د طالبانو حکومت پنځه کاله؛ "موږ هم حق لرو چې تعلیم وکړو او خپل راتلونکی جوړ کړو"

ژوندی پوښښ

1. ۲۵ زمری ۱۴۰۵ - ۱۶ اګست ۲۰۲۶په افغانستان کې د طالبانو د حکومت پنځه کاله او د مېرمنو ژوند

   په افغانستان کې د طالبانو له حکومته پنځه کاله تېرېږي.

   د طالبانو حکومت په کابل کې د لویې جرګې په تالار کې د اګست ۱۵ مه، ‏‏"هغه ورځ چې په ۲۰۲۱ کال کې دوی کابل ته ننوتل"، ولمانځله.

   په دې پنځو کلونو کې له شپږم ټولګي پورته د نجونو پر زده کړو تر "امر ثاني" بندیز اعلان شوی، د ښځو پر کار، ازاد تګ راتګ او ځینو نورو حقونو باندې محدودیتونه لګېدلي دي.

   بي بي سي د افغانستان په بېلابېلو ولایتونو کې له یو شمېر نجونو او مېرمنو سره وغږېدله او دوی یې وپوښتل چې په تېرو پنځو کلونو کې یې څه لاسته راوړي او څه یې له لاسه ورکړي دي.

   په دې پاڼه کې تاسې د یو شمېر مېرمنو خبرې لوستلی، اوریدلی او لیدلی شئ.

2. ۲۵ زمری ۱۴۰۵ - ۱۶ اګست ۲۰۲۶پخوانۍ خبریاله: هیله لرم چې یوه ورځ بېرته خپلې دندې ته وګرځم

   په کابل کې د ندا په نوم یوه پخوانۍ خبریاله وایي، هیله لري چې یوه ورځ بېرته خبریالي وکړي.

   دا وایي، ارمان یې و چې له دندې سره خپلې لوړې زده کړې هم سر ته ورسوي، خو په خبره یې د طالبانو حکومت راتګ سره دنده او زده کړې دواړه ترې پاتې شوي.

   د دغې خبریالې په خبره افغان مېرمنې حق لري چې زده کړې وکړي، کار ته لاړ شي او سپورت کې فعالې وي.

3. ۲۵ زمری ۱۴۰۵ - ۱۶ اګست ۲۰۲۶"د ښوونځي د تګ عمر نیمايي زدکوونکي بې زدکړو پاتې"

   د طالبانو حکومت د ۱۴۰۲ کال کلنی راپور وايي، په ټول افغانستان کې اوس د ټولو دولتي او خصوصي ښوونځيو شمېر څه باندې اتلس زره دی.

   که څه هم د ښوونځیو د زدکوونکو شمېر یې نه دی مشخص کړی خو ویلي یې دي چې په دولتي او خصوصي ښوونځیو او د عمومي زده کړو په دولتي او خصوصي بنسټونو کې ټول څه باندې لس مېلیونه زده کوونکي په زده کړو بوخت دي.

   خو ملګرو ملتونو ویلي، اوس له نیمايي ډېر د ښوونځي عمر لرونکي ماشومان له زده کړو بې برخې پاتې دي.

   د ملګرو ملتونو ښوونیز، روزنیز او کلتوري سازمان 'یونیسکو' هم ویلي، طالبانو په افغانستان کې په ۲۰۲۱ کال کې له بیا واکمنېدو راهیسې نږدې دوه نیم مېلیونه افغانې نجونې له منځنیو زدکړو منع کړې دي.

4. ۲۵ زمری ۱۴۰۵ - ۱۶ اګست ۲۰۲۶په مدرسو کې د نجونو ډېرېدونکی شمېر

   د طالبانو حکومت د شمېرو له مخې په مدرسو او د عمومي زده کړو بنسټونو کې په تېر ۱۴۰۴ کال کې څه باندې "اووه نیم مېلیونه هلکانو او څه باندې پینځه مېلیونه" نجونو زده کړې کولې.

   له شپږم ټولګي پورته د نجونو پر ښوونځیو او لوړو زدکړو او په ډېرو برخو کې د ښځو پر کار بندیزونه هم د دې لامل ګرځېدلي، چې په دغو مدرسو کې د ښځینه زده کوونکو او ښوونکو شمېر په چټکۍ ډېر شي.

   که څه هم په کابل کې د یوې دیني مدرسې زده کوونکې وايي، مدرسې د ښوونځي ځای نشي ورته نیولی.

5. ۲۵ زمری ۱۴۰۵ - ۱۶ اګست ۲۰۲۶وروستی, د طالبانو اوسنۍ واکمنۍ کې دیني مدرسې څلور برابره ډېرې شوې دي

   که څه هم تازه شمېرې نشته خو تېر کال په افغانستان کې د ديني مدرسو شمېر له یویشت زرو اوښتی و او په چټکۍ لوړېدونکی دی. دا شمېر د تېر افغان حکومت پر مهال شاوخوا پنځه زره و.

   د طالبانو د حکومت د وروستیو شمېرو له مخې په دغو مدرسو او د عمومي زده کړو بنسټونو کې ټول کابو دیارلس میلیونه هلکان او نجونې زدکړې کوي.

   د طالبانو د حکومت د پوهنې وزارت د بیاواکمنۍ په لومړي کال ویلي وو چې "په هر ولایت کې یوه ستره جهادي او په هره ولسوالۍ کې له درې تر لسو ديني مدرسې جوړوي" او له هغې راهیسې د ديني مدرسو شمېر بې‌ساری لوړ شوی او د رپوټونو له مخې، د مدرسو جوړول د طالبانو د حکومت د چارواکو او قوماندانانو تر منځ یو ډول سیالي ګرځېدلې ده.

   د تېر جمهوري حکومت پر مهال، د پوهنې وزارت تر چتر لاندې څه باندې ۱۲۰۰ د ديني زده کړو مرکزونه یا مدرسې ثبت وې.

   بشپړ مطلب یې دلته لوستلی شئ.

6. ۲۵ زمری ۱۴۰۵ - ۱۶ اګست ۲۰۲۶وروستی, "موږ هم حق لرو چې تعلیم وکړو او خپل راتلونکی جوړ کړو"

   د کونړ ولایت اوسېدونکې چې مستعار نوم یې سلما دی او غږ یې د بي بي سي يوې همکارې لوستی وايي، د طالبانو حکومت له بیا راتګ سره، "زما په شخصي ژوند کې هم ډېر بدلونونه راغلي دي، يعنې هغه خوبونه، هدفونه او پلانونه چې د خپل راتلونکې لپاره مې لرل له ډېرو خنډونو سره مخامخ شوي دي."

7. ۲۴ زمری ۱۴۰۵ - ۱۵ اګست ۲۰۲۶وروستی, د ښځو د زدکړو په اړه د طالبانو حکومت چارواکي سره وېشلي دي, يوګيتا ليمای: له افغانستانه د بي بي سي خبریاله

   موږ ته له ډېرې مودې راهيسې معلومېږي چې د ښځو د زدکړو په اړه د طالبانو حکومت چارواکي سره وېشلي دي.

   له ځينو طالب چارواکو سره په خبرو کې چې په هغو کې ان ځینې لوړ پوړي چارواکي هم شامل دي په نارسمي ډول، له کامرې پرته اعتراف کړی چې دوی غواړي د ښځو او نجونو پر مخ دې ښوونځي او پوهنتونونه بېرته پرانيستل شي.

   خو د طالبانو مشر مولوي هبت الله چې په کندهار کې مېشت دی، تراوسه په خپله خبره کلک ولاړ دی او په وروستیو کلونو کې یې پر مېرمنو نور محدويتونه هم لګولي دي.

   د نظر له دې توپيرونو سره سره د طالبانو حکومت د بهرنيو چارو له مرستيال وزير شير محمد عباس پرته چې تېر کال یې د نجونو د ښونځيو د بيا پرانيستلو غوښتنه کړې وه، هېڅ طالب چارواکي په عامه توګه د خپل مشر له دې امر سره مخالفت نه دی ښودلی.

   له خپلو څرګندونو وروسته شير محمد عباس ستانکزی له افغانستانه ووت او له هغه راهيسې یې دې هېواد ته د بېرته راستنېدو هېڅ نښه نه ليدل کېږي.

8. ۲۴ زمری ۱۴۰۵ - ۱۵ اګست ۲۰۲۶وروستی, تېر پنځه کاله له افغانستان سره له ۱۱ میلیارد ډالرو ډېره مرسته شوې

   د ملګرو ملتونو شمېرې ښيي چې د ۲۰۲۱ کال د اګست له میاشتې راهیسې، کله چې طالبان بېرته واک ته ورسېدل، افغانستان ته د بشري مرستو لپاره له ۱۱ میلیارد ډالرو ډېره مرسته ځانګړې شوې ده. دغه هېواد د جمهوري نظام له سقوط او د پراختیايي مرستو د یوې لویې برخې له بندېدو وروسته له پراخ بشري کړکېچ سره مخ دی.

   اوسنی بحران د طالبانو د بېرته واک ته رسېدو له لومړیو میاشتو او د افغانستان د اقتصاد له ناڅاپي ټکان سره پیل شو. د ملي اسعارو ارزښت راکم شو، سلګونه زره کسانو خپلې دندې له لاسه ورکړې او د نړیوالو ادارو د ملاتړ ګڼ پروګرامونه هم ودرول شول.

   د دې وضعیت په غبرګون کې، ملګرو ملتونو د ۲۰۲۱ کال په سپټمبر کې د کال د وروستیو څلورو میاشتو لپاره د څه باندې ۶۰۰ میلیونو ډالرو بېړنۍ مرستې غوښتنه وکړه. په همدې کال کې افغانستان ته د بشري مرستو ټولیزه کچه شاوخوا ۲.۵ میلیارد ډالرو ته ورسېده.

   خو تر ټولو لویه د مرستې غوښتنه په ۲۰۲۲ کال کې وشوه. ملګرو ملتونو په هغه کال کې، د طالبانو له بیا واکمنېدو یوازې څو میاشتې وروسته، په افغانستان کې د بشري اړتیاوو د پوره کولو لپاره د څه باندې ۴.۴ میلیارد ډالرو بودجې غوښتنه وکړه، چې په پای کې یې له ۳.۸ میلیارد ډالرو څخه زیاته برخه تأمین شوه.

   په هغه وخت کې متحده ایالات افغانستان ته د بشري مرستو تر ټولو لوی تمویلوونکی و. دغو مرستو له امدادي ادارو سره مرسته وکړه چې هره اونۍ د بشري پروګرامونو د ملاتړ لپاره لسګونه میلیونه ډالر نغدې پیسې افغانستان ته ولېږدوي.

   خو له ۲۰۲۳ کال وروسته د مرستندویه پروګرامونو د تمویل بهیر کم شو. ملګرو ملتونو په هغه کال کې د ۳.۲۳ میلیارد ډالرو غوښتنه وکړه، خو یوازې نږدې دوه میلیارد ډالر یې تأمین شول.

   په ۲۰۲۴ کال کې هم د افغانستان بشري اړتیاوې له درې میلیارد ډالرو زیاتې اټکل شوې وې، خو ترلاسه شوې مرستې د اړتیا له اټکل شوې کچې کمې وې.

9. ۲۴ زمری ۱۴۰۵ - ۱۵ اګست ۲۰۲۶وروستی, "له ښوونځي نه وتل راته له وحشت ډکه شېبه وه"

   د هیلې په مستعار نامه یوه نجلۍ وايي، پنځه کاله مخکې چې دا په ۱۱ ټولګي کې وه او د دوی د ازموینې ورځ وه، له ټولګي نه په ډېر وحشت ووتلو، کور ته چې راغلو د ټولو طبیعت خراب و چې د افغانستان راتلونکی به څه کېږي.

   بالاخره طالبانو په رسنیو کې ظاهرا خلکو ته ډاډ ورکړ چې هر څه به روان وي، خو پسرلي کې د ښوونځي د پیلېدو پر لومړۍ ورځ یې له ښوونځي رخصت کړو چې ښوونځي لا نه دي شروع شوي او زموږ هیله یې په سېند لاهو کړه. موږ یې له ۱۲ ټولګي فارغې کړو.

10. ۲۴ زمری ۱۴۰۵ - ۱۵ اګست ۲۰۲۶"زه يوازې په نامه محصله شوم خو د محصلۍ ژوند مې تجربه نه کړ"

    د کونړ ولایت یوه اوسېدونکې چې مستعار نوم یې سيلۍ دی او غږ یې د بي بي سي یوې همکارې لوستی وايي، پر لوړو زدکړو له بنديز وروسته مې ډېر ارمانونه چې د خپل راتلونکي لپاره لرل همداسې نيمګړي پاتې شول، د طالبانو له راتګ وروسته مې د کانکور ازموينه ورکړه او د اقتصاد پوهنځي ته کاميابه شوم. هغه ورځ زه ډېره خوشاله وم، فکر مې کاوه چې پوهنتون ته به ولاړم شم، درس به ووايم، او خپل راتلونکی به جوړ کړم. خو نن پنځه کاله وروسته ما لا هم د خپل پوهنتون دروازه نه ده ليدلې. ريښتيا خبره دا ده چې دا احساس زما لپاره ډېر سخت دی. انسان چې د خپل هدف لپاره زحمت وباسي په ازموينه کې کامیاب شي د پوهنتون خوبونه وويني خو په سترګو یې ونه ګوري نو دا بيا ډېر درد لري..."

11. ۲۴ زمری ۱۴۰۵ - ۱۵ اګست ۲۰۲۶"امنيت راغلی خو اقتصادي ستونزې ډېرې شوې دي"

    د کابل یوه اوسېدونکې چې مستعار نوم یې حميده دی وايي، د طالبانو په راتګ سره په ژوند کې ډېر بدلون راغلی دی. نوموړې چې په کور کې پنځه خویندې لري وايي، د طالبانو په راتګ سره یې خویندې له ښوونځي‌ پاتې دي او پر کور ناستې دي. دا زياتوي، "دا خبره سمه ده چې امنيت راغلی جنګ ورک شوی خو خلک له اقتصادي مشکلاتو سره مخامخ شوي، خلک د ګهيځ او د بېګا ډوډۍ نه لري، پوهنتونونه بند شوي او ښوونځي بند دي."

12. ۲۴ زمری ۱۴۰۵ - ۱۵ اګست ۲۰۲۶په افغانستان کې د طالبانو د حکومت پنځه کاله: نړیوال د ملاتړ د کموالي خبرداری ورکوي

    پر افغانستان د طالبانو حکومت د بیا واکمنېدو د پنځمې کلیزې په تړاو د ملګرو ملتونو، اروپايي ټولنې او ځینو لویدیځو هېوادونو استازو په افغانستان کې د ګڼو هم‌ مهاله کړکېچونو، په تېره بیا د ښځو او نجونو ژوند ته د جدي ننګونو په اړه خبرداری ورکړی.

    د ملګرو ملتونو د امنیت شورا مشرتابه د لسګونو هېوادونو په استازي خپره کړې ګډه اعلامیه کې ویلي، چې په تېرو پنځو کلونو کې په افغانستان کې د بشري حقونو ناوړه وضعیت، بشري کړکېچ او اقتصادي او امنيتی ستونزو پر افغانانو فشار او ګاونډیو هېوادونو او د سیمې امنیت ته خطرونه ډېر کړي.

    په افغانستان کې د ملګرو ملتونو د ښځو برخې د مسؤلې په ګډون د نړیوالو ټولنو او هېوادونو استازو له افغانستانه د نړیوال پام او ملاتړ پر اوښتو هم نیوکې او خواشيني ښودلې.په دې اړه بشپړ مطلب دلته لوستلی شئ!

13. ۲۴ زمری ۱۴۰۵ - ۱۵ اګست ۲۰۲۶په افغانستان کې د ښځو په ژبه د طالبانو د حکومت پنځه کاله؛ "مېړه او زامن مې بې روزګاره دي"

    په افغانستان کې د طالبانو حکومت پنځه کاله پوره کېږي. د ۲۰۲۱ کال د اګست پر ۱۵مه د جمهوریت له پرځېدو سره یې پر افغانستان د بيا ځل لپاره ولکه ټينګه کړه. له هغه راهيسې په ګڼو برخو کې پر ښځو محدوديتونه لګول شوي، د بېلګې په توګه له شپږم ټولګي پورته نجونې ښوونځي او پوهنتون ته د تګ اجازه نه لري، د کار په برخه کې هم پرې محدوديتونه لګېدلي دي. مېرمنې وايي د طالبانو حکومت له خوا لګول شويو بنديزونو او محدوديتونو له ټولنيزه اړخه ګوښې کړې او د ژوند په ډېرو برخو کې یې له ستونزو سره مخامخ کړې دي. یوه افغان ښوونکې چې مستعار نوم یې شازیه دی وايي، له تېرو پنځو کلونو راهیسې خاوند او زامن بي روزګاره دي.

14. ۲۴ زمری ۱۴۰۵ - ۱۵ اګست ۲۰۲۶ملګري ملتونه: د طالبانو حکومت نجونې او ښځې له اساسي حقونو بې برخې کړې دي

    د ملګرو ملتونو بېلابېلو ادارو د طالبانو حکومت د پنځه کلنې واکمنۍ پر مهال د افغانستان د وضعیت، پرمختګونو او د دوی د تګلارو په اړه اعلامیې خپرې کړې دي.

    په دې لړ کې په افغانستان کې د ملګرو ملتونو مرستندویه استازولۍ (یوناما) په یوې نوې اعلامیه کې ویلي، چې واک ته د طالبانو حکومت له راګرځېدو راهیسې په تېرو پنځو کلونو کې افغانستان کې امنیتي وضعیت ښه شوی، خو د طالبانو حکومت باید پاینده ثبات، نړیوالې ښکېلتیا او د پانګونې جلبېدو لپاره ځیني مهم ګامونه پورته کړي.

    خو یوناما وايي، د ښځو او نجونو پر حقونو سخت محدودیتونه ژور ټولنیز او اقتصادي زیانونه اړوي او افغانان یې سملاسي او اوږدمهاله بیه پرې کوي.

    په افغانستان کې د ملګرو ملتونو د مرستندویه پلاوي په وینا، دغه بندیزونه افغانستان لپاره هغه فرصتونه هم محدودوي چې له نړیوال ملاتړ او همکارۍ څخه په بشپړه توګه ګټه پورته کړي.

    په اعلامیه کې د یوناما د سرپرستې مشرې جورجیټ ګانیون له خولې ویل شوي:

    "د افغانانو، سیمې او نړیوالې ټولنې ګډ هدف روښانه دی. دې هدف ته د نږدې کېدو لپاره، برحاله چارواکي باید پر ښځو او نجونو محدودیتونه لرې کړي، د ښوونې او روزنې، کارموندنې او عامه ژوند برخو کې د دوی بشپړ ګډون ته اجازه ورکړي، بنسټیز حقونه او ازادي خوندي کړي، او د امنیت او ترهګرۍ اړوند نړیوالو اندېښنو ته رسیدګي وکړي. دا د نړیوالو تمې او د افغانستان د اوږدمهاله ثبات او سوکالۍ لپاره اړینې پانګونې دي."

15. ۲۴ زمری ۱۴۰۵ - ۱۵ اګست ۲۰۲۶نېکو: یوه ورځ به دا ستونزې حل شي‌ او د پخوا په څېر به کار او زده کړې کوو

    نېکو احمدزۍ چې دا یې مستعار نوم دی وايي، افغانستان کې د نظام په بدلون سره ښځو خپل کارونه او د زدکړو حق له لاسره ورکړ خو یو شمېر مېرمنې شته چې خپلې هیلې له لاسه نه دي ورکړې او موخې ته رسیدو لپاره یې بېلا بېلې لارې لټولې دي. دا وايي، ځینو ښځو خپله ځان ته د کار زمینې برابرې کړې دي‌. همدارنګه یو شمېر یې په انلاین بڼه زدکړې هم کوي. نوموړې هیله منه ده، چې یوه ورځ به حالت بدل شي‌ او بېرته به د کار او زدکړو حق ترلاسه کړي. په خبره یې د همدې ورځو زدکړې او کاري‌تجربې به یې هغه وخت بیا ورته ګټورې تمامې شي.

16. ۲۴ زمری ۱۴۰۵ - ۱۵ اګست ۲۰۲۶د طالبانو د حکومت پنځه کلونه: " قابله او میندواره یم خو د خپلې لور راتلونکې ته اندېښمنه یم"

    "همدا درې میاشتې وړاندې و. د شپږو اولادونو مور وه او شاوخوا ۴۵ کلنه وه. د غریبې کورنۍ وه چې له یوې لرې ولسوالۍ زموږ کلینیک ته ناوخته رارسېدلې وه! د ډاکټر او قابلي د نشتوالي له امله... موږ خورا ډېره هڅه وکړه... د نوي زېږېدلي ماشوم او هم یې د مور وضعیت ډېر خراب و! دوه شپې او ورځې یې له مرگ سره مبارزه وکړه او په پای کې زموږ هڅو پايله ورنه کړه او مور یې ساه ورکړه. یوازې وتوانېدو چې نوی زېږېدلی ماشوم وژغورو."

    مرضیه (مستعار نوم) په افغانستان کې قابله ده او له تېرو پنځو کلونو په یوه داسې کلینیک کې کار کوي چې د شاوخوا ۵۱ زره کسانو لپاره خدمتونه وړاندې کوي.

    دا کلینیک د ښځینه ناروغیو او زېږون متخصصه ډاکټره نه لري.

    مرضیه د مخکې یادې شوې مور د مړینې کیسه بیا- بیا یادوي او وايي، په افغانستان کې ډېرې میندوارې ژوندۍ پاتېدای شي، خو د زېږون پر مهال د ډاکټر او قابلې د نشتوالي له امله ژوند له لاسه ورکوي:

    "اوس د دغه نوي زېږېدلي او د شپږو نورو ماشومانو برخلیک به له مور پرته څنګه شي؟ د ټولې کورنۍ برخلیک؟ موږ ټول خواشیني او خپه وو... زموږ لپاره تر ټولو سخته تجربه، د خپل ناروغ د له لاسه ورکولو شېبې دي."

    افغانستان له هغو هېوادونو دی چې د میندو د مړینې کچه په کې تر نورو هېوادونو لوړ دی.

    دا هېواد د قابلو په ګډون د ښځینه روغتیايي کارکوونکو له سخت کمښت سره مخامخ دی.

    پر دې سربېره، د طالبانو حکومت ښوونځي، بيا پوهنتونونه او وروسته د نجونو پر مخ نیمه لوړ طبي تحصیلي مرکزونه بند کړل.

    بشپړ مطلب د بي بي سی پښتو پر پاڼه لوستلی شئ

17. ۲۴ زمری ۱۴۰۵ - ۱۵ اګست ۲۰۲۶"مه پرېږدئ د نن ورځې محدودیتونه مو د سبا هيلې وننګوي"

    د پوهنتون استاده محموده تقوا وايي، د نجونو پر وړاندې د لوړو زدکړو او پوهنتون د دروازو د تړل کېدو وضعيت خورا سخت دی خو نوموړې همدا راز پر نجونو او مېرمنو غږ کوي چې مه پرېږدئ د نن ورځې محدوديتونو مو د سبا هيلې وننګوي.

    دا افغان نجونو ته سپارښتنه کوي چې "که نن ستاسو پر مخ د رسمي زدکړو دروازې تړل شوې دي خو د خپلو هيلو دروازې مه تړئ، انلاين زدکړې وکړئ، ژبې زدکړئ او پر خپله وړتيا کار وکړئ."

18. ۲۴ زمری ۱۴۰۵ - ۱۵ اګست ۲۰۲۶هغه قابله چې اوس کلچې پلوري

    افغانستان کې د طالبانو حکومت پر ښځو بېلابېل بندیزونه لګولي، چې له کبله یې هره ور‌ځ له کوره بهر د مېرمن تګ ستونزمن شوی دی. د کابل اوسېدونکې او قابله غوټۍ نوري، کله چې یې دنده له لاسه ورکړه د خپل لاس لوړ بیه بنګړي یې خرڅ کړل او د کلچو پخولو کار یې پیل کړ. دا وايي، اوس له دې لارې خپل کور ساتي. 

19. ۲۴ زمری ۱۴۰۵ - ۱۵ اګست ۲۰۲۶ښځې او د طالبانو حکومت پنځه کاله : "د ښوونځي ارمان مو لا هم په زړه کې پاتې دی"

    په افغانستان کې د طالبانو حکومت له خوا له شپږم ټولګي پورته د نجونو پر زدکړو له بنديزه ګڼې نجونې اغېزمنې شوې دي. د ارزو (مستعار) په نامه یوه نجلۍ وايي، اوس هم د ښوونځي ارمان کوي. نوموړې وايي، "د طالبانو حکومت له واک ته رسېدو راهيسې له ښوونځي پاتې شوو، څو کاله په کور کېناستو... وروسته مو مدرسې شروع کړې خو د ښوونځي ارمان مو لا هم په په زړه کې پاتې دی."

20. ۲۴ زمری ۱۴۰۵ - ۱۵ اګست ۲۰۲۶یونیسکو: د ۲۰۲۱ له اګسټ راهیسې له دوو میلیونو ډېرې افغانې نجونې له زدکړو بې برخې شوې دي

    د ملګرو ملتونو ښوونیز، روزنیز او کلتوري سازمان 'یونیسکو' ویلي، طالبانو په افغانستان کې په ۲۰۲۱ کال کې له بیا واکمنېدو راهیسې اټکل شوي ۲.۴ میلیونه افغانې نجونې له منځنیو زدکړو منع کړې دي.

    دا اوونۍ د طالبانو حکومت په داسې حال کې واک ته د بېرته ستنېدو پنځمه کلیزه لمانځي چې ځینې هېوادونه له دغه حکومت سره خپلې اړیکې پراخوي، سره له دې چې د بشري حقونو د څارونکو اندېښنې مخ په زیاتېدو دي.

    یونیسکو په خپل بیان کې وویل، افغانستان یوازینی هېواد دی چې نجونې او ښځې پکې په رسمي ډول له منځنیو او لوړو زده کړو څخه منع دي. دې ادارې وویل، دغه وضعیت ''افغانستان د لسیزو له ضایع شوي ظرفیت، لا زیاتې بېوزلۍ او نه جبرانېدونکي زیان سره د مخ کېدو له خطر سره مخ کوي.''

    دغه سازمان اټکل کوي چې د ښځو پر منځنیو او لوړو زدکړو بندیز ښايي تر ۲۰۶۶ کال پورې ۶۰۰ زره افغان ښځې له کاري ځواک څخه وباسي، د عایداتو په مجموعي ډول د ۹.۶ میلیارد ډالرو د ضایع کېدو لامل شي او د کم عمره ودونو خطر ډېر کړي.

    د طالبانو حکومت پوهنې وزارت سملاسي د نظر غوښتنې په ځواب کې څه ونه ویل.

    د بشپړ مطلب لپاره پر لانديني لېنک کېکاږۍ: