Cyngor yn argymell cau dwy ysgol wledig er gwaethaf gwrthwynebiad

Mae Cyngor Sir Conwy wedi argymell cau dwy ysgol gynradd yng nghefn gwlad, er gwaethaf ymgynghoriad cyhoeddus yn dangos bod cymunedau yn erbyn hynny.

Parhau gyda'r cynlluniau i gau Ysgol Betws y Coed ac Ysgol Ysbyty Ifan y mae cabinet y cyngor er bod gwrthwynebiad cryf gan drigolion.

Cafodd pryderon sylweddol eu codi yn y ddwy ardal - gan gynnwys deiseb ag arni 600 o lofnodion, 24 gwrthwynebiad ffurfiol a dros 100 o wrthwynebiadau ar y we.

Daeth swyddogion y cyngor i'r canlyniad nad oedd unrhyw dystiolaeth newydd yn cyfiawnhau newid y cynlluniau ac maen nhw'n argymell i arweinwyr fwrw ymlaen i gau'r ysgolion.

Mae Estyn wedi dweud yn y gorffennol ei bod yn ymddangos mai "ychydig iawn o dystiolaeth" oedd bod y cyngor wedi ystyried yn ddigonol yr effaith ar ddysgu a lles disgyblion.

Ond fe wnaeth y corff arolygu gydnabod bod yr awdurdod wedi darparu cyfiawnhad yn seiliedig ar niferoedd isel o ddisgyblion, llefydd gwag a phwysau ariannol.

Yn ôl yr adroddiad, mae lle i 40 yn Ysgol Ysbyty Ifan a dim ond 14 o ddisgyblion oedd yno ar amser yr ymgynghoriad.

Mae adroddiad ar wahân yn datgan bod lle i 100 disgybl yn Ysgol Betws-y-coed a dim ond 14 oedd yno hefyd ar amser yr ymgynghoriad.

Pan gafodd y cynlluniau i gau eu cyhoeddi gyntaf, roedd rhieni ym Metws-y -coed yn poeni y byddai'r ardal yn gallu troi i mewn i'r "Abersoch nesa'".

Mae'r ysgol honno wedi bod yn rhan o ffederasiwn ffurfiol gydag Ysgol Dolwyddelan ac Ysgol Capel Garmon ers 2016, gan weithredu o dan un corff llywodraethu ac un pennaeth.

Y cynllun ydy i'r ddwy ysgol gau ar 31 Awst, 2027.

Bydd aelodau'r cabinet yn cyfarfod ddydd Mawrth yn eu pencadlys yng Nghoed Pella, Bae Colwyn, i drafod y mater.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.