ታዳጊዎች ግድያ እንዲፈጽሙ የሚመለምለው የወንጀል ቡድን

ሐሽሹን የገዛቸው ከአደንዛዥ ዕፅ አዘዋዋሪ ቢሆንም ለፖሊስ ለመደወል ወሰነች። የሐሽሽ ጥቅሉ ውስጥ "ታግተን ተይዘናል፤ እርዳታ እንፈልጋለን፤ ዕድሜያችን 15 ነው" የሚል ጽሑፍ አግኝታለች።
ፈረንሳይ፣ ማርሴ ውስጥ በአውሮፓውያኑ 2022 ነው ይህ የተከሰተው።
ከፈረንሳዊው ታዳጊ አደንዛዥ ዕፅ አዘዋዋሪ ጋር ሌላም ታዳጊ አብሮት አለ። ክፍያ ያለው ሥራ እንደሚያገኙ ተነግሯቸው ነበር።
ታዳጊዎቹ በፈረንሳይ ፍርድ ቤት ቀርበው ቃላቸውን ሰጥተዋል።
አንደኛው ታዳጊ ገንዘብ እንዲቀበል ተመደበ። ሌላኛው መንገድ ላይ ዕፁን ይሸጣል።
የታዳጊዎቹ አለቆች አደንዛዥ ዕፅ በስፋት እየተሸጠ አይደለም፤ የተጠቃሚዎች ቁጥር ቀንሷል በሚል ይደበድቧቸው ጀመር።
ታዳጊዎቹ ተደፍረዋል። ታዳጊዎቹን በእገታ ለማቆየት በሚል እርቃናቸውን እየደነሱ ቪድዮ እንዲቀረጹ መደረጉ በፍርድ ቤት ተገልጿል።
አደንዛዥ ዕፅ ለሸጡላት ሴት በጽሑፍ መልዕክት ካስተላለፉ በኋላ ከሁለተኛ ፎቅ ዘልለው ተጎድተዋል። አንደኛው ቢያመልጥም ሌላኛው ተይዞ በስለት ተወግቷል።
ከታሰሩ በኋላ ስልካቸው ላይ ምሥሎች ተገኝተዋል። በእነሱ ዕድሜ ያሉ ሌሎች ብዜ ታዳጊዎች በደረሰባቸው ስቃይ ሰውነታቸው ላይ ጠባሳ ይታያል።
ሁለቱ ታዳጊዎች ላይ በደረሰው ስቃይ ስድስት ሰዎች ላይ ፍርድ ቤት ውሳኔ አሳልፏል።
ማርሴ የቱሪስት መዳረሻ ብትሆንም ሌላም ገጽታ አላት። ቢቢሲ የአደንዛዥ ዕፅ ዝውውር ሰንሰለትን በተመለከተ ለመዘገብ ወራት ወስዶበታል።

የፎቶው ባለመብት, Social media
እጅግ አደገኛ የሆኑ የወንጀለኛ ቡድን መሪዎች ታዳጊዎችን ይመለምላሉ። ታዳጊዎቹ በቀላሉ ገንዘብ እንደሚያገኙ ይነገራቸዋል። ነገር ግን አደንዛዥ ዕፅ ለመሸጥ ይገደዳሉ።
ታዳጊዎቹ የከፋ ድብደባ እንዲሁም ብዝበዛ ይደርስባቸዋል።
ቅጥረኛ ገዳዮችን ለመቅጠር በማኅበራዊ ሚዲያ ላይ ያስተዋውቃሉ። ታዳጊዎች በዚህ ነውጠኛ ዓለም ውስጥ ገብተው የሚደርስባቸውን እንግልት መመልከት ይቻላል።
በእስር ቤት የሚገኝ የወንጀለኞች ቡድን አባል "ፍጹም ጨካኝ መሆኑ" ወደ ከፍተኛ እርከን ለማደግ እንዳገዘው ይናገራል።
ዲዜድ የተባለው የወንጀለኞች ቡድን በማርሴ ከተማ ካሉ አደገኛ ቡድኖች መካከል ግንባር ቀደሙ ነው።
በፈረንሳይ ከሚገኝ ሌላ የወንጀለኞች ቡድን ጋር አደንዛዥ ዕፅ በሚሸጡበት አካባቢ ወሰን ተጋጭተዋል። ዲዜድ አሸናፊ ሆኖ ወጥቷል።
የቡድኑ ስም የሆነው 'ዲዜድ' የአልጄሪያ አካባቢ መጠሪያ ኮድ ነው። ከቡድኑ መሥራቾች አንዱ ፈረንሳዊ አልጄሪያዊ መህዲ ላሪቢ ነው። ባለፈው ዓመት በቁጥጥር ሥር ውሏል።
የወንጀለኞች ቡድኑ በቪድዮ መግለጫ በመስጠት ታዋቂ ሆኗል። በዚህም በፈረንሳይ ቀዳሚው የወንጀል ቡድን ነው።
ከ2023 ወዲህ የወንጀል ቡድኑ ታዋቂ መሆኑን የፈረንሳይ የፀረ አደንዛዥ ዕፅ ክፍል ኃላፊ ዲሚትሪ ዙላስ ይናገራል።

የፎቶው ባለመብት, Lea Guedj / BBC
የወንጀል ቡድኑ በማርሴ አቅራቢያ ያለ ከተማ ከንቲባን ዒላማ ማድረጉ በደኅንነት ባለሙያዎች ከተደረሰበት በኋላ ከንቲባው ፖሊስ ጥበቃ ወደሚያደርግበት ሥፍራ ተወስደዋል።
በማኅበራዊ ሚዲያ በተለቀቀ ቪድዮ ላይ ስድስት ጭምብል ያደረጉ ሰዎች ከጠረጴዛ ጀርባ ይታያሉ። ዲዜድ በድርጊቱ እጁ እንደሌለበት ይገልጻሉ።
በፈረንሳይ የኮኬይን እና ዕፀ ፋርስ ስርጭት መጠን ጨምሯል። የወንጀል ቡድኖችም እየተስፋፉ ነው።
በፈረንሳይ ኮኬይን የሚጠቀሙ ሰዎች ቁጥር በቅርቡ ወደ ሁለት ሚሊዮን እንደሚደርሱ ይጠበቃል።
በአውሮፓውያኑ 2017 ቁጥሩ 600,000 ነበር።
ዕፅ ዝውውር በየዓመቱ እስከ 7 ቢሊዮን ዶላር እንደሚያስገኝ እና 200,000 ሰዎችን እንደሚያሳትፍ የፈረንሳይ የፀረ አደንዛዥ ዕፅ ክፍል ኃላፊ ዲሚትሪ ዙላስ ይናገራል።

የፎቶው ባለመብት, Lea Guedj / BBC
አብዛኞቹ ዕፅ አዘዋዋሪዎች ታዳጊዎች ናቸው። ከ18 ዓመት በታች የሆኑ ዕፅ አዘዋዋሪዎች ቁጥር እየጨመረ መጥቷል።
በ2025 በወጣ መረጃ መሠረት ከ10,000 በላይ ታዳጊ ዕፅ አዘዋዋሪዎች ተገኝተዋል።
ዲዜድ የወንጀለኞች ቡድን ለዚህ ዋነኛ ማሳያ ነው። የደንበኞቹን ቁጥር ለመጨመር የቡድኑን አባላት ቁጥር ማሳደግ አለበት። ስለዚህም ታዳጊዎችን ይመለምላል።
አደንዛዥ ዕፅ ከማዘዋዋር በተጨማሪ ሰዎችን ማገት፣ ማሰቃየት እና መግደል ይጠበቅባቸዋል።
ታዳጊዎችን በቀላሉ አደገኛ ድርጊት ማስፈጸም እንደሚቻል በማመን ምልመላው ይካሄዳል። አመራር የሚሰጠው ከአገር ውጭ ወይም ከእስር ቤት ይሆናል።
ፖሊስ እንደሚለው ታዳጊዎቹ ወደዚህ ዓለም ከገቡ በኋላ በቀላሉ መውጣት አይችሉም።
ካሪን ብሮውላርድ በዚህ ቡድን የተጎዳች እናት ናት። የ15 ዓመት ልጇ ሂውጎ ከቤተሰቡ ጋር ተጋጭቶ ከቤት ጠፍቷል።
ከሦስት ቀን በኋላ ፖሊስ ሲይዘው ካናቢስ እና ገንዘብ ይዞ ነበር። ከዚያም ፖሊስ ወደ ቤቱ መልሶታል።
በ2023 ማርሴ ሥራ ማግኘቱን ለቤተሰቡ ገልጾ ከቤት ወጣ።
"ያለበትን ሁኔታ ይነግረን ነበር። ሁሉም ነገር ጥሩ ነው ይለኛል" ስትል እናቱ ታስታውሳለች።
ከሦስት ሳምንት በኋላ ሐኪም ደወለላት። "ልጅሽ ጭንቅላቱን በጥይት ተመትቷል" አላት።
የወንጀል ቡድን ውስጥ ገብቶ እንደነበርም ፖሊስ ያምናል።
ዲዜድ የወንጀል ቡድን ከሚቆጣጠራቸው አንዱን አካባቢ የ41 ዓመቷ እናት ፋዲላ ኦዱፍ ታስጎበኛለች።
በአካባቢው የመኪና ክላክስ ድምጽ መሰማት ሲጀምር ቢቢሲ ቪድዮ መቅረጽ እንዲያቆም ጠየቀች።
በአካባቢው እያለፈ የነበረው አሽከርካሪ ቀረጻው ከቆመ ጋዜጠኞች መውጣት እንደሚችሉ ተናገረ።
ፖሊስ ያልሆነ ግለሰብ በዚህ መንገድ ትዕዛዝ መስጠቱ አስገራሚም ነው።

የፎቶው ባለመብት, Lea Guedj / BBC
"የወንጀል ቡድኖቹ የበለጠ አደገኛ እየሆኑ መጥተዋል። ልጆቻችን እውነታውን እንዲያውቁ እያደረግን ነው" ትላለች ፋዲላ።
ታዳጊዎች ገንዘብ እንደሚሰጣቸው ቃል ስለሚገባላቸው ቤተሰባቸውን ጥለው ወደ ወንጀል ይገባሉ።
ካሚል በወንጀል ቡድኑ የተቀጠረው በጥበቃ ሥራ እንደሆነ ይናገራል።
አሁን 20 ዓመቱ ሲሆን ከቡድኑ መውጣቱን ይናገራል። ታዳጊዎችን የሚመለምሉበትን መንገድም ይገልጻል።
"እንዴት ጭንቅላታችን ውስጥ መግባት እንደሚችሉ ያውቃሉ። የምንፈልገውን ይሰጡናል። ቆንጆ መኪና፣ ሰፊ ቤት፣ ዕፅ ወይም ሴት ሊሆን ይችላል። ይሄንን ሲሰጡን ታማኝ መሆን እንዳለብን ይሰማናል። እስከምንሞት ወይም እስከምንታሰር ድረስ እንቀጥላለን።"
ድክመት የሚያሳዩ ሰዎች የበለጠ ጫና ይደረግባቸዋል።
የዲዜድ አባል የሆነው አዳም (ስሙ ተለውጧል) ግድያ የሚፈጽመው የቡድኑ ክንፍ መሆኑን ይገልጻል።

የፎቶው ባለመብት, Lea Guedj / BBC
በእስር ቤት ሆኖ የፍርድ ቤት ብይን እየጠበቀ ይገኛል። በበርካታ ግድያዎች ተከስሷል።
"ቆራጥ እንደሆንኩ ተመልክተዋል። ባልፈልገውም ጨካኝ መሆኔ እድገት እንዳገኝ አድርጓል። ወደ ላይ ከወጣሁ በኋላ ቦታዬ እዚያው ሆነ።"
የተከሰሰባቸው የግድያ ወንጀሎች "በጣም አስደንጋጭ" መሆናቸውን ይናገራል።
"በጠራራ ፀሐይ ወይም በተጨናነቀ ትራፊክ መካከል ሊሆን ይችላል። ከሰው ሰው ይለያያል። በጥፊ መምታት፣ እናቱ ፊት መውሰድ፣ መኪናው ውስጥ ሳለ ማቃጠል ሊሆን ይችላል። የተረጋጋሁ ስለሆንኩ እወጣዋለሁ።"
አዳም "የተወሰነ" ጸጸት እንደሚሰማው ቢናገርም በአጠቃላይ ግን ጸጸት እንደሌለበት ይናገራል።
"እኔ ባላደርገውም ሌሎች ያደርጉት ነበር" ሲል ይናገራል።
በዕፅ ዝውውር በአጭር ጊዜ ከፍተኛ ገንዘብ እንደሚገኝ ያውቃል። ገና በ20ዎቹ ዕድሜ ክልል ውስጥ ሳለ የገባበት ወጥመድ "አደገኛ" መሆኑን ይገልጻል።
ዲዜድ በሚቆጣጠራቸው አካባቢዎች የአደንዛዥ ዕፅ ዋጋ ዝርዝር ግድግዳ ላይ ይነበባል።
አንድ ጎዳና ላይ ስለሚንቀሳቀሱ ወጭ ወራጁን እንዲሁም የፖሊስንም እንቅስቃሴ መከታተል ይችላሉ።
በአካባቢው ምሽት ላይ ተኩስ መስማት የተለመደ ነው።
የቡድኑ ተቀናቃኝ የሆነ ሌላ የወንጀል ቡድን አባል የሆነው 'ጆይ' እንደሚለው ገና በ13 ዓመቱ በወር 2,500 ዶላር ያገኝ ነበር። አሁን ገቢው በሦስት እጥፍ ጨምሯል።
ሕይወቱ በአንድ አቅጣጫ እንዲሄድ እንደተጻፈለት ያምናል።
የ23 ዓመቱ 'ጆይ' በሚገኝበት የወንጀል ቡድን በተፈጠሩ ነውጦች የተገደሉ ሰዎች አሉ። ይሄም ያሳዝነው እንደሆነ ሲጠየቅ "ዕፅ ሕይወትን ያመሰቃቅላል። ግን ሁላችንም ምርጫ አለን" ሲል ይመልሳል።
የፈረንሳይ የፀረ አደንዛዥ ዕፅ ክፍል ኃላፊ ዲሚትሪ ዙላስ የወንጀል ቡድኖቹ የብሔራዊ ደኅንነት ስጋት ናቸው ይላል።
የትራፊክ አደጋ፣ በቤተቦች መካከል የሚፈጠር ግጭት፣ ድባቴ እና ራስን ማጥፋት ያስከትላል። በየዓመቱ ከ700 በላይ ከልክ ያለፈ ዕፅ የመውሰድ ክስተቶች መመዝገባቸውን ይናገራል።
የፍትሕ ሥርዓቱ ላይ የሚያሳድረውን ጫናም ይጠቅሳል።
ፖሊስ በማርሴ እና በሌሎችም ከተሞችም አደንዛዥ ዕፅን በመቆጣጠር ውጤት እያገኘ ነው።
የወንጀል ቡድኖች መሪዎች ከመታሰራቸው በተጨማሪ አደንዛዥ ዕፅ በቁጥጥር ሥር እየዋለ ነው።
ከ2024 ወዲህ ከዲዜድ ጋር ግንኙነት ያላቸው 1,000 ሰዎች ታስረዋል። ወደ 600 የሚደርሱትም ተፈርዶባቸዋል።
የወንጀል ቡድኖች በማኅበራዊ ሚዲያ ቪድዮ በመልቀቅ ታዳጊዎችን መመልመላቸውን ቀጥለዋል።
በማርሴ ለአሽከርካሪዎች፣ ለሸቀጥ አድራሾች እና ለቅጥረኛ ገዳዮች ማስታወቂያዎች ይወጣሉ። በሰው ሠራሽ አስተውሎት ምሥል የሚሠሩት ቪድዮዎች ታዳጊዎችን ለመሳብ ያለሙ ናቸው።
ፓሪስን ጨምሮ በሌሎችም ከተሞች ማስታወቂያዎቹ ይለቀቃሉ።
የፈረንሳይ ፀረ ወንጀል ቡድን ኃላፊ ቲባውት ፎንታኒ እንደሚለው፤ የወንጀል ታሪክ የሌላቸው ሳይቀሩ ቡድኖቹን ይቀላቀላሉ።
በወንጀል ልምድ ስለሌላቸውም በቀላሉ በቁጥጥር ሥር ይውላሉ።
ልጇ ሂውጎ የተገደለባት ካሪን የወንጀል ቡድን መሪዎች ታዳጊዎችን በመመልመል "ቤተሰብ ያጠፋሉ" ትላለች።
"ታናናሽ እህቶች፣ ታናናሽ ወንድሞች፣ አያቶች ይጠፋሉ። እነዚህ የወንጀል ቡድን መሪዎች ልብ የላቸውም።"




































