வங்கக்கடலில் இன்று புயல் உருவாகிறது - சென்னையில் நாளை முதல் மழையின் தீவிரம் அதிகரிக்க வாய்ப்பு

செயற்கைக்கோள் புகைப்படம்
பிரசுரிக்கப்பட்டது
வாசிக்கும் நேரம்: 3 நிமிடங்கள்

வங்கக்கடலில் நிலைகொண்டுள்ள ஆழ்ந்த காற்றழுத்தத் தாழ்வு மண்டலம், இன்று (நவம்பர் 16) மாலைக்குள் புயலாகவும், நாளை தீவிரப் புயலாகவும் வலுப்பெறும் என இந்திய வானிலை ஆய்வு மையம் கணித்துள்ளது.

இந்த வானிலை அமைப்பு நவம்பர் 19-ஆம் தேதி இரவு ஆந்திரப் பிரதேசக் கடற்கரைக்கு அருகே மிகத் தீவிரப் புயலாகச் செல்லக்கூடும் என்று கணிக்கப்பட்டுள்ளது.

இதன் தாக்கத்தால் தமிழகத்தில் நவம்பர் 18, 19ஆம் தேதிகளில் சில இடங்களில் மிக கனமழை பெய்யக்கூடும் என எச்சரிக்கை விடுக்கப்பட்டுள்ளது. சென்னை உள்ளிட்ட வட தமிழக மாவட்டங்களில் மழையின் தீவிரம், புயல் நகரும் பாதையைப் பொறுத்து அமையும் என கூறப்பட்டுள்ளது.

புயலாக வலுப்பெறும் வானிலை அமைப்பு

தென்கிழக்கு வங்கக்கடல் மற்றும் அதையொட்டிய தென்மேற்கு வங்கக்கடல் பகுதியில் உருவான காற்றழுத்தத் தாழ்வு மண்டலம், வடக்கு-வடமேற்கு திசையில் நகர்ந்து ஆழ்ந்த காற்றழுத்தத் தாழ்வு மண்டலமாக வலுப்பெற்றுள்ளது என வானிலை ஆய்வு மையம் தெரிவித்துள்ளது.

நவம்பர் 16-ஆம் தேதி அதிகாலை 5.30 மணி நிலவரப்படி, இந்த ஆழ்ந்த காற்றழுத்தத் தாழ்வு மண்டலம் கடந்த ஆறு மணி நேரத்தில் மணிக்கு 8 கி.மீ. வேகத்தில் வடக்கு-வடமேற்கு திசையில் நகர்ந்துள்ளது.

இலங்கையின் திருகோணமலையிலிருந்து சுமார் 630 கி.மீ. வடகிழக்கிலும், அந்தமான் நிகோபார் தீவுகளின் ஸ்ரீ விஜயபுரத்திலிருந்து 680 கி.மீ. மேற்கிலும், சென்னையிலிருந்து 720 கி.மீ. கிழக்கு-தென்கிழக்கிலும், விசாகப்பட்டினத்திலிருந்து 820 கி.மீ. தெற்கு-தென்கிழக்கிலும், ஒடிசாவின் கோபால்பூரிலிருந்து 940 கி.மீ. தெற்கிலும் இந்த வானிலை அமைப்பு நிலைகொண்டிருந்தது.

இது தொடர்ந்து வடக்கு-வடமேற்கு திசையில் நகர்ந்து இன்று மாலைக்குள் தெற்கு மற்றும் அதையொட்டிய மத்திய மேற்கு வங்கக்கடல் பகுதியில் புயலாக வலுப்பெறும்.

நவம்பர் 17-ஆம் தேதி மாலைக்குள் மத்திய மேற்கு வங்கக்கடலில் தீவிரப் புயலாக மாறும் என எதிர்பார்க்கப்படுகிறது.

அதன்பிறகு மேலும் வலுப்பெற்று வடமேற்கு திசையில் நகர்ந்து, நவம்பர் 19-ஆம் தேதி இரவு ஆந்திரப் பிரதேசக் கடற்கரைக்கு அருகே மத்திய மேற்கு வங்கக்கடல் பகுதியில் மிகத் தீவிரப் புயலாக நிலைகொள்ளக்கூடும் என இந்திய வானிலை ஆய்வு மையம் தெரிவித்துள்ளது.

இதற்கிடையே, ஆந்திரப் பிரதேசம் மற்றும் அதையொட்டிய தெற்கு ஒடிசா கடற்கரைப் பகுதிகளுக்கு 'புயலுக்கு முந்தைய கண்காணிப்பு' என்ற மஞ்சள் நிற எச்சரிக்கையை வானிலை ஆய்வு மையம் வெளியிட்டுள்ளது.

புயலின் சாத்தியமான பாதையை காட்டும் வரைபடம்
படக்குறிப்பு, புயலின் சாத்தியமான பாதையை காட்டும் வரைபடம்

தமிழகத்தில் எப்போது மழை பெய்யும்?

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

சென்னை வானிலை ஆய்வு மையத்தின் நேற்றைய கணிப்பின்படி, தமிழகத்தில் இன்று (நவம்பர் 16) வட கடலோர மாவட்டங்களின் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் மிதமான மழை பெய்யக்கூடும் என தெரிவிக்கப்பட்டுள்ளது.

தென் தமிழகத்தின் ஓரிரு இடங்களில் லேசான மழைக்கு வாய்ப்புள்ளது. ஏனைய தமிழகப் பகுதிகளில் பெரும்பாலும் வறண்ட வானிலை நிலவும் எனக் கணிக்கப்பட்டுள்ளது.

சென்னை மற்றும் புறநகர்ப் பகுதிகளில் இன்று வானம் பொதுவாக மேகமூட்டத்துடன் காணப்படும். நகரின் ஓரிரு பகுதிகளில் லேசானது முதல் மிதமான மழை பெய்யக்கூடும். அதிகபட்ச வெப்பநிலை 30 முதல் 31 டிகிரி செல்சியஸாகவும், குறைந்தபட்ச வெப்பநிலை 24 முதல் 25 டிகிரி செல்சியஸாகவும் இருக்கலாம் என சென்னை வானிலை ஆய்வு மையம் தெரிவித்துள்ளது.

நாளை (நவம்பர் 17) முதல் மழையின் தீவிரம் அதிகரிக்க வாய்ப்புள்ளது. சென்னை, திருவள்ளூர், செங்கல்பட்டு மாவட்டங்களில் ஓரிரு இடங்களில் இடியுடன் கூடிய கனமழை பெய்யக்கூடும். அப்போது மணிக்கு 40 முதல் 50 கி.மீ. வேகத்தில் பலத்த காற்று வீசக்கூடும்.

வட கடலோர தமிழகத்தின் ஏனைய பகுதிகளிலும், புதுச்சேரி மற்றும் காரைக்கால் பகுதிகளிலும் ஓரிரு இடங்களில் இடியுடன் கூடிய மிதமான மழை பெய்ய வாய்ப்புள்ளது. தென் தமிழகத்தின் ஓரிரு இடங்களில் இடியுடன் கூடிய லேசான மழை பெய்யக்கூடும். ஏனைய பகுதிகளில் வறண்ட வானிலை நிலவும் என வானிலை ஆய்வு மையம் தெரிவித்துள்ளது.

நவம்பர் 18-ஆம் தேதி சென்னை, திருவள்ளூர், செங்கல்பட்டு மாவட்டங்களில் ஓரிரு இடங்களில் இடியுடன் கூடிய கனமழை முதல் மிகக் கனமழை பெய்யக்கூடும். காஞ்சிபுரம், ராணிப்பேட்டை, திருவண்ணாமலை, விழுப்புரம், கடலூர், மயிலாடுதுறை மாவட்டங்களில் ஓரிரு இடங்களில் கனமழைக்கு வாய்ப்புள்ளது. வட கடலோர தமிழகத்தின் மற்ற பகுதிகள் மற்றும் காரைக்காலில் மிதமான மழையும், தென் தமிழகத்தில் லேசான மழையும் பெய்யக்கூடும்.

கோப்புப் படம்

நவம்பர் 19-ஆம் தேதி சென்னை, திருவள்ளூர், ராணிப்பேட்டை, செங்கல்பட்டு மாவட்டங்களில் ஓரிரு இடங்களில் கனமழை முதல் மிகக் கனமழை பெய்ய வாய்ப்புள்ளது. காஞ்சிபுரம், திருவண்ணாமலை, விழுப்புரம், கடலூர், மயிலாடுதுறை மாவட்டங்களில் ஓரிரு இடங்களில் கனமழை பெய்யக்கூடும். தஞ்சாவூர், திருவாரூர் மாவட்டங்கள் மற்றும் காரைக்காலில் மிதமான மழையும், தமிழகத்தின் மற்ற பகுதிகளில் லேசானது முதல் மிதமான மழையும் பெய்யக்கூடும்.

இந்த நாள்களில் மழையுடன் இடி, மின்னல் மற்றும் மணிக்கு 40 முதல் 50 கி.மீ. வேகத்தில் பலத்த காற்றும் வீசக்கூடும் என முன்னறிவிப்பில் குறிப்பிடப்பட்டுள்ளது.

வட தமிழகக் கடலோரப் பகுதிகளில் இன்று மணிக்கு 40 முதல் 50 கி.மீ. வேகத்திலும், இடையிடையே 60 கி.மீ. வேகத்திலும் காற்று வீசக்கூடும். நாளை இந்தக் காற்றின் வேகம் மணிக்கு 50 முதல் 60 கி.மீ. ஆகவும், இடையிடையே 70 கி.மீ. ஆகவும் அதிகரிக்கக்கூடும் என எச்சரிக்கப்பட்டுள்ளது.

மீனவர்களுக்கு எச்சரிக்கை

சென்னை காசிமேடு (கோப்புப் படம் )
படக்குறிப்பு, கோப்புப் படம்

தென்கிழக்கு வங்கக் கடல், தென்மேற்கு வங்கக் கடல் மற்றும் மத்திய வங்கக் கடல் பகுதிகளில் நவம்பர் 16 முதல் கடும் காற்று வீசக்கூடும் என்பதால், அந்தப் பகுதிகளுக்கு மீன்பிடிக்கச் செல்ல வேண்டாம் என அறிவுறுத்தப்பட்டுள்ளது.

குறிப்பாக, மத்திய வங்கக் கடல் பகுதியில் நவம்பர் 17-ஆம் தேதி முதல் மணிக்கு 90 முதல் 100 கி.மீ. வேகத்திலும், அதிகபட்சமாக 120 கி.மீ. வேகத்திலும் காற்று வீசக்கூடும். நவம்பர் 18-ஆம் தேதி முதல் அடுத்த இரண்டு நாள்களுக்கு மணிக்கு 100 முதல் 130 கி.மீ. வேகத்திலும், இடையிடையே 145 கி.மீ. வேகத்திலும் காற்று வீச வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

தமிழகத்தின் வட கடலோரப் பகுதிகளில் நவம்பர் 16-ஆம் தேதி மணிக்கு 40 முதல் 50 கி.மீ. வேகத்திலும், இடையிடையே 60 கி.மீ. வேகத்திலும் காற்று வீசக்கூடும். நவம்பர் 17ஆம் தேதி காற்றின் வேகம் மணிக்கு 50 முதல் 60 கி.மீ. ஆகவும், நவம்பர் 18, 19-ஆம் தேதிகளில் மணிக்கு 60 முதல் 70 கி.மீ. ஆகவும் அதிகரிக்கக்கூடும். நவம்பர் 20-ஆம் தேதி மணிக்கு 50 முதல் 60 கி.மீ. வேகத்திலும், 21ஆம் தேதி மணிக்கு 40 முதல் 50 கி.மீ. வேகத்திலும் காற்று வீசக்கூடும் எனத் தெரிவிக்கப்பட்டுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு