መንግስቲ ፌደራል ኣብ ክልል ትግራይ መሰጋገሪ መንግስቲ ከቕውም ምዃኑ ኣፍሊጡ

መንግስቲ ፌዴራል፡ ኣብ ክልል ትግራይ፡ ቀልጢፉ ናብ መረፃ ዘሰጋገር፡ ግዝያዊ ክልላዊ መንግስቲ ከቝም ይንቀሳቐስ ከምዘሎ፡ ኣብርሃም በላይ (ዶክተር) ገሊፁ።

ኣብ ቀረባ እዋን ኮሚሽነር ኮሚሽን ማእከል ኑክሌር ኰይኑ ዝተሾም ኣብርሃም፡ ትማሊ ምስ መንግስታዊ ቴሌቪዥን [ኢቢሲ] ኣብ እዋናዊ ኩነታት ኣመልኪቱ ኣብ ዝገበሮ ቃለ መሐትት እዩ ከምኡ ኢሉ።

ሓይልታት ህወሓት 23 መስከረም ንመዕርፎ ነፈርቲ ኣሉላ ኣሉላ ኣባነጋ ምስ ተቘፃፀሩ፡ ኣብ ሰለስተ ግንባራት ክካየድ ዝቐነየ ወተሃደራዊ ውግእ ስዒቡ፡ ሓይልታት ፈዴራል ብደቡባዊ ሸነኻት ብምድፋእ፡ ንከተማ መቐለ ምቍፅፃሮም ምንጭታት ይገልፁ።

ነቲ ብጀነራል ታደሰ ወረደ ዝምራሕ ግዝያዊ ምምሕዳር ብምፍራስ፡ ንዝሓለፈ መንፈቕ ዓመት ኣብ ስልጣን ዝፀንሐ ብህወሓት ዝምራሕ ክልላዊ ምንግስቲ፡ ኣብ ከተማ መቐለ ጉድኣት ከይበፅሕ ብምሕላይ፡ ካብታ ከተማ ርሒቝ 'ዕጥቃዊ ቃልሱ' ክቕፅል ምዃኑ ኣፍሊጡ ኣሎ።

ነዚ ምዕባለታት ስዒቡ እዩ፡ መንግስቲ ፌደራል፡ "ኣብ ክልል ትግራይ ቅልጡፍ ሰላምን ምርግጋእን ንምምፃእ ህዝቢ ባዕሉ ዘመሓድረሉ ሓዱሽ መሓውር የዳሉ" ከምዘሎ ኣብርሃም በላይ ገሊፁ ዘሎ።

ብተወሳኺ፡ ዶክተር ኣብርሃም ኣብቲ ቃለ መሕትቱ፡ ኣብዚ ሕዚ እዋን ሓይልታት ምክልኻል ነቲ ክልል ካብ 'ተረፍ መረፍ' ሓይልታት ህወሓት ንምፅራይ ይንቀሳቐስ ከምዘሎ'ውን ኣመልኪቱ።

ቀፂሉ'ውን፡ ካብ ቀበሌ ጀሚሩ ብተሳትፎ ህዝቢ ሓደሽቲ ምምሕዳራዊ መሓውራት ክቘሙ ምዃኖም ገሊፁ።

ዶክተር ኣብርሃም በላይ፡ እዚ ናይ ምስግጋር መስርሕ ኣብ ሓጺር ግዜ ተዛዚሙ፡ ኣብ ውሽጢ ኣዋርሕ ክልላዊ መረጻ ንምክያድ ሰፊሕ ምድላዋት ይግበር ከምዘሎ'ውን ተዛሪቡ ኣሎ።

ኣብ መወዳእታ 2012 ዓ.ም [ግ] ኣብቲ ክልል ዝተኻየደን ደማዊ ኲናት ትግራይ ዘስዐበን ኣካታዓይ መረፃ ስዒቡ፡ ኣብታ ክልል መረፃ ተኸዓይዱ ኣይፈልጥን።

ካብ ሽዑ ጀሚሩ ድማ፡ እታ ክልል ብግዝያዊ ምምሕዳራት ክትመሓደር ዝፀንሐት ኰይና፡ ኣብ ኣብያተ ምኽሪ ሃገራዊ ባይቶታት በዂራ ፀኒሐ ኣላ።

ብጌታቸው ረዳን ጀነራል ታደሰ ወረዳን ዝምርሑ መሰጋገሪ መንግስታት፡ ከምቲ ቃል ዝኣተውዎ ነቲ ክልል ናብ መረፃ ዘሰጋግር ባይታ ከንፅፉ ኣይከኣሉን ተባሂሎም ይንቀፉ።

እቲ ዞባዊ መልክዕ እናሓዘ ዝመፅዝ ዘሎን ህወሓት፣ ፋኖ-ኣምሓራን ሰራዊት ሓርነት ኦሮሞን [ኦላ] ኣባል ዝዀነሉ ማሕበር-ሸውዓት ኪዳን፡ ቃልሲ ክቕፅል ድዩ ኣይክቕፅልን ኣይተፈልጠን።

ከምኡ ድማ ደድሕሪ እዚ ኪዳን፡ ምንግስታት ኤርትራ፣ ግብፅን ሱዳንን ከምዘለዋ መንግስቲ ፌዴራል ዝኸስስ ዘሎ ኰይኑ፡ እተን ሃገራት ነዚ ክሲ ኣይቕበለኦን።

ኣብርሃም ኣብቲ ቃለ መሐረትቱ፡ እዚ ብዝምልከት፡ ኣብ ዘህቦ ርእይቶ፡ ገሊኦም ሓይልታት ወፃኢ ብቐጥታ ኣብቲ ግጭት ምስታፎም ከሲሱ ኣሎ።

"ኣብዚ ናይ ሕዚ ውግእ፡ ኣባላት ሰራዊት ኤርትራ ምስ ዕጥቆም ተሳቲፎም ኣለዉ፤ ብዙሓት ዝተማረኹ ድማ ኣለዉ"፡ ኢሉ።

እዚ ክሲ፡ ቅድም ክብል ቢቢሲ ትግርኛ ካብ ዘዘራረቦ ላዕለዋይ ወተሃደራዊ መራሒ ሓይልታት ሰላም'ውን ዝተሰምዐ ዀይኑ፡ ሚኒሰተር ዜና ኤርትራ ነዚ ክሲ ዝነፅግ ምላሽ ከምዝሃበና ይዝከር።