Streic ymwelwyr iechyd oedd yn effeithio ar apwyntiadau babanod yn dod i ben

Docotr gyda babi a'i famFfynhonnell y llun, Getty Images
GanOwain EvansGohebydd BBC Cymru a Gwydion EdwardsBBC Cymru Fyw
  • Cyhoeddwyd

Fe fydd streic sydd wedi para naw mis yn dod i ben, yn dilyn cytundeb rhwng ymwelwyr iechyd a Bwrdd Iechyd Cwm Taf Morgannwg.

Mae rhyw 100 o ymwelwyr iechyd wedi bod yn gweithredu ers mis Chwefror, gan effeithio ar wasanaethau i deuluoedd gyda babanod newydd a phlant bach.

Bydd yr ymwelwyr iechyd yn dychwelyd i'r gwaith yr wythnos nesaf.

Mae'r bwrdd iechyd wedi cytuno y bydd ymwelwyr iechyd bellach ar raddfa gyflog band saith yn hytrach na band chwech a dyna'n union yr oedden nhw eisiau meddai undeb Unite.

Mae'r undeb wedi disgrifio hyn fel buddugoliaeth sylweddol i ymwelwyr iechyd gan ddweud ei fod yn gosod cynsail pwysig i ymwelwyr iechyd a nyrsys ar draws y Deyrnas Gyfunol ac yn dod ag un o'r streiciau hiraf yn hanes y gwasanaeth iechyd yng Nghymru, i ben.

Ymwelwyr iechyd yn streicio fis Chwefror
Disgrifiad o’r llun,

Mae rhyw 100 o ymwelwyr iechyd wedi bod yn gweithredu ers mis Chwefror

"Anghydfod ynglŷn â chydnabod sgiliau a'r gwaith allweddol mae ymwelwyr iechyd yn ei wneud i deuluoedd a phlant yn eu cymunedau oedd hyn," meddai Sharon Graham, ysgrifennydd cyffredinol undeb Unite.

Ychwanegodd: "Maen nhw wedi sicrhau'r gydnabyddiaeth honno heddiw."

Dros yr haf fe ddangosodd ymchwil gan undeb Unite fod ymweliadau cartref yn Sir Pen-y-Bont ar Ogwr, sef un rhan o Gwm Taf Morgannwg, wedi gostwng 85% a bod gostyngiad tebyg wrth godi pryderon am ddiogelu.

Roedd bwrdd Cwm Taf Morgannwg yn dweud bod pawb oedd angen cefnogaeth yn ei gael.

Mae ymwelwyr iechyd yn cynnig cefnogaeth allweddol i deuluoedd gyda babanod newydd a phlant bach gan sicrhau bod plant yn cael pob cyfle i ddatblygu a gofalu am iechyd a lles y teuluoedd.

Maen nhw hefyd yn bwysig o ran codi pryderon ynglŷn â diogelu.

Roedd ymwelwyr iechyd yn dadlau eu bod nhw ar eu colled gymaint â £9,000 y flwyddyn am nad oedden nhw ar y band cyflog cywir.

Mae Bwrdd Iechyd Cwm Taf Morgannwg yn dweud eu bod yn datblygu rôl arbenigol band saith ar gyfer ymwelwyr iechyd gyda chyfrifoldebau a dyletswyddau ychwanegol uwchlaw band chwech.

Bydd modd i ymwelwyr iechyd symud i'r band newydd o fis Ionawr ymlaen, ond bydd hynny'n ddibynnol ar gwblhau camau datblygiad a gwerthuso swydd.

Fe fydd y rôl newydd yn cynnig lefel uwch o wasanaeth i deuluoedd lleol meddai'r Bwrdd Iechyd.

Fe fyddan nhw hefyd yn cynnig taliad un tro i'r gweithwyr fel rhan o'r pecyn i ddod â'r gweithredu i ben.

'Adfer gwasanaethau i deuluoedd yn flaenoriaeth'

"Ein blaenoriaeth," meddai prif weithredwr y bwrdd iechyd, Paul Mears, "yw adfer gwasanaethau i deuluoedd a chefnogi ein cydweithwyr yn y proffesiwn i ddychwelyd i'r gwaith yn ogystal â chefnogi'r rheiny sydd wedi parhau i weithio yn ystod y streic".

Roedd ymwelwyr iechyd yn dadlau eu bod nhw ar eu colled gymaint â naw mil o bunnoedd y flwyddyn am nad oedden nhw ar y band cyflog cywir.

Mae Llywodraeth Cymru wedi croesawu'r ffaith y bydd ymwelwyr iechyd yn dychwelyd i'r gwaith a bod yna gytundeb ar y ffordd ymlaen i ddatrys anghydfod cymhleth sydd wedi para'n hir.

Mae ymwelwyr iechyd yn cynnig gwasanaeth "allweddol i blant a theuluoedd", medden nhw, "gan gynnwys cyflawni rôl ddiogelu bwysig".

"Y flaenoriaeth nawr yw adfer gwasanaethau i deuluoedd sydd wedi eu heffeithio gan yr anghydfod."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.