ఒడిశా: కాల్పులకు గురైన ఆరోగ్య శాఖ మంత్రి నవ్ కిశోర్ దాస్ ఆస్పత్రిలో చికిత్స పొందుతూ మృతి

దాడి జరిగిన వెంటనే నవ్ కిశోర్ దాస్‌ను హుటాహుటిన విమానంలో భువనేశ్వర్‌కు తరలించి ఒక ప్రైవేట్ హాస్పిటల్లో చేర్పించారు. ఆస్పత్రిలో వైద్యులు ఆయన ప్రాణాలు కాపాడేందుకు చేసిన ప్రయత్నాలేవీ ఫలించలేదు.

లైవ్ కవరేజీ

  1. ఎల్‌జీబీటీక్యూ యాప్‌ పరిచయాలతో బంగారం దోపిడీ.. దొంగలెలా దొరికారంటే?

  2. 81 బిలియన్ డాలర్లు సమీకరించిన ఆంథ్రోపిక్

    ఆంత్రోపిక్
    ఫొటో క్యాప్షన్, ఆంత్రోపిక్ షేర్లకు పది రెట్లు డిమాండ్ ఉంది.

    ఏఐ చాట్‌బాట్ క్లాడ్ వెనుక ఉన్న సంస్థ ఆంథ్రోపిక్ స్టాక్ మార్కెట్ అరంగేట్రంలో రికార్డు స్థాయిలో $81 బిలియన్లు (సుమారు రూ. 7.5 లక్షల కోట్లు) సమీకరించింది.

    ఇది ఈ సంస్థను ప్రపంచంలోని అత్యంత విలువైన కంపెనీలలో ఒకటిగా నిలబెట్టనుంది.

    నష్టాల్లో ఉన్న ఈ వ్యాపారంలో షేర్లను కొనుగోలు చేయడానికి ఇన్వెస్టర్ల నుండి భారీగా ఆసక్తి పెరగడంతో, మొదట అనుకున్న కంటే ఎక్కువ షేర్లు అమ్ముడయ్యాయి.

    ఆంథ్రోపిక్ షేర్ ధరను మొదట ప్రతిపాదించిన $70-$78 శ్రేణి కంటే ఎక్కువగా, $83 వద్ద నిర్ణయించారు.

  3. జీటీఏ 6 విడుదల.. ప్రపంచవ్యాప్తంగా ఎందుకింత క్రేజ్?

  4. వెల్లింగ్టన్ టెస్టు: తొలి రోజు 5 వికెట్ల నష్టానికి 243 పరుగులు చేసిన న్యూజీలాండ్

    న్యూజీలాండ్, క్రికెట్, భారత్
    ఫొటో క్యాప్షన్, తొలి టెస్ట్ తొలిరోజు న్యూజీలాండ్ ఐదు వికెట్ల నష్టానికి 243 పరుగులు చేసింది.

    భారత్, న్యూజీలాండ్ తొలి టెస్టు మొదటిరోజు కివీస్ జట్టు ఐదు వికెట్ల నష్టానికి 243 పరుగులు చేసింది.

    ఎదురుదెబ్బల నుంచి కోలుకున్న న్యూజీలాండ్ తొలిరోజు ఆట ముగిసేనాటికి హెన్రీ నికోల్స్ 113 పరుగులతో, గ్లెన్ ఫిలిప్స్ 94 పరుగులతో క్రీజ్‌లో ఉన్నారు.

    వారిద్దరూ ఆరో వికెట్‌కు 173 పరుగుల భాగస్వామ్యం నెలకొల్పారు.

    నికోల్స్ తన టెస్ట్ కెరీర్‌లో 12వ సెంచరీని పూర్తి చేయగా, ఫిలిప్స్ సెంచరీకి ఆరు పరుగుల దూరంలో ఉన్నాడు.

    టాస్ గెలిచిన భారత్ బౌలింగ్ ఎంచుకుంది. జస్ప్రీత్ బుమ్రా తొలి ఓవర్‌లోనే న్యూజీలాండ్ కెప్టెన్ టామ్ లాథమ్‌ను ఔట్ చేశాడు.

    భారత ఫాస్ట్ బౌలర్లు న్యూజీలాండ్‌ను 70 పరుగులకే ఐదు వికెట్లు కోల్పోయేలా చేశారు. ఆ తర్వాత నికోల్స్, ఫిలిప్స్ తొలి రోజు ఆట ముగిసే వరకు మరో వికెట్ నష్టపోకుండా జాగ్రత్తగా ఆడారు.

    భారత్ తరఫున బుమ్రా 17 ఓవర్లలో 52 పరుగులిచ్చి మూడు వికెట్లు పడగొట్టాడు. ఆకాశ్ దీప్, అన్షుల్ కంబోజ్‌లు చెరో వికెట్ తీసుకున్నారు.

  5. నర్సాపురం, పూరీ మధ్య గోపాల్‌పూర్ సమీపంలో రేపు తీరం దాటనున్న తీవ్ర తుపాను అక్వాన్

    తుపాను, ఆంధ్రప్రదేశ్, ఒడిశా
    ఫొటో క్యాప్షన్, అక్వాన్

    పశ్చిమ మధ్య బంగాళాఖాతంలో కొనసాగుతున్న తీవ్ర తుపాను 'అక్వాన్' వేగంపెంచింది.

    గత ఆరు గంటల్లో గంటకు 15 కిలోమీటర్ల వేగంతో ఉత్తర దిశగా కదులుతోంది.

    ప్రస్తుతం ఇది నర్సాపురంకు 420 కిలోమీటర్లు, కళింగపట్నానికి ఆగ్నేయంగా 400 కిలోమీటర్లు, చెన్నైకి ఈశాన్యంగా 580 కిలోమీటర్లు, ఒడిశాలోని గోపాల్‌పూర్‌కు 490 కిలోమీటర్లు, పూరీకి 550 కిలోమీటర్ల దూరంలో కేంద్రీకృతమై ఉంది.

    ఈ తుపాను ఉత్తర-వాయువ్య దిశగా కదిలే అవకాశం ఉంది. రేపు మధ్యాహ్నానికి నర్సాపురం, పూరీ మధ్య గోపాల్‌పూర్ సమీపంలో తీరం దాటే అవకాశం ఉంది.

    తీరం దాటే సమయంలో గరిష్ఠంగా గంటకు 90 నుంచి 100 కిలోమీటర్ల వేగంతో గాలులు వీస్తాయి. గాలుల వేగం అప్పుడప్పుడు గంటకు 110 కిలోమీటర్ల వరకు చేరవచ్చు.

    శ్రీకాకుళం, విజయనగరం, మన్యం జిల్లాల్లో అక్కడక్కడ భారీ వర్షాలు పడతాయని ఆంధ్రప్రదేశ్ విపత్తుల నిర్వహణ సంస్థ పేర్కొంది. ఇవాళ ఉత్తరాంధ్ర జిల్లాల్లో కొన్నిప్రాంతాల్లో మోస్తరు వర్షాలు కురుస్తున్నాయని వెల్లడించింది.

    ఉత్తరాంధ్ర జిల్లాల ప్రజలు అప్రమత్తంగా ఉండాలని, మత్స్యకారులు వేటకు వెళ్లకూడదని ఏపీఎస్డీఎంఏ ఎండీ, ఆర్టీజీఎస్ సీఈవో ప్రఖర్ జైన్ సూచించారు.

  6. గుంతల రోడ్లు, భూ రికార్డుల చిక్కులకు ఏఐతో పరిష్కారాలు చూపుతున్న భారత స్టార్టప్‌లు

  7. మీ శ్వాసలో పండ్ల వాసన వస్తోందా? - డయాబెటిస్ గురించి ఈ 6 లక్షణాలు తెలుసుకోండి

  8. వైవాహిక అత్యాచారం నేరమో కాదో తేల్చనున్న సుప్రీం కోర్టు

  9. వందే భారత్ స్లీపర్ రైళ్లు : ఎలాంటి సౌకర్యాలు ఉన్నాయి, వేగం ఎంత?

  10. చైనా చేరుకున్న ట్రంప్, ఘనస్వాగతం పలికిన షీ జిన్‌పింగ్

    చైనా, అమెరికా
    ఫొటో క్యాప్షన్, అమెరికా అధ్యక్షుడు ట్రంప్‌కు స్వాగతం పలికేందుకు చైనా అధ్యక్షుడు షీ జిన్‌పింగ్ స్వయంగా షెన్‌జెన్ బావాన్ అంతర్జాతీయ విమానాశ్రయానికి చేరుకున్నారు.

    చైనా అధ్యక్షుడు షీ జిన్‌పింగ్ విమానాశ్రయానికి వెళ్లి ట్రంప్‌కు స్వాగతం పలకడం కేవలం మర్యాదపూర్వక కార్యక్రమమే కాదు. దీని వెనుక ఎంతో ఆలోచించి రూపొందించిన దౌత్య వ్యూహం ఉంది.

    ఇలాంటి స్వాగతానికి ఉన్న ప్రాధాన్యాన్ని షీ జిన్‌పింగ్ అర్థం చేసుకున్నారు.

    షీ జిన్‌పింగ్ అధ్యక్షుడైన తర్వాత తొలిసారి స్వయంగా విమానాశ్రయానికి వెళ్లి ఒక విదేశీ అధ్యక్షుడికి స్వాగతం పలికినట్లు భావిస్తున్నారు.

    అమెరికా అధ్యక్షుడు ట్రంప్ గతంలో చేసిన పనినే షీ జిన్‌పింగ్ ఇప్పుడు చేస్తున్నారు.

    ఈ ఏడాది అమెరికాలో షీ జిన్‌పింగ్‌కు స్వాగతం పలికేందుకు ట్రంప్ స్వయంగా వాషింగ్టన్ విమానాశ్రయానికి వెళ్లారు. ఇప్పుడు చైనా అధ్యక్షుడు కూడా ట్రంప్‌కు స్వాగతం పలకడానికి విమానాశ్రయానికి వెళ్లారు.

    అయితే వ్యక్తిగత గౌరవం, మర్యాద, హోదాకు ట్రంప్ ఎంతో ప్రాధాన్యం ఇస్తారని షీ జిన్‌పింగ్‌కు తెలుసు.

    ఈ బాధ్యతను మరొకరికి అప్పగించకుండా స్వయంగా స్వాగతం పలకడం ద్వారా ట్రంప్‌కు ప్రత్యేక గౌరవం ఇచ్చారు జిన్ పింగ్. ఆయన స్వయంగా వెళ్లి స్వాగతించడం ద్వారా ట్రంప్ తనకు ఎంతో ముఖ్యమైన వ్యక్తి అని తెలియజేస్తున్నారు.

    వాణిజ్యం, తైవాన్, సాంకేతికత వంటి అంశాలపై జరగనున్న చర్చలు ఈ సానుకూల సంకేతంతో సులభతరం అవుతాయని షీ జిన్‌పింగ్ ఆశించవచ్చు.

    తన ప్రతిష్ఠకు ఎలాంటి నష్టం కలగకుండా జిన్ పింగ్ ఈ పని చేయగలరు. ఎందుకంటే ట్రంప్, షీ జిన్‌పింగ్, పుతిన్ మధ్య జరగనున్న ఈ అసాధారణ శిఖరాగ్ర సమావేశానికి సంబంధించిన మొత్తం ప్రణాళిక, ఏర్పాట్లు ఇప్పటికే చైనా నియంత్రణలో ఉన్నాయి.

    ట్రంప్, షీ జిన్‌పింగ్
    ఫొటో క్యాప్షన్, విమానం దిగిన డోనల్డ్ ట్రంప్‌ను ఆలింగనం చేసుకుంటున్న చైనా అధ్యక్షుడు షీ జిన్‌పింగ్.
    సమావేశం
    ఫొటో క్యాప్షన్, అమెరికా అధ్యక్షుడి ఎయిర్ ఫోర్స్1 విమానం చైనాలోని షెన్‌జెన్ బావాన్ అంతర్జాతీయ విమానాశ్రయంలో దిగింది.
    గౌరవ వందనం
    ఫొటో క్యాప్షన్, రన్‌వేపై రెడ్ కార్పెట్‌తో ట్రంప్‌కు స్వాగతం పలికారు చైనా అధ్యక్షుడు షీ జిన్‌పింగ్.
    ట్రంప్, అమెరికా, చైనా
    ఫొటో క్యాప్షన్, స్వాగతం పలికేందుకు వచ్చిన కళాకారులను చప్పట్లతో అభినందిస్తున్న ట్రంప్.
    షెన్‌జెన్‌
    ఫొటో క్యాప్షన్, చైనాలోని షెన్‌జెన్‌లో ట్రంప్‌ను చూసేందుకు వచ్చిన స్థానికులు.
  11. అనంత్‌ సింగ్: తన కుమార్తె పెళ్లికి 4 లక్షలమంది హాజరవుతారని ప్రకటించిన ఎమ్మెల్యేకు ఎంత ఆస్తి ఉంది?

  12. అత్యవసరమైతే తప్ప బయటకు రావద్దు: తీరప్రాంత ప్రజలకు అధికారుల సూచన

    తుపాను
    ఫొటో క్యాప్షన్, అక్వాన్ పశ్చిమ మధ్య బంగాళాఖాతంలో నెమ్మదిగా కదులుతోంది.

    పశ్చిమ మధ్య బంగాళాఖాతంలో తీవ్ర తుపానుగా బలపడిన అక్వాన్ నెమ్మదిగా కదులుతోందని ఆంధ్రప్రదేశ్ ఆర్టీజీఎస్, ఏపీ విపత్తుల నిర్వహణ సంస్థ తెలిపింది.

    గడిచిన 6 గంటల్లో గంటకు 3 కిలోమీటర్ల వేగంతో తుపాను కదులుతోందని వెల్లడించింది. ప్రస్తుతానికి ఇది చెన్నైకి 580 కిలోమీటర్లు, మచిలీపట్నానికి 610 కిలోమీటర్లు, విశాఖపట్నానికి 610 కిలోమీటర్లు, ఒడిశాలోని గోపాల్‌పూర్‌కు 730 కిలోమీటర్ల దూరంలో కేంద్రీకృతమై ఉన్నట్టు పేర్కొంది.

    ఎల్లుండి మధ్యాహ్నానికి నెల్లూరు- విశాఖ మధ్య తీవ్ర తుపాన్‌గా తీరం దాటే అవకాశం ఉందని కూడా ప్రకటించింది. తీరం దాటే సమయంలో గంటకు 100-110 కిలోమీటర్లు, గరిష్ఠంగా 120 వేగంతో ఈదురుగాలులు వీస్తాయని వాతావరణ శాఖాధికారులు అంచనా వేస్తున్నారు.

    తుపాన్ గమనంపై ఎప్పటికప్పుడూ జిల్లా యంత్రాంగానికి ఆర్టీజిఎస్ - విపత్తుల నిర్వహణ సంస్థ తగిన సూచనలు చేస్తోందని తెలిపారు. అత్యవసర సహాయక చర్యల కోసం 13 ఎన్డీఆర్ఎఫ్, 11 ఎస్డీఆర్ఎఫ్, స్థానిక అగ్నిమాపక బృందాలు సిద్ధంగా ఉంచినట్టు ఏపీ రాష్ట్ర విపత్తుల నిర్వహణ సంస్థ ఎండీ, ఆర్టీజీఎస్ సీఈవో ప్రఖర్ జైన్ చెప్పారు.

    తుపాను ప్రభావంతో కోస్తా జిల్లాల్లో రేపు, ఎల్లుండి కొన్నిచోట్ల అత్యంత భారీ వర్షాలు కురుస్తాయని, ఇతర ప్రాంతాల్లో అక్కడక్కడ భారీ నుంచి అతిభారీ వర్షాలు కురిసే అవకాశం ఉందన్నారు. తీర ప్రాంత ప్రజలు అత్యవసరమైతే తప్ప బయటకు రావొద్దని విజ్ఞప్తి చేశారు. రైతులు వ్యవసాయ పనుల్లో ముందస్తు జాగ్రత్తలు తీసుకోవాలని ప్రఖర్ జైన్ సూచించారు.

  13. మీ దంతాలపై కాఫీ, టీ, బిర్యానీ మరకలు పడుతున్నాయా, వాటిని నివారించే మార్గాలు ఏమిటి..

  14. ఇండోపసిఫిక్ ప్రాంతంలో సముద్ర గస్తీ పెంపుపై ‘క్వాడ్’ కొత్త కార్యక్రమం

    నరేంద్రమోదీ, డోనల్డ్ ట్రంప్
    ఫొటో క్యాప్షన్, ఉగ్రవాదం, హింసాత్మక తీవ్రవాదాన్ని క్వాడ్ దేశాలు తీవ్రంగా ఖండించాయి.

    సీమాంతర ఉగ్రహవాదం సహా, ఉగ్రవాదం ఏరూపంలో ఉన్నా ఆమోదనీయం కాదని క్వాడ్ దేశాలు ఓ సంయుక్త ప్రకటనలో స్పష్టం చేశాయి.

    మనీలాలో క్వాడ్ నేతల శిఖరాగ్ర సమావేశం జరిగింది. ఈ సమావేశానికి భారత ప్రధానమంత్రి నరేంద్ర మోదీ, అమెరికా అధ్యక్షుడు డొనల్డ్ ట్రంప్, ఆస్ట్రేలియా ప్రధానమంత్రి ఆంథోనీ అల్బనీస్, జపాన్ ప్రధానమంత్రి టకైచి సానే హాజరయ్యారు.

    క్వాడ్ నేతల సంయుక్త పత్రికా ప్రకటనను భారత విదేశీ వ్యవహారాల మంత్రిత్వశాఖ విడుదల చేసింది.

    సీమాంతర ఉగ్రవాదం, తీవ్రవాదం సహా ఏరూపంలో ఉన్న ఉగ్రవాదమైనా ఆమోదనీయం కాదని నాలుగుదేశాల నేతలు తీవ్రంగా ఖండించారు.

    ఉగ్రవాదంపై పోరులో నాలుగు దేశాల మధ్య సహకారాన్ని మరింత పెంచుతామని ప్రకటించాయి.

    ప్రాంతీయ శాంతి, భద్రతలకు భంగం కలిగించే ఏకపక్ష చర్యలను వ్యతిరేకిస్తున్నట్లు తెలిపాయి. బలప్రయోగం లేదా ఒత్తిడి ద్వారా ప్రస్తుత పరిస్థితులను మార్చే ప్రయత్నాలను కూడా వ్యతిరేకించాయి.

    ఎగుమతులపై ఏకపక్షంగా ఆంక్షలు విధించడం వంటి ఆర్థిక ఒత్తిళ్లపైనా ఆందోళన వ్యక్తం చేశాయి.

    ఇండో-పసిఫిక్ ప్రాంతంలో సముద్ర నిఘా, సమాచార మార్పిడిని మెరుగుపరిచేందుకు 'ఇండో-పసిఫిక్ మారిటైమ్ సర్వైలెన్స్ కోలాబరేషన్' పేరుతో కొత్త కార్యక్రమాన్ని క్వాడ్ దేశాలు ప్రకటించాయి.

    క్వాడ్ దేశాలు
    ఫొటో క్యాప్షన్, స్వేచ్ఛాయుత, సురక్షిత సైబర్ స్పేస్ కోసం కలిసి పనిచేస్తాయని క్వాడ్ దేశాలు పేర్కొన్నాయి.

    2027 ప్రారంభంలో తొలిసారిగా 'క్వాడ్ బిజినెస్ లీడర్స్ ఫోరమ్' నిర్వహించనున్నట్లు క్వాడ్ దేశాలు ప్రకటించాయి.

    ఇండో-పసిఫిక్ ప్రాంతంలో నమ్మకమైన కృత్రిమ మేధ (ఏఐ) అందుబాటులోకి రావడం, దాని వినియోగాన్ని పెంచడం కోసం 'ఏఐ యాక్సిలరేటర్' ప్రాముఖ్యతను నాలుగు దేశాలు మరోసారి గుర్తుచేశాయి.

    స్వేచ్ఛాయుత, సురక్షిత సైబర్ స్పేస్ కోసం కలిసి పనిచేస్తామని ప్రకటనలో పేర్కొన్నాయి.

    సమాచార మార్పిడి కోసం సురక్షితమైన, నమ్మకమైన వ్యవస్థలను విస్తరించేందుకు చేపట్టిన భాగస్వామ్యంలో సాధించిన పురోగతిని క్వాడ్ దేశాలు స్వాగతించాయి.

    చివరగా ఆసియాన్ ఐక్యతకు, ఆ ప్రాంతంలో దాని కీలక పాత్రకు తమ మద్దతును నాలుగు దేశాలు మరోసారి ప్రకటించాయి.

  15. అక్వాన్ తుపాను: పలు జిల్లాల్లో రెడ్ అలర్ట్

  16. అక్వాన్ తుపాను ఎక్కడుంది... వరుసగా తుపాన్లు రావడానికి కారణమేంటి?

  17. ఐపీఎల్ 2027కు ముందు జట్లలో కీలక మార్పులు

    మహమ్మద్ షమీ
    ఫొటో క్యాప్షన్, రూ.8 కోట్లకు రాజస్థాన్ రాయల్స్ జట్టులో చేరుతున్న మహమ్మద్ షమీ

    ఇండియన్ ప్రీమియర్ లీగ్ (ఐపీఎల్) 2027కి ముందు... జట్ల మధ్య క్రీడాకారుల మార్పిడి కొనసాగుతోంది.

    ఫాస్ట్ బౌలర్లు మహమ్మద్ షమీ, ఎం సిద్ధార్థ్‌లను రాజస్థాన్ రాయల్స్‌ ట్రేడ్ చేయగా.. సామ్ కరన్ లఖ్‌నవూ సూపర్ జెయింట్స్‌లో చేరుతున్నాడు.

    షమీని అంతకుముందు లఖ్‌నవూ సూపర్ జెయింట్స్ రూ.10 కోట్లకు కొంది. ఇప్పుడు షమీ రూ.8 కోట్లకు రాజస్థాన్ రాయల్స్‌లో చేరుతున్నాడు.

    టూ-టైమ్ పర్పుల్ క్యాప్ విన్నర్ హర్షల్ పటేల్.. ప్రస్తుతం గుజరాత్ టైటాన్‌కు ఆడనున్నాడు.

    2025 ఐపీఎల్ వేలంలో హర్షల్ పటేల్‌ను రూ.8 కోట్లకు సన్‌రైజర్స్ హైదరాబాద్ కొనుగోలు చేసింది. ప్రస్తుతం రూ.4 కోట్లకు గుజరాత్ టైటాన్స్‌ తరఫున ఆడనున్నాడు.

    నవంబర్ 11న పంజాబ్ కింగ్స్, ముంబయి ఇండియన్స్ మధ్య కీలకమైన ట్రేడ్ జరిగింది. దీనిలో హార్దిక్ పాండ్యా పంజాబ్ కింగ్స్‌లో చేరగా, అర్ష్‌దీప్ సింగ్ ముంబయి ఇండియన్స్‌కు వెళ్లాడు.

  18. గుజరాత్ అల్లర్ల గ్యాంగ్ రేప్ కేసులో ఇద్దరు దోషులకు బెయిల్.. ‘గుండె పగిలింది’ అన్న బాధిత మహిళ

  19. ప్రధాని మోదీ గురించి ట్రంప్ ఏమన్నారు?

    క్వాడ్ నేతలు, మోదీ, ట్రంప్
    ఫొటో క్యాప్షన్, ప్రాంతీయ, ప్రపంచ అంశాలపై క్వాడ్ నేతలతో సమావేశమైన ట్రంప్

    ఫిలిప్పీన్స్‌లోని మనీలాలో అమెరికా అధ్యక్షుడు డోనల్డ్ ట్రంప్‌ను, జపాన్ ప్రధాని సనాయ్ తకాయిచిని, ఆస్ట్రేలియా ప్రధాని ఆంథోనీ ఆల్బనీస్‌ను భారత ప్రధానమంత్రి నరేంద్ర మోదీ కలిశారు.

    ప్రాంతీయ, ప్రపంచ అంశాలపై క్వాడ్ దేశాల నాయకులతో ట్రంప్ ఒక ఉన్నత స్థాయి సమావేశాన్ని నిర్వహించారు.

    ఈ సందర్భంగా మాట్లాడిన డోనల్డ్ ట్రంప్.. ‘‘ఆయన (పీఎం మోదీ) చాలా కఠినమైన వ్యక్తి. బహుశా ఆమె (జపాన్ ప్రధాని సనాయ్ తకాయిచి) ఆయన కంటే కూడా మరింత కఠినమైన వ్యక్తి కావచ్చు" అన్నారు.

    "రాబోయే 12 నెలలు ప్రజలను ఎంతగానో ఆశ్చర్యపరుస్తాయి. మేం దీని గురించి అంతర్గతంగా చర్చిస్తున్నాం. మేం చేస్తున్న పనులు నిజంగానే అద్భుతమైనవి" అని అన్నారు.

    ప్రధాని మోదీని ఉద్దేశించి మాట్లాడుతూ.. ‘‘ఆయన నా స్నేహితుడని నేను మీకు చెప్పాలనుకుంటున్నా. ఆయన గొప్ప నేత. ప్రపంచవ్యాప్తంగా ప్రతి ఒక్కరూ ఆయన్ను ఎంతో గౌరవిస్తారు’’ అని ట్రంప్ చెప్పారు.

  20. ‘ధోనికి వీడ్కోలు పలకడానికి మరో అవకాశం దొరికితే బాగుండు’

    మహేంద్ర సింగ్ ధోని
    ఫొటో క్యాప్షన్, ధోని చెన్నైకి ట్రోఫీల కంటే ఎక్కువే అందించారన్న ఎంకే స్టాలిన్ (ఫైల్ ఫొటో)

    ఐపీఎల్‌లో ఒక క్రీడాకారుడిగా ఇక మహేంద్ర సింగ్ ధోని ఆడరు.

    చెన్నై సూపర్ కింగ్స్ ఆయన్ను టీమ్ మెంటార్‌గా నియమించింది. ఈ ప్రకటన తర్వాత సోషల్ మీడియాలో చాలామంది ధోనికి అభినందనలు తెలిపారు.

    దీనిపై స్పందించిన తమిళనాడు మాజీ ముఖ్యమంత్రి ఎంకే స్టాలిన్.. ‘‘మహేంద్ర సింగ్ ధోనీ చెన్నైకి కేవలం ట్రోఫీలను మాత్రమే కాకుండా, తరతరాలను ఏకం చేసే ఒక అనుభూతిని, క్రికెట్‌కు అతీతమైన బంధాన్ని అందించారు’’ అని ఎక్స్‌లో ట్వీట్ చేశారు.

    ఏ మంచి విషయానికైనా ఒకానొక దశలో ముగింపు ఉంటుందని ఆయన అన్నారు.

    అయితే, తమిళనాడు ప్రజలందరికీ ఎంతో ఇష్టమైన ఈ క్రీడాకారుడికి, తగిన వీడ్కోలు పలికే అవకాశం మరొక్కసారి లభించి ఉంటే బాగుండేదని ఆయన ఆకాంక్షించారు.

    ఇదే సమయంలో, ధోనీకి, చెన్నై సూపర్ కింగ్స్‌కు మధ్య ఉన్న అనుబంధాన్ని ఒక శకం ముగింపుగా క్రికెట్ వ్యాఖ్యాత హర్షభోగ్లే అభివర్ణించారు.

    ధోనీ, చెన్నై సూపర్ కింగ్స్ ‘మేడ్ ఫర్ ఈచ్ అదర్’ అని పేర్కొన్నారు. ఐపీఎల్ ఏటా మరింత బలోపేతం అవుతున్నప్పటికీ, ధోనీ నిష్క్రమణతో నేడు అది ఏదో వెలితిగా, బాధాకరంగా అనిపిస్తోందన్నారు.

    ధోని ఒక నాయకుడని, మ్యాచ్ ఫినిషర్‌ని, ఎంత ఒత్తిడిలో అయినా ప్రశాంతంగా ఉండే ఆటగాడని మాజీ క్రికెటర్ ఇర్ఫాన్ పఠాన్ అభివర్ణించారు.

    భారత క్రికెట్‌లో ధోని సృష్టించిన వారసత్వాన్ని అందుకోవడం కష్టమని చెప్పారు.

    ధోనీ అనుభవం, పరిజ్ఞానం రాబోయే తరాల క్రికెటర్లకు స్ఫూర్తినిస్తూనే ఉంటాయని ఇర్ఫాన్ పఠాన్ ఆశాభావం వ్యక్తం చేశారు.