Ail ddyn wedi ei gyhuddo ar ôl digwyddiad yn ymwneud â gwn yn Nhreforys

Swyddogion arfog a char heddlu ar A48, Heol y Clâs, bnawn Gwener, 6 TachweddFfynhonnell y llun, Athena
Disgrifiad o’r llun,

Cafodd heddlu arfog eu galw i'r A48, Heol y Clâs, bnawn Gwener, 6 Tachwedd

GanMatt Murray a Nia TudurBBC Cymru Fyw
  • Cyhoeddwyd

Mae dyn 24 oed wedi bod o flaen llys wedi ei gyhuddo o fod â gwn yn ei feddiant, wedi i'r heddlu ymateb i ddigwyddiad yn ymwneud â char yn cael ei daro gan ergydion gwn yn Nhreforys, Abertawe.

Cafodd swyddogion arfog eu hanfon i'r A48, Heol y Clâs, tua 16:15 ddydd Gwener, 6 Tachwedd, lle'r oedd car, yn ôl yr heddlu, wedi dioddef difrod oedd yn gyson ag effaith ergyd gwn.

Cafodd un person fan anafiadau.

Ymddangosodd David Joyce yn Llys Ynadon Abertawe ddydd Gwener ar gyfer gwrandawiad byr, lle siaradodd yn unig i gadarnhau ei enw, ei oedran a'i gyfeiriad - sef Heol Bonymaen, Abertawe.

Clywodd y llys bod Mr Joyce wedi cael ei arestio dridiau wedi'r digwyddiad honedig.

Dywedodd ei gyfreithiwr, Lucas Edwards, wrth y llys y byddai ei gleient yn gwadu'r cyhuddiadau o ffrwgwd a bod â gwn yn ei feddiant gyda'r bwriad o beryglu bywyd, gan ddweud "nad oedd ei gleient yn yr ardal" adeg y digwyddiad.

Cafodd ei gadw yn y ddalfa a bydd yn ymddangos yn Llys y Goron Abertawe ar 14 Rhagfyr.

Thomas Patrick Gilheaney yn cael ei dywys ger Llys Ynadon Abertawe gan ddau swyddog diogelwch Ffynhonnell y llun, Athena
Disgrifiad o’r llun,

Fe aeth Thomas Patrick Gilheaney o flaen llys ddydd Llun, gan wadu cyhuddiad o fod ag arf ymosodol yn ei feddiant

Mae dyn arall 29 oed eisoes wedi ei gyhuddo mewn cysylltiad â'r digwyddiad.

Yn Llys Ynadon Abertawe ddydd Llun 9 Tachwedd, fe wadodd Thomas Patrick Gilheaney, 29, o Lansamlet gyhuddiadau o fod ag arf ymosodol - machete, yr honnir - yn ei feddiant, ac ymladd yn gyhoeddus.

Mae disgwyl i Mr Gilheaney ymddangos yn Llys y Goron Abertawe ar 11 Rhagfyr.

Mae dyn 41 oed a bachgen 16 oed - y ddau o Lansamlet, gafodd eu harestio mewn cysylltiad â'r digwyddiad, wedi cael eu rhyddhau ar fechnïaeth.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.