Ken Skates: Llafur wedi methu blaenoriaethu'r hyn oedd bwysicaf i etholwyr

Dywedodd Ken Skates wrth gynhadledd Lafur Cymru fod angen i'r blaid "ailddarganfod ei phwrpas" ac ailgysylltu ag etholwyr ledled CymruFfynhonnell y llun, Getty Images
Disgrifiad o’r llun,

Dywedodd Ken Skates wrth gynhadledd Lafur Cymru fod angen i'r blaid "ailddarganfod ei phwrpas" ac ailgysylltu ag etholwyr ledled Cymru

GanJacob MorrisGohebydd Gwleidyddol BBC Cymru a Gwen Aeron
  • Cyhoeddwyd

Mae arweinydd Llafur Cymru, Ken Skates, wedi cyfaddef nad oedd y blaid bob amser wedi blaenoriaethu'r materion oedd bwysicaf i etholwyr, wrth i adolygiad o'u colled yn etholiad y Senedd nodi nifer o wendidau yn ymgyrch y blaid.

Dywedodd Mr Skates fod y blaid weithiau wedi canolbwyntio ar faterion fyddai'n arwain at "ddadl fywiog" mewn cyfarfodydd plaid, ond nad oeddent o anghenraid yn gwella bywydau pobl.

Daeth yr adolygiad hefyd i'r casgliad bod strategaeth wleidyddol cyn Brif Weinidog Cymru, Eluned Morgan, wedi chwarae rhan yn y golled, gan awgrymu nad oedd galwadau am fwy o bwerau i'r Senedd bob amser yn taro tant gyda phleidleiswyr.

Wrth annerch aelodau Cymreig y blaid yn eu cynhadledd yn Llandudno ddydd Sadwrn, dywedodd Prif Weinidog y DU, Andy Burnham, fod angen i Lafur Cymru "wrando" a bod yn barod "i wneud pethau'n wahanol".

Ar hyn o bryd, naw allan o'r 96 aelod sydd gan Lafur Cymru ar lawr y Siambr - y tro cyntaf iddyn nhw beidio â bod mewn llywodraeth ers dechrau datganoli.

Prif Weinidog y DU, Andy Burnham, ac arweinydd Llafur Cymru, Ken Skates, yng nghynhadledd y blaid yn LlandudnoFfynhonnell y llun, Getty Images
Disgrifiad o’r llun,

Prif Weinidog y DU, Andy Burnham, ac arweinydd Llafur Cymru, Ken Skates, yng nghynhadledd y blaid yn Llandudno

Mewn araith i'r gynhadledd yn Venue Cymru, Llandudno, dywedodd Mr Skates fod y blaid wedi treulio gormod o amser yn dadlau am strwythurau a phwerau gwleidyddol, yn hytrach na'r materion oedd yn effeithio ar fywydau pobl o ddydd i ddydd.

"Mae sefyll dros Gymru yn golygu sefyll dros bobl Cymru, swyddi a chyflogau pobl, a'r GIG," meddai.

Ychwanegodd fod y blaid weithiau wedi methu blaenoriaethu'r pethau oedd bwysicaf i etholwyr.

"Doedden ni ddim yn cyflawni digon dros y bobl oedd ein hangen ni fwyaf.

"Roeddem weithiau'n blaenoriaethu pethau oedd yn swnio'n dda ar bapur neu bethau oedd yn arwain at ddadl fywiog mewn cyfarfodydd, ond oedd ddim o anghenraid yn ateb y cwestiwn sylfaenol o sut mae hyn yn mynd i wella bywydau pobl."

Wrth siarad â BBC Cymru cyn y gynhadledd , dywedodd Mr Skates hefyd ei bod hi'n "gwbl amlwg" bod angen i'r blaid "ailddarganfod ei phwrpas" ynghyd ag "ailgysylltu â phobl ar hyd a lled Cymru".

Daeth adolygiad o'r canlyniad etholiadol i'r casgliad bod strategaeth wleidyddol cyn Brif Weinidog Cymru, Eluned Morgan, wedi chwarae rhan yn y golled.

Fe ddywedodd ffynhonnell agos at y cyn-Brif Weinidog, Eluned Morgan, ei bod yn "hurt" awgrymu ei bod wedi canolbwyntio ar faterion cyfansoddiadol ac y byddai hi wedi canolbwyntio ar y GIG ac ar ddod â swyddi o safon i Gymru.

Ond, yn ôl y ffynhonnell, fe wnaeth honni bod Llafur Cymru wedi cynnal "ymgyrch ofnadwy", a oedd yn cynnig "gobaith". Y pwnc pennaf a gododd ar drothwy y drws gydag etholwyr oedd amhoblogrwydd y Prif Weinidog, ar y pryd, Keir Starmer.

Fe ychwanegon nhw mai'r foment dyngedfennol oedd ymgyrch is-etholiad Caerffili, gan ddisgrifio'r ymgyrch honno fel un "gwbl inept".

Fe gyfeiriodd hefyd at y foment y collodd Eluned Morgan ei sedd cyn iddi ildio'r arweinyddiaeth yn ystod y cyfri, a bod y blaid Gymreig yn ceisio ei "rheoli", hyd yn oed "y geiriau yn ei haraith ymddiswyddo".

Yn ôl yr adroddiad, nid oedd galwadau am drosglwyddo mwy o bwerau fel plismona ac Ystâd y Goron ymhlith prif flaenoriaethau llawer o etholwyr, oedd yn poeni mwy am yr economi, costau byw a'r GIG.

"Mae'n rhaid i ni roi grym gwirioneddol iddyn nhw [y cyhoedd] dros y penderfyniadau sy'n llywio eu bywydau," medd Andy BurnhamFfynhonnell y llun, PA
Disgrifiad o’r llun,

"Mae'n rhaid i ni roi grym gwirioneddol iddyn nhw [y cyhoedd] dros y penderfyniadau sy'n llywio eu bywydau," medd Andy Burnham

Wrth annerch aelodau'r blaid ddydd Sadwrn, fe wnaeth Andy Burnham gydnabod maint y golled.

Doedd Mr Burnham ddim yn Brif Weinidog tan ar ôl etholiad y Senedd, yng Ngorffennaf 2026.

Dywedodd ei fod am weld "un tîm Llafur" yng Nghymru, lle byddai pawb yn gweithio tuag at yr un nodau.

"Yr hyn rwy'n awyddus i'w gyflawni yn fwy na dim yw'r ymdeimlad o un tîm Llafur i Gymru," meddai.

"Lle rwy'n gweithio gyda chi, nid yn creu problemau i chi nac yn mynd yn groes i'r hyn y mae Ken a'i gydweithwyr am ei gyflawni."

Dywedodd y cyn-faer o Fanceinion fod angen i'r blaid wrando a bod yn barod i wneud pethau'n wahanol.

"Mae'n rhaid i ni wrando. Mae'n rhaid i ni bwyso a mesur, ac mae'n rhaid i ni fod yn barod i wneud pethau'n wahanol.

"Ond mae'n rhaid i ni fynd ymhellach na hynny hefyd. Oherwydd, gadewch i ni fod yn onest, mae gwleidyddion wastad wedi dweud y byddan nhw'n gwrando mwy."

Awgrymodd hefyd y gallai'r blaid fod wedi colli golwg ar rai o'r egwyddorion oedd wrth wraidd datganoli.

"Rhywle ar hyd y ffordd efallai ein bod ni wedi colli golwg ar rai o'r egwyddorion a ysgogodd ddatganoli yn y lle cyntaf.

"Mae'n debyg ein bod ni wedi rhoi'r gorau i wrando cymaint ag y dylem, a stopio gwthio pŵer i lawr i bob cod post yng Nghymru."

Fe wnaeth Burnham alw eto am ddatganoli mwy o bŵer i gymunedau lleol yng Nghymru, gan ddweud fod datganoli erioed wedi bod yn fwy na symud pŵer o San Steffan i Gaerdydd yn unig.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.