Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Amerika: Yangiwe gufungurwa by'agateganyo nyuma y'imyaka 32 yishe abana be babiri
- Umwanditsi, Ana Faguy
- Yatangajwe
- Igihe co gusoma: iminota 2
Umugore wo muri leta ya South Carolina muri Amerika, wemeye ko yaroshye abana be babiri mu kiyaga bikabaviramo urupfu mu myaka 32 ishize, yongeye kwangirwa gufungurwa by'agateganyo ku nshuro ya kabiri.
Susan Smith, w'imyaka 55, yahamijwe icyaha cyo kwica abana be nyuma yo kubabohera ku ntebe z'abana zijya mu modoka, maze agasunika imodoka mu kiyaga mu mwaka wa 1994.
Mu iburanisha ryabaye ku wa kane imbere y'inama ya leta ishinzwe gufata ibyemezo ku ifungurwa ry'agateganyo ry'abagororwa, Smith yagize ati: "Nageze ku rwego rwo hasi cyane mu buzima bwanjye igihe narekaga imodoka nazirikiyemo abana banjye ikinjira muri kiriya kiyaga."
Nyuma yaho, abagize iyo nama barindwi bose bafashe icyemezo cyo kwanga ubusabe bwe bwo gufungurwa.
Se w'abo bana na we yari yiyemeje gukomeza kurwanya ifungurwa rye, kandi abantu benshi bagaragaje ko batifuza ko arekurwa.
Abanyamategeko bamwunganiraga bavuga ko yari afite ihungabana rikomeye, igihe yakoraga icyo cyaha.
Yabwiye abagize iyo nama ko yahindutse kandi ko amaze gukura mu mitekerereze kuva yakwica abana be, Michael wari ufite imyaka itatu na Alex wari ufite umwaka umwe.
Yunzemo ati:"Sinkiri umuntu nk'uwo nari we mu myaka 32 ishize." Yongeyeho ko yicuza cyane ibyo yakoze kandi ko iyo aza kugira amahirwe yari guhindura ibyabaye.
Yagize ati: "Bari abana b'inzirakarengane. Ntibari bakwiriye gupfa."
Se w'abo bana, David Smith, witabiriye iburanisha kugira ngo avuganire abana be, yavuze ko n'ubwo hashize imyaka 32, bidakuraho ibyo Susan Smith yakoze abizi neza kandi abigambiriye.
Yagize ati: "Nzi neza mu mutima wanjye ko kumufungura by'agateganyo byaba ari akarengane gakomeye gakorewe Michael na Alex."
Mu rubanza, ubushinjacyaha bwavuze ko Smith yishe abana be nyuma y'uko umugabo bari bafitanye umubano w'ibanga amubwiye ko abo bana ari bo batumaga atabana na we.
Ariko mu iburanisha ryo ku wa Kane, Smith yarabihakanye ati: "Ibi ntibyabaye kubera umugabo. Ibyo si ukuri."
Igihe abana baburaga bwa mbere, Smith yavuze ko yambuwe imodoka n'umugabo wari wayihagaritse nijoro akayitwarana. Mu gihe yasabaga abaturage kumufasha gushaka abana be no kubagarura amahoro, mu by'ukuri imibiri yabo yari iri munsi y'amazi y'icyo kiyaga cyegereye aho. Gusa, nyuma yaje kwemera icyaha.
Smith yahamijwe icyaha cy'ubwicanyi, akatirwa igifungo cya burundu.
Nk'uko amategeko ya South Carolina yari ameze icyo gihe, yemerewe gusaba ifungurwa ry'agateganyo buri myaka ibiri nyuma yo kurangiza nibura imyaka 30 muri gereza.
Muri Amerika, bamwe mu bantu bahamijwe ibyaha bashobora gufungurwa by'agateganyo, bivuze ko barekurwa mbere y'uko barangiza igihano bakatiwe n'inkiko.
Kugira ngo Susan Smith arekurwe, byari ngombwa ko nibura bibiri bya gatatu by'abagize iyo nama y'abafata ibyemezo babyemera. Ariko ibyo ntibyabaye, bityo ubusabe bwe buteshwa agaciro, akaba akomeje gufungwa.