ህንዲ፡ ዝናብ ብዘስዓቦ ዕልቕልቕ ልዕሊ 100 ሰባት ሞይቶም

ኣብ ህንዲ፡ ዞባታት ኡታር ፕራድሰን ቢሃርን፡ ብርቱዕ ዝናብ ብዘስዓቦ ዕልቕልቕ ልዕሊ 100 ሰበት ከምዝሞቱ ሰብ መዚ እታ ሃገር ሓቢሮም።

ኣብ ክልቲኤን ዞባታት፡ ኣገልግሎት ባቡር፡ ካልእ መጓዝያ፡ ኣገልግሎት ጥዕና፡ ትምህርትን ቀረብ ኤሌክትሪክን ተሰናኺሉ ከምዝሎ'ውን ገሊጾም።

ሓለፍቲ ዞባ ኡታር ፕራዲሽ፡ ኣብቲ ዞባ፡ ካብ ሓሙስ ክሳብ ሎሚ 93 ሰባት ሞይቶም ከምዘለዉ ሓቢሮም።

ኣብ ዞባ ቢሃር እውን፡ ቁጽሪ ምውታት 29 ከም ዝበጽሐ ሰብ መዚ ምክልኻል ሓደጋታት እታ ዞባ ሓቢሮም።

ኣብ ርእሰ ከተማ ዞባ ቢሃር ዝኾነት ከተማ ፓንታ፡ እቲ ዕልቅልቕ ብርቱዕ ዕንወት ከምዘውረደ እውን ተፈሊጡ።

ሰብ መዚ እዘን ዞባታት፡ ሓይሊ ኣየር ሄሊኮፕተራት ክሰደሎምን መንግስቲ ድማ መጨንጉዒ ማይ ዝኾና ሞተራት ክቕርበሎምን ሓቲቶም ኣለዉ።