Tri pherson wedi'u harestio ar ôl digwyddiad yn ymwneud ag arfau tanio

Pum swyddog heddlu arfog, gyda'u cefnau at y camera, o flaen cerbydau heddlu ar stryd gyda'r nosFfynhonnell y llun, ATHENA
Disgrifiad o’r llun,

Cafodd swyddogion heddlu arfog eu hanfon i Dreforys mewn ymateb i ddigwyddiad yn Nhreforys brynhawn Gwener

GanGwen AeronBBC Cymru a Manon Wiliam
  • Cyhoeddwyd

Mae trydydd person wedi cael ei arestio yn dilyn digwyddiad yn ymwneud ag arfau tanio yn ardal Treforys, Abertawe, ddydd Gwener.

Mae dyn 29 oed o Abertawe wedi cael ei arestio ar amheuaeth o affráe a meddu ar arf ymosodol, ac mae'n parhau yn y ddalfa.

Roedd dyn 41 oed o Lansamlet a bachgen 16 oed hefyd wedi'u harestio mewn cysylltiad â'r digwyddiad, ac mae'r ddau yn parhau yn y ddalfa.

Mae'r heddlu wedi cadarnhau nad ydyn nhw'n ymwybodol o unrhyw anafiadau sy'n gysylltiedig â'r digwyddiad, ac maen nhw'n credu bod y bobl dan sylw yn debygol o fod yn adnabod ei gilydd.

'Digwyddiad critigol'

Cafodd swyddogion heddlu arfog eu galw i ardal Treforys ar ôl i gar ddioddef difrod a oedd "yn gyson ag ergyd gwn" ar Heol y Clâs ar yr A48, tua 16:15 ddydd Gwener.

Cafodd y dyn 41 oed ei arestio ar amheuaeth o feddu ar arf tanio gyda'r bwriad o beryglu bywyd, a'r bachgen 16 oed ar amheuaeth o affráe.

Cafodd y trydydd dyn ei arestio fore Sadwrn ar amheuaeth o affráe a meddu ar arf ymosodol.

Dywedodd Heddlu De Cymru fod "anafiadau'r person a gyflwynodd ei hun i'r heddlu yn ymddangos yn amherthnasol i'r digwyddiad", ac nad yw'r heddlu'n "ymwybodol o unrhyw anafiadau yn gysylltiedig â'r digwyddiad".

Yn ôl adroddiadau o ardal Heol y Clâs, roedd car Audi Q5 du wedi'i ddifrodi, ac roedd yn ymddangos fel petai ergyd gwn wedi taro drws a ffenestr ochr y gyrrwr.

Roedd car llai arall gerllaw hefyd wedi'i ddifrodi'n sylweddol mewn gwrthdrawiad.

Cafodd sawl ffordd yn yr ardal ei chau i'r cyhoedd, gan ailagor ddydd Sadwrn.

Mewn datganiad yn hwyr nos Wener, dywedodd Heddlu De Cymru fod "ymchwiliad troseddol ar y gweill" a bod y "digwyddiad wedi'i ddatgan yn ddigwyddiad critigol".

Mae ditectifs o dîm Ymchwiliadau Troseddau Mawr Heddlu De Cymru yn parhau i ymchwilio i amgylchiadau'r digwyddiad.

Dywedodd y Prif Uwcharolygydd Stephen Jones fod gwaith ymchwilio sylweddol wedi'i wneud ers y digwyddiad ddydd Gwener.

"Er bod yr ymchwiliad yn parhau, rydym yn credu bod yr unigolion dan sylw yn debygol o adnabod ei gilydd," meddai.

"Mae digwyddiadau fel hyn yn brin, ond rydym yn gwerthfawrogi eu bod yn achosi cryn bryder mewn cymunedau lleol.

"Nid ydym yn ymwybodol ar hyn o bryd o unrhyw fygythiad ehangach i'r cyhoedd."

Ychwanegodd bod y llu "yn diolch o galon i'r cyhoedd am eu dealltwriaeth a'u cefnogaeth yn ystod digwyddiad a fydd wedi achosi cryn bryder i bobl Treforys, Llansamlet ac Abertawe ehangach.

"Mae'r ymchwiliad hwn yn parhau ac fe fydd presenoldeb yr heddlu yn parhau yn yr ardal wrth i swyddogion weithio i roi sicrwydd i'r gymuned leol."

'Anarferol iawn i Abertawe'

Dywedodd Aelod o'r Senedd Gŵyr Abertawe, Gwyn Williams: "Mae'n rhywbeth anarferol iawn i Abertawe ddihuno i newyddion fel hyn, ond mae'r heddlu mewn rheolaeth, does dim perygl i'r cyhoedd nawr," meddai.

"Mae'r ffordd ar agor ac mae'r heddlu'n ymchwilio i'r digwyddiad."

Roedd hofrennydd Gwasanaeth Hedfan Cenedlaethol yr Heddlu i'w weld yn cylchu uwchben yr ardal, ond mae bellach wedi dychwelyd i'w ganolfan.

Bu'n rhaid i glwb pêl-droed Morriston Town AFC ganslo arddangosfa tân gwyllt nos Wener oherwydd y digwyddiad.

Mewn neges ar y cyfryngau cymdeithasol, dywedodd: "Yn anffodus, mae'r heddlu wedi ein hysbysu bod angen canslo'r digwyddiad oherwydd sefyllfa sy'n parhau."

"Mae hyn yn dod i rym ar unwaith, ac rydym yn cynghori pawb i aros gartref."

Mae'r heddlu'n annog y cyhoedd i beidio â rhannu sibrydion di-sail ar y cyfryngau cymdeithasol, gan ofyn i bobl "rannu gwybodaeth o ffynonellau swyddogol a dilys yn unig."

Maen nhw hefyd eisiau clywed gan unrhyw un a welodd y digwyddiad, neu sydd â lluniau dashcam, teledu cylch cyfyng neu ffôn symudol.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.