ ਹੈ, " ਮੈਂ ਸਚਮੁੱਚ ਬਹੁਤ ਤਕਲੀਫ ਝੱਲ ਰਹੀ ਸੀ, ਇੰਨਾ ਜ਼ਿਆਦਾ ਦਰਦ ਸੀ ਕਿ ਮੇਰਾ ਰੰਗ ਪੀਲ਼ਾ ਪੈ ਗਿਆ ਸੀ ਅਤੇ ਮੇਰੀਆਂ ਅੱਖਾਂ ਵਿੱਚੋਂ ਅੱਥਰੂ ਵਹਿ ਰਹੇ ਸੀ।"

ਮੈਰੀ ਨੇ ਕਿਹਾ ਕਿ ਉਸ ਕੋਲ ਪਬਲਿਕ ਵਿਚ ਪਿਸ਼ਾਬ ਕਰਨ ਤੋਂ ਇਲਾਵਾ ਕੋਈ ਚਾਰਾ ਨਹੀਂ ਸੀ। ਉਹ ਕਹਿੰਦੀ ਹੈ ਕਿ ਨੇਗਰੇ ਨੇ ਆਪਣੀ ਜੈਕਟ ਨਾਲ ਉਸ ਨੂੰ ਸ਼ੀਲਡ ਦੇਣ ਦੀ ਪੇਸ਼ਕਸ਼ ਕੀਤੀ।

ਉਹ ਕਹਿੰਦੀ ਹੈ, "ਉਹ ਬਹੁਤ ਸ਼ਰਮ ਭਰਿਆ ਸੀ। ਉਸ ਨੇ ਆਪਣੀਆਂ ਅੱਖਾਂ ਮੇਰੇ ਤੋਂ ਨਹੀਂ ਹਟਾਈਆਂ ਸੀ।"

ਮੈਰੀ ਹੇਲੇਨ ਨੇ ਕਿਹਾ ਕਿ ਉਹ ਕਈ ਸਾਲਾਂ ਤੱਕ ਸ਼ਰਮਿੰਦਗੀ ਮਹਿਸੂਸ ਕਰਦੀ ਰਹੀ।

ਅਨਾਇਸ ਦੀ ਤਰ੍ਹਾਂ ਉਸ ਨੂੰ ਵੀ ਪੁਲਿਸ ਨੇ ਸੰਪਰਕ ਕੀਤਾ ਸੀ ਅਤੇ ਕਿਹਾ ਸੀ ਕਿ ਉਹ ਨੇਗਰੇ ਦੀਆਂ ਕਥਿਤ ਪੀੜਤਾਂ ਵਿੱਚੋਂ ਇੱਕ ਹੈ। ਉਹ ਕਹਿੰਦੀ ਹੈ, " ਇਹ ਇੱਕ ਵੱਡਾ ਸਦਮਾ ਸੀ।"

ਕੈਮੀਕਲ ਸਬਮਿਸ਼ਨ

ਮੈਰੀ ਹੇਲੇਨ ਕਹਿੰਦੀ ਹੈ ਕਿ ਮਨੋਵਿਗਿਆਨਿਕ ਤਣਾਅ ਦੇ ਨਾਲ-ਨਾਲ ਉਹ ਪਿਸ਼ਾਬ ਸਬੰਧੀ ਸਮੱਸਿਆਵਾਂ ਦਾ ਵੀ ਸ਼ਿਕਾਰ ਹੋ ਗਈ ਹੈ।

ਉਹ ਸਮਝਾਉਂਦੀ ਹੈ ਕਿ ਭਾਵੇਂ ਇਹ ਘਟਨਾਵਾਂ ਉਸ ਤਰੀਕੇ ਨਾਲ ਮੇਲ ਨਹੀਂ ਖਾਂਦੀਆਂ ਜੋ ਆਮ ਤੌਰ 'ਤੇ ਲੋਕ ਜਿਨਸੀ ਸੋਸ਼ਣ ਦੇ ਮਾਮਲਿਆਂ ਬਾਰੇ ਸੋਚਦੇ ਹਨ, ਪਰ ਜੋ ਉਸ ਨਾਲ ਵਾਪਰਿਆ ਉਸ ਨੂੰ ਕੋਈ ਸ਼ੱਕ ਨਹੀਂ ਹੈ। ਉਹ ਕਹਿੰਦੀ ਹੈ, "ਮੇਰੇ 'ਤੇ ਹਮਲਾ ਕੀਤਾ ਗਿਆ, ਮੈਨੂੰ ਨਸ਼ੀਲੀ ਚੀਜ਼ ਦਿੱਤੀ ਗਈ, ਮੈਨੂੰ ਜ਼ਹਿਰ ਦਿੱਤਾ ਗਿਆ, ਪਰ ਮੇਰੇ ਲਈ ਇਹ ਇੱਕ ਜਿਨਸੀ ਹਮਲਾ ਹੈ, ਸਾਫ਼ ਤੌਰ 'ਤੇ।"

ਕੈਮੀਕਲ ਸਬਮਿਸ਼ਨ ਦਾ ਮੁੱਦਾ ਫਰਾਂਸ ਦੀ ਐੱਮਪੀ ਸੈਂਡਰੀਨ ਜੋਸੋ ਨੇ ਚੁੱਕਿਆ ਹੈ। ਉਹ ਇਸ ਸਾਲ ਫਰਾਂਸੀਸੀ ਸੈਨੇਟਰ ਜੋਇਲ ਗੁਏਰਿਊ ਨੂੰ ਜਿਨਸੀ ਸੋਸ਼ਣ ਦੇ ਮਕਸਦ ਨਾਲ ਉਸ ਦੀ ਡਰਿੰਕ ਵਿੱਚ ਐਕਸਟਸੀ(ਇੱਕ ਨਸ਼ੀਲਾ ਪਦਾਰਥ) ਮਿਲਾਉਣ ਦਾ ਦੋਸ਼ੀ ਪਾਏ ਜਾਣ ਬਾਅਦ ਇਸ ਮੁਹਿੰਮ ਦੀ ਇੱਕ ਪ੍ਰਮੁਖ ਆਗੂ ਬਣ ਗਈ।

ਜੋਸੋ ਦੀ ਦਲੀਲ ਹੈ ਕਿ ਲੰਬੇ ਸਮੇਂ ਤੋਂ ਫਰਾਂਸ ਨੇ ਉਨ੍ਹਾਂ ਔਰਤਾਂ ਦੀ ਮਦਦ ਲਈ ਲੋੜੀਂਦੇ ਕਦਮ ਨਹੀਂ ਚੁੱਕੇ ਹਨ ਜਿਨ੍ਹਾਂ ਨੂੰ ਨਸ਼ੀਲੀ ਚੀਜ਼ ਦਿੱਤੀ ਗਈ ਅਤੇ ਨਾ ਹੀ ਅਪਰਾਧੀਆਂ ਖ਼ਿਲਾਫ਼ ਕਾਰਵਾਈ ਬਾਰੇ ਜ਼ਿਆਦਾ ਕੁਝ ਕੀਤਾ ਹੈ।

ਉਸ ਦੀ ਇਸ ਸਾਲ ਇੱਕ ਪਾਇਲਟ ਪ੍ਰੋਗਰਾਮ ਸ਼ੁਰੂ ਕਰਨ ਵਿੱਚ ਮੁੱਖ ਭੂਮਿਕਾ ਸੀ ਜਿੱਥੇ ਔਰਤਾਂ ਨੂੰ ਖ਼ਦਸ਼ਾ ਹੁੰਦਾ ਹੈ ਕਿ ਉਨ੍ਹਾਂ ਨੂੰ ਨਸ਼ੀਲੀ ਚੀਜ਼ ਦਿੱਤੀ ਗਈ ਹੈ, ਉਹ ਪੁਲਿਸ ਕੋਲ ਰਸਮੀ ਸ਼ਿਕਾਇਤ ਦਰਜ ਕਰਵਾਏ ਬਿਨ੍ਹਾਂ ਲੈਬ ਵਿੱਚ ਖੂਨ, ਪਿਸ਼ਾਬ ਜਾਂ ਵਾਲਾਂ ਦੇ ਸੈਂਪਲ ਲੈ ਕੇ ਜਾ ਸਕਦੀਆਂ ਹਨ।

ਜੋਸੋ ਨੇ ਬੀਬੀਸੀ ਗਲੋਬਲ ਵੂਮਨ ਨੂੰ ਦੱਸਿਆ, "ਲੋਕ ਇਕੱਠੇ ਹੋ ਰਹੇ ਹਨ, ਹੋਰ ਪੀੜਤਾਂ ਰਿਪੋਰਟ ਕਰ ਰਹੀਆਂ ਹਨ, ਵਧੇਰੇ ਸ਼ਿਕਾਇਤਾਂ ਦਰਜ ਹੋ ਰਹੀਆਂ ਹਨ ਅਤੇ ਇਹ ਜ਼ਰੂਰੀ ਹੈ।"

ਪਰ ਇੱਥੇ ਕੁਝ ਸੀਮਾਵਾਂ ਨੇ। ਅਨਾਇਸ, ਮੈਰੀ ਹੇਲੇਨ ਅਤੇ ਨੇਗਰੇ ਦੇ ਕਈ ਹੋਰ ਕਥਿਤ ਪੀੜਤਾਂ ਨੂੰ ਇਹ ਸ਼ੱਕ ਹੀ ਨਹੀਂ ਹੋਇਆ ਸੀ ਕਿ ਉਨ੍ਹਾਂ ਨੂੰ ਕੋਈ ਨਸ਼ੀਲੀ ਚੀਜ਼ ਦਿੱਤੀ ਗਈ ਸੀ ਅਤੇ ਜਦੋਂ ਤੱਕ ਨਸਾਂ ਦੇਣ ਦੇ ਤੁਰੰਤ ਬਾਅਦ ਟੈਸਟ ਨਹੀਂ ਕੀਤਾ ਜਾਂਦਾ, ਉਦੋਂ ਤੱਕ ਇਹ ਪਦਾਰਥ ਖੂਨ ਅਤੇ ਪਿਸ਼ਾਬ ਦੇ ਸੈਂਪਲਾਂ ਵਿਚ ਸਾਹਮਣੇ ਨਹੀਂ ਆਉਂਦੇ।

ਵਾਲਾਂ ਵਿੱਚ ਲੰਬੇ ਸਮੇਂ ਬਾਅਦ ਵੀ ਡਰੱਗਜ਼ ਦਾ ਪਤਾ ਲੱਗ ਸਕਦਾ ਹੈ ਪਰ ਜਿਵੇਂ ਸਮਾਂ ਲੰਘਦਾ ਹੈ ਇਹ ਕਹਿਣਾ ਮੁਸ਼ਕਿਲ ਹੋ ਜਾਂਦਾ ਹੈ ਕਿ ਡਰੱਗ ਕਦੋਂ ਦਿੱਤਾ ਗਿਆ ਸੀ।

ਰੇਅਮੰਡ-ਪਾਇਨਕੇਅਰ ਏਪੀ-ਐਚਪੀ ਹਸਪਤਾਲ ਵਿੱਚ ਪਾਇਲਟ ਚਲਾਉਣ ਵਾਲੇ ਪ੍ਰੋਫੈਸਰ ਜੀਨ-ਕਲੌਡ ਐਲਵੈਰੇਜ਼ ਮੁਤਾਬਕ, ਡਿਉਰੈਟਿਕਸ ਦੀ ਵਰਤੋਂ ਇਸ ਤਰੀਕੇ ਬਹੁਤ ਅਸਧਾਰਨ ਹੈ। ਉਹ ਕਹਿੰਦੇ ਹਨ ਕਿ ਉਨ੍ਹਾਂ ਨੇ ਜ਼ਹਿਰ ਵਿਗਿਆਨੀ ਵਜੋਂ ਆਪਣੇ 26 ਸਾਲ ਦੇ ਕਰੀਅਰ ਵਿੱਚ ਉਸ ਨੇ ਕਦੇ ਵੀ ਅਜਿਹਾ ਕੁਝ ਨਹੀਂ ਦੇਖਿਆ।

ਲੈਬ ਰੂਟੀਨ ਵਿੱਚ 400 ਪਦਾਰਥ ਟੈਸਟ ਕਰਦੀ ਹੈ ਅਤੇ ਹੁਣ ਅਸੀਂ ਡਿਉਰੈਟਿਕਸ ਬਾਰੇ ਖੋਜ ਕਰ ਰਹੇ ਹਾਂ।

"ਇੰਤਜ਼ਾਰ ਨੇ ਦੂਜੀ ਵਾਰ ਪੀੜਤ ਬਣਾ ਦਿੱਤਾ"

ਨੇਗਰੇ ਨਾਲ ਅਨਾਇਸ ਦੀ ਉਸ ਮੁਲਾਕਾਤ ਨੂੰ ਹੁਣ ਪੰਦਰਾਂ ਸਾਲ ਹੋ ਚੁੱਕੇ ਹਨ ਅਤੇ ਜਦੋਂ ਉਸ ਨੇ ਪਹਿਲੀ ਵਾਰ ਪੁਲਿਸ ਨਾਲ ਗੱਲ ਕੀਤੀ ਸੀ, ਉਸ ਗੱਲ ਨੂੰ ਸੱਤ ਸਾਲ ਬੀਤ ਗਈ ਹਨ।

ਇਲਜ਼ਾਮ ਲਗਾਉਣ ਵਾਲੀਆਂ ਬਾਕੀ ਔਰਤਾਂ ਵਾਂਗ ਉਹ ਵੀ ਇਸ ਗੱਲ ਤੋਂ ਨਿਰਾਸ਼ ਹੈ ਕਿ ਨੇਗਰੇ ਦੇ ਮਾਮਲੇ ਨੂੰ ਅਦਾਲਤ ਵਿੱਚ ਆਉਂਦਿਆਂ ਇੰਨਾ ਸਮਾਂ ਲੱਗ ਰਿਹਾ ਹੈ।

ਪ੍ਰਭਾਵਿਤ ਵਿੱਚੋਂ ਲਗਭਗ ਤੀਹ ਔਰਤਾਂ ਦੀ ਮਦਦ ਕਰ ਰਹੇ ਫੋਂਡੇਸ਼ਨ ਡੇ ਫੇਮਸ ਨਾਮੀ ਇੱਕ ਮਹਿਲਾ ਅਧਿਕਾਰ ਸੰਗਠਨ ਮੁਤਾਬਕ ਕਥਿਤ ਦੋਸ਼ੀ ਲਗਾਤਾਰ ਹਿਉਮਨ ਰਿਸੋਰਸਿਜ਼ ਖੇਤਰ ਵਿੱਚ ਕੰਮ ਕਰਦਾ ਆ ਰਿਹਾ ਹੈ।

ਅਨਾਇਸ ਜੋ ਕਿ ਹੁਣ 42 ਸਾਲ ਦੀ ਹੈ ਕਹਿੰਦੀ ਹੈ, "ਸਭ ਕੁਝ ਪਰੇਸ਼ਾਨ ਕਰਨ ਵਾਲਾ ਹੈ ਅਤੇ ਮੈਨੂੰ ਗੁੱਸਾ ਹੈ ਕਿ ਸਾਡੇ ਨਾਲ ਕਿਹੋ ਜਿਹਾ ਵਿਵਹਾਰ ਕੀਤਾ ਜਾ ਰਿਹਾ ਹੈ।"

ਉਹ ਕਹਿੰਦੀ ਹੈ ਕਿ ਉਸ ਨੇ ਪਹਿਲਾ ਵਾਰ 2019 ਵਿੱਚ ਪੁਲਿਸ ਨਾਲ ਗੱਲ ਕੀਤੀ ਸੀ ਪਰ 2023 ਤੱਕ ਕੇਸ ਬਾਰੇ ਕੁਝ ਨਹੀਂ ਸੁਣਿਆ, ਜਦਕਿ ਉਸ ਨੇ ਵਾਰ ਵਾਰ ਕਈ ਈ-ਮੇਲਾਂ ਵੀ ਭੇਜੀਆਂ।

ਉਹ ਕਹਿੰਦੀ ਹੈ, "ਚਾਰ ਸਾਲਾਂ ਤੱਕ ਮੈਂ ਇਹ ਜਾਣਦਿਆਂ ਇਕੱਲੀ ਸੀ ਕਿ ਮੈਂ ਪੀੜਤ ਹਾਂ। ਮੈਂ ਨਹੀਂ ਜਾਣਦੀ ਸੀ ਕਿ ਕੀ ਕਰਨਾ ਹੈ। ਮੈਨੂੰ ਨਿਆਂ ਪ੍ਰਣਾਲੀ ਪ੍ਰਤੀ ਬਹੁਤ ਗੁੱਸਾ ਹੈ।"

ਮੈਰੀ ਹੇਲੇਨ ਇਸ ਇੰਤਜ਼ਾਰ ਨੂੰ ਦੂਜੀ ਵਾਰ ਪੀੜਤ ਬਣਾਏ ਜਾਣਾ ਦੱਸਦੀ ਹੈ।

ਉਹ ਕਹਿੰਦੀ ਹੈ, "ਇੱਕ ਪੀੜਤ ਹੋ ਕੇ ਮੈਨੂੰ ਇਸ ਦਾ ਪ੍ਰਭਾਵ ਸਾਬਿਤ ਕਰਨਾ ਪੈ ਰਿਹਾ ਹੈ, ਮੈਨੂੰ ਦਿਮਾਗ਼ ਦੇ ਡਾਕਟਰ ਕੋਲ ਜਾਣਾ ਪੈ ਰਿਹਾ ਹੈ, ਖਾਸ ਨੋਟ ਲਿਖਣੇ ਪੈ ਰਹੇ ਹਨ।"

ਕੇਸ ਵਿੱਚ ਹੋਈ ਦੇਰੀ ਨੇ ਜੋ ਹੋਇਆ ਉਸ ਨੂੰ ਹੋਰ ਨਾ-ਬਰਦਾਸ਼ਤਯੋਗ ਬਣਾ ਦਿੱਤਾ।

ਮੈਰੀ ਹੇਲੇਨ ਕਹਿੰਦੀ ਹੈ, "ਸਾਨੂੰ ਨਹੀਂ ਲਗਦਾ ਕਿ ਸਾਨੂੰ ਗੰਭੀਰਤਾ ਨਾਲ ਲਿਆ ਗਿਆ ਹੈ।"

ਯੂ.ਐੱਨ ਵੂਮਨ ਤੋਂ ਕੈਲੋਇਪੀ ਮਿੰਗੇਰੂ ਨੇ ਬੀਬੀਸੀ ਨੂੰ ਕਿਹਾ ਕਿ ਸਰਕਾਰ, ਪੁਲਿਸ ਅਤੇ ਨਿਆਂ ਪ੍ਰਣਾਲੀ ਪਸੀਨੇ ਤੇ ਪਦਾਰਥਾਂ ਦੀ ਮਦਦ ਨਾਲ ਕੀਤੇ ਜਾਣ ਵਾਲੇ ਜਿਨਸੀ ਸੋਸ਼ਣ ਨਾਲ ਨਜਿੱਠਣ ਲਈ ਹੋਰ ਬਹੁਤ ਕੁਝ ਕਰਨ ਦੀ ਲੋੜ ਹੈ ਅਤੇ ਅਧਿਕਾਰੀ ਬਹੁਤ ਗੰਭੀਰ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੇ ਹਨ ਅਤੇ ਕਥਿਤ ਸੋਸ਼ਣ ਦੇ ਮਾਮਲਿਆਂ ਵਿੱਚ ਦੇਰੀ ਔਰਤਾਂ ਦੀ ਜ਼ਿੰਦਗੀ ਬਰਬਾਦ ਕਰ ਰਹੀ ਹੈ।

ਬੀਬੀਸੀ ਨੇ ਫ੍ਰੈਂਚ ਪੁਲਿਸ, ਜੁਡੀਸ਼ੀਅਰੀ ਅਤੇ ਸਰਕਾਰ ਨੂੰ ਕੇਸ ਸਬੰਧੀ ਹੋ ਰਹੀਆਂ ਅਲੋਚਨਾਵਾਂ ਬਾਰੇ ਪੁੱਛਿਆ ਪਰ ਉਨ੍ਹਾਂ ਦਾ ਕੋਈ ਜਵਾਬ ਨਹੀਂ ਆਇਆ।

ਲੰਬੇ ਸਮੇਂ ਤੱਕ ਮੈਰੀ ਹੇਲੇਨ ਚੁੱਪ ਰਹੀ ਜਦੋਂ ਤੱਕ ਉਸ ਨੇ ਸ਼ਰਮ ਮਹਿਸੂਸ ਕਰਨੀ ਬੰਦ ਨਹੀਂ ਕਰ ਦਿੱਤੀ।

ਉਸ ਨੇ ਕਿਹਾ, "ਮੈਨੂੰ ਖੁਦ ਨੂੰ ਲੁਕਾਉਣ ਦੀ ਲੋੜ ਨਹੀਂ ਹੈ- ਮੈਂ ਪੀੜਤ ਹਾਂ। ਮੇਰੇ ਲਈ ਜਨਤਕ ਤੌਰ 'ਤੇ ਬੋਲਣਾ ਜ਼ਰੂਰੀ ਹੈ ਕਿਉਂਕਿ ਇਸ ਨੇ ਕਈ ਪੀੜਤਾਂ ਨੂੰ ਖੁਦ ਦੀ ਪਛਾਣ ਕਰਨ ਵਿੱਚ ਮਦਦ ਕੀਤੀ ਅਤੇ ਪਤਾ ਲੱਗਿਆ ਕਿ ਉਹ ਪੀੜਤ ਹਨ ਅਤੇ ਇਸ ਤੋਂ ਬਾਅਦ ਉਨ੍ਹਾਂ ਨੇ ਸ਼ਿਕਾਇਤ ਦਰਜ ਕਰਵਾਈ।"

ਉਹ ਕਹਿੰਦੀ ਹੈ, "ਜਿਸ ਦੁਨੀਆਂ ਵਿੱਚ ਅਸੀਂ ਰਹਿੰਦੇ ਹਾਂ, ਬੋਲਣਾ ਜ਼ਰੂਰੀ ਹੈ। ਜਿਨਸੀ ਹਿੰਸਾ ਬਾਰੇ ਗੱਲ ਕਰਨਾ ਜ਼ਰੂਰੀ ਹੈ।"

ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTER, WhatsApp ਅਤੇ YouTube 'ਤੇ ਜੁੜੋ।)