டிரம்ப் - புதின் - ஜின்பிங் சந்திப்பு சாதித்தது என்ன? ஒரு பகுப்பாய்வு

2026 நவம்பர் 19  சீனாவின் ஷென்சென் நகரில் உள்ள கிலின் ஷான்சுவாங் அரசு விருந்தினர் மாளிகையில், ஆசிய-பசிபிக் பொருளாதார ஒத்துழைப்பு (APEC) உச்சி மாநாட்டின் ஒரு பகுதியாக நடைபெற்ற முத்தரப்புக் கூட்டத்தில் பங்கேற்க வந்த ரஷ்ய அதிபர் விளாடிமிர் புதின், சீன அதிபர் ஷி ஜின்பிங், அமெரிக்க அதிபர் டொனால்ட் டிரம்ப்.
படக்குறிப்பு, வரலாற்றுச் சிறப்புமிக்க இந்த முத்தரப்புக் கூட்டத்தின் காட்சிகள் மட்டும்தான் உச்சி மாநாட்டின் நீடித்த நினைவாக இருக்கக்கூடும்.
    • எழுதியவர், ஆண்டனி ஸூர்ச்சர்
    • பதவி, வட அமெரிக்க செய்தியாளர்
  • பிரசுரிக்கப்பட்டது
  • வாசிக்கும் நேரம்: 3 நிமிடங்கள்

விளாடிமிர் புதின் மற்றும் ஷி ஜின்பிங் ஆகியோருடனான தனது முத்தரப்புச் சந்திப்பில், குறைந்தபட்ச செயல்திட்டங்கள் மற்றும் தெளிவான கோரிக்கைகள் ஏதுமின்றியே டொனால்ட் டிரம்ப் கலந்துகொண்டார். அந்தச் சந்திப்பிலிருந்து அவர் எதையும் பெரிதாகப் பெறாமலேயே திரும்பியதாகத் தெரிகிறது.

இறுதியில், இந்தச் சந்திப்பின் காட்சிகள்தான் – அரசியல் வட்டாரங்களில் கூறப்படுவதுபோல, அந்தச் சந்திப்பு உருவாக்கிய அரசியல் பிம்பம்தான் இந்த உச்சி மாநாட்டின் நீடித்த நினைவாக இருக்கக்கூடும். வல்லரசு நாடுகளின் தலைவர்கள் பங்கேற்ற இந்தச் சந்திப்பை, சிலர் வரலாற்றுச் சிறப்புமிக்க 'யால்டா 2.0' கூட்டம் என்று வர்ணித்தனர்.

இந்தப் பயணத்தில் ஆடம்பரமான வரவேற்பும், விழா ஏற்பாடுகளும் கிடைத்ததே அமெரிக்க அதிபர் டிரம்ப் அதிகம் விரும்பியதாக இருக்கலாம். அமெரிக்காவில் இந்த மாதத் தொடக்கத்தில் நடைபெற்ற இடைக்கால தேர்தலில் அவரது குடியரசுக் கட்சி படுதோல்வி அடைந்திருந்தது. அந்த அரசியல் பின்னடைவால் பாதிக்கப்பட்டிருந்த டிரம்ப், ஆசியாவுக்கான தனது மூன்று நாள் பயணத்தின்போது உலகின் கவனத்தை தன் பக்கம் ஈர்த்ததையும், அமெரிக்கா, ரஷ்யா, சீனா ஆகிய நாடுகளின் தலைவர்கள் முதன்முறையாக முத்தரப்புக் கூட்டத்தில் பங்கேற்றதையும் வெளிப்படையாகவே ரசித்தார்.

புதன்கிழமை ஃபாக்ஸ் நியூஸ் தொலைக்காட்சிக்கு அளித்த பேட்டியில் செவ்வாய்க்கிழமை நடைபெற்ற ஆசிய-பசிபிக் பொருளாதார ஒத்துழைப்பு (APEC) விருந்தில் தனக்கு அளிக்கப்பட்ட முக்கிய இருக்கை, சீனாவுக்கு வந்தபோது தனக்கு அளிக்கப்பட்ட வரவேற்பு ஆகியவற்றை டிரம்ப் சுட்டிக்காட்டினார்., "ஆரவாரம், அழகு, ஆடம்பரமான ஏற்பாடுகள், ஆயிரக்கணக்கான மக்கள்" என்று அவற்றை விவரித்த அவர், தனது பயணம் ஏற்கெனவே வெற்றியடைந்துவிட்டதற்கு இதுவே சான்று என கூறினார்.

இது வெற்றிக்கான மிக குறைந்த அளவுகோலாகத் தோன்றலாம். ஆனால், அமெரிக்க அதிபரைப் பொறுத்தவரை அது போதுமானதாக இருக்கலாம்.

ஷி ஜின்பிங்குடனான சந்திப்புக்கு முன்னதாக, 'எனது நண்பர்' புதினை வரவேற்கும் டிரம்ப்
படக்குறிப்பு, ஷி ஜின்பிங்குடனான சந்திப்புக்கு முன்னதாக, புதினை வரவேற்கும் டிரம்ப்

இருப்பினும், முத்தரப்புக் கூட்டத்துக்குப் பிறகு அமெரிக்க தரப்பிலிருந்து இதுவரை குறிப்பிடத்தக்க கருத்துகள் எதுவும் வெளியாகவில்லை.

சீனா, கூட்டத்தில் விவாதிக்கப்பட்ட அம்சங்களை விவரிக்கும் கூட்டறிக்கையை உடனடியாக வெளியிட்டது. புதினும் கூட்டத்துக்குப் பிறகு ஒரு மணி நேரம் செய்தியாளர்களைச் சந்தித்து விளக்கமளித்தார். ஆனால், டிரம்ப் பொதுவெளியில் மிகக் குறைவாகவே கருத்துத் தெரிவித்துள்ளார். அதற்குப் பதிலாக, வெள்ளை மாளிகையில் வெள்ளிக்கிழமை செய்தியாளர் சந்திப்பு நடத்துவதாக உறுதியளித்துள்ளார்.

இந்த ஆண்டின் தொடக்கத்தில் சீனாவுக்குச் சென்றபோதும், கடந்த அக்டோபரில் தென் கொரியாவில் நடைபெற்ற ஏபெக் உச்சி மாநாட்டின்போது ஷி ஜின்பிங்கைச் சந்தித்த பிறகும், வாஷிங்டனுக்கு திரும்பும் விமானப் பயணத்தின் போதே டிரம்ப் செய்தியாளர்களிடம் பேசினார்.

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

தற்போதைக்கு, வியாழக்கிழமை மூன்று தலைவர்களும் சந்தித்த பிறகு வெளியிடப்பட்ட கூட்டறிக்கையே வெள்ளை மாளிகையின் சார்பில் பேசுகிறது. ஆனால், "மூலோபாய நிலைத்தன்மை மற்றும் சர்வதேசப் பாதுகாப்பை" உறுதிசெய்வதற்கான முயற்சிகளுக்கு ஆதரவு தெரிவிக்கும் தெளிவற்ற வாசகங்களே அந்த ஆவணத்தில் பெரும்பாலும் இடம்பெற்றுள்ளன.

உலகின் முக்கியத்துவம் வாய்ந்த பிரச்னைகள் குறித்து மூன்று சக்திவாய்ந்த தலைவர்களும் ஒரே அறையில் அமர்ந்து இணக்கமாக விவாதித்த காட்சிகள், பேரழிவை ஏற்படுத்தக் கூடிய மோதல்கள் எதுவும் எதிர்காலத்தில் ஏற்படப் போவதில்லை என்ற ஒருவித நம்பிக்கையை உலகுக்கு அளிக்கக்கூடும். ஆனால், மேலும் பேச்சுவார்த்தைகளை நடத்துவதாக அளிக்கப்பட்ட உறுதிமொழிகளும், அணு ஆயுதப் போர் "ஒருபோதும் நடத்தப்படக் கூடாது" என்ற ஒப்புதலும், வெறும் பேச்சைத் தாண்டி உருப்படியான அம்சங்கள் மிகக் குறைவாகவே கொண்டுள்ளன.

"பொதுவாக, உலகின் முக்கிய நாடுகளின் தலைவர்கள் பல்வேறு வடிவங்களில் ஒன்றுகூடுவது நல்லது. அதன் முடிவுகள் மிகக் குறைவானவையாக இருந்தாலும் அது வரவேற்கத்தக்கது" என்று அமெரிக்கா-சீனா உறவுகளுக்கான புஷ் அறக்கட்டளையின் தலைவர் டேவிட் ஃபயர்ஸ்டீன் பிபிசியிடம் தெரிவித்தார்.

இடமிருந்து வலமாக: ரஷ்ய அதிபர் விளாடிமிர் புதின், சீன அதிபர் ஷி ஜின்பிங், அமெரிக்க அதிபர் டொனால்ட் டிரம்ப் ஆகியோர் 2026 நவம்பர் 19 அன்று சீனாவின் ஷென்சென் நகரில் உள்ள கிலின் ஷான்சுவாங் அரசு விருந்தினர் மாளிகையில் நடைபெற்ற முத்தரப்புக் கூட்டத்தில் பங்கேற்றனர்.
படக்குறிப்பு, உலகின் முக்கியப் பிரச்னைகள் குறித்து மூன்று சக்திவாய்ந்த தலைவர்களும் ஒரே அறையில் அமர்ந்து இணக்கமாக விவாதித்த காட்சிகள், உலகுக்கு ஒருவித நம்பிக்கையை அளிக்கக்கூடும்.

சர்வதேசச் சந்தையில் புதைபடிவ எரிபொருள்களின் முக்கிய விநியோக நாடாக ரஷ்யா இருப்பதைக் கருத்தில்கொண்டு,"சுத்திகரிக்கப்பட்ட பெட்ரோலியப் பொருள்களின் உற்பத்தியையும் விநியோகத்தையும் அதிகரிப்பது" குறித்த ஒரு வாசகம், புதினுக்காக சேர்க்கப்பட்டதாக தெரிகிறது. அமெரிக்காவின் சமீபத்திய கண்டனத்துக்கு இலக்காகியுள்ள சர்வதேச குற்றவியல் நீதிமன்றத்தை கூட்டறிக்கை கண்டித்திருப்பதும் கவனிக்கத்தக்கது.

உலகின் மூன்று முக்கிய வல்லரசுகளின் தலைவர்களும் ஒரு விஷயத்தில் ஒருமித்த கருத்தைக் கொண்டிருக்கிறார்கள் என்றால் அது சர்வதேசச் சட்டத்தை நடைமுறைப்படுத்த முயலும் உலகளாவிய அமைப்புகளுக்கு, அந்த முயற்சிகளைச் செயல்படுத்துவதற்கான அதிகார பலம் இருக்கக் கூடாது என்பதுதான்.

சீனாவில் இருந்தபோது, புதினைத் தனது 'நண்பர்' என்று அழைத்த டிரம்ப், சீனத் தலைவருடன் கைகுலுக்கி, கட்டித்தழுவிய பிறகு, ஜின்பிங்குடனான தனது 'சிறப்பான தனிப்பட்ட உறவையும்' பாராட்டினார்.

ஆனால், டிரம்ப் வாஷிங்டனுக்குத் திரும்பியதும், அவரது ஆசியப் பயணம் குறித்து மிதமான கவலை முதல் வெளிப்படையான கடுமையான விமர்சனம் வரை பல்வேறு கருத்துகள் நிலவும் அரசியல் சூழலை அவர் எதிர்கொள்ள வேண்டியிருக்கும்.

புவிசார் அரசியல் எதிரிகளுடனான நமது உறவுகளை நாம் எவ்வாறு சித்தரிக்கிறோம் என்பது குறித்து நான் கவலைப்படுகிறேன். விளாடிமிர் புதினும் ஷி ஜின்பிங்கும் நமது நண்பர்கள் அல்ல," என்று யூட்டா மாகாணத்தைச் சேர்ந்த குடியரசுக் கட்சி செனட்டர் ஜான் கர்டிஸ் வியாழக்கிழமை பிபிசி-க்கு அளித்த பேட்டியில் தெரிவித்துள்ளார்

"ராஜதந்திரம் முக்கியமானதுதான், ஆனால் நமது எதிரிகள் யார் என்பது குறித்த தெளிவை இழக்கும் அளவுக்கு ஒருபோதும் இருக்கக் கூடாது."

ஜனநாயகக் கட்சியினர் தங்கள் விமர்சனங்களை வெளிப்படையாகவே முன்வைத்தனர்.

"புகைப்பட வாய்ப்புகளுக்காகவோ, தனது செல்வாக்கையும் பெருமையையும் உயர்த்திக் கொள்வதற்காகவோ அமெரிக்காவின் பாதுகாப்பை விட்டுக்கொடுக்க முடியாது" என்று வெளியுறவுக் குழுவைச் சேர்ந்த ஒன்பது செனட்டர்கள் வெள்ளை மாளிகைக்கு எழுதிய கடிதத்தில் குறிப்பிட்டுள்ளனர்.

உள்நாட்டில் ஏற்பட்ட அரசியல் பின்னடைவுகளின் பாதிப்பைத் தணிப்பதற்காக, சர்வதேச அளவில் ராஜதந்திர வெற்றியைத் தேடிய முதல் அமெரிக்க அதிபர் டிரம்ப் அல்ல. ஜனநாயகக் கட்சியைச் சேர்ந்த பில் கிளிண்டனும் பராக் ஒபாமாவும் தங்கள் கட்சிகள் இடைக்காலத் தேர்தல்களில் தோல்வியடைந்ததைத் தொடர்ந்து, அதிபர்களாக இருந்தபோது வெளிநாட்டுப் பயணங்களை மேற்கொண்டனர்.

அந்த சந்தர்ப்பங்களில், அவர்களின் அரசியல் செல்வாக்கில் ஏற்பட்ட உயர்வு குறுகிய காலமே நீடித்தது. ஆசிய உச்சி மாநாட்டில் டிரம்ப் விரும்பிய காட்சிகள் கிடைத்திருக்கலாம். ஆனால், அவற்றுடன் குறிப்பிடத்தக்க முன்னேற்றம் எதுவும் ஏற்படாததால், இந்தப் பயணமும் விரைவில் மறக்கப்படக்கூடும்.

- இது, பிபிசிக்காக கலெக்டிவ் நியூஸ்ரூம் வெளியீடு