தமிழ்நாட்டில் 3 மாதமாக ஜிஎஸ்டி வசூல் சரிவா? திமுக குற்றச்சாட்டும் அரசு பதிலும் - நிபுணர்கள் விளக்கம்

தமிழ்நாட்டில் கடந்த ஜூலை முதல் செப்டம்பர் வரையில் மாதாந்திர சரக்கு மற்றும் சேவை வரி (ஜி.எஸ்.டி) வசூல் முந்தைய ஆண்டுடன் ஒப்பிடுகையில் தொடர்ந்து குறைந்து வருவதாக திமுக குற்றம் சாட்டியுள்ளது.

கடந்த 2025-ஆம் ஆண்டுடன் ஒப்பிடுகையில் 2026-ஆம் ஆண்டின் ஜூலை, ஆகஸ்ட் மாதங்களில் ஜி.எஸ்.டி வசூல் 1 சதவிகிதமும் செப்டம்பர் மாதம் 5 சதவிகிதமும் குறைந்ததாக திமுக தெரிவிக்கிறது.

ஆனால் முடிந்த செப்டம்பர் மாதத்தில் மாநில அரசுக்கு கிடைத்த ஜி.எஸ்.டி வரி பாக்கி முந்தைய ஆண்டைவிட 16% கூடுதலாக இருப்பதாக தமிழ்நாடு அரசின் வணிக வரித்துறையின் குறிப்பு தெரிவிக்கிறது.

ஜி.எஸ்.டி தரவுகள் கூறுவது என்ன, மாநில அரசின் தற்போதைய நிலை என்ன ஆகியவற்றை புரிந்துகொள்ள பொருளாதார நிபுணர்களிடம் பிபிசி தமிழ் பேசியது.

தமிழ்நாட்டின் வரி வசூல் சரிந்தது உடனடியாக பதற்றமடைய வேண்டிய விஷயமில்லை என்றாலும் அதனை கவனத்தில் கொண்டு உரிய நடவடிக்கைகளை எடுக்க வேண்டும் என்கிறார் பொருளாதார நிபுணரும் பேராசிரியருமான ஜோதி சிவஞானம்.

பொருளாதார சூழலைக் கருத்தில் கொண்டு மாநில அரசு தேவையான இடையீட்டு நடவடிக்கைகளை மேற்கொள்ள வேண்டும் என்கிறார் பொருளாதார நிபுணரான கிருஷ்ணமூர்த்தி பிரபாகர்.

திமுக குற்றச்சாட்டு என்ன?

ஜி.எஸ்.டி வசூல் தொடர்ந்து மூன்று மாதங்களாகக் குறைந்து, 5% வரை சரிவைச் சந்தித்திருப்பது வேதனையளிப்பதாக முன்னாள் மாநில நிதியமைச்சர் தங்கம் தென்னரசு தனது எக்ஸ் பக்கத்தில் பதிவிட்டுள்ளார்.

திமுக ஆட்சிக் காலத்தில் நாட்டின் பிற மாநிலங்களை விஞ்சி, இரட்டை இலக்க வளர்ச்சியோடு ஜி.எஸ்.டி வசூலில் சாதனை படைத்ததாகவும் அவர் தனது பதிவில் குறிப்பிட்டுள்ளார்.

"நாட்டின் பிற மாநிலங்கள் தொடர் தொழில் வளர்ச்சியைக் காணும்போது, தமிழ்நாட்டில் மட்டும் உற்பத்தி முடங்கி, நுகர்வு சுருங்கி வருவது நிர்வாகக் கோளாறின் வெளிப்படையான அடையாளம். தொழில் முதலீடுகளையும் நிதி மேலாண்மையையும் தொலைநோக்குப் பார்வையோடு கையாண்ட திராவிட மாடல் ஆட்சியின் வழிகாட்டுதல் இன்றி, பொருளாதாரத்தை முடக்கியுள்ள இந்த சீர்கேட்டிற்கு ஆளும் அரசு என்ன பதில் சொல்லப் போகிறது?." என்றும் அவர் தனது பதிவில் தெரிவித்துள்ளார்.

ஜி.எஸ்.டி வசூல் தேசிய அளவில் நேர்மறையாக உள்ளது என்றும் தமிழ்நாட்டில் எதிர்மறையாக இருப்பதாகவும் தமிழகத்தின் முன்னாள் தொழில்துறை அமைச்சர் டி.ஆர்.பி ராஜா தெரிவித்துள்ளார்.

இது தொடர்பாக அவர் வெளியிட்ட எக்ஸ் தளப் பதிவில், "பெரும்பாலான முக்கிய மாநிலங்களில் பொருளாதார நடவடிக்கைகளும் வரி வருவாயும் அதிகரித்து வரும் நிலையில், இந்த முக்கியமான குறியீட்டில் தமிழ்நாடு அதற்கு நேர்மாறான திசையில் சென்று கொண்டிருக்கிறது!" எனத் தெரிவித்துள்ளார்.

இது உடனடி கவனம் தேவைப்படும் எச்சரிக்கை சமிக்ஞை என்று கூறும் டி.ஆர்.பி ராஜா இந்த வேறுபாட்டிற்கான காரணங்களை தவெக அரசு விளக்க வேண்டும் என்றும் துறைவாரியான விவரங்களையும் வெளியிட வேண்டும் என்றும் தெரிவித்தார்.

தமிழ்நாட்டில் ஜி.எஸ்.டி வசூல் குறைந்துள்ளதா?

மாநில வாரியான ஜிஎஸ்டி (GST) வருவாய் வளர்ச்சி தரவுகளின்படி, தமிழ்நாட்டின் ஜி.எஸ்.டி வசூல் கீழே கொடுக்கப்பட்டுள்ளன.

2025 ஜூலை: ரூ.10,536 கோடி, 2026 ஜூலை: ரூ.10,414 கோடி, வித்தியாசம்: -1%

2025 ஆகஸ்ட்: ரூ.10,329 கோடி. 2026 ஆகஸ்ட்: ரூ.10,189 கோடி, வித்தியாசம்: -1%

2025 செப்டம்பர்: ரூ.10,670 கோடி, 2026 செப்டம்பர்: ரூ.10,188 கோடி, வித்தியாசம்: -5%

இந்தத் தரவுகளை மேற்கோள்காட்டி தான் திமுக கேள்வி எழுப்பியிருந்தது.

தமிழக வணிக வரித்துறை பதில் என்ன?

இந்த நிலையில் தமிழக வணிக வரித்துறை வழங்கியதாக குறிப்பு ஒன்றை மேற்கோள்காட்டி ஊடகங்கள் செய்தி வெளியிட்டுள்ளன.

அதன்படி, எஸ்.ஜி.எஸ்.டி மற்றும் ஐ.ஜி.எஸ்.டியிலிருந்து கிடைக்கும் எஸ்.ஜி.எஸ்.டி பங்கு ஆகியவற்றை சேர்க்கையில் கணக்கீடுகளுக்கு பிறகான ஜி.எஸ்.டியில் செப்டம்பர் மாதம் மாநில அரசுக்கு 17% கூடுதல் தொகை வந்துள்ளதாக தெரிவித்துள்ளது.

மேலும் அந்தக் குறிப்பில், "இந்த இடைவெளி ஜி.எஸ்.டி வரியின் இயல்பை சுட்டிக்காட்டுகிறது. தமிழ்நாட்டின் நிதி ஆரோக்கியத்திற்கு முக்கியமான புள்ளிவிவரங்கள் என்பவை, தீர்வு நடவடிக்கைகளுக்குப் பிந்தைய வரவுகளே ஆகும், அதாவது, ஒருங்கிணைந்த சரக்கு மற்றும் சேவை வரி (IGST - ஐ.ஜி.எஸ்.டி) பகிர்ந்தளிக்கப்பட்டது போக மாநிலத்திற்கு எஞ்சியிருக்கும் தொகையே." என்று தெரிவித்ததாக கூறப்பட்டுள்ளது.

'மந்த நிலையின் தொடக்கமாக பார்க்க வேண்டும்'

ஆனால், இந்த இரண்டு புள்ளி விவரங்களையும் ஒப்பிட்டுப் பார்க்கக்கூடாது என்கிறார் ஜோதி சிவஞானம்.

பிபிசி தமிழிடம் பேசிய அவர், "ஜி.எஸ்.டி வசூல் என்பது குறிப்பிட்ட மாதத்தில் நிகழக்கூடியது. ஆனால் ஐ.ஜி.எஸ்.டி மாநிலங்களுக்கு திருப்பிக் கொடுக்கப்படுவது. அது தாமதமாக நடக்கக்கூடிய ஒன்று. ஒரு பொருளின் உற்பத்தி மற்றும் விற்பனை எப்போது வேண்டுமானாலும் நடந்திருக்கலாம். குறிப்பிட்ட செப்டம்பர் மாதத்தில் தான் நடந்திருக்க வேண்டும் என்கிற அவசியமில்லை. கடந்த காலங்களில் மாநிலத்தின் ஜி.எஸ்.டி வசூல் எவ்வளவு உயர்ந்துள்ளது என்பது தான் அளவீடாக இருந்துள்ளது.

ஏனென்றால் அது தான் மக்களின் நுகர்வைக் காட்டுகிறது. மாநிலத்தின் ஜி.எஸ்.டி வசூல் குறைகிறது என்றால் மக்களின் நுகர்வு குறைகிறது அல்லது மக்கள் செலவு செய்வதில்லை, பொருட்களை வாங்குவதில்லை என்றே அர்த்தம். இதனால் உடனடியாக பதற்றமடைய வேண்டியதில்லை. ஆனால் இதனை ஒரு மந்தநிலையின் தொடக்கமாகவே பார்க்க வேண்டும்." என்றார்.

தொடர்ந்து பேசிய அவர், "மாநிலத்தின் வளர்ச்சி குறைந்து, விலைவாசி உயர்வதன் வெளிப்பாடாகவும் இது இருக்கலாம். பொருட்களை மக்கள் வாங்கும்போது அல்லது நுகரும்போது தான் வரி வசூல் அதிகரிக்கும். ஓராண்டுக்கான அளவை தான் நாம் பார்க்க வேண்டும்.

இருந்தபோதிலும் தொடர்ந்து நேர்மறையாக இருக்கின்ற ஒரு குறியீடு திடீரென எதிர்மறையாகச் செல்கிறது என்றால் அதில் கவனத்தில் கொள்ள வேண்டிய விஷயம். மக்களின் நுகர்வு குறைந்தால் மாநிலத்தின் பொருளாதார நிலையும் அதனால் பாதிக்கப்படும். இதே நிலை தொடர்ந்தால் அரசாங்கம் தீவிரமான நடவடிக்கைகளை எடுக்க வேண்டியிருக்கும்." என்றார்.

செப்டம்பர் மாத ஜி.எஸ்.டி தரவுகளின்படி, பெரிய மாநிலங்களில் தமிழ்நாடு மட்டுமே எதிர்மறையான வளர்ச்சியைப் பதிவு செய்துள்ளதாகக் கூறும் அவர், அதுவும் கவனத்தில் கொள்ள வேண்டிய விஷயம் என்றும் தெரிவித்தார்.

'வரி வசூல் திறம்பட இல்லை'

கணக்கீடுகளுக்குப் பிறகு மாநில அரசுக்குக் கிடைக்கும் ஜி.எஸ்.டியும் மாநில சொந்த ஜி.எஸ்.டி வசூலையும் ஒப்பிட முடியாது என்கிற கருத்தையே பொருளாதார நிபுணரும் பேராசிரியருமான கிருஷ்ணமூர்த்தி பிரபாகரும் முன்வைக்கிறார்.

பிபிசி தமிழிடம் பேசிய அவர், "கடந்த முறை ஜி.எஸ்.டி வரி விகிதங்கள் சீரமைக்கப்பட்டபோது மாநில அரசுகள் பெருமளவில் வருவாய் இழந்தன. ஆனால் மாநில அரசுகளுக்கு இழப்பீடு வழங்குவது முடிந்துவிட்டது.

புகையிலைப் பொருட்களுக்கு கூடுதல் வரி விதித்ததன் மூலம் வருவாய் இழப்பை மாநில அரசால் ஓரளவுக்குச் சமாளிக்க முடிந்தது. தற்போதைய நிலைக்கு நுகர்வு குறைந்ததோடு வரி வசூல் திறம்பட இல்லாதததும் இதற்கு ஒரு காரணம்.

மற்ற தென்னிந்திய மாநிலங்கள் எல்லாம் நேர்மறையான விகிதங்களைப் பதிவு செய்திருக்கும்போது தமிழ்நாடு எதிர்மறையான விகிதங்களைப் பதிவு செய்வது மக்களிடம் நுகர்வு குறைவதன் வெளிப்பாடாகவே இருக்கிறது. மற்ற மாநிலங்கள் மற்றும் தேசிய சராசரி ஒரு திசையில் செல்ல மாநிலத்தின் போக்கு எதிர்திசையில் செல்வது நிச்சயம் மாநிலம் சார்ந்த காரணிகளாலே உருவாகின்றன." என்றார்.

தொடர்ந்து பேசிய அவர், "தமிழ்நாட்டி பால், வேளாண் மற்றும் உணவுப் பொருட்களின் விலை தொடர்ந்து அதிகரித்து வருகிறது. இது மாநிலத்தின் வருவாயை பாதிக்கும். அதன் விளைவாக தமிழ்நாடு அதிகம் கடன் பெற வேண்டியிருக்கும், அதனால் வட்டி செலவும் அதிகரிக்கும். தமிழ்நாடு அரசு முன்னெச்சரிக்கையுடன் செயல்பட வேண்டும்." என்றார்.

இது தொடர்பாக கருத்து பெற மாநில வணிக வரித்துறையை பிபிசி தமிழ் தொடர்பு கொண்டது. ஊடகங்களின் வெளிவந்துள்ள துறையின் குறிப்புகளையே மேற்கோள் காட்டுமாறு பிபிசி தமிழிடம் தெரிவிக்கப்பட்டது.

- இது, பிபிசிக்காக கலெக்டிவ் நியூஸ்ரூம் வெளியீடு