लाइभ, भोटेकोशी-त्रिशूली बाढी : शव फेला पर्ने क्रम जारी, प्रधानमन्त्री शाह नुवाकोट पुगेर फर्किए

रसुवामा बुधवार स्थानीय भोटेकोशी नदीमा अचानक आएको विनाशकारी बाढीका कारण धनजनको ठूलो क्षति भएको छ।

सारांश

रसुवाको भोटेकोशी नदी र तल त्रिशूलीमा बुधवार आएको बाढीका कारण धनजनको ठूलो क्षति
क्षतिबारे विवरण आउने क्रम जारी
बिहीवार दिउँसोसम्म ३३२ जनाको शव फेला परेको नेपाल प्रहरीद्वारा पुष्टि
९०० जनाभन्दा बढी मानिस अझै सम्पर्कविहीन: राष्ट्रिय विपद् व्यवस्थापन प्राधिकरण
प्रधानमन्त्री वालेन्द्र शाहद्वारा नुवाकोटमा बाढी प्रभावित स्थानको निरीक्षण

लाइभ कभरेज

२६ अगष्ट २०२६हेलिकप्टर तथा ड्रोन सञ्चालकसँग प्राधिकरणको विशेष अनुरोध
राष्ट्रिय विपद्‌ जोखिम न्यूनीकरण तथा व्यवस्थापन प्राधिकरणले बाढीपछि खोज एवं उद्धार कार्यमा हेलिकप्टर तथा ड्रोनसँग सम्बन्धित सङ्घसंस्थालाई सरकारी निकायसँग समन्वय गर्न अनुरोध गरेको छ।
“वायुसेवा सञ्चालक सङ्घ नेपाल, नेपाल ड्रोन सङ्घलगायत हेलिकप्टर र ड्रोनसँग सम्बन्धित सबै सङ्घसंस्थालाई जिल्ला प्रशासन कार्यालय, सुरक्षा निकाय एवं सम्बन्धित स्थानीय तहसँग समन्वय गरी खोज तथा उद्धारमा सहयोग गर्न प्राधिकरण विशेष अनुरोध गर्छ,” प्राधिकरणले एउटा सूचनामार्फत् भनेको छ।
प्राधिकरणले उद्धारको पर्खाइमा रहेका व्यक्तिले उद्धारका लागि ध्यानाकर्षण गराउन आफू रहेको/बसेको ठाउँमा आगो बाली धुँवा निकालेर सङ्केत गर्न अनुरोध समेत गरेको छ। अधिकारीहरूका अनुसार बुधवार बिहान रसुवाको भोटेकोशी र त्रिशुली नदीमा आएको बाढीका कारण रसुवा, नुवाकोट, धादिङ, चितवनलगायतका जिल्ला प्रभावित भएका छन् र ती जिल्लामा विपद्‌मा परेका व्यक्तिहरूको उद्धार कार्य जारी छ।
२६ अगष्ट २०२६१९ पुल, ४० किलोमिटर सडक 'क्षतिग्रस्त' – सडक विभाग
सडक विभागका अनुसार हालसम्म त्रिसुली नदीका विभिन्न भागमा अवस्थित १९ वटा पुलमा बाढीले क्षति पुर्याएको छ।
विभागका अनुसार कम्तीमा ४० किलोमिटर सडक क्षेत्र पनि क्षतिग्रस्त भएको छ।
२६ अगष्ट २०२६'ऐतिहासिक त्रिशूली बजारमा ठूलो क्षति' - वडाध्यक्ष, निरञ्जन राजवंशी, बीबीसी न्यूज नेपाली
रसुवा र नुवाकोट हुँदै बग्ने भोटेकोशी र त्रिशूली नदीमा आएको बाढीले नुवाकोटको ऐतिहासिक त्रिशुली बजार लगभग डुबाएको अवस्थामा रहेको विदुर नगरपालिका वडा नं १ का वडाध्यक्ष लेनिन रञ्जितले बताएका छन्।
उनले बीबीसीसँग भने, "बजारको आधाभन्दा बढी क्षेत्र पूरै डुबेको छ। त्रिशूली जलविद्युत् गृह, बजारका नयाँ र पुराना दुइटै पक्की पुल, त्रिशूली स्कूल, मन्दिर र घरहरू सबै नै बगाएका छन्। छेउको ढुङ्गेबजार पनि पूरै डुबेको छ।"
उनले भौतिक मात्र नभई मानवीय क्षति पनि भएको तर त्यसको यकिन तथ्य नभएको बताए।
उनले भने, "साथीहरूले आँखैअगाडि मानिसहरू बगाएको देखेका छन्। बजारका कतिपय बासिन्दासँग सम्पर्क हुन सकिरहेको छैन।"
उनले उद्धारका लागि हेलिकप्टर मगाउने प्रक्रिया चलिरहेको पनि बताए।
अहिले बजारका बासिन्दाहरु विदुर र कलोनी क्षेत्रमा आश्रय लिइरहेका छन्। उनका अनुसार त्रिशूलीवासीहरूलाई बाढी आउने सूचना दिँदै तत्काल ठाउँ छोड्न भनिएको थियो र माइकिङ पनि गरिएको थियो। तर कतिपयले विश्वास नगर्दा पनि क्षति अझ बढेको हुन सक्ने उनको भनाइ छ।
वडाध्यक्ष रञ्जितले भने, "खोलाछेउको तल्लो बजारका बासिन्दाहरूले तत्काल ठाउँ छोडे पनि माथिल्लो बजारका स्थानीयवासी भने सर्न बाँकी थियो। पहिला पनि यस्ता हल्लाहरू चल्दा बजार बगाउने गरी भने कहिल्यै बाढी आएको थिएन । यति भयानक बाढी आउने कल्पनै गरिएको थिएन।"
उनले भने, "म माइकिङ गरेर त्रिशूलीको पुरानो पुल तर्दातर्दै बाढी आयो। नयाँ पुलमा पुग्दा खुट्टाखुट्टासम्म पानी आइसकेको थियो। जसोतसो ढुङ्गेमा पुगेर जोगिएँ।"
यसअघि विसं २०४२ सालमा रसुवाको धुन्चे क्षेत्रमा पहिरो गई त्रिशुली खोला थुनिँदा बजार बगाउने डरले पूरै बजार खाली गरिएको जानकारहरू बताउँछन्। तर सो बाढी बजारभित्र भने पस्न सकेको थिएन।
'साँघुबजार'को नामले पनि चिनिने नुवाकोटको ऐतिहासिक त्रिशूली बजारमा लगभग ५०० घरपरिवार रहेको र त्यहाँको जनसङ्ख्या २,००० भन्दा बढी रहेको अधिकारीहरूको भनाइ छ।
२६ अगष्ट २०२६रसुवा र नुवाकोटका १३ वटा जलविद्युत् कम्पनीमा क्षति
स्वतन्त्र ऊर्जा उत्पादकहरूको संस्था ईप्पानले तिब्बतबाट भोटेकोशीमा आएको बाढीले रसुवा र नुवाकोटका १३ वटा जलविद्युत् आयोजनामा क्षति पुगेको जनाएको छ।
ईप्पानका अध्यक्ष मोहन डाँगीले निर्माणाधीन र निर्माण सम्पन्न भइसकेका निजी र सरकारी समेत गरी १३ वटा बिद्युत् आयोजनामा क्षति पुगेको बीबीसी न्यूज नेपालीलाई जानकारी दिए।
उनका अनुसार रसुवामा ७ वटा र नुवाकोटमा छ वटा आयोजनामा क्षति पुगेको छ।
ईप्पानका अध्यक्ष डाँगीले क्षतिको हदबारे थाहा नभएको बताए।
उनले जलविद्युत् आयोजनामा मानिसहरू फसे वा नफसेकोबारे बुझ्ने प्रयास भइरहेको जानकारी दिएका छन्।
कतिपय आयोजनाका उत्पादन गृह र अन्य पूर्वाधार नदी छेउमा रहेका कारण मानिसहरू फसेको हुनसक्ने आशङ्का गरिएका छन्।
२६ अगष्ट २०२६चीनसँगका दुवै ठूला नाका बन्द
तिब्बतबाट आएको बाढीले रसुवा र नुवाकोट क्षेत्रमा सडक र अन्य पूर्वाधार बगाएसँगै चीनसँगको प्रमुख नाका फेरि बन्द भएको छ।
गत वर्षको बाढीका कारण लामो समयपछि खुलेको रसुवागढी नाकसम्म पुग्ने सडक र कैयौँ पुलहरू बगाएको विवरण आएका छन्।
बाढी र पहिरोले सडक भत्काउँदा डेढ महिनाभन्दा लामो समयदेखि अर्को प्रमुख नाका तातोपानी पनि बन्द रहँदै आएको छ।
काठमाण्डू नजिकका दुवै नाका बन्द हुँदा यसको ठूलो असर चीनसँगको व्यापारमा पर्ने नेपाल हिमालय सीमापार वाणिज्य सङ्घका अध्यक्ष रामहरि कार्कीले बताए।
२६ अगष्ट २०२६उद्धारमा जुट्न चिनियाँ राष्ट्रपति र प्रधानमन्त्रीको निर्देशन
तिब्बतमा भएको प्राकृतिक विपद्‍मा ‘उल्लेख्य’ क्षति पुगेको भन्दै ‘पूर्ण आकारको उद्धार कार्य’मा जुट्न प्रधानमन्त्री ली चियाङले निर्देशन दिएको चिनियाँ सरकारी सञ्चार माध्यम सीसीटीभीले जनाएको छ।
राष्ट्रपति सी जिन्पिङले पनि बाढी नियन्त्रणको वर्तमान अवस्था ‘निकै संवेदनशील चरण’मा रहेको बताएका छन्।
राष्ट्रपति सीले सबै क्षेत्र र सम्बन्धित निकायहरूले उच्च सतर्कता अपनाउँदै जोखिम तथा खतराहरूको पहिचान र निराकरणलाई तीव्रता दिनुपर्ने बताएको सीसीटीभीले जनाएको छ।
२६ अगष्ट २०२६२०० वटाभन्दा धेरै ट्रक बगाएको आशङ्का, कैयौँ मानिस सम्पर्कविहीन, अशोक दाहाल, बीबीसी न्यूज नेपाली
नेपाल हिमालय सीमापार वाणिज्य सङ्घका अध्यक्ष रामहरि कार्कीले रसुवागढी नाकामा सामान ढुवानीका पुगेका २०० वटाभन्दा धेरै ट्रकहरू बगाएको अनुमान गरिएको बताएका छन्।
उनले कैयौँ कामदारहरू पनि सम्पर्कविहीन रहेको जानकारी दिए।
“२०० वटा भन्दा बढी मालवाहक गाडी बगायो भन्ने छ। यार्डमा भएको गाडी एउटा पनि छैन,” कार्की भन्छन्।
“हाम्रा धेरै मान्छेहरू सम्पर्कविहीन छन्। अहिले करिब २०-३० जना सम्पर्कमा भएको अवस्था छ।”
२६ अगष्ट २०२६वीर अस्पताल र ट्रमा सेन्टरमा १०० वटा आपत्कालीन शय्या तयार
स्वास्थ्य मन्त्रालयले बाढी प्रभावितका लागि काठमाडौँस्थित वीर अस्पताल र ट्रमा सेन्टरमा १०० वटा आपत्कालीन शय्या छुट्याइएको जनाएको छ ।
हालसम्म तीन जना घाइतेहरुलाई उद्धार गरेर काठमाडौँ ल्याइसकिएको स्वास्थ्य मन्त्रालयले जनाएको छ।
यसैबीच विश्व स्वास्थ्य सङ्गठन (डब्लूएचओ)ले नेपालका बाढी पीडितलाई आवश्यक स्वास्थ्य तथा राहत सामग्री पठाउन लागेको प्रधानमन्त्री कार्यालयले जनाएको छ।
स्वास्थ्य तथा खाद्य स्वच्छतामन्त्री निशा मेहतासँग कुराकानीपछि एक हजार जनालाई पुग्ने आधारभूत औषधि र स्वास्थ्य उपकरण डब्लूएचओले पठाउन लागेको प्रधानमन्त्रीको सचिवालयका सुरेन्द्र बजगाईँले जानकारी दिएका छन्।
२६ अगष्ट २०२६, चारको मृत्यू, ३० को उद्धार
नेपाल प्रहरीले हालसम्म बाढीका कारण नुवाकोटमा ४ जनाको ज्यान गएको जानकारी दिएको छ। प्रहरी प्रवक्ता अबिनारायण काफ्लेले अहिलेसम्म ३० जनाको उद्धार गरिएको र त्यसमध्ये ३ जनालाई उपचारका लागि काठमाण्डू ल्याइएको बताए। नेपाल प्रहरीका ३२ जना सम्पर्कविहीन रहेको उनको भनाइ छ।
२६ अगष्ट २०२६प्रधानमन्त्रीले दिए यस्तो निर्देशन
विपद् जोखिम न्यूनीकरण तथा व्यवस्थापन राष्ट्रिय परिषद्को बैठकमा प्रधानमन्त्री वालेन्द्र शाहले विपद्पछिको खोज तथा उद्धारमा सम्पूर्ण स्रोतसाधन परिचालन गर्न निर्देशन दिएका छन्।
गृह मन्त्रालयका अनुसार समन्वयात्मक ढङ्गले खोज तथा उद्धारको काम अघि बढाउने निष्कर्ष उक्त बैठकले निकालेको छ।
अधिकारीहरूले क्षतिको विवरण दिइसकेका छैनन् तर विपद् जोखिम न्यूनीकरण प्राधिकरणका प्रमुख कार्यकारी धर्मराज उप्रेतीले "टिमुरे र स्याफ्रुबेँसीमा’मा ठूलो क्षति पुगेको बताए।
उनले बिहान बाढी आएको केही मिनेटभित्रै आफूहरू सक्रिय भएर तटीय क्षेत्रका बासिन्दालाई सावधानी अपनाउन एसएमएस सन्देश पठाएको जानकारी दिए।
२६ अगष्ट २०२६त्रिशूलीले बगायो झोलुङ्गे पुल
२६ अगष्ट २०२६राष्ट्रपतिद्वारा दुःख व्यक्त
राष्ट्रपति रामचन्द्र पौडेलले रसुवा र नुवाकोट हुँदै बहने भोटेकोशी र त्रिशूली नदीमा आएको बाढीले पुर्‍याएको क्षतिको खबरले आफूलाई अत्यन्त दुःखी बनाएको बताएका छन्।
पौडेलले उद्धार र राहतको कामलाई तीव्रता दिन सरकार, राजनीतिक दल, सामाजिक सङ्घसंस्था, सुरक्षा निकाय र सर्वसाधारण नागरिकहरूलाई आह्वान गरेका छन्।
राष्ट्रपतिले तल्लो तटीय क्षेत्रका सर्वसाधारणलाई सतर्क रहन तथा समन्वय र सहयोगमा जुट्न अनुरोध गरेका छन्।
२६ अगष्ट २०२६तस्बिरमा भोटेकोशी र त्रिशूलीको बाढी
२६ अगष्ट २०२६सशस्त्र प्रहरी बलका १३ जना सम्पर्कविहीन
सशस्त्र प्रहरी बलले आफ्ना १३ जना सुरक्षाकर्मी सम्पर्कविहीन भएको भन्दै खोज तथा उद्धारका लागि तयार अवस्थामा १०५ जना सुरक्षाकर्मीलाई काठमाण्डूस्थित त्रिभुवन विमानस्थलमा तैनाथ गरेको जनाएको छ।
सशस्त्र प्रहरी बलका सहप्रवक्ता शैलेन्द्र थापाले रसुवाको मैलुङबाट चार जना र टिमुरेबाट नौ जना सम्पर्कविहीन रहेको बताए।
उनले सडकमार्गबाट राजधानीको सिनामङ्गलस्थित विपद् हेर्ने गणबाट ४५ जनाको टोली नुवाकोटतर्फ प्रस्थान जानकारी दिए। उनले बीबीसीसँग भने, “बलम्बुमा १०० शय्याको अस्पताल हामीले स्ट्यान्डबाई राखेको छ।”
२६ अगष्ट २०२६उद्धारकार्यमा १२ वटा हेलिकप्टर
नेपाली सेनाले हालसम्म निजी क्षेत्रका आठ वटा र सेनाका चार गरी कुल १२ वटा हेलिकप्टर बाढी प्रभावित स्थानमा उद्धारकार्यका लागि परिचालन गरिएको जनाएको छ।
सेनाको हेलिकोप्टरमार्फत् स्याफ्रुबेँसीबाट-६, मैलुङबाट दुई जना र धुन्चेबाट चार जनाको उद्धार गरिएको नेपाली सेनाको सैनिक जनसम्पर्क निर्देशनालयले जनाएको छ।
२६ अगष्ट २०२६मन्त्रिपरिषद्‌को आकस्मिक बैठक
रसुवामा आज बिहान भीषण बाढी आएपछि प्रधानमन्त्री वालेन्द्र शाहले मन्त्रिपरिषद्को आकस्मिक बैठक बोलाएका छन्।
उनको सचिवालयका अनुसार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बैठक बस्ने छ।
यसअघि उनले विपद् जोखिम न्यूनीकरण तथा व्यवस्थापन राष्ट्रिय परिषद्को बैठक गरेका थिए।
२६ अगष्ट २०२६पोहोर पनि भएको थियो ठूलो विपत्ति
गत वर्ष नेपाल-चीन सीमा नाका हुँदै बग्ने भोटेकोशी नदीमा भीषण बाढी आउँदा रसुवागाढी नाका अवरुद्ध भएको थियो भने १८ जना बेपत्ता भएका थिए।
नेपाल-चीन सीमाबाट ३६ किलोमिटर टाढा अवस्थित ल्हेन्दे खोलाको माथिल्लो जलाधार क्षेत्रमा रहेको हिमनदीबाट अचानक पानीको निकास भएको र त्यसका कारण हिमनदीको बाँध फुटेकाले उक्त विपद् निम्त्याएको अधिकारीहरूले बताएका थिए।
गत वर्ष असार २४ गतेको उक्त विपद्का कारण ३ प्रहरी, ६ कामदार, ३ जना कन्टेनरचालक र ६ चिनियाँ नागरिकको मृत्यु भएको थियो।
जिल्ला विपद् व्यवस्थापन समिति रसुवाको एउटा प्रतिवेदनका अनुसार त्यस बेला नवनिर्मित भन्सार, जलविद्युत् आयोजना, ईभी चार्जिङ स्टेशनसहितका संरचनासहितमा गरेर झन्डै ६ अर्ब ६२ करोड रुपैयाँको क्षति पुगेको थियो।
२६ अगष्ट २०२६‘बाढीले मेरो घरखेत, भैँसीपाडा सबै बगायो'
२६ अगष्ट २०२६चितवनमा पनि सतर्कता
सरकारी निकायहरूले रसुवादेखि नुवाकोट, धादिङ र चितवनको मुग्लिङसम्म त्रिशूली नदीको किनारमा पर्ने स्थानमा विशेष सतर्कता अपनाउन अनुरोध गरेका छन्।
त्रिशूली नदीमा पानीको मात्रा बढेको र विपद्को जोखिम हुन सक्ने भन्दै जिल्ला प्रशासन कार्यालय चितवनले त्रिशूली र कालीगण्डकी नदी मिसिएपछि बन्ने नारायणी नदीको तटबाट मानिसहरूलाई सुरक्षित स्थानमा सर्न भनेको छ।
एउटा सूचना जारी गर्दै जिल्ला प्रशासन कार्यालयले नदी आसपास नजान र गएको भए तत्काल सुरक्षित स्थानमा पुग्न अनुरोध गरेको छ।
प्रशासनले नदी आसपासका क्षेत्रमा बसोबास गर्ने र निर्माणाधीन तथा सञ्चालित आयोजनाहरू र नदीको तटीय क्षेत्रमा रहेका कार्यालयहरूलाई समेत आवश्यक पूर्वतयारी र सावधानी अपनाउन भनेको छ।
“स्थानीय तहहरूले नदी किनारमा बसोबास गर्ने स्थानीय व्यक्तिहरूलाई सुरक्षित स्थानमा सार्नुहोला,” प्रशासनको सूचनामा भनिएको छ।
२६ अगष्ट २०२६कसरी आयो बाढी?, फणीन्द्र दाहाल, बीबीसी न्यूज नेपाली
विपद् प्राधिकरणकी प्रवक्ता शान्ति महतले जनाए अनुसार प्रारम्भिक रूपमा हेर्दा तिब्बतमा पहिला हिउँपहिरोले नदी थुनिएको र अहिले "हिउँ पग्लिएका कारण" रसुवामा बाढी आएको अनुमान गरिएको छ।
गत वर्ष पनि यस्तै प्रकृतिको घटना भएको स्मरण गर्दै उनले भनिन्, "हामीले यसबारे तिब्बत चीनसँग 'ट्रान्स बाउन्ड्री' छलफल गर्नुपर्ने भएको छ। ...उतापट्टिको भएकाले हामीलाई बाढी आइसकेपछि मात्रै (थाहा) भएको छ। यस्ता समस्याहरू बढेको भएर हामीले चीन सरकार र नेपाल सरकारबीच एमओयू गरेर अघि बढ्नुपर्ने आवश्यकता देखिएको छ।”
उनले रसुवागढीमा भन्सार कार्यालय र आसपासका प्रहरी चौकी र हेल्थ पोस्टहरूमा क्षति पुगेको बताइन्। उनका अनुसार तिब्बतबाट बिहान ८:४० बजे बाढी प्रवेश गरेको थियो भने सरकारी निकायले ९ बजेतिर सूचना पाएको थियो।
उनले विपद्सँग सम्बद्ध सबै निकायहरूलाई परिचालन गर्ने र निजी क्षेत्रका ३४ वटा हेलिकप्टरहरूलाई अन्यत्र कतै परिचालन नगर्न निर्देशन दिइएको बताइन्।

लाइभ, भोटेकोशी-त्रिशूली बाढी : शव फेला पर्ने क्रम जारी, प्रधानमन्त्री शाह नुवाकोट पुगेर फर्किए

सारांश

लाइभ कभरेज

२६ अगष्ट २०२६हेलिकप्टर तथा ड्रोन सञ्चालकसँग प्राधिकरणको विशेष अनुरोध

२६ अगष्ट २०२६१९ पुल, ४० किलोमिटर सडक 'क्षतिग्रस्त' – सडक विभाग

२६ अगष्ट २०२६'ऐतिहासिक त्रिशूली बजारमा ठूलो क्षति' - वडाध्यक्ष, निरञ्जन राजवंशी, बीबीसी न्यूज नेपाली

२६ अगष्ट २०२६रसुवा र नुवाकोटका १३ वटा जलविद्युत् कम्पनीमा क्षति

२६ अगष्ट २०२६चीनसँगका दुवै ठूला नाका बन्द

२६ अगष्ट २०२६उद्धारमा जुट्न चिनियाँ राष्ट्रपति र प्रधानमन्त्रीको निर्देशन

२६ अगष्ट २०२६२०० वटाभन्दा धेरै ट्रक बगाएको आशङ्का, कैयौँ मानिस सम्पर्कविहीन, अशोक दाहाल, बीबीसी न्यूज नेपाली

२६ अगष्ट २०२६वीर अस्पताल र ट्रमा सेन्टरमा १०० वटा आपत्कालीन शय्या तयार

२६ अगष्ट २०२६, चारको मृत्यू, ३० को उद्धार

२६ अगष्ट २०२६प्रधानमन्त्रीले दिए यस्तो निर्देशन

२६ अगष्ट २०२६त्रिशूलीले बगायो झोलुङ्गे पुल

२६ अगष्ट २०२६राष्ट्रपतिद्वारा दुःख व्यक्त

२६ अगष्ट २०२६तस्बिरमा भोटेकोशी र त्रिशूलीको बाढी

२६ अगष्ट २०२६सशस्त्र प्रहरी बलका १३ जना सम्पर्कविहीन

२६ अगष्ट २०२६उद्धारकार्यमा १२ वटा हेलिकप्टर

२६ अगष्ट २०२६मन्त्रिपरिषद्‌को आकस्मिक बैठक

२६ अगष्ट २०२६पोहोर पनि भएको थियो ठूलो विपत्ति

२६ अगष्ट २०२६‘बाढीले मेरो घरखेत, भैँसीपाडा सबै बगायो'

२६ अगष्ट २०२६चितवनमा पनि सतर्कता

२६ अगष्ट २०२६कसरी आयो बाढी?, फणीन्द्र दाहाल, बीबीसी न्यूज नेपाली