Canslo drama ddadleuol Neil Foden 'ddim yn hawdd' - Prif Weithredwr S4C

Geraint Evans
GanGwyn Loader
Newyddion S4C
  • Cyhoeddwyd

Mae prif weithredwr S4C wedi dweud nad oedd canslo drama ddadleuol Y Pennaeth yn "benderfyniad hawdd".

Cyhoeddodd S4C eu bwriad i gyhoeddi'r gyfres dair rhan fyddai, yn eu geiriau nhw, yn ddrama am y "cyfleon a gollwyd i rwystro" y pedoffeil a phrifathro Neil Foden, ym mis Awst.

Mewn tro pedol yr wythnos ddiwethaf, daeth cadarnhad na fyddai'r cynhyrchiad yn cael ei darlledu.

Dywedodd Geraint Evans mai "lles y dioddefwyr a'r goroeswyr" oedd ei "ystyriaeth bennaf" wrth benderfynu canslo'r ddrama.

Cafodd y cyn-brifathro Neil Foden ei garcharu am 17 mlynedd yn 2024 am gam-drin pedair merch yn rhywiol dros gyfnod o bedair blynedd.

Ym mis Awst, wrth gyhoeddi'r bwriad i ddarlledu'r ddrama, dywedodd comisiynydd drama a ffilm S4C ar y pryd, Gwenllïan Gravelle bod y ddrama yn "stori bwysig ac ysgytwol am sut y llwyddodd dyn mewn safle o rym ac ymddiriedaeth i fradychu'r statws hwnnw dros nifer o flynyddoedd, tra'n codi cwestiynau anodd am ddiwylliannau lle mae unigolion yn cael eu gweld fel rhai na ellir eu herio".

Dywedodd hefyd bod y ddrama wedi'i datblygu "gyda gofal a sensitifrwydd mawr" ac yn "ymdrin â'r pwnc yn gyfrifol".

Fe wnaeth y penderfyniad ddenu ymateb chwyrn gan rai, gyda sawl un yn dweud ei bod yn "warth" bod S4C wedi comisiynu'r gyfres.

Yng nghanol mis Tachwedd, mewn datganiad byr, cyhoeddodd y darlledwr na fyddai'n briodol parhau â'r cynhyrchiad gan ymddiheuro "am y gofid a achoswyd".

Fe wnaeth S4C wrthod gwneud cyfweliad a dydyn nhw ddim wedi cadarnhau faint sydd wedi'i wario ar y gyfres, gan ddweud bod hynny yn "sensitif yn fasnachol".

'Ystyried lles dioddefwyr a goroeswyr'

Mewn première o ffim Star Wars yn y Gymraeg, siaradodd prif weithredwr S4C, Geraint Evans, am y penderfyniad am y tro cyntaf.

Dywedodd: "Doedd hynny ddim yn benderfyniad hawdd i unrhyw un wneud, ond wrth gwrs roedd rhaid i fi fel prif weithredwr ystyried lles y dioddefwyr a'r goroeswyr yn yr achos yna a dyna oedd yr ystyriaeth bennaf i fi wrth i ni benderfynu peidio â bwrw ymlaen gyda'r cynhyrchiad."

"Dwi ddim am ddweud llawer mwy... achos dwi ddim eisiau i straeon fel hyn i gael eu hail godi dro ar ôl tro wrth feddwl am y dioddefwyr. Felly dwi'n credu fod gorwneud hynny yn rhywbeth sydd ddim yn llesol iddyn nhw, a nhw ddylai fod ar ein meddyliau ni gyd."

Mae Newyddion S4C yn deall bod adolygiad mewnol yn cael ei gynnal gan y darlledwr i'r penderfyniad gwreiddiol i gomisiynu'r ddrama.

Dyw hi ddim yn glir a fydd casgliadau'r adolygiad yn cael eu cyhoeddi.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol .

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig