ఇక్కడితో ఈ లైవ్ పేజీని ముగిస్తున్నాం.
గుడ్ నైట్
మరిన్ని ముఖ్యమైన వార్తలను వివరంగా చదవడానికి ఈ లింక్ను క్లిక్ చేయండి.
ప్రధాన ఎన్నికల కమిషనర్ జ్ఞానేశ్ కుమార్ ఒక రాజకీయ పార్టీకి లబ్ధి చేకూరుస్తున్నారని ఈ సందర్భంగా నేహా బోరా ఆరోపించారు.
ఇక్కడితో ఈ లైవ్ పేజీని ముగిస్తున్నాం.
గుడ్ నైట్
మరిన్ని ముఖ్యమైన వార్తలను వివరంగా చదవడానికి ఈ లింక్ను క్లిక్ చేయండి.

ఫొటో సోర్స్, INCIndia
ఇండియా కూటమి శనివారం దిల్లీలోని మల్లికార్జున ఖర్గే నివాసంలో నిర్వహించిన ఇండియా కూటమి మాక్ పార్లమెంట్లో ప్రధాన ఎన్నికల కమిషనర్ జ్ఞానేశ్ కుమార్పై ‘ప్రజా అభిశంసన’ తీర్మానం’ ప్రవేశపెట్టిన సందర్భంగా ఏఐఎస్ఏ అధ్యక్షురాలు నేహా బోరా ప్రసంగించారు.
ప్రధాన ఎన్నికల కమిషనర్ జ్ఞానేశ్ కుమార్ ఒక రాజకీయ పార్టీకి లబ్ధి చేకూరుస్తున్నారని ఈ సందర్భంగా నేహా బోరా ఆరోపించారు.
‘‘ఎన్నికల సంఘాన్ని స్వతంత్రంగా ఉంచడానికి, ప్రజాస్వామ్య పవిత్రతను కాపాడటానికి సుప్రీం కోర్టు ఒక ప్రక్రియను నిర్దేశించింది. కానీ, ఆ ప్రక్రియను ఉల్లంఘించి ప్రధాన ఎన్నికల కమిషనర్ను నియమించారు. ఇది ప్రజాస్వామ్య ఉల్లంఘన, ఓటు పవిత్రతకు భంగం కలిగించడమే’’ అని ఆమె అన్నారు.
ఫారం 6లో మార్పులు చేయడం ద్వారా యువత ఓటు హక్కును హరించడానికి ప్రయత్నం జరిగిందని నేహా ఆరోపించారు.
యువత దేశ రాజకీయాలను అర్థం చేసుకోవడమే కాకుండా, దేశ రాజకీయాలను నిర్ణయించడంలో కూడా పాత్ర పోషిస్తున్న తరుణంలో ఇది జరిగిందని ఆమె అన్నారు.
ఇది ప్రధాన ఎన్నికల కమిషనర్ జ్ఞానేశ్ కుమార్ పన్నిన కుట్ర అని నేహా బోరా ఆరోపించారు.
కాంగ్రెస్ అధ్యక్షుడు మల్లికార్జున్ ఖర్గే నివాసంలో జరిగిన 'మాక్ పార్లమెంట్'లో ప్రధాన ఎన్నికల కమిషనర్ పదవి నుంచి జ్ఞానేశ్ కుమార్ను తొలగించాలన్న ప్రతిపాదనను ఏకగ్రీవంగా ఆమోదించారు.

ఫొటో సోర్స్, ANI
సమాజ్వాదీ పార్టీ నాయకుడు ఆజమ్ ఖాన్ శనివారం రాంపూర్ జైలు నుంచి విడుదలయ్యారు. ఆయన జైలు నుంచి బయటకు రాగానే ఎన్ఫోర్స్మెంట్ డైరెక్టరేట్ (ఈడీ) బృందం మరో కేసులో అరెస్టు చేసింది.
అయితే, ఆజమ్ ఖాన్ కుమారుడు అబ్దుల్లా ఆజం విడుదలయ్యారని బీబీసీ అసోసియేట్ జర్నలిస్ట్ ముజాసిమ్ ఖాన్ తెలిపారు.
ఈలోగా ఆజమ్ ఖాన్ విలేకరులతో మాట్లాడారు.
"ఇంకా చెప్పడానికి ఏముంది? నేనేం చెప్పగలను? చట్టానికి విలువ లేకుండా పోయింది. ముస్లిం అయినందుకేనా ఈ శిక్ష? ఒక ముస్లిం విశ్వవిద్యాలయాన్ని నిర్మించడమే మేం చేసిన తప్పు. అదే మా నేరం. మేం పిల్లల కోసం పాఠశాలలు నిర్మించాం. ఇదేనా మా నేరం?" అని ఆయన అన్నారు.
2026 అక్టోబర్ 14న, మొహమ్మద్ అలీ జౌహర్ విశ్వవిద్యాలయం నిర్మాణంలో ఆర్థిక అవకతవకలు, ప్రభుత్వ నిధుల దుర్వినియోగం, మనీలాండరింగ్ ఆరోపణలపై ఆజమ్ఖాన్ను ఒక కేసులో ఎన్ఫోర్స్మెంట్ డైరెక్టరేట్ నిందితుడిగా పేర్కొంది. ఈ కేసుకు సంబంధించి ఆయనను శనివారం అరెస్టు చేశారు.

ఫొటో సోర్స్, UGC
రాప్తాడులోని జడ్పీ హైస్కూల్లో తరగతి గదిలో పాఠాలు జరుగుతుండగా ఓ వ్యక్తి ఎలక్ట్రిక్ రంపంతో ప్రవేశించి ఓ బాలికపై దాడి చేశాడు. నిందితుడి కోసం గాలిస్తున్నట్టు అనంతపురం ఎస్పీ జగదీశ్ బీబీసీకి చెప్పారు. ఈ ఘటనపై ముఖ్యమంత్రి నారా చంద్రబాబు దిగ్భ్రాంతి వ్యక్తం చేశారు. ఇక్కడ క్లిక్ చేసి పూర్తి కథనం చదవండి

ఫొటో సోర్స్, Youtube/Congress
ఇండియా కూటమితో పాటు ఇతర ప్రతిపక్షాలు కూడా ఎస్ఐఆర్ ప్రక్రియలో అవకతవకలు జరిగాయని ప్రధాన ఎన్నికల కమిషనర్ జ్ఞానేశ్ కుమార్పై ఆరోపిస్తున్నాయి. ఈ ప్రక్రియ కారణంగా దాదాపు 13 కోట్ల మంది ఓటర్ల పేర్లు ఓటర్ల జాబితా నుంచి తొలగించారని ప్రతిపక్షాలు చెబుతున్నాయి. ఇది ప్రజల ప్రజాస్వామిక హక్కులపై నేరుగా జరిగిన దాడిగా ఆరోపిస్తున్నాయి. మరిన్ని వివరాలు ఇక్కడ క్లిక్ చేసి చదవండి

ఫొటో సోర్స్, Kevin Shoesmith/BBC
"వ్యక్తిగతంగా నేను మనుషుల్లోని అత్యుత్తమ లక్షణాలను చూశాను. అది నాకు ఎంతో స్ఫూర్తినిచ్చింది. మానవత్వంపై నా నమ్మకాన్ని మరింత బలపరిచింది. అపరిచితులు చూపిన దయ వల్లే నా ప్రయాణం సాధ్యమైంది. ప్రపంచం సహకారం లేకపోతే నేను ఈ ప్రయాణాన్ని పూర్తి చేయలేకపోయేవాడిని" 1998లోమొదలైన ఈ సాహసికుడి కాలినడక ఎలా సాగిందో ఇక్కడ క్లిక్ చేసి చదవండి

ఫొటో సోర్స్, Asif Ali
ఉత్తరాఖండ్లోని చమోలీ జిల్లా జోషిమఠ్ సమీపంలో జరిగిన హెలీకాప్టర్ ప్రమాదంలో మరణించిన ఆరుగురి మృతదేహాలను వెలికితీసి, జోషిమఠ్కు తరలించే సహాయక చర్యలు కొనసాగుతున్నాయి.
ప్రమాద స్థలం చాలా ఎత్తైన పర్వత ప్రాంతంలో ఉండటంతో, సహాయక బృందాలు కాలినడకన అక్కడికి చేరుకోవలసి వచ్చింది.
బద్రీనాథ్ నుంచి దెహ్రాదూన్లోని సహస్రధారకు తిరిగి వస్తున్న హెలీకాప్టర్ శుక్రవారం చమోలీ జిల్లాలో కూలిపోయింది.
ఈ ఘటనలో పైలట్ సహా విమానంలో ఉన్న ఆరుగురు మరణించారు.
‘‘రెస్క్యూ ఆపరేషన్లో భాగంగా అన్ని మృతదేహాలను వెలికితీశారు. శనివారం సాయంత్రంలోగా అన్ని మృతదేహాలను జోషిమఠ్కు తరలించేందుకు యంత్రాంగం ప్రయత్నిస్తోంది. అక్కడ మృతదేహాలను గుర్తించే ప్రక్రియ జరుగుతుంది" అని బీబీసీ న్యూస్కు చమోలీ జిల్లా మేజిస్ట్రేట్ గౌరవ్ కుమార్ తెలిపారు.
జిల్లా యంత్రాంగం వెల్లడించిన వివరాల ప్రకారం.. భారత సైన్యం, ఐటీబీపీ, ఎస్డీఆర్ఎఫ్, ఎన్డీఆర్ఎఫ్, పోలీసులు, అటవీ శాఖ, పరిపాలనా విభాగాల బృందాలు పాండుకేశ్వర్ నుంచి కాలినడకన కొండ మార్గం ద్వారా సంఘటనా స్థలానికి చేరుకుని. మృతదేహాలను బయటకు తీయడంలో నిమగ్నమయ్యాయి.
మృతదేహాలను, హెలికాప్టర్ శకలాలను సురక్షితంగా జోషిమఠ్కు తీసుకువచ్చేందుకు, సహాయక చర్యల కోసం చాయ్ గ్రామం చుట్టూ ప్రత్యామ్నాయ నడక మార్గాన్ని కూడా అన్వేషిస్తున్నట్లు డీఎం గౌరవ్ కుమార్ తెలిపారు.
అది 1472 వ సంవత్సరం. శీతాకాలంలో డిజోన్ నగరానికి కొత్తగా వచ్చిన జెహన్నే అనే మహిళ ఘోరమైన హింసను ఎదుర్కొన్నారు. ఆ సమయంలో ఆమె నిండు గర్భిణి. ఇది మధ్యయుగపు న్యాయవ్యవస్థ గురించి మనకున్న అంచనాలను మార్చేసే ఒక ఆశ్చర్యకరమైన సంఘటన. ఈ కథనాన్ని మరింత చదవడానికి క్లిక్ చేయండి

ఫొటో సోర్స్, Getty Images
బెంగళూరులోని ఒక ఫైవ్స్టార్ హోటల్ స్విమ్మింగ్ పూల్లో విద్యుదాఘాతానికి గురై ఇద్దరు విదేశీయులు మృతి చెందారు. వారిలో ఒకరు జర్మన్ కాగా, మరొకరు స్లోవేకియాకు చెందినవారు.
వారిద్దరినీ కాపాడే ప్రయత్నంలో ఒక అమెరికన్ పౌరుడు సహా ఇద్దరు వ్యక్తులు గాయపడ్డారు. వారిని ఆసుపత్రిలో చేర్చారు.
ఈ ఘటనలో మృతులను లుఫ్థాన్సాలో పనిచేసే 57 ఏళ్ల అలెగ్జాండర్ మాక్సిమిలియన్ థాయిస్, ఐబీఎంలో పనిచేసే 45 ఏళ్ల జురాజ్ హోర్వాట్గా గుర్తించినట్లు పోలీసులు వెల్లడించారు.
మృతుల్లో ఒకరి భార్య ఇచ్చిన ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు.
"విద్యుత్ తీగల నుంచి కరెంట్ స్విమ్మింగ్పూల్లోకి ప్రవహించడం వల్ల ఈ ప్రమాదం జరిగిందనేది ప్రాథమిక అనుమానం. అయితే, అన్ని వైద్య, సాంకేతిక నివేదికలు అందిన తర్వాతే అసలు ఏం జరిగిందో తెలుస్తుంది" అని బెంగళూరు పోలీస్ కమిషనర్ సీమంత్ కుమార్ సింగ్ విలేఖరులతో చెప్పారు.

ఫొటో సోర్స్, bhagwant mann/fb
పంజాబ్లో అధికారంలో ఉన్న ఆమ్ ఆద్మీ పార్టీ 2027లో జరగనున్న అసెంబ్లీ ఎన్నికల కోసం అభ్యర్థుల తొలి జాబితాను విడుదల చేసింది.
ఈ జాబితాలో ధూరి నుంచి భగవంత్ మాన్, కోట్కపురా నుంచి కుల్తార్ సింగ్ సంధ్వాన్, అజ్నాలా నుంచి కుల్దీప్ సింగ్ ధాలివాల్, అమృత్సర్ సౌత్ నుంచి డాక్టర్ ఇందర్బీర్ సింగ్ నిజ్జర్తో సహా మొత్తం 40 మంది అభ్యర్థుల పేర్లు ఉన్నాయి.
టిక్కెట్లు ఖరారు అయిన వారందరికీ పంజాబ్ ముఖ్యమంత్రి భగవంత్ సింగ్ మాన్ అభినందనలు తెలిపారు. కొత్త వారికి కూడా ఈ ఎన్నికల్లో అవకాశం కల్పిస్తామని అన్నారు.
నేను బీబీసీ ప్రతినిధి శారద మియాపురం, ఇప్పటినుంచి రాత్రి 10 గంటల వరకు ముఖ్యమైన వార్తలను మీకు అందిస్తాను.

ఫొటో సోర్స్, Getty Images
హాంకాంగ్ సిక్సెస్ టోర్నీలో భారత్పై పాక్ విజయం సాధించడంతో ప్రధాని షాబాజ్ షరీఫ్ అభినందనలు తెలిపారు. అయితే ఇది వరల్డ్ కప్ కాదంటూ సోషల్ మీడియాలో నెటిజన్లు, ప్రముఖ విమర్శిస్తున్నారు.
మరింత కథనాన్ని ఇక్కడ క్లిక్ చేసి చదవండి.

ఆంధ్రప్రదేశ్లో స్థానిక సంస్థల ఎన్నికల నేపథ్యంలో చెలరేగిన హింసాత్మక ఘటనలపై సోషల్ మీడియాలో విస్తృత చర్చ మొదలైంది. ''ఏపీని దక్షిణాది బిహార్గా మార్చేశారు'' అంటూ ట్రోలింగ్, విమర్శలు ఎక్కువగా కనిపిస్తున్నాయి. హింసాత్మక ఘటనల ఫోటోలు, వీడియోలు షేర్ చేస్తూ ఏపీ, బిహార్ మధ్య పోలికలు పెడుతూ కామెంట్లు పెడుతున్నారు.పూర్తి కథనం కోసం ఇక్క క్లిక్ చేయండి.

ఫొటో సోర్స్, Reuters
థాయ్లాండ్కు చెందిన 42 ఏళ్ల మానవ హక్కుల న్యాయవాది అర్ణోన్ నంపా.. ఆ దేశ రాజరిక వ్యవస్థను ప్రశ్నించినందుకు జైలు శిక్షలు ఎదుర్కొంటున్నారు. 2020లో బ్యాంకాక్లో హ్యారీ పోటర్ ఇతివృత్తంతో నిర్వహించిన నిరసనలో యువ మాంత్రికుడి వేషంలో పాల్గొన్న ఆయన.. రాజకుటుంబాన్నిప్రశ్నించడంతో పాటు జవాబుదారీతనం ఉండాలని డిమాండ్ చేశారు.
దీంతో రాజకుటుంబాన్ని అవమానించారనే ఆరోపణలపై థాయ్లాండ్లోని లెస్ మజెస్టే చట్టం (ఆర్టికల్ 112) కింద ఆయనపై 14 కేసులు నమోదయ్యాయి. తాజాగా ఓ కేసులో కోర్టు ఆయనకు రెండేళ్ల ఎనిమిది నెలల జైలు శిక్ష విధించింది. దీంతో ఇప్పటివరకు ఆయనకు పడిన మొత్తం శిక్ష 34 ఏళ్లు దాటింది. మరో రెండు కేసుల్లో తీర్పు వెలువడాల్సి ఉంది.
2020 నుంచి ఈ చట్టం కింద 294 మందిపై కేసులు నమోదయ్యాయి. వీరిలో 18 ఏళ్లలోపు వారు 20 మంది ఉన్నారు. ఈ చట్టం ప్రకారం గరిష్ఠంగా 50 ఏళ్ల జైలు శిక్ష పడే అవకాశం ఉంది.

ఫొటో సోర్స్, Reuters
రష్యా వైమానిక దాడులు తీవ్రతరం అవుతున్న నేపథ్యంలో యుక్రెయిన్కు 2.1 బిలియన్ డాలర్ల విలువైన 500 పేట్రియాట్ క్షిపణులను విక్రయించేందుకు అమెరికా ఆమోదం తెలిపింది.
ఇటీవల నెలల్లో ఈ క్షిపణుల సరఫరాలో జాప్యం జరుగుతోందని యుక్రెయిన్ పేర్కొన్న నేపథ్యంలో అమెరికా నిర్ణయం వెలువడింది.
ఆధునిక పీఏసీ-3 ఇంటర్సెప్టర్ క్షిపణుల విలువ సుమారు 2.1 బిలియన్ డాలర్లు ఉంటుందని అమెరికా విదేశీ వ్యహహారాల శాఖ వెల్లడించింది. వీటి కొనుగోలు ఖర్చును ఐరోపాలోని యుక్రెయిన్ మిత్రదేశాలు, కెనడా భరించనున్నాయనితెలిపింది.
పేట్రియాట్ క్షిపణుల సరఫరాను వేగవంతం చేయాలని యుక్రెయిన్ అధ్యక్షుడు జెలియెన్ స్కీ పలుమార్లు అమెరికాను కోరారు. రష్యా ప్రయోగించే ప్రమాదకర బాలిస్టిక్ క్షిపణులను అడ్డుకోవడానికి ఇవే సమర్థమైన ఆయుధాలని యుక్రెయిన్ భావిస్తోంది.
అమెరికా విదేశీ వ్యహహారాల శాఖ శుక్రవారం విడుదల చేసిన ప్రకటనలో ఈ కొనుగోలుకు సంబంధించిన వివరాలను వెల్లడించింది. 'జంప్స్టార్ట్' కార్యక్రమం ద్వారా కెనడా, జర్మనీ, నార్వే అందించే విరాళాలు, యూరోపియన్ యూనియన్ 'యుక్రెయిన్ సపోర్ట్ లోన్' ద్వారా సమకూరే నిధులతో ఈ కొనుగోలుకు చెల్లింపులు చేయనున్నట్లు తెలిపింది.
ఈ ఒప్పందంలో ప్రధాన కాంట్రాక్టర్గా అమెరికాకు చెందిన లాక్హీడ్ మార్టిన్ వ్యవహరించనుంది. ఈ విక్రయంలో అమెరికా ప్రభుత్వ నిధులు ఏవీ వినియోగించడం లేదని మంత్రిత్వ శాఖ స్పష్టం చేసింది.

ఫొటో సోర్స్, ANI
శ్రీహరికోట నుంచి జీఎస్ఎల్వీ-ఎఫ్18 రాకెట్ ద్వారా ఎన్వీఎస్-03 నావిగేషన్ ఉపగ్రహాన్ని విజయవంతంగా కక్ష్యలోకి ప్రవేశపెట్టినట్లు ఇస్రో ప్రకటించింది.
శుక్రవారం శ్రీహరికోటలో ఉన్న సతీశ్ ధావన్ అంతరిక్ష కేంద్రం నుంచి జీఎస్ఎల్వీ-ఎఫ్18 రాకెట్ నింగిలోకి దూసుకెళ్లింది.ఈ రాకెట్ ఎన్వీఎస్-03 ఉపగ్రహాన్ని విజయవంతంగా నిర్దేశిత కక్ష్యలోకి చేర్చింది.
జీఎస్ఎల్వీ-ఎఫ్18/ఎన్వీఎస్-03 ప్రయోగం విజయవంతం కావడంతో శ్రీహరికోటలోనిసతీశ్ ధావన్ అంతరిక్ష కేంద్రంలో ఇస్రో శాస్త్రవేత్తలుఒకరికొకరు అభినందనలు తెలుపుకున్నారు.
తదుపరి తరం నావిగేషన్ ఉపగ్రహ వ్యవస్థలో ఎన్వీఎస్-03 మూడో ఉపగ్రహం. ఐఆర్ఎన్ఎస్ఎస్ సిరీస్ ద్వారా అందించే నావిగేషన్ సేవలను నిరంతరాయంగా కొనసాగించేందుకు దీన్ని రూపొందించారు.
దేశానికి స్థానం, నావిగేషన్, సమయ నిర్ధరణ సేవలను స్వతంత్రంగా పొందే అవకాశం కల్పించే వ్యూహాత్మక ఉపగ్రహం ఇదని ఇస్రో చీఫ్ డాక్టర్ వి. నారాయణన్ అన్నారు.
నావిగేషన్ ఉపగ్రహాలను సాధారణ ప్రజలకు ఉపయోగపడే పనుల కోసం కూడా వినియోగిస్తారని ఆయన తెలిపారు. రైళ్లను ఎప్పటికప్పుడు ట్రాక్ చేయడంతో పాటు వాహనాలు, సముద్ర నౌకల కదలికలను పర్యవేక్షించేందుకు ఇవి ఉపయోగపడతాయని చెప్పారు. 'వన్ నేషన్ వన్ టైమ్' ప్రాజెక్టులోనూ ఈ ఉపగ్రహం కీలక భాగమని వివరించారు.
'గగన్' వ్యవస్థతో కలిసి నావిగేషన్ సేవలు అందించడం ద్వారా ప్రపంచ నావిగేషన్ వ్యవస్థలో భారత్ తన వంతు పాత్ర పోషిస్తోందని ఇస్రో చీఫ్ పేర్కొన్నారు.

ఫొటో సోర్స్, MANDEEP SAINI
ప్రపంచ రెజ్లింగ్ చాంపియన్షిప్లో 59 కిలోల విభాగంలో స్వర్ణ పతకం గెలిచి, ఈ ఘనత సాధించిన తొలి భారత మహిళా రెజ్లర్గా మనీషా భన్వాలా నిలిచారు.
కజకిస్థాన్ రాజధాని అస్తానాలో శుక్రవారం జరిగిన ఉత్కంఠభరిత ఫైనల్లో అమెరికాకు చెందిన అబిగైల్ నెట్ను 8-6 తేడాతో ఓడించారు.
ఒలింపిక్స్లో లేని ఈ వెయిట్ కేటగిరీలో మనీషా తన పోరును ప్రీ క్వార్టర్ ఫైనల్తో ప్రారంభించారు. ఈ దశలో కెనడాకు చెందిన లారెన్స్ బ్యూత్రెగార్డ్ను విక్టరీ బై ఫాల్ పద్ధతిలో ఓడించారు.
క్వార్టర్ ఫైనల్లో మంగోలియాకు చెందిన బొలోర్తుయా ఖురెల్ఖూను 6-0 తేడాతో ఓడించారు. ఆ తర్వాత సెమీఫైనల్లో స్థానిక రెజ్లర్ అల్టిన్ షగయేవాను సాంకేతిక ఆధిక్యంతో ఓడించి ఫైనల్కు చేరుకున్నారు. దీంతో హరియాణాకు చెందిన మనీషా ఈ ప్రతిష్ఠాత్మక టోర్నీలో స్వర్ణ పతకం సాధించారు.
ప్రపంచ రెజ్లింగ్ చాంపియన్షిప్లో స్వర్ణం గెలిచిన రెండో భారత రెజ్లర్గా మనీషా నిలిచారు. అంతకుముందు 2010లో మాస్కోలో జరిగిన పోటీల్లో సుశీల్ కుమార్ 66 కిలోల విభాగంలో బంగారు పతకం సాధించారు.
ప్రస్తుత చాంపియన్షిప్లో మహిళల విభాగంలో పతకాలు సాధించిన నాలుగో భారత రెజ్లర్ మనీషా. ఆమె కంటే ముందు నీలం సిరోహి (50 కిలోలు), కాజల్ ధోచక్ (76 కిలోలు) రజత పతకాలు సాధించగా, తనూ శర్మ (72 కిలోలు) కాంస్య పతకం గెలుచుకున్నారు.
బీబీసీ న్యూస్ తెలుగు లైవ్ పేజీకి స్వాగతం.
నేను బీబీసీ ప్రతినిధి వద్ది ప్రభాకర్, మధ్యాహ్నం 2 గంటల వరకు ముఖ్యమైన వార్తలను మీకు అందిస్తాను.
నిన్నటి లైవ్ పేజీ కోసం ఈ లింక్ను క్లిక్ చేయండి