Abubuwan da ke faruwa a Najeriya da sassan duniya

Rahoto kai-tsaye

Nabeela Mukhtar Uba

1. 8 Oktoba 2026Abin da Christa Pike ta furta bayan farfaɗowa daga allurar mutuwa

   Christa Pike ta miƙe tana iya tattakawa a cikin ɗakin asibiti bayan yunƙurin da aka yi na zartar mata da hukuncin kisa a makon da ya gabata ya ci tura, in ji ɗaya daga cikin lauyoyinta.

   Pike, mai shekara 50 a duniya, an yanke mata hukuncin kisa ne bayan ta kashe wata matashiya mai suna Colleen Slemmer tare da hadin gwiwar saurayinta a shekarar 1995.

   Pike ba ta mutu ba bayan an yi mata allurar mutuwa har guda biyu a ranar 30 ga watan Satumba. Masana sun nuna matuƙar mamaki kan wannan lamari.

   Tawagar lauyoyinta sun ce ta farfaɗo a kan gadon asibiti kuma ta fara magana, inda ta tashi a fusace amma da alamar ruɗani a tattare da ita.

   Lauyanta ce a lokacin da ta farfaɗo ta ce “Ku su waye, a ina nake?” kamar yadda ta tambayi malaman jinya da ke a cikin ɗakin.

   A tattaunawa da BBC, lauyan Christa, Stephen Ferrel ya ce duk da bai tattauna da ita kai-tsaye ba amma an shaida masa cewa zuwa yammacin Talata ta yi magana kuma tana iya tattakawa a ɗakinta na asibiti.

   Ya bayyana cewa babu tabbas kan abin da zai faru gare ta a nan gaba, amma akwai damuwar cewa allurar da aka yi mata na iya illata wani ɓangare na jikinta.

   Babu tabbas kan abin da zai zama makomar Pike, bayan da lauyoyinta suka buƙaci a yi watsi da hukuncin kisan da aka yanke mata bayan faruwar lamarin.

2. 8 Oktoba 2026Hukumomin Nijar sun tabbatar da tsare ɗan jarida Moussa Kaka

   Hukumomi a Jamhuriyar Nijar sun tabbatar da cewa fitaccen dan jarida Moussa Kaka yana raye kuma yana hannun gwamnati, fiye da wata guda bayan bacewarsa a Yamai, babban birnin kasar.

   Kaka, mai shekara 66, wanda shi ne babban daraktan gidan talabijin da rediyo na Saraounia kuma tsohon wakilin gidan rediyon RFI, ya bace ne a ranar 31 ga Agusta bayan ya bar ofishinsa domin komawa gida.

   Ministan shari'a da kare hakkin bil'adama na Nijar, Alio Daouda, ya shaida wa kungiyar Reporters Without Borders (RSF) cewa ana zargin Kaka da aikata wani laifi kuma za a gurfanar da shi a gaban kotu. Sai dai bai bayyana inda ake tsare da shi ko kuma irin laifin da ake zarginsa da aikatawa ba.

   RSF ta ce rashin bayyana halin da Kaka yake ciki tsawon fiye da wata guda ya yi daidai da abin da ake kira batar da mutum ta hanyar amfani da ƙarfi inda kuma kungiyar ta buƙaci a sake shi.

   Lamarin Kaka na zuwa ne a daidai lokacin da ake samun koma baya a 'yancin aikin jarida a kasashe mambobin AES tun bayan da gwamnatocin soja suka karbi iko a kasashen uku na Nijar da Mali da Burkina Faso.

   A cewar Rahoton na RSF kan ƴancin ƴan jarida na 2026, Burkina Faso tana matsayi na 110, Nijar na 120, yayin da Mali ke matsayi na 121. RSF ta ce hukumomin soji a kasashen AES na kara amfani da dokokin tsaron kasa da na laifukan intanet wajen daukar mataki kan 'yan jarida.

   Kungiyar ta ce akalla 'yan jarida biyar na tsare a Nijar, daya a Mali, yayin da wasu 'yan jaridar Burkina Faso biyu, Serge Oulon da Moussa Sareba, har yanzu ba a san inda suke ba.

   Dan jarida mai binciken ƙwaƙwaf Atiana Serge Oulon ya bace tun bayan sace shi a shekarar 2024. Wani bincike da aka gudanar a 2026 ya ce jami’na tsaro sun tsare shi a asirce tare da azabtar da shi.

   'Yancin aikin jarida ya tabarbare matuka a kasashen AES. A Mali, an kama dan jarida Youssouf Sissoko, daga bisani kuma aka yanke masa hukunci bayan ya wallafa kalaman sukar shugaban mulkin sojin Nijar.

   A kasashen uku, an rufe ko takaita ayyukan wasu kafafen yada labarai, tare da kama 'yan jarida. A Burkina Faso kuma, kungiyoyin kare 'yancin 'yan jarida da suka hada da CPJ, RSF, IFJ da Human Rights Watch sun ce an tilasta wa wasu 'yan jaridar da ke sukar hukumomi.

   A yayin da ake ci gaba da wannan matsin lamba, batun Kaka yana da muhimmanci ba wai kawai saboda shahararsa ba, har ma yana kara haifar da tambayoyi game da makomar 'yancin aikin jarida a tsakanin kasashen AES, wadanda ke kara hada kai da juna.

3. 8 Oktoba 2026Mace guda ta rasu, da dama sun jikkata a harin Isra'ila a Gaza

   Kafofin yada labaran Falasdinu sun ce an kashe wata mata tare da jikkata wasu mutane da dama sakamakon harin Isra'ila a arewa maso yammacin Gaza.

   Kamfanin dillancin labarai na SAFA ya ce hare-haren Isra'ila sun kuma faɗa kan wasu yankunan sansanin 'yan gudun hijira na Bureij da ke tsakiyar Gaza, da wasu sassan birnin Gaza, da matsugunai da tantuna a gabashin Jabalia.

   Ma'aikatar lafiya da Hamas ke jagoranta ta ce Isra'ila ta kashe sama da mutum 1,460 a Gaza tun bayan fara yarjejeniyar tsagaita bude wuta a watan Oktoban bara.

   Isra'ila ta ce tana kai hare-haren ne kan Hamas.

4. 8 Oktoba 2026Mutum uku aka kashe a hari kan filin jiragenmu - Saudiyya

   Saudiyya ta ce hare-haren da aka kai kan wasu filayen jiragen saman kasarta a cikin kwanaki biyu da suka gabata, sun yi sanadin mutuwar mutum uku tare da jikkata wasu 36.

   Hukumar kula da zirga-zirgar jiragen sama ta kasar ta ce filin jirgin saman Sarki Khalid da ke kusa da Riyadh da kuma filin jirgin saman Abha ne suka kasance wuraren da aka kai harin.

   Kungiyar Houthi da Iran ke marawa baya ta ce ita ce ta kai wadannan hare-hare.

   Kungiyar dai na iko da mafi yawan yankin arewa maso yammacin Yemen, kuma tana fafatawa da dakarun gwamnatin Yemen da Saudiyya ke marawa baya domin kwace iko da yankuna, bayan da yakin basasar kasar ya sake barkewa a watan Yuli.

   Majalisar Dinkin Duniya ta ce sabon rikicin ya tilasta wa fiye da mutum dubu 200 tserewa daga muhallansu a cikin kasar.

5. 8 Oktoba 2026Maraba

   Mun sake haɗuwa a shafin labarai kai-tsaye na ranar Alhamis.

   Ku biyo mu domin sanin abubuwan da ke faruwa a sassan duniya, musamman Najeriya da maƙwabtanta.

   Kuna iya zuwa shafukanmu na sada zumunta domin kallon bidiyo da ma tafka muhawara.