காணொளி: 'புரசை பாபு' எனும் வி.எஸ்.பாபு கடந்து வந்த பாதை

காணொளிக் குறிப்பு, 'புரசை பாபு' எனும் வி.எஸ்.பாபு கடந்து வந்த பாதை
காணொளி: 'புரசை பாபு' எனும் வி.எஸ்.பாபு கடந்து வந்த பாதை
பிரசுரிக்கப்பட்டது

2011-ல் கொளத்தூரில் ஸ்டாலினின் வெற்றிக்கு பணியாற்றி பின் 2026ல் ஸ்டாலினையே தோற்கடித்த தவெக எம்எல்ஏ வி.எஸ். பாபு உயிரிழந்தார்.

75 வயதான வி.எஸ்.பாபு, கடந்த சுமார் 70 நாட்களாகச் சென்னை தனியார் மருத்துவமனையில் சிகிச்சை பெற்று வந்த நிலையில் மாரடைப்பு காரணமாக உயிரிழந்ததாக மருத்துவமனை தெரிவித்துள்ளது.

யார் இந்த வி.எஸ்.பாபு?

'புரசை பாபு' என அனைவராலும் அழைக்கப்பட்ட வி.எஸ். பாபு, வடசென்னை அரசியலில் நீண்டகாலமாகச் செயல்பட்டு வந்தவர்.

திமுகவில் வி.எஸ்.பாபு இருந்தபோது வடசென்னை மாவட்டச் செயலாளராகப் பொறுப்பு வகித்தார்.

பாபு மட்டுமின்றி, அவரது தம்பி வி.எஸ். ரவி, சகோதரர் மகன்களான வி.எஸ்.ஜே. சீனிவாசன், வி.எஸ்.ஜே. தினகரன் உள்ளிட்ட குடும்பத்தினரும் திமுகவில் முக்கியப் பொறுப்புகளில் இருந்தனர்.

2006ஆம் ஆண்டு நடைபெற்ற சட்டமன்றத் தேர்தலில் புரசைவாக்கம் தொகுதியில் திமுக சார்பில் போட்டியிட்ட பாபு வெற்றி பெற்றார்.

2011 சட்டமன்றத் தேர்தலில் ஆயிரம் விளக்கு தொகுதியிலிருந்து கொளத்தூருக்கு மு.க. ஸ்டாலின் மாறியபோது, அவரைப் பெருவாரியான வாக்குகள் வித்தியாசத்தில் வெற்றி பெறச் செய்ய வேண்டிய முக்கியப் பொறுப்பு பாபுவிடம் இருந்தது.

2011 சட்டமன்றத் தேர்தலில் திமுக படுதோல்வியைச் சந்தித்தாலும், கொளத்தூர் தொகுதியில் ஸ்டாலின் 2,734 வாக்குகள் வித்தியாசத்தில் வெற்றி பெற்றார்.

இந்தத் தேர்தலுக்குப் பிறகு திமுக தலைமையுடன் ஏற்பட்ட கருத்து வேறுபாடு காரணமாக வி.எஸ். பாபு அக்கட்சியிலிருந்து விலகினார்.

அவருடன் அவரது குடும்பத்தினரும் திமுகவிலிருந்து வெளியேறினர்.

பின்னர் அதிமுகவில் இணைந்த பாபு, ஜெயலலிதா மறைவுக்குப் பிறகு டிடிவி தினகரனுக்கு ஆதரவான நிலைப்பாட்டை எடுத்தார். தொடர்ந்து அம்மா மக்கள் முன்னேற்றக் கழகத்தில் இணைந்து சிறிது காலம் பணியாற்றினார்.

அதன்பிறகு அமமுகவிலிருந்து விலகி எடப்பாடி பழனிசாமி முன்னிலையில் மீண்டும் அதிமுகவில் இணைந்தார்.

மாவட்டச் செயலாளர் பதவியை எதிர்பார்த்து இணைந்த அவருக்கு, முதலில் எம்ஜிஆர் இளைஞர் அணியில் பொறுப்பு வழங்கப்பட்டது.

2024 மக்களவைத் தேர்தலில் அதிமுக தோல்வியடைந்ததைத் தொடர்ந்து, கட்சியின் நிர்வாகப் பொறுப்புகள் மாற்றியமைக்கப்பட்டன. இதன் ஒரு பகுதியாக, 2025ஆம் ஆண்டு ஜூன் மாதம் வடசென்னை வடக்கு மேற்கு மாவட்டச் செயலாளராக வி.எஸ். பாபு நியமிக்கப்பட்டார்.

இதற்கிடையே, அதிமுக பொதுச் செயலாளர் எடப்பாடி பழனிசாமி கும்மிடிப்பூண்டியில் நடைபெற்ற நிகழ்ச்சியில் சொந்த கட்சியினரை பாபுவின் ஆதரவாளர்கள் தாக்கியதை தொடர்ந்து கட்சிக்குள் ஏற்பட்ட சர்ச்சைகளுக்கு மத்தியில், பாபுவின் மாவட்டச் செயலாளர் பதவி பறிக்கப்பட்டது.

இதையடுத்து, 2026 சட்டமன்றத் தேர்தலுக்கு முன்பாக தமிழக வெற்றிக் கழகத் தலைவர் விஜய் முன்னிலையில் வி.எஸ். பாபு அக்கட்சியில் இணைந்தார்.

2026 சட்டமன்றத் தேர்தலில் கொளத்தூர் தொகுதியில் திமுக தலைவர் மு.க. ஸ்டாலினை எதிர்த்து தவெக சார்பில் யார் போட்டியிடுவார் என்ற எதிர்பார்ப்பு நிலவிய நிலையில், அக்கட்சியின் வேட்பாளராக வி.எஸ். பாபு அறிவிக்கப்பட்டார்.

தேர்தலில் ஸ்டாலினை 8,795 வாக்குகள் வித்தியாசத்தில் தோற்கடித்து திமுகவுக்குவி.எஸ். பாபு அதிர்ச்சியளித்தார்.

2011ஆம் ஆண்டு ஸ்டாலினின் வெற்றிக்காகப் பணியாற்றிய பாபு, 15 ஆண்டுகளுக்குப் பிறகு அதே தொகுதியில் அவரைத் தோற்கடித்தது அரசியல் வட்டாரங்களில் கவனம் பெற்றது.

தேர்தல் வெற்றிக்குப் பிறகு தனது இரு கைகளையும் மடக்கி பாபு காட்டிய சைகை சமூக ஊடகங்களில் பிரபலமானது.

- இது, பிபிசிக்காக கலெக்டிவ் நியூஸ்ரூம் வெளியீடு