የወንዶች መካንነት እስካሁን እንዴት በቂ ትኩረት ሳያገኝ ቀረ?

በአውሮፓውያኑ 2020 አጋማሽ በኮቪድ ምክንያት በተከሰተው የእንቅስቃሴ ገደብ ወቅት ነበር ሉክ እና ባለቤቱ ቤተሰብ ለመመሥረት የወሰኑት።
ሉክ ሲናገር "በአስራዎቹ ዕድሜዬ የማስበው፣ ያለ ኮንዶም የግብረ ሥጋ ግንኙነት ከተፈፀመ ብቻ እርግዝና እንደሚከሰት ነበር" ይላል።
"ስለዚህ ዕድሜዬ ከፍ እያለ ሲሄድ፣ ሁሉም ነገር በተለመደው ሁኔታ ይቀጥላል ብዬ እጠብቅ ነበር። ነገር ግን ያ ሳይሆን ሲቀር ምን ማድረግ እንዳለብኝ ወይም ወዴት መሄድ እንዳለብኝ አላውቅም" ሲልም ያክላል።
ከ18 ወራት ያልተሳካ ሙከራ በኋላ፣ ጥንዶቹ ሐኪማቸውን ያገኙ ሲሆን፣ ለተጨማሪ ምርመራ ወደ ሆስፒታል እና መካንነትን ወደሚከታተል ክሊኒክ ተላኩ።
ከዚያ በኋላ ባለው የአንድ ዓመት ጊዜ ውስጥ፣ ሙሉ ትኩረት የተደረገው በባለቤቱ ላይ ብቻ እንደነበር ሉክ ይናገራል። ቀጠሮዎቹ በሙሉ በእርሷ ስም ነበሩ።
"አጠቃላይ ሥርዓቱ የተገነባው ችግሩ የሴቷ ነው በሚል ግምት ላይ ነው" የሚል እምነት ያለው ሉክ፣ "የወንዱ ወገን ሙሉ በሙሉ ችላ ይባላል" ሲልም እምነቱን ያጠናክራል።
ሉክ የወንድ የዘር ፍሬ (የስፐርም) ችግር ሊኖርበት እንደሚችል የተነገረው ከአንድ ዓመት በላይ የህክምና ክትትል ሲያደርጉ ከቆዩ በኋላ ነው።
ይህን ሲሰማ በስሜት " 'አሁን ነው የምትነግሩኝ?' አልኩኝ" ይላል። "በሂደቱ ላይ እንደ አጃቢ ከመታየት ይልቅ፣ በእኔ በኩል በጊዜ ሊመረመሩ የሚችሉ ነገሮች ነበሩ" በማለትም ስሜቱን ይገልጻል።
መካንነት ከስድስት ጥንዶች መካከል በአንዱ ላይ ሊከሰት የሚችል ሲሆን፤ ከእነዚህ ውስጥ ግማሽ ያህሉ ደግሞ ከወንዶች ችግር ጋር የተያያዙ ናቸው።
በቅርቡ የወጣው የብሔራዊ የጤና እና እንክብካቤ ልቀት ተቋም የሕክምና መመሪያ እንደሚጠቁመው፣ ጥንዶች ያለ እርግዝና መከላከያ ለ12 ወራት ያህል የግብረ ሥጋ ግንኙነት ካደረጉ በኋላ ዕርግዝና ካልተፈጠረ፣ ሁለቱም መርመር አለባቸው።
ሆኖም ባለሙያዎች እንደሚናገሩት፣ ወንዶች በመካንነት ምርመራ፣ ሕክምና እና በጉዳዩ ላይ በሚደረጉ ውይይቶች ላይ ብዙም እንዲሳተፉ አይደረጉም።
"ታስቦበት ባይሆንም እንኳን ግልፅ ማግለል ሊኖር ይችላል" ሲሉ የለንደን ዩኒቨርሲቲ ኮሌጅ ፕሮፌሰር የሆኑት ቦላ ግሬስ ሁኔታውን ገልፀዋል።
አክለውም "ይህ ተግባር የመካንነት ክሊኒኮችን የምክር አገልግሎት ሰጪዎችን ጨምሮ በሁሉም መሰል አገልግሎት መስጫዎች ውስጥ እንደሚስተዋል" ወንድ ታካሚዎቻቸውን ዋቢ በማድረግ አስረድተዋል።
በ2019 በግሬስ የተመራ አንድ ጥናት እንደሚያሳየው፣ ብዙ ወንዶች በመካንነት ሕክምና ሂደት ውስጥ ይበልጥ መሳተፍ ይፈልጋሉ፤ ነገር ግን ብዙውን ጊዜ ድምፃቸው እንደማይሰማ ይሰማቸዋል።
ይህ ደግሞ ተደጋጋሚ አዙሪት እንደሚፈጥር ትከራከራለች። አንዳንድ የመካንነት ሕክምና አገልግሎቶች ወንዶችን ስለማያካትቱ ወንዶች ያላቸው ተሳትፎ ይቀንሳል።
ግሬስ ሁኔታውን ስታስረዳ፣ "ወንዶች የሚገለሉበትን፣ ነገር ግን ደግሞ ለሕክምናው ባለመምጣታቸው የሚወቀሱበትን አዙሪት ፈጥረናል" ትላለች።
ይህ ደግሞ እውነተኛ መዘዞችን ሊያስከትል እንደሚችል የገለፀች ሲሆን፤ ይኸውም በወንዶች ላይ ብቻ ሳይሆን ቀጥሎ ያለውን ከዕቅድ ጀምሮ ውሳኔ ላይ እስከመድረስ ያለውን ጭንቀትና ፈተና በሚጋፈጡት በሴቶችም ላይ ጭምር መሆኑን ታስረዳለች።
ይህ በተጨማሪም፣ ችግሮች ዘግይተው እንዲታወቁ፣ ምርመራዎች እና ሕክምናዎች ይበልጥ ውስብስብ፣ ከባድ እና ውድ እንዲሆኑ ሊያደርግ ይችላል።
ስለዚህ አንድ ወንድ ችግር ሊኖርበት እንደሚችል በሚነገረው ጊዜ፣ ሥርዓቱ እንዴት ድጋፍ ሊያደርግለት ይችላል? ወንዶች ስለ መካንነት ይበልጥ በግልጽ እንዲነጋገሩስ ምን ተጨማሪ ነገሮች ሊደረጉ ይችላሉ? የሚለው መልስ የሚሻ ጥያቄ ነው።
'በሕክምና ሥርዓቱ ችላ መባል'
እንደ አውሮፓውያኑ በ1978 የመጀመሪያው በቤተ ሙከራ የተዳቀለ ፅንስ ከተወለደበት ጊዜ ጀምሮ፣ የወሊድ ህክምና በአብዛኛው በሴቶች ላይ ያተኮረ ነው።
የቤተ ሙከራ ፅንሰት የእንቁላል ከረጢቶችን በማነቃቃት እንቁላል እንዲያመርቱ ማድረግን፣ እንቁላሎቹን ማውጣትን፣ በቤተ ሙከራ ውስጥ ከወንድ የዘር ፍሬ ጋር ማዳቀልን እና ከዚያም የተፈጠረውን ፅንስ ወደ ማህፀን ውስጥ መመለስን ያጠቃልላል።
ከወንዶች አንጻር ያለው ሁኔታ ደግሞ በአብዛኛው የዘር ፍሬ ናሙና ሰጥቶ ሳይንሱ ስራውን እስኪሰራ ድረስ መጠበቅ ነው።
ይህ አለመመጣጠን የወሊድ እንክብካቤ ላይ የራሱን ተፅዕኖ አሳርፏል ይላሉ በማንቸስተር ዩኒቨርሲቲ የአንድሮሎጂ (በወንዶች የስነ-ተዋልዶ ጤና ላይ ያተኮረ የህክምና ዘርፍ) ፕሮፌሰር የሆኑት አለን ፔሲ።
እርሳቸው እንደሚሉት፣ የወሊድ ሕክምና ማዕከላት አብዛኛውን ጊዜ የሚመሩት በሴቶች ስነ-ተዋልዶ ጤና ላይ በሰለጠኑ የማህፀንና ፅንስ ሀኪሞች ሲሆን፣ ከወንዶችጋር የተገናኘ የወሊድ ችግር ብዙ ጊዜ እንደ ሁለተኛ ደረጃ ጉዳይ ሊታይ ይችላል።
"አሁን ላይ ግን፣ በዚህ ጉዳይ ላይ ፍላጎት ስላላቸው ስራውን በጥሩ ሁኔታ የሚያከናውኑ አንዳንድ በጣም ጎበዝ የማህፀንና ፅንስ ሀኪሞች አሉ። ነገር ግን በአጠቃላይ ሀኪሞች ደረጃ፣ ማለትም በሁለተኛ ወይም በሶስተኛ ደረጃ የህክምና ክሊኒኮች፣ ወንዶች እንደ ሁለተኛ አማራጭ ወይም እንደ ትርፍ ጉዳይ ሊታዩ ይችላሉ።"
በፖሊሲ ደረጃም ቢሆን ተመሳሳይ አለመመጣጠኖች መኖራቸውን ይገልጻሉ።
የጤና ሚኒስቴር በቅርቡ በእንግሊዝ የ10 ዓመት የጤና እንክብካቤ ራዕይ ስር የወንዶች እና የሴቶች የጤና ስትራቴጂዎችን በተናጠል አሳትሟል።
'የመውለድ ጉዳይ' (Fertility) በሴቶቹ እትም ላይ ድጋፍን እና የህክምና መመሪያን የሚያብራራ ገጽን ጨምሮ ወደ 20 ጊዜ ያህል ተጠቅሷል።
በወንዶቹ ሰነድ ውስጥ ግን የተጠቀሰው አምስት ጊዜ ብቻ ሲሆን፣ ያውም በአብዛኛው ከውፍረት፣ ከአልኮል ወይም ከሌሎች የጤና ችግሮች ጋር በተያያዘ ነው።
የብሪታንያ የወሊድ ማኅበር የቀድሞ ሊቀመንበር የነበሩት ፔሲ፣ ይህንን ሁኔታ "የጨዋታውን ሜዳ እኩል ለማድረግ የሚያስችል ዕድልን ያስመለጠ አጋጣሚ" ሲሉ ይገልፁታል።
"ይህ ሲባል ፈጽሞ ለሴቶች የሚደረገው ይቀነስ ማለት አይደለም፤ ምናልባትም ለሴቶች ከሚደረግላቸውም በላይ ልናደርግላቸው ይገባል" ይላሉ።
"ነገር ግን ለወንዶች ተገቢውን ሚና በመስጠት፣ በቀጣይ የሕይወት ተሞክሯቸው እንዲሁም በምርምርና ሕክምና ረገድ ልናደርጋቸው በምንችላቸው ነገሮች ላይ መሠረታዊ ለውጥ ማምጣት እንችላለን" በማለትም አክለዋል።
የጤና እና ማህበራዊ እንክብካቤ ሚኒስቴር ቃል አቀባይ በበኩላቸው "ወንዶች የመውለድ ችግሮች በሚያጋጥሟቸው ጊዜ ከሴቶች ጋር እኩል የሆነ ድጋፍ፣ መረጃ እና እንክብካቤ ሊያገኙ ይገባል" ብለዋል።
የወንዶች መካንነት [መውለድ ያለመቻል] ጉዳይ "የአገልግሎቶች ቅርፀት እና አቅርቦት ረገድ በአግባቡ መካተቱን" ለማረጋገጥ ከእንግሊዝ ብሔራዊ የጤና ተቋም ጋር መስራታቸውን እንደሚቀጥሉም ገልጸዋል።
በአንድ ወቅት ሉክ በዘር ፍሬው ማመንጫ (testicles) ላይ የአልትራሳውንድ ምርመራ አድርጎ የነበረ ቢሆንም፣ ክሊኒኩን መልሶ እስካስታወሰ ድረስ ለአንድ ዓመት ያህል ምንም ምላሽ አልተሰጠውም ነበር።
በተደረገው ድጋሚ ምርመራ ቫሪኮሴል (varicocele) በመባል የሚታወቀው በዘር ፍሬ ከረጢት ውስጥ የሚከሰት እና የዘር ፍሬ ጥራትን ሊጎዳ የሚችል የደም ሥር እብጠት እንዳለበት ታወቀ። ሕክምና ቢደረግለትም የጥንዶቹ የመውለድ ችግር ግን አልተቀረፈም።
ሉክ፣ በግል ለሚሰራ የአንድሮሎጂ ባለሙያ ክፍያ ስለ አኗኗር ዘይቤው እና ስለ አመጋገቡ ዝርዝር የሆነ የግል ምክር ለማግኘት፣ ሌላ ተጨማሪ ዘጠኝ ወራት ፈጅቶበታል።
"በጣም ከባድ እና ብቸኝነት የበዛበት ነበር" ይላል ሉክ ያሳለፈውን ጊዜ ሲያስታውስ።
"ከወንድነት ጋር የተያያዙ ማህበረሰባዊ አመለካከቶችን በሚጻረር መልኩ፣ ችግሩ ከወንድ ወገን መሆኑን የማወቁ አስደንጋጭ ስሜት አለ። ከዚያም በተጨማሪ ከስርዓቱ ሙሉ በሙሉ እንደተገለልክና ችላ እንደተባልክ ይሰማኻል።"
በአሁኑ ጊዜ ጥንዶቹ አንድ ጤነኛ የወንድ የዘር ፍሬን ከተዘጋጀ የሴቷ ዘር (እንቁላል) ጋር በቤተ ሙከራ በማዳቀል ፅንስ ለመፍጠር የሚያስችል የሕክምና ሂደት ላይ ይገኛሉ።
ይህም በቤተ ሙከራ ውስጥ እንቁላሉን በሺዎች ከሚቆጠሩ ስፐርሞች ጋር በማገናኘት በራሱ ፅንስ እንዲፈጠር ከመተው ይልቅ፣ በጣም ቀጭን በሆነ መርፌ አማካኝነት አንድ ብቻ የወንድ የዘር ፍሬን በቀጥታ ወደ እንቁላሉ ውስጥ የማስገባት የሕክምና ዘዴ ነው።

የፎቶው ባለመብት, AFP via Getty Images
'አስቸጋሪውን ወቅት ተደብቆ ማሳለፍ'
የሕክምና ባለሙያዎች እንደሚናገሩት አጠቃላይ ሁኔታው መለወጥ የጀመረ ቢሆንም፣ ለውጡ ግን በጣም አዝጋሚ ነው።
በለንደን ዩኒቨርሲቲ ኮሌጅ ሆስፒታሎች አማካሪ የሆኑት የዩሮሎጂ ቀዶ ጥገና ሀኪም ፕሮፌሰር ሁሴን አልናጃር፣ "ነገሮች ወደ ትክክለኛው አቅጣጫ እየተጓዙ ነው፣ ነገር ግን አሁንም ወደኋላ ቀርተናል" ይላሉ።
ለአብነትም፣ የመጀመሪያው የዘር ፈሳሽ ችግር እንዳለ ካመለከተ፣ ወንድየው ከሴት አጋሩ ቀድሞ ባለሙያ የማማከር ልምዱ አሁን ላይ እየዳበረ መጥቷል።
"ነገሮች እየተቀየሩ ነው ስል ይህንን ማለቴ ነው፣ ነገር ግን ለውጡ እየሆነ ያለው በዝግታ ነው" ሲሉ ያክላሉ። "በአጠቃላይ ግን፣ ከመካንነት ጋር በተያያዘ አሁንም ቢሆን ሴቶች መጀመሪያ የመመርመራቸው ዕድል እጅግ የላቀ ነው።"
የ34 ዓመቱን ጄምስን ለመሰሉ ወንዶች፣ ይህ አዝጋሚ የለውጥ ጉዞ በሕይወት ተሞክሯቸው ላይ የራሱን ጥላ አሳርፏል።
ጄምስ እና ባለቤቱ ለመውለድ ከተቸገሩ በኋላ፣ በእርሱ አባባል "እንደ ሰጎን ራሴን በአሸዋ ውስጥ ደብቄ ነበር" የሚለው ጊዜ አጋጥሞት ነበር።
ባለቤቱ ሁሉንም ዓይነት ምርመራዎች እና ፍተሻዎች እያደረገች በነበረበት ወቅት፣ እሱ ግን ለወራት ያህል ችላ በማለት ራሱን ደብቆ ቆይቷል። "ያንን ወቅት እና የባከነውን ጊዜ በየቀኑ አስባለሁ" ይላል።
ጄምስ በግንባታ ቦታ በስራ ላይ እያለ ነበር የዘር ፈሳሽ ምርመራ ውጤቱ የደረሰው።
የዘር ፍሬው "ደካማ፣ ዘገምተኛ እና ቅርጹ የተበላሸ" እንደሆነ ተነገረው፤ እናም በተፈጥሯዊ መንገድ ለመውለድ እንደሚቸገር ተረዳ። በዚያ ቀን ወደ ቤት የተመለሰበት በመኪና የሦስት ሰዓት ያህል ጉዞ "በጣም የሚያም እና ጭጋጋማ" ነበር።
በምርመራው ሂደት ላይ መዘግየቶች ነበሩ። የተሟላ የአካል እና የሆርሞን ምርመራዎችን ለማድረግ ሌላ ተጨማሪ ሁለት ዓመት ፈጅቶበታል።
ይህንንም ያገኘው የግል የዩሮሎጂ ባለሙያ ካማከረ በኋላ ነበር። ከዓመታት ጥረት እና በቤተ-ሙከራ ፅንስ ለመፍጠር በርካታ ሙከራዎች ከተደረጉ በኋላ፣ የጥንዶቹ ልጅ ለማግኘት ሕክምና በመጨረሻ ሳይሳካ ቀርቷል።
"ያለ ምንም ቅድመ ሁኔታ ለምትወዳት የሕይወት አጋርህ፣ የስቃይዋ ሁሉ መንስኤው አንተ እንደሆንክ አድርገህ ራስህን ትቆጥራለህ" ይላል ጄምስ።
"ልጅ መውለድ ለማትችልበት ሁኔታ ተጠያቂው አንተ እንደሆንክ ይሰማሃል" ሲልም ስሜቱን ይገልጻል።
የወንዶች መካንነት ብዙውን ጊዜ ከወንድነት ጥንካሬ እና ከብቃት ጋር ተያይዞ መታየቱ፣ አንዳንድ ወንዶች ችግሩን አምኖ ለመቀበል ወይም ለመወያየት እንዲቸገሩ ያደርጋቸዋል።
ፕሮፌሰር ፔሲ በአንድ የምግብ ግብዣ ስፍራ ላይ የታዘቡትን ሲያስታውሱ፣ "ሴቶቹ ሁሉ በአንድ ወገን ተሰብስበው በቤተ-ሙከራ ፅንስ ስለሚፈጠርበት ሁኔታ ሲያወሩ፣ ወንዶቹ ደግሞ በሌላኛው ወገን ሆነው ስለ እግር ኳስ ያወሩ ነበር" ብለዋል።
ጄምስ የወሊድ ችግሩን በወንድነቱ ላይ የመጣ ተግዳሮት አድርጎ ባይመለከተውም፣ ከዚሁ ጋር በተገናኘ ያለው ማህበራዊ መገለል ግን በዚያ አስቸጋሪ ወቅት ድጋፍ ለማግኘት እንዲቸገር አድርጎታል።
"ይህን ነገር የምትጋፈጡት አንተና የሕይወት አጋርህ ብቻ ስለሆናችሁ፣ ልክ ደሴት የሆንክ እና እንዳንተ ያለ ሰው ምንም የሌለ ያህል ይሰማሃል" ይላል።
"ወዴት እና ወደ ማን መሄድ እንዳለብህ ወይም ምን ማለት እንዳለብህ አታውቅም።"
በዩናይትድ ኪንግደም ሕግ መሠረት፣ በነጻ ወይም በተደጋጋሚ እንኳን ባይሆን የወሊድ አገልግሎት የሚሰጡ ክሊኒኮች ከሕክምናው በፊት የምክር አገልግሎት የመስጠት ግዴታ አለባቸው።
የሀገሪቱ የወሊድ ተቆጣጣሪው አካል እንደገለጸው፣ በኢንተርኔትም ሆነ በአካል፣ ከሴቶች አንጻር ለወንዶች ድጋፍ የሚሰጡ ቡድኖች በጣም ጥቂት ናቸው። ሆኖም ይህ ሁኔታ መለወጥ ስለመጀመሩ አንዳንድ ምልክቶ አሉ።
የ43 ዓመቱ ሾን ግሪንአዌይ፣ በአውሮፓውያኑ 2018 በተደረገለት ምርመራ፣ በዘር ፈሳሹ ውስጥ ምንም ዓይነት የወንድ የዘር ፍሬ የማይገኝበት ሁኔታ 'አዞኦስፐርሚያ' (azoospermia) እንዳለበት ታወቀ።
መንስኤው በግልጽ ባይታወቅም፣ በታዳጊነቱ ከባድ የጆሮ ደግፍ በሽታ ይዞት ነበር፤ ይህ ደግሞ ከወንዶች መካንነት ጋር ግንኙነት እንዳለው የሚነገርለት ቫይረስ ነው።
እሱና ባለቤቱ በመጨረሻም በወንድ የዘር ፍሬ ልገሳ አማካኝነት ልጆችን ያፈሩ ቢሆንም፣ ሾን ግን ያንን ሁሉ ተሞክሮ ያሳለፈው ብቻውን እንደነበር ይናገራል።
"ምንም ዓይነት ድጋፍ አልነበረኝም፤ እንዲሁም ማንም ሰው ስለ ጉዳዩ ከግል ተሞክሮው ተነስቶ አያወራም ነበር፤ ስለዚህ ታሪኬን ለሌሎች ለማካፈል ወሰንኩ" ይላል።
ከዛም ከ40 ዓመቱ ጓደኛው ሲያራን ሃኒንግተን ጋር በመሆን በወንዶች የስነ-ተዋልዶ ጉዳዮች ላይ ያተኮረ ፖድካስት እና የወሊድ ችግር ያለባቸው ወንዶች በዋትስአፕ እና በአካል በመገናኘት የሚደጋገፉበትን የጥምረት መረብ አቋቋሙ።
በዚህም በአሁኑ ጊዜ በወንዶች መካንነት ላይ የሚደረገውን ውይይት፣ ከአሥር ዓመት ገደማ በፊት ከነበረው የአእምሮ ጤና ግንዛቤ ጋር ያነጻጽሩታል። አሁንም ድረስ እንደ ነውር የሚቆጠር ቢሆንም፣ ቀስ በቀስ ግን ይፋዊ ውይይቶች እየተለመዱ መጥተዋል።
"በጣም ስር የሰደደ ማህበራዊ መገለል አለ፤ ነገር ግን በሚያሳዝን መልኩ ጉዳዩ በራስ ላይ እስካልደረሰ ድረስ ማንም ትኩረት የማይሰጠው ዓይነት ርዕስ ነው" ይላል እርሱም በ2012 የመውለድ ችግር እንዳለበት የተነገረው መሆኑን የሚያስታውሰው ሲያራን።
ሁኔታውን "መቆጣጠር እስኪጀምር" እና አመጋገቡን በማስተካከል፣ አልኮል በማቆም እና የአካል ብቃት እንቅስቃሴ በማድረግ በአኗኗር ዘይቤው ላይ ለውጥ እስኪያደርግ ሁለት ዓመት እንደፈጀበት ይናገራል።
ከሰባት ዙር በቤተ-ሙከራ ፅንስ የማዳበር ሕክምና እና ከሁለት የፅንስ መጨናገፍ በኋላ፣ ባለቤቱ ጄኒፈር በመጨረሻ አንድ ወንድ እና አንዲት ሴት ልጅ ወልዳለች።
ጥናቶች እንደሚያሳዩት ውጥረት፣ በቂ እንቅልፍ ማጣት፣ ማጨስ፣ አልኮል መጠጣትና የአመጋገብ ሁኔታ የወንድ የዘር ፍሬን ጥራት ሊጎዱ ይችላሉ። ነገር ግን አነስተኛና ለአጭር ጊዜ የሚቆዩ ለውጦች ብዙም ተጽእኖ ላይኖራቸው እንደሚችል ፕሮፌሰር ፔሲ ይናገራሉ።
"ማንኛውም የአኗኗር ዘይቤ ለውጥ ቀጣይነት ሊኖረው ይገባል" ይላሉ።
"የወንድ የዘር ፍሬ ከመጀመሪያው ጀምሮ ተመርቶ እስኪያልቅ ድረስ ሦስት ወራት ይፈጃል፤ ስለዚህ ዓርብ ምሽት ላይ መጠጣት ካቆምክ፣ ሰኞ ጠዋት ላይ መሻሻል ይኖራል ብለህ አትጠብቅ" በማለት ሁኔታውን ያስረዳሉ።
ሁሉም ወንዶች ግን ይህንን ምክር ተግባራዊ አያደርጉም።
ሾን እንደሚናገረው፣ አንዳንድ ሴቶች የሕይወት አጋሮቻቸው ልጅ የመውለድ ዕድላቸውን ሊጎዳ እንደሚችል እየተነገራቸው እንኳን ሲጋራ፣ አልኮል እና እፅ ለመተው ፈቃደኛ አለመሆናቸውን ነግረውታል።
"በነገራችን ላይ ወንዶቹ ራሳቸው [ይህን ጉዳይ] በፍጹም አያወሩትም" ሲልም ተናግሯል።
"የጤና እንክብካቤ ስርዓቱ ራሱን ማሻሻልና እንዳለበት እናውቃለን፣ ነገር ግን የማታ ማታ ነገሩ የሁለትዮሽ መንገድ ነው" ይላል።
"በመሆኑም አንዳንድ ወንዶች እና አንዳንድ ሴቶች በተመሳሳይ ሁኔታ ራሳቸውን ማሻሻልና መለወጥ አለባቸው።"
በአውሮፓውያኑ 2022 በዳንዲ ዩኒቨርሲቲ ተመራማሪዎች የተደረገ አንድ አነስተኛ ጥናት እንዳመለከተው፣ ከአውሮፓ የስነ-ወሊድ ስፔሻሊስቶች መካከል ከስድስቱ አንዱ፣ ወንዶችን የዘር ፍሬ ምርመራ እንዲያደርጉ ለማሳመን ዘወትር እንደሚቸገሩ ገልጸዋል።
በዓለም አቀፍ ደረጃም ቢሆን፣ አንዳንድ ወንዶች የዘር ፈሳሽ ናሙና ለመስጠት ምቾት የማይሰማቸው ሲሆን፣ ሌሎች ደግሞ ንቁ የወሲብ ሕይወት ስላላቸው ወይም ቀደም ሲል ልጅ የወለዱ በመሆናቸው ብቻ ምንም ዓይነት የመውለድ ችግር የለብንም ብለው ያስባሉ።

'የለውጥ ምልክቶች'
የሰዎች ግንዛቤ መለወጥ ስለመጀመሩ አመላካች ነገሮች አሉ።
በብሪታንያ የወሊድ ማኅበር እና በካርዲፍ ዩኒቨርሲቲ የተዘጋጁት በእንግሊዝ ለሚገኙ ትምህርት ቤቶች የተዘጋጀው በግል፣ በማህበራዊ ጉዳይ፣ በጤና እና በኢኮኖሚ ጉዳይ ላይ ያተኮረው አዲስ የትምህርት ዕቅድ፣ በአሁኑ ወቅት ወንዶችን ለመካንነት የሚያጋልጡ ሁኔታዎችን በተመለከተ ለሴቶች ከሚሰጠው ጋር በእኩል ትኩረት አካትቷል።
እንዲሁም በዚህ ዓመት በለንደን ኦሊምፒያ በተካሄደውና በሁለት ቀናት ውስጥ ወደ 2,000 የሚጠጉ ሰዎች በጎበኙት ግዙፍ የወሊድ ትዕይንት ላይ፣ አዘጋጆቹ የወንዶች መካንነት ለመጀመሪያ ጊዜ የመድረኩ ዋነኛ የትኩረት ማዕከል እንደሚሆን ገልጸዋል።
በትዕይንቱ ላይ፣ በቴክኖሎጂ የላቁ የወንድ ዘር መመርመሪያ መሣሪያዎችን የሚያቀርቡ አካላት፣ እንቁላል ማቀዝቀዣ እና የእርግዝና አጋዥ ንጥረነገሮችን የመሳሰሉ ይበልጥ የተለመዱት አገልግሎቶችን ከሚያቀርቡት ጋር ጎን ለጎን ቀርበው ነበር።
በወንድ የዘር ፍሬ ጥራት እና ለወንዶች በሚደረጉ ዘመናዊ የሕክምና አማራጮች ላይ ያተኮሩ ሴሚናሮችም ተካሂደዋል።
የትዕይንቱ የይዘት ዳይሬክተር ሶፊ ሱሌሪያ፣ "[ይህ] እንዲሁ ለይስሙላ የተደረገ አይደለም፤ ይህ የወንዶች የመውለድ ጉዳይ የአንድ ወገን ብቻ ርዕስ አለመሆኑን እውቅና የመስጠት ጉዳይ ነው። የስነ-ተዋልዶ ጤና መሰረታዊ አካል ነው። ስለሆነም እኩል ዕይታ፣ እኩል ኢንቨስትመንት እና እኩል ርኅራኄ ሊቸረው ይገባል" ሲሉ ተናግረዋል።
በዚህ ዘርፍ ላይ የተሰማሩ ሐኪሞችም ለውጦችን እያዩ መሆናቸውን እና ይህም ልጅ ከመውለድ ባለፈ በሌሎች ምክንያቶችም ትልቅ ትርጉም እንዳለው ይናገራሉ።
የወንዶች መካንነት ከውፍረት እስከ ማጨስ እና የሆርሞን መዛባት ያሉ ሰፋ ያሉ የጤና እክሎች አመላካች ሊሆን እንደሚችል ከጊዜ ወደ ጊዜ እየጨመሩ የመጡ ማስረጃዎች ያሳያሉ ይላሉ የብሪታንያ የዩሮሎጂ ቀዶ ጥገና ሐኪሞች ማህበር ተወካይ የሆኑት ፕሮፌሰር አልናጃር።
ጤናማ የሆኑ ወንዶች የተሻለ የስነ-ተዋልዶ ጤና እንዳላቸው የሚገልጹት ፕሮፌሰሩ "ጤናማ ያልሆነ የዘርፍ ፍሬ ምርመራ ውጤት፣ አንዳንድ ጊዜ ተጨማሪ የሕክምና ክትትል እንደሚያስፈልግ የሚያሳይ የመጀመሪያው ምልክት ሊሆን ይችላል" ይላሉ።
"ለዚህ ነው የወንዶች መካንነት ችግር ከእርግዝና ጉዳይ ጋር ብቻ ተያይዞ መታየት የለበትም ብዬ የማምነው፤ ይልቁንም እንደ አንድ ወሳኝ የወንዶች ጤና ጉዳይ እና በጊዜ ሕክምና ለማድረግ እንደሚያስችል አጋጣሚ እውቅና ሊሰጠው ይገባል" ባይ ናቸው።
መውለድ አለመቻላቸው ሕይወታቸውን የቀረጻቸው እንደ ጄምስ ያሉ ወንዶች፣ እንዲህ ዓይነቱን መሻሻል ለማሳየት ከዚህ በላይ ሊዘገዩ አይገባም።
"አሁንም ድረስ የቀጠለውን ማህበራዊ መገለል የምንቀይረው ራሳችንን በአሸዋ ውስጥ ቀብረን እና ችላ በማለት ሳይሆን፣ ጉዳዩን ይፋ አውጥተን በመወያየት ነው" ይላሉ።
"ይበልጥ ግልጽ መሆን ስንጀምር፣ ነገሩ ነውር እንደሆነ የሚያስቡ ወይም ስለ ጉዳዩ በመናገራቸው ብቻ ወንድነታቸው እንዳነሰ አድርገው የሚቆጥሩ ሰዎች ቁጥር እየቀነሰ ይሄዳል።"



































