బెపి కొలంబో: ఈ అంతరిక్ష నౌక బుధగ్రహంపై ఏ గుట్టు విప్పనుంది?

ఫొటో సోర్స్, ESA/JAXA
- రచయిత, రెబెక్కా మోరెల్, అలిసన్ ఫ్రాన్సిస్, టోనీ జొల్లిఫీ
- హోదా, బీబీసీ ప్రతినిధులు
- ప్రచురణ
- చదివే సమయం: 6 నిమిషాలు
ఎనిమిదేళ్ల సుదీర్ఘ ప్రయాణం. దాదాపు వెయ్యి కోట్ల కిలోమీటర్లు ప్రయాణించాక 'బెపి కొలంబో' అనే వ్యోమనౌక తన చివరి మజిలీ అయిన బుధ గ్రహం చుట్టూ ఉన్న కక్ష్యలోకి చేరబోతోంది.
అది అత్యంత ప్రతికూల వాతావరణంలోకి ప్రవేశించనుంది. బుధగ్రహం సూర్యుడికి అత్యంత సమీపంలో ఉన్న గ్రహం. అక్కడ ఉష్ణోగ్రతలు భీకరంగా 430డిగ్రీల సెల్సియస్ వరకు చేరుకుని, ఆపై మైనస్ 180 డిగ్రీల సెల్సియస్కు పడిపోతాయి.
ఇప్పటివరకు ఈ గ్రహం గురించి శాస్త్రవేత్తలకు తెలిసింది చాలా తక్కువ.
అయితే ఈ ప్రయోగం ద్వారా బుధ గ్రహానికి సంబంధించిన కొన్ని పెద్ద రహస్యాలను తెలుసుకోవచ్చని ఆశిస్తున్నారు.
సూర్యుడికి సమీపంలో ఉన్నప్పటికీ దాని బిలాల్లో మంచు ఉండటానికి కారణం కనుక్కోవడం, దాని ఉపరితలం అంతటా చుక్కల్లా ఉన్న గుంతలను అర్థం చేసుకోవడం వంటివి ఇందులో ఉన్నాయి.

"సౌర కుటుంబంలో అందరూ కాస్త తక్కువగా పట్టించుకున్న గ్రహం ఇది. కానీ, అదే దీన్ని మరింత ఆసక్తికరంగా మారుస్తోంది" అని ఈ పరిశోధన బృందంలో ముఖ్యులైన లెస్టర్ యూనివర్సిటీ ప్రొఫెసర్ ఎమ్మా బన్స్ అన్నారు.
"బుధ గ్రహం ఎలా పుట్టింది, ఎలా మారుతూ వచ్చింది, ఇప్పుడు ఎలా ఉందో తెలుసుకోవడం మాకు చాలా అవసరం’’ అన్నారు ఎమ్మా బన్స్.
‘‘ సూర్యుడి వేడిని, అక్కడి విపరీతమైన వాతావరణ మార్పులను ఇది ఎలా తట్టుకుంటోందో కూడా అర్థం చేసుకోవాలి" అని ఆమె చెప్పారు.

ఫొటో సోర్స్, Getty Images
కష్టమైన ప్రయాణం.. ప్రమాదకరమైన మలుపు
యూరప్, జపాన్ అంతరిక్ష సంస్థలు కలిసి చేపట్టిన ఈ బెపి కొలంబో ప్రయోగం 2018లో ఫ్రెంచ్ గయానా నుంచి మొదలైంది.
ఈ అంతరిక్ష నౌక అంతర సౌర వ్యవస్థలోకి ప్రయాణిస్తున్నందున, సూర్యుని అపారమైన గురుత్వాకర్షణ శక్తితో పోరాడాల్సి వచ్చింది. అందుకే , ఇది తన ప్రయాణమంతా వేగాన్ని నియంత్రించుకుంటూ సాగింది.
బుధగ్రహ కక్ష్యలోకి ప్రవేశించడానికి సరిపడా వేగాన్ని తగ్గించుకోవడానికి చాలా సంక్లిష్టమైన మార్గాన్ని ఎంచుకుంది. ఇందుకోసం భూమి చుట్టూ ఒకసారి, శుక్రగ్రహం చుట్టూ రెండుసార్లు, బుధగ్రహం చుట్టూ ఆరుసార్లు చక్కర్లు కొట్టింది.
నిజానికి ఈ ప్రయాణం ఏడేళ్లలోనే ముగియాల్సింది. కానీ ఇంజిన్ వ్యవస్థలో చిన్న సమస్య రావడంతో మరో ఏడాది ఆలస్యమైంది.
ఇప్పుడు బుధ గ్రహం కక్ష్యలోకి చేరే చివరి అడుగు చాలా ప్రమాదకరమైనది. బుధ గ్రహం గురుత్వాకర్షణ శక్తికి చిక్కడానికి ఈ వ్యోమనౌక 37 నిమిషాల పాటు ఒక్కసారిగా సడన్ బ్రేక్ వేసినట్టుగా వేగాన్ని తగ్గించుకోవాలి.
ఇందులో ఏ చిన్న పొరపాటు జరిగినా వ్యోమనౌక ఆగకుండా బుధ గ్రహాన్ని దాటుకుని దూరంగా వెళ్లిపోయే ప్రమాదం ఉంది.

ఫొటో సోర్స్, NASA
బుధ గ్రహంపై వింతలు, విశేషాలు
ఇప్పటివరకు కేవలం రెండు వ్యోమ నౌకలు మాత్రమే బుధ గ్రహం దగ్గరకు వెళ్లాయి. ఆ రెండూ అమెరికా అంతరిక్ష సంస్థ నాసా పంపినవే.
1970లలో 'మెరైనర్-10' మూడుసార్లు గ్రహం పక్క నుంచి వెళ్లగా 2011లో 'మెసెంజర్' వ్యోమనౌక అక్కడికి చేరి నాలుగేళ్ల పాటు పరిశోధనలు చేసింది.
అయినా సరే ఈ చిన్ని గ్రహం గురించి తెలుసుకోవాల్సింది ఇంకా ఎంతో ఉంది. చంద్రుడి కంటే కొంచెం పెద్దదిగా ఉండే ఈ గ్రహంపై పాత అగ్నిపర్వతాలు, ఎత్తైన కొండలు, పెద్ద పెద్ద బిలాలు ఉన్నాయి.
ఇక్కడ కాలం గడిచే తీరు చాలా విచిత్రంగా ఉంటుంది. బుధ గ్రహం సూర్యుడి చుట్టూ చాలా వేగంగా తిరుగుతుంది కాబట్టి అక్కడ ఒక ఏడాది కేవలం 88 రోజుల్లోనే పూర్తవుతుంది.
కానీ తన చుట్టూ తాను మాత్రం చాలా నెమ్మదిగా తిరుగుతుంది. అందువల్ల, అక్కడ ఒక్క రోజు గడవాలంటే మన భూమిపై 59 రోజులు పడుతుంది.
బుధ గ్రహం మీద ధ్రువ ప్రాంతాల్లోని బిలాల్లో మంచు ఎలా ఉందో చూడటంతో పాటు, గ్రహం పైన ఉన్న వింతైన సొట్టల గురించి కూడా ఈ వ్యోమనౌక పరిశోధిస్తుంది.
గ్రహం అంతటా వేల సంఖ్యలో ఉన్న ఈ గుంతలు లోతు తక్కువగా ఉండి గుంపులుగా కనిపిస్తాయి.
గ్రహాల వయసుతో పోలిస్తే ఇవి చాలా కొత్తవి.. అంటే సుమారు లక్ష ఏళ్ల నాటివి మాత్రమే. ఇవి అంతరిక్షం నుంచి రాళ్లు పడటం వల్ల ఏర్పడిన పెద్ద గుంతలు కాదని శాస్త్రవేత్తలకు తెలుసు. కానీ ఇవి అసలు ఏమిటి, ఎలా ఏర్పడ్డాయి అనేది ఇప్పటికీ అంతుచిక్కని ప్రశ్న.

ఫొటో సోర్స్, NASA
భారీ శకలాలు ఢీకొని చిన్నదైందా?
శాస్త్రవేత్తలను ఆశ్చర్యపరుస్తున్న మరో విషయం ఏమిటంటే.. ఈ గ్రహం చూడటానికి చిన్నదిగా ఉన్నా, దీని లోపల చాలా పెద్ద లోహపు ముద్ద ఉంది.
ఒకప్పుడు ఈ గ్రహం చాలా పెద్దదిగా ఉండేదని కానీ పుట్టిన కొత్తలో ఏదో ఒక పెద్ద గ్రహశకలం బలంగా ఢీకొట్టి పక్కకు వెళ్లిపోవడం వల్ల ఇలా మారి ఉండవచ్చని ప్రొఫెసర్ ఎమ్మా బన్స్ అన్నారు.
"ఆ పెద్ద దెబ్బకు గ్రహం పైపొర మొత్తం ఊడిపోయి ఉండవచ్చు. లేదా చాలా కాలం పాటు వరుసగా చాలా గ్రహశకలాలు బలంగా ఢీకొనడం వల్ల బయటి పొరలు కరిగి ఇప్పుడు మనం చూస్తున్న చిన్న రూపంలోకి వచ్చి ఉండవచ్చు లేదా, లోహాలు ఎక్కువగా ఉన్న ప్రాంతంలోనే ఇది ఇలా పుట్టి ఉండవచ్చు" అని ఆమె వివరించారు.

ఫొటో సోర్స్, Tony Jolliffe/BBC News
రెండు వ్యోమ నౌకలు విడిపోయేటప్పుడు..
ఈ ప్రయోగంలో మరో విశేషం ఏమిటంటే, ఇది ఒకరకంగా 'ఒకటి కొంటే ఒకటి ఉచితం' లాంటిది. ఇందులో రెండు వేర్వేరు వ్యోమనౌకలు కలిసి ప్రయాణిస్తున్నాయి.
బుధ గ్రహం దగ్గరకు చేరిన కొన్ని వారాల తర్వాత ఇవి రెండూ విడిపోతాయి. యూరప్ వ్యోమనౌక గ్రహానికి చాలా దగ్గరగా ఉండి పరిశీలిస్తుంటే, జపాన్ వ్యోమనౌక కొంచెం దూరం నుంచి గ్రహాన్ని గమనిస్తుంది.
లండన్లోని సైన్స్ మ్యూజియంలో బెపి కొలంబో అసలు పరిమాణంలో ఉన్న నమూనాను ప్రజల కోసం ఉంచారు.
వ్యోమనౌకను తయారు చేసేటప్పుడు పరీక్షల కోసం దీన్ని వాడారు.
ఈ రెండు వ్యోమనౌకలు విడిపోయే క్షణం తమకు ఎంతో ఉత్కంఠగా ఉంటుందని దీన్ని తయారు చేసిన 'ఎయిర్బస్' సంస్థ ఇంజనీర్ జెస్సికా మార్షల్ చెప్పారు.
ప్రయోగం మొదలైనప్పటి నుంచి ఎనిమిదేళ్ల పాటు ఇవి విడిపోకుండా చాలా గట్టిగా కలిపి ఉంచారు. ఇప్పుడు అవి చాలా సున్నితంగా విడిపోవాలి.
"దీనికోసం మేము ఎంతో ఆలోచించి ఒక ప్రత్యేక స్ప్రింగ్ ఏర్పాటు చేశాము. ఎనిమిదేళ్లుగా అంతరిక్షంలోని వేడిని, ప్రమాదకర కిరణాలను తట్టుకున్న ఆ స్ప్రింగ్ ఇప్పుడు చాలా నెమ్మదిగా విచ్చుకోవాలి. అది విచ్చుకునేటప్పుడు రెండో వ్యోమనౌక తన చుట్టూ తాను తిరగడానికి వీలుగా కొంచెం మెలితిరుగుతుంది కూడా" అని మార్షల్ చెప్పారు.
అత్యాధునిక పరికరాలతో ఉన్న ఈ రెండు వ్యోమనౌకలు బుధ గ్రహ రహస్యాలను కనిపెడతాయని శాస్త్రవేత్తల బృందం ఎంతో ఆశతో ఉంది.
అయితే, అక్కడికి వెళ్లాక ఇంకెన్ని కొత్త వింతలు బయటపడతాయో అనే ఆలోచన ఈ ప్రయోగాన్ని మరింత ఆసక్తికరంగా మార్చింది.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)































