በአሜሪካ ከሚፈለጉ 10 ሰዎች መካከል አንዱ የሆነው ሜክሲኳዊ ዕፅ አዘዋዋሪ በቁጥጥር ስር ዋለ

ታትሟል
የንባብ ጊዜ: 2 ደቂቃ

በኤፍቢአይ ተፈላጊ በሆኑ ዋነኛ 10 ሰዎች ዝርዝር ውስጥ የተመደበው ሜክሲኮው የዕፅ አዘዋዋሪ ከሜክሲኮ መንግሥት ኃይሎች ጋር በተደረገ የተኩስ ልውውጥ በቁጥጥር ስር መዋሉ ተነገረ።

ፋውስቶ ኢሲድሮ "ቻፖ ኢሲድሮ" ሜዛ ፍሎሬስ እና ሌሎች ሰባት ሰዎች አርብ ዕለት በጉዋሳቭ፣ ሲናሎዋ ውስጥ በሜክሲኮ ልዩ ኃይሎች በቁጥጥር ስር መዋላቸውን የአገሪቱ መከላከያ አስታውቋል።

በዘመቻው ወቅት ሰባት ተጠርጣሪዎች ተገድለዋል። በጓዋሳቭ ደኅንነትን ለማጠናከር የሚጓዙ አራት የሜክሲኮ ጦር አባላት መገደላቸውንም ባለሥልጣናት ገልጸዋል።

ሜዛ ፍሎሬስ በሜክሲኮ በተደራጀ የወንጀል ክስ ሲፈለግ ነበረ። ኤፍቢአይ በበኩሉ "አሜሪካን በፌንታኒል፣ ኮኬይን፣ ሄሮይን እና ሌሎች ገዳይ መድኃኒቶች አጥለቅልቋል" በሚል ይከሰዋል። አሜሪካ ግለሰቡ ተላልፎ እንዲሰጣት ትፈልጋለች።

ፕሬዝዳንት ዶናልድ ትራምፕ ወደ ዋይት ሐውስ ከተመለሱ በኋላ በአሜሪካ ጫና ውስጥ የገባችው ሜክሲኮ ከአደንዛዥ ዕፅ ጋር የተያያዙ ወንጀሎችን ለመዋጋት ጥረት እያደረገች ነው።

የሜዛ ፍሎሬስ ድርጅት ወይም ጉሳቭ ካርቴል በመባል የሚታወቀው መሪ የሆነው ሜዛ ፍሎሬስ ከ1990ዎቹ ጀምሮ በአደንዛዥ ዕፅ ዝውውር ንግድ ውስጥ ከፍተኛ ተሳትፎ እንዳለው ይታመናል።

የሜክሲኮ ልዩ ኃይሎች የት እንዳለ ለማወቅ የአሜሪካን መረጃ በመጠቀም ወደ ተደበቀበት ቅጥር በማቅናት መክበባቸውን የሜክሲኮ የመከላከያ ሴክሬታሪያት አስታውቋል።

ሆኖም ወደ ግቢው በመግባት ሜዛ ፍሎሬስን ከመያዛቸው በፊት "በተኩስ እና በፈንጂዎች ጥቃት ደርሶባቸዋል" ተብሏል።

በበይነመረብ የተለቀቁ ቪዲዮዎች ሄሊኮፕተሮች ሲተኩሱ አሳይተዋል። ሌሎች ደግሞ በቤዝቦል ስታዲየም ውስጥ የነበሩ ሰዎች የተኩስ ድምፅ ሰምተው ሲሸሹ አሳይተዋል።

በአጠቃላይ ስምንት ሰዎች በቁጥጥር ስር የዋሉ ሲሆን፣ ከእነዚህም መካከል የሜዛ ፍሎሬስ ምክትል (የአጎቱ ልጅም ጭምር ነው) እንዲሁም የቡድኑን የገንዘብ ጉዳዮችን የሚመራው የባለቤቱ ወንድም ይገኙበታል ሲል የመከላከያ ሚኒስቴር አስታውቋል።

ሜዛ ፍሎሬስ፣ የአጎቱ ልጅ እና አማቹ ክስ እንዲመሠረትባቸው ወደ ዋና ከተማዋ ሜክሲኮ ሲቲ መወሰዳቸውን የመከላከያ ሚኒስቴር ገልጿል። ቀሪዎቹ አምስት ሰዎች ግን በሲናሎዋ ግዛት ውስጥ ቀርተዋል።

ባለሥልጣናት አክለውም በተካሄደው ዘመቻ የሮኬት ማስወንጨፊያን ጨምሮ በርካታ የጦር መሳሪያዎችን እንዲሁም አደንዛዥ ዕጾችን እና ጥሬ ገንዘብ መያዛቸውን ተናግረዋል።

በሄርሞሲሎ ከተማ የሚገኘው የአሜሪካ ቆንስላ ጄኔራል በተለያዩ አካባቢዎች "በሌሊት የተከሰቱ የፀጥታ ዘመቻዎችን፣ ግጭቶችን፣ የመንገድ መዘጋቶችን እና የተሽከርካሪዎች መቃጠልን በተመለከተ የሚወጡ ሪፖርቶችን እየተከታተለ" መሆኑን አስታውቋል።

ቆንስላው በአካባቢው ሊከሰት የሚችል ሁከት በመኖሩ የአሜሪካ ዜጎች ጥንቃቄ እንዲያደርጉ የአካባቢው ነዋሪዎችም ከቤታቸው እንዳይወጡ መክሯል።

ሜዛ ፍሎሬስ በ2025 በኤፍ.ቢ.አይ "በጣም በሚፈለጉ ወንጀለኞች" ዝርዝር ውስጥ የተካተተ ሲሆን ጠለፋን፣ በጉልበት ገንዘብ መቀበልን እና ማሰቃየትን ጨምሮ በ"ከባድ ወንጀሎች" ተከሶ ነበር።