'டெல் அவிவ் விமான நிலையத்தில் மோத திட்டமிட்ட ஃப்ளைதுபை துணை விமானி' - விசாரணையில் வெளியான புதிய தகவல் என்ன?

ஃப்ளைதுபை விமானத்தைக் கடத்த முயன்றதாகக் குற்றம்சாட்டப்படும் துணை விமானி, அந்த விமானத்தை இஸ்ரேலின் டெல் அவிவ் நகரில் உள்ள பென் குரியன் விமான நிலையத்திலோ அல்லது அங்குள்ள உயரமான கட்டடம் ஒன்றிலோ மோதச் செய்யத் திட்டமிட்டிருந்ததாக அமெரிக்க மற்றும் இஸ்ரேலிய ஊடகங்கள் தெரிவிக்கின்றன.

ஓமன் நாட்டைச் சேர்ந்த அந்த நபர், தனியாகச் செயல்பட்ட தீவிரவாதி என்று அந்தச் செய்திகளில் குறிப்பிடப்பட்டுள்ளது.

கடந்த புதன்கிழமை துபையில் இருந்து டெல் அவிவ் சென்ற FZ1073 விமானத்தில், துணை விமானி 'தீவிரவாதச் செயலை' நடத்த முயன்றதாக ஐக்கிய அரபு எமிரேட்ஸின் அரசு வழக்கறிஞர் தெரிவித்துள்ளார்.

விமானியின் அறையில் வைக்கப்பட்டிருந்த அவசரகால கோடரியால் விமானத்தின் கேப்டனைத் தாக்கி காயப்படுத்திய அவர், பின்னர் பயணிகளால் கட்டுப்படுத்தப்பட்டார். விமானத்தில் பயணித்த மற்றொரு விமானி விமானத்தை செளதி அரேபியாவில் பத்திரமாகத் தரையிறக்கினார்.

துணை விமானி 'இஸ்லாமிய கடும்போக்கு கருத்துகளுக்கு உட்படுத்தப்பட்டிருந்ததாக' இஸ்ரேல் பிரதமர் தெரிவித்துள்ளார்.

மேலும், கேப்டன், பயணிகள் மற்றும் மற்றொரு விமானி ஆகியோர் இணைந்து '9/11 போன்ற பேரழிவைத் தடுத்ததாகவும்' அவர் கூறியுள்ளார்.

ஃப்ளைதுபை விமானத்தின் துணை விமானி குறித்து, விசாரணை தொடர்ந்துவரும் நிலையில் கடந்த வார இறுதியில் மேலும் பல தகவல்கள் வெளியாகியுள்ளன.

பல்வேறு செய்திகளில் அவரது பெயர் ஹமாம் அல்-ஹம்மாமி என்று குறிப்பிடப்பட்டுள்ளது. ஐக்கிய அரபு எமிரேட்ஸில் அவர் தொடர்ந்து விசாரிக்கப்பட்டு வரும் நிலையில், இஸ்ரேலிய அதிகாரிகளுக்கும் விசாரணை தொடர்பான தகவல்கள் தெரிவிக்கப்பட்டு வருகின்றன.

விசாரணை குறித்து அறிந்தவர்களை மேற்கோள்காட்டி இஸ்ரேலிய ஊடகங்கள் வெளியிட்ட தகவலின்படி, கேப்டன் ஸ்மித் மச்சார் மீது தாக்குதல் நடத்திய பிறகு, விமானத்தைத் தொடர்ந்து வழக்கம்போல் இயக்கி இஸ்ரேலிய வான்வெளிக்குள் செல்ல துணை விமானி திட்டமிட்டிருந்ததாக விசாரணையாளர்களிடம் தெரிவித்துள்ளார்.

பென் குரியன் விமான நிலையத்திடம் இருந்து தரையிறங்குவதற்கான அனுமதியைப் பெற்ற பிறகு, 180-க்கும் மேற்பட்ட பயணிகளுடன் இருந்த போயிங் 737 MAX விமானத்தை அந்த விமான நிலையத்திலோ அல்லது மத்திய டெல் அவிவில் உள்ள உயரமான கட்டடம் ஒன்றிலோ மோதச் செய்யத் திட்டமிட்டிருந்ததாகவும் அவர் தெரிவித்ததாகச் செய்திகள் கூறுகின்றன.

அமெரிக்காவில் 2001 செப்டம்பர் 11 அன்று அல்-காய்தா நடத்திய தாக்குதல்களைப் போன்ற வகையில் இந்தத் தாக்குதலை நடத்த அவர் திட்டமிட்டிருந்ததாகவும் அந்தச் செய்திகளில் குறிப்பிடப்பட்டுள்ளது.

அவர் தீவிரவாத அமைப்பு அல்லது வெளிநாட்டு அரசின் சார்பில் செயல்பட்டதைவிட, தனியாகவே செயல்பட்டிருக்க அதிக வாய்ப்புள்ளதாக விசாரணை வட்டாரங்கள் தெரிவித்ததாகச் செய்திகள் கூறுகின்றன.

இதற்கு முன்பு டெல் அவிவ் சென்ற மற்றொரு விமானத்தைக் கடத்தி, அதை மோதச் செய்யவும் துணை விமானி திட்டமிட்டிருந்ததாகவும் ஆனால், அந்த விமானத்தில் தனக்குத் தெரிந்த ஒருவர் பயணம் செய்வதை அறிந்ததால் அந்தத் திட்டத்தை அவர் கைவிட்டதாகவும் விசாரணையாளர்களிடம் தெரிவித்ததாகத் தகவல்கள் தெரிவிக்கின்றன.

இந்தத் தகவல்கள் குறித்து ஐக்கிய அரபு எமிரேட்ஸ் அல்லது இஸ்ரேலிய அதிகாரிகளிடமிருந்து உடனடியாக எந்தக் கருத்தும் வெளியாகவில்லை.

ஐக்கிய அரபு எமிரேட்ஸின் அரசு வழக்கறிஞர் ஹமத் அல்-ஷம்சி, இந்தச் சம்பவத்தின் முழுமையான பின்னணி, நோக்கம் மற்றும் இதனுடன் தொடர்புடைய ஏதேனும் தொடர்புகள் குறித்து தங்கள் நாட்டின் விசாரணை தெளிவுபடுத்தும் என்று சனிக்கிழமை தெரிவித்தார். விசாரணை முடிந்ததும் அதன் முடிவுகள் அறிவிக்கப்படும் என்றும் அவர் கூறினார்.

இந்தச் சம்பவத்தில் முக்கியமான பாதுகாப்புக் குளறுபடிகள் குறித்தும் கேள்விகள் எழுந்துள்ளன. குறிப்பாக, அந்தத் தாக்குதல் நடத்த முயன்ற நபர் ஃப்ளைதுபை நிறுவனத்தில் எவ்வாறு பணியில் சேர்க்கப்பட்டார், இஸ்ரேலியர்கள் நிறைந்த விமானத்தை டெல் அவிவ் நகருக்கு இயக்குவதற்கு அவருக்கு எவ்வாறு அனுமதி வழங்கப்பட்டது என்ற கேள்விகள் எழுந்துள்ளன.

துணை விமானி, கடும்போக்கு கருத்துகள் கொண்டிருந்தது குறித்த கவலைகள் காரணமாக ஓமன் நாட்டின் தேசிய விமான நிறுவனமான ஓமன் ஏர் நிறுவனத்தில் விமானம் ஓட்டுவதற்குத் தடை செய்யப்பட்டு, நிர்வாகப் பணிக்கு மாற்றப்பட்டதாக பிராந்திய அதிகாரிகள் தெரிவித்துள்ளனர்.

அதன்பின்னர், கடும்போக்கு கருத்துகளுக்கு அவர் ஆளாகியிருந்ததற்கான அறிகுறிகள் ஏதேனும் உள்ளதா என்பதை ஆராயாத வழக்கமான பாதுகாப்புச் சோதனைகளுக்குப் பிறகு, ஐக்கிய அரபு எமிரேட்ஸைச் சேர்ந்த ஃப்ளைதுபை நிறுவனத்தில் அவர் பணியில் சேர்க்கப்பட்டதாக அதிகாரிகள் தெரிவித்துள்ளனர்.

மேலும், இஸ்ரேலுடன் அதிகாரபூர்வ தூதரக உறவுகள் இல்லாத ஓமன் போன்ற நாடுகளின் குடிமக்களான விமானிகள், இஸ்ரேலுக்கான விமானங்களை இயக்க அனுமதிக்கப்படுவதில்லை என்று இஸ்ரேலிய விமானப் போக்குவரத்து விதிமுறைகளும் கூறுகின்றன.

FZ1073 விமானம் புறப்படுவதற்கு முன்பு, அதில் பயணம் செய்யவிருந்த பயணிகள் மற்றும் விமானப் பணியாளர்களின் பட்டியலை ஐக்கிய அரபு எமிரேட்ஸ் அதிகாரிகள் இஸ்ரேலுடன் பகிர்ந்துகொண்டதாக பிராந்திய அதிகாரிகள் ஞாயிற்றுக்கிழமை அசோசியேட்டட் பிரஸ் செய்தி நிறுவனத்திடம் தெரிவித்தனர்.

வெளிநாட்டு விமான நிறுவனங்கள் வழங்கும் இதுபோன்ற பயணிகள் மற்றும் பணியாளர்களின் பட்டியல்களைப் பாதுகாப்பு ஆய்வுக்கு உட்படுத்துவது போக்குவரத்து அமைச்சகத்தின் பொறுப்பு என்று இஸ்ரேலின் உள்நாட்டுப் பாதுகாப்பு அமைப்பான ஷின் பெட் தெரிவித்தது.

ஆனால், பயணிகள் மற்றும் விமானப் பணியாளர்களின் பட்டியல்கள் தங்கள் அமைச்சகத்திடம் வழங்கப்படவில்லை என்று போக்குவரத்துத் துறை அமைச்சர் மிரி ரெகெவ் தெரிவித்துள்ளார். வெளிநாட்டு விமான நிறுவனங்கள் இயக்கும் விமானங்களுக்கான பாதுகாப்புக் கண்காணிப்பு ஷின் பெட் மற்றும் வெளிநாட்டு உளவுத்துறை அமைப்பான மொசாட் ஆகியவற்றின் பொறுப்பில் இருப்பதாகவும் அவர் கூறினார்.

இஸ்ரேல் பிரதமர் பெஞ்சமின் நெதன்யாகு, இஸ்ரேலுக்கு வரும் வெளிநாட்டு விமானப் போக்குவரத்து தொடர்பான 'அனைத்துப் பாதுகாப்பு அம்சங்களையும்' ஆய்வு செய்ய தேசிய பாதுகாப்பு கவுன்சில் தலைவருக்கு உத்தரவிட்டுள்ளார்.

துணை விமானிக்கு ஆஸ்திரேலியாவுடன் உள்ள தொடர்புகள் குறித்தும் அந்நாட்டு அதிகாரிகள் விசாரணை நடத்தி வருகின்றனர். அவர் 2015 முதல் 2017 வரை ஆஸ்திரேலியாவில் படித்ததாக உள்ளூர் ஊடகங்களிடம் தகவல் தெரிவித்தவர்கள் கூறியுள்ளனர்.

- இது பிபிசிக்காக கலெக்டிவ் நியூஸ்ரூம் வெளியீடு