Mae'r actores o Aberteifi a merch y diweddar brifardd Dic Jones, Delyth Wyn y tu allan i'r Babell Lên bore heddiw.

Mae hi'n paratoi ar gyfer sesiwn sy'n cael ei arwain ganddi hi, ei chwaer, Rhian Medi ac Eddie Ladd. Enw'r perfformiad yw Talwrn Merched y Wawr, ac mae'n ddathliad o ferched cryfion o ranbarthau Penfro, Ceredigion a Chaerfyrddin.

Dywedodd Delyth ei bod "yn Eisteddfod wych a bendigedig.

"Wrth gwrs rwy'n meddwl llawer am fy nhad yr wythnos yma a pha mor sbeshal ydyw e bod y Steddfod yn ein hardal ni."

Elliw Jones oedd enillydd Tlws Sbardun yn y Tŷ Gwerin brynhawn ddoe, a hynny ar achlysur 10 mlwyddiant y wobr.

Cafodd y gystadleuaeth ei chynnal am y tro cyntaf yn Eisteddfod Sir Fynwy a'r enillydd cyntaf oedd Elidyr Glyn.

Mwy yma.

Bydd Gwobr Goffa Osborne Roberts yn cael ei chynnal yn y Pafiliwn heddiw am 11:55. Eleni, mae'n 75 o flynyddoedd ers sefydlu'r wobr.

Mae'r wobr - y Rhuban Glas i gantorion rhwng 19 a 25 oed - yn cael ei gyfrif fel un o brif wobrau'r Eisteddfod Genedlaethol.

Mae Mary Lloyd Davies, un o gyn-enillwyr y gystadleuaeth wedi bod yn sôn wrth Cymru Fyw am arwyddocâd y gystadleuaeth. Mwy yma.

Mae'r haul yn disgleirio yn Llantwd ar hyn o bryd, a'r maes yn barod am ddiwrnod prysur arall.

Ar raglen Tocyn neithiwr, cafodd Elis James sgwrs gydag Iwan Griffiths cyn perfformio stand yp yn y Pafiliwn.

Rhannodd Elis fod 33 aelod o'r teulu yn dod i'w wylio!

Roedd cyfle hefyd i roi cynnig ar gêm o bodlediad Elis a John Robbins, sef Cymru Connection. Yr her yw darganfod Cymry y mae Elis a'r holwr yn eu hadnabod mewn llai na munud... ond doedd dim angen cymaint o amser â hynny ar faes yr Eisteddfod!

Côr Taflais o Gaerdydd ddaeth i'r brig yng nghystadleuaeth y côr agored yn y Pafiliwn neithiwr.

Cafodd y côr ei ffurfio yn 2023 a daethon nhw yn ail yn y gystadleuaeth yma llynedd.

Gwyliwch ran o'u perfformiad isod. Mae holl ganlyniadau ddoe o'r Pafiliwn a chlipiau uchafbwyntiau yma.

Mae disgwyl i aelodau llys yr Eisteddfod drafod argymhelliad y Brifwyl i gynnig gwasanaeth darllenydd sensitifrwydd i feirniaid sy'n dymuno hynny.

Mae'r mater wedi dod fwy i'r amlwg ers atal y Fedal Ddrama yn Eisteddfod Genedlaethol 2024.

Mae'r union reswm dros ganslo'r fedal yn parhau yn ddirgelwch, ond ers y digwyddiad mae sawl trafodaeth wedi bod ar sicrhau sensitifrwydd mewn llenyddiaeth, a hawl pob awdur i ysgrifennu y tu hwnt i'w brofiad personol.

Mwy yma.

Ffynhonnell y llun, Eisteddfod Genedlaethol

Penbleth oedd enillwyr cystadleuaeth Brwydr y Bandiau 2026 ar y maes brynhawn ddoe.

Mae'r gystadleuaeth yn cael ei chynnal yn flynyddol mewn partneriaeth rhwng Maes B a'r BBC er mwyn "darganfod talent cerddoriaeth gyfoes Cymraeg newydd".

Y rhai oedd wedi cyrraedd y tri olaf eleni, ac yn perfformio ar Lwyfan y Maes nos Fercher, oedd Heledd a Mared, Lucy Borja, a Penbleth.

Mwy yma.

Mae gohebwyr Cymru Fyw yn barod i grwydro'r maes unwaith eto.

Arhoswch gyda ni yn ystod y dydd i ddilyn y cyfan.