አሜሪካ በዩኬ የሚገኘው የጦር ሰፈሯ ላይ ጥቃት ለመፈጸም አሲረዋል ያለቻቸው ሦስት ግለሰቦች ላይ ክስ መሰረተች

የፎቶው ባለመብት, Getty Images
የአሜሪካ ፍትሕ መስሪያ ቤት ከኢራን ጋር ግንኙነት አላቸው ያላቸው ሦስት ግለሰቦች ላይ አሜሪካ እና አውሮፓ ውስጥ ከተቀነባበሩ ተከታታይ ሴራዎች ጋር በተያያዘ ክስ መመስረቱን አስታወቀ።
ቢሮው በመግለጫው፣ የኢራን ወኪሎች በቅርቡ በዩናይትድ ኪንግደም በሚገኝ የአየር ኃይል ጦር ሰፈር ላይ የሽብር ሴራ በማቀድ አቀናብረዋል ብሏል።
በመስከረም ወር በብሪታንያ ፌርፎርድ የአየር ኃይል ሰፈር አቅራቢያ ከተከሰተው እና የአሜሪካ ጦር ኃይሎች ከሚገኙበት ተቋም ጋር የተያያዘው ነው።
ከተከሳሾቹ አንዱ የኢራን እና የኢራቅ ድርብ ዜግነት ያለው ሲሆን፣ ከዚህ ቀደም በቀረቡበት ክሶች ላይ በኒውዮርክ እስር ቤት ሳለ በብሪታንያ ከሚገኙ ሰዎች ጋር ግንኙነት ሲያደርግ ነበር ተብሏል።
ሌሎቹ ሁለት ተጠርጣሪዎች ደግሞ ከኢራን ሆነው በተመሳሳይ መልኩ ተገናኝተዋል በሚል ተከስሰዋል።
ኢራን በበኩሏ ከራፍ ፌርፎርድ ክስተት ጋር ምንም ዓይነት ግንኙነት የለኝም ስትል አስተባብላለች። ፖሊስ ጉዳዩን መከታተል የጀመረው በጦር ሰፈሩ አቅራቢያ አጠረጣሪ የሆኑ መኪኖች መታየታቸው ከተዘገበ በኋላ ነበር።
በብሪታንያ ባለሥልጣናት እንደተገለጸው በጉዳዩ ላይ እስካሁን ሰባት ሰዎች ተይዘው ምርመራ እየተደረገባቸው ይገኛል።
ተከሳሾቹ ሞሼን ሞሃጄሪ የተባለ ኢራናዊ፣ ሞሐመድ አሉ አል ሃሳኒ የተባለ ኢራቃዊ እና ሞሐመድ ባቀር ሳድ ዳውድ አል ሳዲ የተባለ የኢራንና የኢራቅ ድርብ ዜግነት ያለው ግለሰብ ናቸው። በግለሰቦቹ ላይ የተመሰረተው ዝርዝር ክስ ማክሰኞ ዕለት ይፋ ሆኗል።
በክሱ መሠረት፣ ሦስቱ ሰዎች "ሃራካት አሻብ አል ያማኒ አል ኢስላሚያ" (የአጋር ሕዝቦች እስላማዊ ንቅናቄ) በተባለ እስላማዊ ቡድን ስም የተፈጸሙ ጥቃቶችን ማቀናበራቸው ተነግሯል።
የአሜሪካ ፍትሕ መሥሪያ ቤት እንዳለው፣ ቡድኑ እንደ አውሮፓውያኑ በ2026 በአውሮፓ ለተፈጸሙ 18 ጥቃቶች ኃላፊነት ወስዷል። ከእነዚህ ጥቃቶች ሰባቱ በዩናይትድ ኪንግደም የተፈጸሙ እንደነበሩ ተገልጿል።
ጥቃቶቹ በእሳት የማቃጠል፣ ፍንዳታዎች እና በለንደን የተፈጸመ ለአደገኛ የስለት ጥቃትን ያካትታሉ።
ቢሮው እንዳለው፣ በለንደኑ ጥቃት ሁለት የአይሁድ ሃይማኖት ተከታዮች በስለት የተወጉ ሲሆን፣ ከእነሱ አንዱ የአሜሪካ እና የብሪታንያ ድርብ ዜግነት ያለው ነበር።
በሰሜን ለንደን በሚገኘው ጎልደርስ ግሪን አካባቢ ባለፈው ዓመት ሚያዝያ ወር ላይ ሁለት አይሁዳውያን ወንዶች በስለት ተወግተዋል። በዚህ ጉዳይ የተጠረጠረ ግለሰብ ከጥቂት ወራት በኋላ ፍርድ ቤት እንደሚቀርብ ይጠበቃል።
የአሜሪካ ፌዴራል ምርመራ ቢሮ (ኤፍቢአይ) ዳይሬክተር ካሽ ፓቴል በስምንት ክሶች የተዘጋጀው የክስ ሰነድ፣ ኢራን በአውሮፓና በአሜሪካ ውስጥ የሽብር ጥቃቶችን ለማካሄድ ያላትን ቁርጠኝነት የሚያሳይ ነው ብለዋል።
ከተከሳሾቹ መካከል አንደኛው እስር ቤት ውስጥ ሆኖ ተጨማሪ የጥቃት ድርጊቶችን ለማቀድ የተመሰጠሩ መልዕክቶችን በማስተላለፍ ወንጀል እንደሚከሰስም ፓቴል ገልጸዋል።
ፓቴል እንዳሉት፣ ተከሳሾቹ ከኢራን እስላማዊ አብዮታዊ ዘብ እና በኢራን የሚደገፈው የኢራቅ ሚሊሻ ቡድን ካታይብ ሄዝቦላህ ድጋፍ ተደርገው ለመፈጸም ከተሞከሩ 20 ያህል ጥቃቶች ጋር ግንኙነት አላቸው ተብለዋል።
በመስከረም ወር መጨረሻ ላይ በዩናይትድ ኪንግደም የሽብር ድርጊት እና የፈንጅ ጥቃት ለመፈፀም በዝግጅት ላይ ነበሩ የተባሉ አምስት ግለሰቦች በቁጥጥር ሥር ውለዋል።
ግለሰቦቹ በቁጥጥር ሥር የዋሉት ሦስት አጠራጣሪ ተሽከርካሪዎች ወደ የአሜሪካ የጦር ሠፈር አቅጣጫ ካመሩ በኋላ መሆኑን ፖሊስ ገልጿል።
በመኪናዎቹ ውስጥ ምንም ዓይነት ፈንጂዎች ያልተገኘ ሲሆን በርከት ያለ ነዳጅ ግን በቁጥጥር ሥር ውሏል።
አካባቢው ከአሜሪካ ጦር ጋር የሚጋራው ረዥም ታሪክ ያለው ሲሆን በቅርቡም የአሜሪካ የጦር አውሮፕላኖች በኢራን ጦርነት ወቅት ማረፊያ ሆነው አገልግለዋል።
ፕሬዚደንት ዶናልድ ትራምፕ ተጠርጥረው በቁጥጥር ሥር የዋሉት ግለሰቦች ትልቅ ውድመት ለማድረስ ሲፈልጉ የነበሩ ናቸው ብለዋል። "ለረዥም ጊዜ ስንከታተላቸው ነበር፤ አሁን አግንተናቸዋል" ሲሉም አክለዋል።
በለንደን የኢራን ኤምባሲ ኢራንን ከዚህ ክስተት ጋር የሚያያዙ ነጥቦችን "መሠረተ ቢስና ክፉ ዓላማ ያላቸው ግምቶች" ሲል በመግለጽ፣ እነዚህን "በጽኑ እንደሚያወግዝ እና እንደሚያስተባብል" አስታውቋል።




































