'Cefnogaeth pobl Machynlleth yn allweddol' i lwyddiant gof o Bowys

Dechreuodd Spike greu eitemau amrywiol ar ôl mynd ar gwrs penwythnos 'nol yn 2003
- Cyhoeddwyd
Mae gof o Bowys wedi cael ei henwi'n 'Of y Flwyddyn yng Nghymru' mewn seremoni wobrwyo i fusnesau.
Mae Spike Blackhurst, sydd â gweithdy yn Llanbrynmair, wedi derbyn gwobr Blacksmith of the Year yng Ngwobrau Prestige y DU.
Dywedodd Spike fod y gydnabyddiaeth wedi rhoi "hwb i'w hyder" ac wedi helpu i "godi proffil ei busnes", ond ychwanegodd mai "cefnogaeth pobl leol ym Machynlleth oedd yn allweddol i'w llwyddiant" yn y lle cyntaf.
Dechreuodd werthu eitemau fel poceri tân a chanwyllbrennau ym marchnad Machynlleth yn 2003, ar ôl darganfod ei hangerdd am waith gof arian ar gwrs penwythnos.
'Wedi rhoi hyder i mi'
Wrth siarad ar raglen BBC Radio Wales Breakfast, dywedodd Spike, sy'n artist, gof ac athrawes, fod derbyn y wobr wedi bod yn brofiad arbennig.
"Mae wedi bod yn wych. Dwi ddim y person gorau am dderbyn canmoliaeth, felly mae cael y gydnabyddiaeth yma wedi bod yn bwysig iawn i mi.
"Mae'n braf cael rhyw gadarnhad bod yr hyn dwi'n ei wneud yn cael ei werthfawrogi ac wedi helpu i feithrin hyder ynof i a chodi proffil fy musnes."

Un o brosiectau diweddar Spike oedd draig tua thri metr o hyd ar ochr tŷ ger Aberdyfi
Mae ei gwaith bellach yn cynnwys cerfluniau mawr, giatiau addurniadol a darnau unigryw wedi'u creu ar gomisiwn.
Mae hefyd yn gweithio ar fainc ar gyfer Llwybr Cenedlaethol Owain Glyndŵr yn y Trallwng, a bydd yn paratoi cerflun gargoil ar gyfer arddangosfa yn Amgueddfa Celf Fodern Cymru (MOMA) y flwyddyn nesaf.
'Does dim rhaid bod yn gryf ac yn fawr'
Ar ôl cwblhau gradd mewn cerflunwaith celfyddyd gain yng Nghaerfaddon, datblygodd Spike ddiddordeb mewn gofaint.
Roedd ganddi ddiddordeb mewn gweithio gyda metel eisoes, ond dywedodd nad oedd wedi ystyried bod yn of fel gyrfa nes iddi fod ar gwrs penwythnos yn ardal Machynlleth.
"Roedd gen i syniad penodol iawn o sut beth oedd gof arian – rhaid bod yn fawr ac yn gryf, gyda barf, a gweithio gyda cheffylau.
"Ond fe wnaeth y cwrs newid fy syniadau'n llwyr. Roeddwn i wrth fy modd yn gweithio gyda thân, yn cael fy nwylo'n fudr ac yn gallu trawsnewid darn o fetel yn rhywbeth hollol wahanol."
Aeth ymlaen i gwblhau cwrs llawn amser yn Henffordd, cyn cael prentisiaeth gyda chwmni yng Nghroesoswallt.
Dywedodd mai un o'r gwersi pwysicaf a ddysgodd oedd mai techneg sy'n bwysig yn y grefft, yn hytrach na chryfder corfforol.
"Mae llawer o bobl yn meddwl bod rhaid cael cryfder mawr i wneud y gwaith yma, ond mae'n ymwneud llawer mwy â gwybod sut i weithio gyda'r metel.
"Dyna un o'r pethau dwi'n ceisio'i gyfleu wrth addysgu eraill."

Yn ôl Spike, mae'n "anhygoel meddwl pa mor bell mae'r busnes wedi dod" ers y dyddiau cyntaf
Dywedodd Spike fod y gefnogaeth a gafodd gan bobl Machynlleth yn y dyddiau cynnar wedi gwneud gwahaniaeth mawr.
"Roedd pobl leol yn fy nghefnogi ac yn credu ynof i. Roeddwn i'n eistedd ym marchnad Machynlleth gyda fy mhoceri tân a'm canwyllbrennau, yn gobeithio y byddai rhywun yn eu prynu.
"Mae'n anhygoel meddwl pa mor bell mae'r busnes wedi dod ers hynny."
Mae'n dweud bod canolbarth Cymru wedi dod yn gartref iddi ers iddi symud i'r ardal.
"Pan ddes i yma am y tro cyntaf, roedd pobl mor groesawgar. Roeddwn i wedi wynebu cryn dipyn o ragfarn mewn mannau eraill, ond yma roedd y teimlad o gymuned yn gryf iawn.
"Dwi ddim wedi fy ngeni yma, ond mae'r ardal yn teimlo fel cartref i mi. Dwi'n teimlo'n rhan o ganolbarth Cymru."
Mae Spike bellach yn byw gyferbyn â'i gweithdy yn Llanbrynmair, ac yn dweud ei bod yn mwynhau'r cyfle i gerdded i'r gwaith bob bore a dechrau'r diwrnod wrth gynnau'r tân yn yr efail.
"Mae'n ffordd hyfryd o fyw. Dwi'n cyrraedd y gweithdy, yn cynnau'r tân ac yn penderfynu pa gomisiwn dwi'n mynd i weithio arno'r diwrnod hwnnw.
"Pan fyddwch chi'n dod o hyd i rywbeth rydych chi'n ei garu, dydy e ddim yn teimlo fel gwaith."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.