Cyhuddo dyn ar ôl digwyddiad yn ymwneud â saethu gwn yn Nhreforys

Thomas Patrick GilheaneyFfynhonnell y llun, athena
Disgrifiad o’r llun,

Mae Thomas Patrick Gilheaney wedi gwadu cyhuddiad o fod ag arf ymosodol yn ei feddiant

GanAnnell Dyfri a Gwen Aeron
  • Cyhoeddwyd

Mae dyn 29 oed wedi ymddangos mewn llys wedi i'r heddlu ei gyhuddo mewn cysylltiad ag achos o saethu yn ardal Treforys, Abertawe.

Cafodd swyddogion arfog eu hanfon i'r A48, Heol y Clâs tua 16:15 ddydd Gwener, lle'r oedd car, yn ôl yr heddlu, wedi dioddef difrod oedd yn gyson ag effaith ergyd gwn.

Yn Llys Ynadon Abertawe ddydd Llun, fe wadodd Thomas Patrick Gilheaney, 29, o Lansamlet gyhuddiadau o fod ag arf ymosodol - machete, yr honnir - yn ei feddiant, ac ymladd yn gyhoeddus.

Mae dyn 41 oed a bachgen 16 oed - y ddau o Lansamlet - a gafodd eu harestio mewn cyswllt â'r digwyddiad, wedi eu rhyddhau ar fechnïaeth.

Mae disgwyl i Mr Gilheaney ymddangos yn Llys y Goron Abertawe ar 11 Rhagfyr.

Pum swyddog heddlu arfog, gyda'u cefnau at y camera, o flaen cerbydau heddlu ar stryd gyda'r nosFfynhonnell y llun, ATHENA
Disgrifiad o’r llun,

Cafodd swyddogion arfog eu hanfon i Dreforys mewn ymateb i ddigwyddiad brynhawn Gwener

Dywedodd y Prif Uwcharolygydd Stephen Jones: "Mae ein hymchwiliad, sy'n cynnwys timau o dditectifs a staff arbenigol, yn parhau.

"Mae digwyddiadau fel hyn yn brin, ond rydym yn gwerthfawrogi eu bod yn achosi cryn bryder o fewn cymunedau lleol.

"Bydd presenoldeb amlwg yr heddlu yn parhau yn yr ardal wrth i swyddogion barhau â'u hymholiadau a rhoi sicrwydd i drigolion lleol.

"Hoffwn ddiolch i aelodau'r cyhoedd sydd wedi cynorthwyo ein hymchwiliad hyd yma."

Mae'r heddlu'nn dal i apelio am wybodaeth gan unrhyw un a welodd y digwyddiad, neu sydd â lluniau dashcam, teledu cylch cyfyng neu ffôn symudol a allai helpu'r ymchwiliad.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.