ஏஐ நிறுவனங்கள் திவாலானால் உங்கள் ரகசியங்கள் விற்பனைக்கு வரக்கூடுமா?

ஏஐ சாட்பாட்
    • எழுதியவர், தாமஸ் ஜெர்மைன்
  • பிரசுரிக்கப்பட்டது
  • வாசிக்கும் நேரம்: 4 நிமிடங்கள்

ஏஐ நிறுவனங்களிடம் நீங்கள் பகிர்ந்துகொள்ளும் தனிப்பட்ட தகவல்கள், அந்த நிறுவனங்கள் மூடப்பட்ட பிறகு என்னவாகும் என்ற கேள்வி தற்போது முக்கியத்துவம் பெற்றுள்ளது. Character.ai நிறுவனத்தின் திவால் நிலை, ஏஐ தொடர்பான அதிகம் பேசப்படாத தனியுரிமை ஆபத்தை வெளிச்சத்துக்குக் கொண்டுவந்துள்ளது.

உங்களுக்கு ஓர் ஏஐ காதலி வேண்டுமா? அதற்கு கேரக்டர்.ஏஐ (Character.ai) என்ற சாட்பாட் நிறுவனத்தை அணுகலாம். சில தினங்களுக்கு முன்பு நான் அந்த நிறுவனத்தில் கணக்கைத் தொடங்கியபோது எனக்குக் கிடைத்த முதல் பரிந்துரை இதுதான். 'ஜெசிகா' என்ற சாட்பாட், தனது பெற்றோர் வீட்டில் இல்லை என்றும், என்னுடன் பாலியல் ரீதியான உரையாடலில் ஈடுபட விரும்புவதாகவும் தெரிவித்தது. எனக்கு அதில் விருப்பமில்லை.

ஆனால், கோடிக்கணக்கானோர் கேரக்டர்.ஏஐ சாட்பாட்களுடன் உறவுகளை வளர்த்துக்கொண்டனர். அவர்களில் குழந்தைகளும் அடங்குவர். சில ஏஐ 'கற்பனை கதாபாத்திரங்கள்', தாங்கள் வழக்கறிஞர்கள் என்றும் உரிமம் பெற்ற மனநல மருத்துவர்கள் என்றும் பயனர்களிடம் கூறுகின்றன.

இந்நிலையில், கேரக்டர்.ஏஐ நிறுவனம் திவால் நிலையை எதிர்கொண்டுள்ளதால், பயனர்களின் தரவுகள், உரையாடல்கள் மற்றும் ரகசியங்கள் விற்பனைக்கு வரக்கூடிய சூழல் உருவாகியுள்ளது.

Character.ai

கேரக்டர்.ஏஐ-ஐ ஒருபோதும் பயன்படுத்தாதவர்கள்கூட இந்தத் தனியுரிமை ஆபத்துகள் குறித்து கவலைப்பட வேண்டும் என்று நிபுணர்கள் என்னிடம் தெரிவித்தனர்.

ஏனெனில், இது எதிர்காலத்தில் உருவாகக்கூடிய மிகப் பெரிய நெருக்கடியின் தொடக்கமாக இருக்கலாம் என்று அவர்கள் அஞ்சுகின்றனர். நல்ல செய்தி என்னவென்றால், சில எளிய நடவடிக்கைகள் மூலம் நமது தகவல்களைப் பாதுகாத்துக்கொள்ள முடியும்.

பிரச்னை என்னவென்றால், நாம் தற்போது ஏஐ தொழில்நுட்பத்தின் முதலீட்டுக் குமிழியில் (ஏஐ தொழில்நுட்ப நிறுவனங்களின் மதிப்பு, முதலீடு மற்றும் எதிர்பார்ப்புகள் உண்மையான பொருளாதார அடிப்படைகளைவிட அதிகமாக உயர்ந்து, ஒரு கட்டத்தில் சரிந்து வீழக்கூடிய சூழல்) இருக்கிறோம் என்று பல ஆய்வாளர்கள் கருதுகின்றனர்.

ஏஐ கருவிகளை உருவாக்குவதற்கும் இயக்குவதற்கும் மிகப் பெரிய அளவில் செலவாகிறது. இதனால், சில நிறுவனங்களால் ஒருபோதும் லாபம் ஈட்ட முடியாமல் போகலாம்.

இந்த குமிழி வெடித்தால், ஏராளமான ஏஐ நிறுவனங்கள் ஒன்றிணையலாம் அல்லது மூடப்படலாம். அப்போது, கோடிக்கணக்கான மக்கள் ஏஐ கருவிகளிடம் பகிர்ந்துகொள்ளும் தரவுகளை யார் வேண்டுமானாலும் வாங்கும் நிலை ஏற்படலாம். அந்தத் தரவுகள் இறுதியில் என்னவாகின்றன என்பதைக்கூட நீங்கள் அறிந்துகொள்ள முடியாமல் போகலாம்.

நிறுவனங்கள் திவாலாகும்போது அவற்றின் தரவுகள் விற்பனை செய்யப்படுவது புதிதல்ல. ஆனால், ஏஐ தொழில்நுட்பம் இந்தப் பிரச்னையை மேலும் மோசமாக்கக்கூடும்.

"மனிதர்களைப் போல உரையாடும் சாட்பாட்களிடம் பேசும்போது, மக்கள் தங்களைப் பற்றிய மிக அதிகமான தனிப்பட்ட மற்றும் உணர்வுப்பூர்வமான தகவல்களைப் பகிர்ந்துகொள்கின்றனர்" என்கிறார் மின்னணுத் தனியுரிமைத் தகவல் மையம் எனும் அமைப்பின் ஏஐ மற்றும் மனித உரிமைகள் திட்ட இயக்குநர் காலி ஷ்ரோடர்.

ஏஐ நிறுவனம்

எனது ஏஐ காதலி ஜெசிகாவுடனான உறவு 10 நிமிடங்களுக்கு மேல் நீடித்திருந்தால், அதனிடம் நான் என்னென்ன விஷயங்களைப் பகிர்ந்திருப்பேன் என்று கற்பனை செய்து பாருங்கள்.

நீங்கள் ஏஐ பயன்படுத்துவதில்லையா? அப்படியிருந்தாலும் உங்களுக்கு ஆபத்து இருக்கிறது. ஏனெனில், பயனர்கள் தங்களது நண்பர்கள் மற்றும் குடும்பத்தினரைப் பற்றிய தகவல்களையும் சாட்பாட்களிடம் பகிர்ந்துகொள்கின்றனர் என்கிறார் ஷ்ரோடர்.

"உதாரணமாக, உங்கள் அம்மா குறித்து நீங்கள் என்ன நினைக்கிறீர்கள் என்பதைப் பகிர்ந்துகொள்ளலாம். அல்லது, 'எனது நண்பர் ஒருவர் தன்பாலின ஈர்ப்பாளர் என்பதை என்னிடம் தெரிவித்தார். அதற்கு நான் எப்படி எதிர்வினையாற்ற வேண்டும்?' என்று கேட்கலாம். இதன்மூலம், கேரக்டர்.ஏஐ-ஐ ஒருபோதும் பயன்படுத்தாதவர்களின் தகவல்கள்கூட அதன் தரவுத் தொகுப்பில் இடம்பெறுகின்றன."

இதன் பொருள், ஏதோ ஒரு வகையில் நாம் அனைவருமே ஆபத்தை எதிர்கொள்ளக்கூடும் என்பதுதான்.

சாட்பாட்கள் உங்கள் ரகசியங்களை வெளியிடத் தொடங்கும்போது

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

திவால் நிலையை எதிர்கொண்டுள்ள கேரக்டர்.ஏஐ, தனது சில சொத்துகளை 20 மில்லியன் டாலருக்கு டிஸ்னி நிறுவனத்துக்கு விற்க ஒப்புக்கொண்டுள்ளது. ஆனால், பயனர்களின் தரவுகள் இந்த ஒப்பந்தத்தில் இடம்பெறவில்லை. எனவே, மிக்கி மவுஸும் அவரது சக ஊழியர்களும் ஜெசிகாவுடனான எனது அதிர்ச்சியளிக்கும் உரையாடலை ஒருபோதும் பார்க்காமல் போகலாம்.

இருப்பினும், நீதிமன்றத்தில் தாக்கல் செய்யப்பட்ட ஆவணங்களின்படி, கேரக்டர்.ஏஐ தனது தரவுகளை நிறுவனத்தை வாங்கும் மற்றவர்களுக்கு விற்பனை செய்ய முடியும். இதனால், பலரும் அதிருப்தி அடைந்துள்ளனர். அவர்களில் அமெரிக்க அதிகாரிகளும் அடங்குவர்.

அமெரிக்காவின் 40 மாகாணங்களைச் சேர்ந்த அரசு வழக்கறிஞர்கள் இணைந்து, குழந்தைகளின் பாதுகாப்பு மற்றும் தனியுரிமையை உறுதிப்படுத்தும் நடவடிக்கைகளை மேற்கொள்ளுமாறு நீதிபதியிடம் கோரிக்கை விடுத்துள்ளனர். இது முக்கியமான நடவடிக்கை என்றாலும், மாகாணங்கள் முன்வைத்துள்ள கோரிக்கைகளைச் செயல்படுத்துவதற்கான அதிகாரம் எந்த அளவுக்கு இருக்கும் என்பது கேள்விக்குறியே.

"அமெரிக்காவில் வலுவான தனியுரிமைப் பாதுகாப்புச் சட்டங்கள் இல்லாத நிலையில், அவர்களால் செய்யக்கூடியவை மிகவும் குறைவு" என்கிறார், அமெரிக்காவின் வடக்கு கரோலினா பல்கலைக்கழகத்தின் சட்டப் பேராசிரியரும், ’Unjust Debts: How Our Bankruptcy System Makes America More Unequal’ என்ற நூலின் ஆசிரியருமான மெலிசா ஜேக்கபி.

சில சட்டங்களின்படி, நிறுவனங்கள் தாங்கள் என்னென்ன தகவல்களைச் சேகரிக்கின்றன, அவற்றை எவ்வாறு பயன்படுத்துகின்றன என்பதைத் தங்களது தனியுரிமைக் கொள்கைகளில் பயனர்களுக்குத் தெரிவிக்க வேண்டும். ஆனால், அந்தச் சட்ட ஆவணங்களை ஆழமாகப் படித்துப் பார்த்தால், அதில் குறிப்பிடப்பட்டுள்ள பல வாக்குறுதிகள் பொருந்தாத சூழல்கள் பட்டியலிடப்பட்டிருப்பதைக் காணலாம்.

ஏஐ நிறுவனம்

"அத்தகைய விதிவிலக்குகளில் நிறுவனங்கள் திவாலாவது அடிக்கடி இடம்பெறுகிறது. இது மிகப் பெரிய ஆபத்து. ஏனெனில், ஒரு நிறுவனம் திவாலானவுடன், உங்களுக்கு இருப்பதாக நீங்கள் நம்பிய பல பாதுகாப்புகள் திடீரெனப் பொருந்தாமல் போய்விடுகின்றன" என்கிறார் ஷ்ரோடர்.

ஐரோப்பிய ஒன்றியம் போன்ற சில பகுதிகளில் வலுவான தனியுரிமைப் பாதுகாப்புச் சட்டங்கள் உள்ளன. இருப்பினும், நிறுவனங்கள் திவாலாகும்போது அவற்றின் தரவுகள் விற்பனை செய்யப்படுவது அங்கும் நடைபெறுகிறது. பொதுவாக, அந்தத் தரவுகளை வாங்கும் நிறுவனம், ஏற்கெனவே நடைமுறையில் இருந்த தனியுரிமைக் கொள்கையைப் பின்பற்ற வேண்டும். ஆனால், அந்தக் கொள்கைகள்கூட தரவுகளை வாங்குபவர்களுக்கு அவற்றைப் பயன்படுத்துவதில் பரந்த அளவிலான சுதந்திரத்தை வழங்கக்கூடும். இதற்கு கேரக்டர்.ஏஐ நிறுவனமே சிறந்த உதாரணம் என்கிறார் ஷ்ரோடர்.

அந்நிறுவனத்தின் தனியுரிமைக் கொள்கையின்படி, பயனர்களின் தரவுகளைப் புதிய அம்சங்களை உருவாக்கவும், ஏஐ மாதிரிகளைப் பயிற்றுவிக்கவும், அல்காரிதம்களை மேம்படுத்தவும், இலக்கு சார்ந்த விளம்பரங்களுக்காகப் பயனர்களின் சுயவிவரங்களை உருவாக்கவும் பயன்படுத்த முடியும்.

எனவே, கேரக்டர்.ஏஐ நிறுவனத்தின் தரவுகளை வாங்கும் எந்தவொரு நிறுவனமும் இதே நோக்கங்களுக்காக அவற்றைப் பயன்படுத்த முடியும்.

"நான் மிகவும் கவலைப்படக்கூடிய விஷயங்கள் இவைதான். இந்த நிறுவனங்கள் சேகரிக்கும் தகவல்கள் எந்த அளவுக்கு உணர்வுப்பூர்வமானவை என்பதைக் கருத்தில் கொண்டால், அதன் விளைவுகள் உண்மையிலேயே அச்சமூட்டக்கூடியதாக இருக்கலாம்" என்கிறார் ஷ்ரோடர்.

உதாரணமாக, திரையில் செலவிடும் நேரத்தைக் கட்டுப்படுத்தியதற்காகத் தனது பெற்றோரைக் கொல்லுமாறு கேரக்டர்.ஏஐ சாட்பாட் ஒன்று இளம் வயதினரைத் தூண்டியதாகக் கூறப்படுகிறது. அந்த நிறுவனத்தின் ஏஐ சாட்பாட் தற்கொலைக்குத் தூண்டியதாகக் கூறப்பட்டதைத் தொடர்ந்து, 14 வயது சிறுவன் ஒருவன் தனது உயிரை மாய்த்துக்கொண்டான். இந்தச் சம்பவங்கள் தொடர்பான உரையாடல்கள் மட்டுமின்றி, கேரக்டர்.ஏஐ நிறுவனத்திடம் உள்ள ஏராளமான பிற தரவுகளும் நீங்கள் இதுவரை கேள்விப்பட்டிராத நிறுவனங்களின் கைகளுக்குச் செல்லக்கூடும்.

இந்த வழக்குகள் தொடர்பாகத் தீர்வு காணப்பட்டுள்ளதாகவும், பாதுகாப்பான தயாரிப்புகளை உருவாக்க பாதிக்கப்பட்ட குடும்பங்களுடன் இணைந்து செயல்பட உறுதிபூண்டுள்ளதாகவும் கேரக்டர்.ஏஐ நிறுவனத்தின் செய்தித் தொடர்பாளர் தெரிவித்துள்ளார். ஆனால், குழந்தைகளின் தனியுரிமை தொடர்பான குறிப்பிட்ட கேள்விகளுக்கு அவர் பதிலளிக்கவில்லை.

"கடந்த ஓராண்டில், ஏஐ பாதுகாப்பு மற்றும் பதின்ம வயதினரின் பாதுகாப்பு தொடர்பாக கேரக்டர்.ஏஐ பல புதுமையான மற்றும் உறுதியான நடவடிக்கைகளை எடுத்துள்ளது. இந்த முயற்சிகளைத் தொடர்ந்து முன்னெடுப்பதுடன், ஏஐ துறையில் உள்ள பிற நிறுவனங்களும் இதேபோன்ற பாதுகாப்புத் தரநிலைகளைப் பின்பற்ற வேண்டும் என்று தொடர்ந்து வலியுறுத்துவோம்" என அந்தச் செய்தித் தொடர்பாளர் கூறியுள்ளார்.

கேரக்டர்.ஏஐ என்பது ஒரே ஒரு நிறுவனம் மட்டுமே. ஆனால், பொருளாதாரத்தில் குறிப்பிடத்தக்க சரிவு ஏற்பட்டால், இதுபோன்று திவாலாகும் நிறுவனங்களில் இதுவே முதலாவதாக இருக்கலாம் என்று ஷ்ரோடர் கவலை தெரிவிக்கிறார்.

"ஏஐ நிறுவனங்களிடம் உள்ள தகவல்களின் அளவு, நிறுவனங்கள் திவாலாகும் நடவடிக்கைகளின்போது மிகவும் மதிப்புமிக்க சொத்தாகக் கருதப்படும். மேலும், இதுபோன்ற தரவுகளை வேறு எதற்கெல்லாம் பயன்படுத்த முடியும், அவை எங்கு செல்லும், யாருடன் பகிரப்படும், அதனால் நுகர்வோருக்கு என்னென்ன ஆபத்துகள் ஏற்படும் என்பதையெல்லாம் நினைத்துப் பார்க்கும்போது, கூடுதல் விதிமுறைகள் இல்லாதது குறித்து நான் மிகவும் கவலைப்படுகிறேன்" என்கிறார் அவர்.

ஏஐ நிறுவனம்

இதிலிருந்து உங்களைப் பாதுகாத்துக்கொள்ள என்ன செய்யலாம்?

இதற்கான எளிய பதில்: ஏஐ நிறுவனங்களிடம் உள்ள உங்களது தரவுகளை நீக்கிவிடுங்கள்.

திவால் நிலை குறித்த அறிவிப்பில், தங்களது தரவுகளை எவ்வாறு நீக்குவது என்பதற்கான வழிமுறைகளை கேரக்டர்.ஏஐ நிறுவனம் வெளியிட்டுள்ளது.

எல்லா நாடுகளிலும் பயனர்களின் தரவுகளை நீக்குவதற்கு நிறுவனங்கள் அனுமதிக்க வேண்டும் என்ற கட்டாயம் இல்லை. இருப்பினும், ஒவ்வொரு நாட்டுக்கும் தனித்தனியாக வெவ்வேறு நடைமுறைகளை உருவாக்குவதற்குப் பதிலாக, பொதுவாக அனைவருக்கும் தரவுகளை நீக்கும் வசதியை நிறுவனங்கள் வழங்குகின்றன.

இது நிச்சயமாகச் சற்று சிரமமான வேலைதான். எனவே, இதுதான் நடைமுறை ஆலோசனை: உங்களைப் பற்றிய மிக முக்கியமான மற்றும் தனிப்பட்ட தகவல்களை எந்தெந்த இணையச் சேவைகள் சேமித்து வைத்திருக்கின்றன என்பதைச் சிந்தித்துப் பாருங்கள். அந்தச் சேவைகளைப் பயன்படுத்துவதை நிறுத்தினால், சில நிமிடங்கள் ஒதுக்கி அவற்றில் உள்ள உங்களது தரவுகளை நீக்க முயற்சி செய்யுங்கள்.

ஒவ்வொரு சேவைக்கும் தரவுகளை நீக்கும் நடைமுறை வேறுபடும். பொதுவாக, அந்த விவரங்களைத் தெரிந்துகொள்ள அந்தச் சேவையின் தனியுரிமை அமைப்புகள் அல்லது தனியுரிமைக் கொள்கையைப் பார்க்கலாம். வேறு வழி எதுவும் கிடைக்கவில்லை என்றால், வாடிக்கையாளர் சேவை மையத்தைத் தொடர்புகொள்ளலாம்.

உங்களது தரவுகளை எவ்வாறு நீக்குவது என்பதைக் கண்டறிவதில் சிரமம் இருந்தால், அதற்கான வழிமுறைகளைத் தெரிந்துகொள்ள ஏஐ சாட்பாட்டிடமே கேட்கலாம். ஆனால், அது அளிக்கும் பதில்களைச் சரிபார்த்துக்கொள்ள மறக்காதீர்கள்.

- இது, பிபிசிக்காக கலெக்டிவ் நியூஸ்ரூம் வெளியீடு