کورونا وائرس: اتوار کو دنیا بھر میں متاثرین کی تعداد میں ریکارڈ اضافہ

لائیو کوریج

1. 9 جولائی 2020انڈیا کی مغربی بنگال ریاست نے لاک ڈاؤن میں مزید سختی کر دی

   کورونا وائرس کے متاثرین کی تعداد میں ایک مرتبہ پھر تیزی سے اضافے کے بعد انڈیا میں ریاست مغربی بنگال نے زیادہ متاثرہ علاقوں میں سخت لاک ڈاؤن نافذ کرنا شروع کر دیا ہے۔

   علاقے میں تمام دفاتر بند کر دیے گئے ہیں، ٹرانسپورٹ کا نظام عارضی طور پر معطل کر دیا گیا ہے اور کسی قسم کی کوئی کاروباری سرگرمی جاری رکھنے کی اجازت نہیں ہے۔

   بنگلہ دیش کی سرحد سے متصل اس ریاست کی کل آبادی 90 ملین ہے۔ آج سے لاگو ہونے والے نئی پابندیاں ایک ہفتے تک برقرار رکھی جائیں گی۔

   مغربی بنگال 24،823 متاثرین کے ساتھ انڈیا کی سب سے متاثرہ ریاست بن چکی ہے۔ صرف منگل کو ہی اس ریاست میں 800 سے زائد متاثرین کی تصدیق ہوئی ہے۔

2. 9 جولائی 2020وزیر تعلیم شفقت محمود: ایس او پیز کے ساتھ تعلیمی اداروں کو کھولنے اور امتحانات لینے کی اجازت ہوگی

   وفاقی وزیر تعلیم شفقت محمود نے کہا ہے کہ پاکستان میں ایس او پیز کے ساتھ 15 ستمبر سے تعلیمی ادارے کھولنے کا فیصلہ ہوا ہے اور اس فیصلے پر ساتھ ساتھ نظرثانی کی جاتی رہے گی۔

   وزیر تعلیم کا کہنا تھا کہ عید کے بعد دور دراز کے علاقوں کے طلبا کو ہاسٹل میں آنے کی اجازت مل جائے گی تاہم ان طلبا کی تعداد 30 فیصد سے زیادہ نہیں ہو گی۔

   شفقت محمود نے بتایا کہ تمام تعلیمی ادارے عید کے بعد اپنے اساتذہ اور ضروری عملے کو بلا سکتے ہیں تاکہ وہ کلاسز کے لیے تیاری کر سکیں اور ایس او پیز پر آگاہی دے سکیں۔

   ان کے مطابق اگر ایس او پیز پر عمل نہ کیا گیا تو وہ ادارہ بند کر دیا جائے گا اور فیڈرل پبلک کمیشن اور پبلک سروس کمیشن کے امتحانات کی بھی ایس او پیز کے ساتھ اجازت دی جا رہی ہے۔

3. 9 جولائی 2020وزیر اعظم عمران خان: عوام سے اپیل کرتا ہوں کہ عیدالاضحیٰ سادگی سے منائیں

   وزیر اعظم عمران خان نے اسلام آباد میں آئسولیشن اور وبائی امراض سے متعلق ایک نئے ہسپتال کی افتتاحی تقریب سے خطاب کرتے ہوئے عوام سے اپیل کی ہے کہ وہ احتیاطی تدابیر اختیار کرتے ہوئے عیدالاضحیٰ پر ایس او پیز پر عمل درآمد کو یقینی بنائیں۔

   انھوں نے کہا کہ سب نے اس وائرس کے پھیلاؤ کو روکنے میں تعاون کیا ہے اور اب ہم دنیا کے ان ممالک میں ہیں جہاں متاثرین کی تعداد کم ہو رہی ہے۔

   وزیر اعظم نے کہا کہ خدا کا کرم ہے کہ پاکستان میں اس وبا سے بہت کم اموات ہوئی ہیں۔

   ان کا کہنا تھا کہ میں آج سب کو کہنا چاہتا ہوں کہ ”اگر ہم نے اس عید پر بداحتیاطی کی تو پھر خطرہ یہ ہے کہ ایک دم یہ وائرس پھیل جائے گا۔ پھر متاثرین کی تعداد بڑھ جائے گی، جس سے ہسپتالوں پر دباؤ پڑے گا۔ اس لیے میں اپیل کرتا ہوں کہ بڑی عید سادگی سے منائیں۔‘‘

   وزیر اعظم عمران خان نے کہا کہ یہ پورے ملک کے لیے اور معیشت کے لیے ضروری ہے۔ ”ہمارے بوڑھے اور بیمار لوگوں کے لیے جن کی جان خطرے میں آجاتی ہے ان کے لیے میں آپ سے اپیل کرتا ہوں کہ یہ عید سادگی سے منائیں۔‘‘

4. 9 جولائی 2020کورونا وائرس: بی بی سی اردو کی لائیو کوریج جاری ہے

   کورونا وائرس کے حوالے سے بی بی سی اردو کی لائیو کوریج میں خوش آمدید۔

   یہاں آپ کو کورونا وائرس کے حوالے سے پاکستان سمیت دنیا بھر سے آنے والی اہم ترین خبریں، تازہ ترین تجزیے اور مصدقہ معلومات سے باخبر رکھا جائے گا۔

   گذشتہ چند دنوں میں دنیا میں کیا ہوا؟ جاننے کے لیے کلک کیجیے۔

5. 24 اپريل 2020کورونا ٹیلی تھون: وزیر اعظم کی احساس ٹرانسمیشن میں مولانا طارق جمیل اور جاوید میانداد کے بیانات پر سوشل میڈیا پر بحث