'உயிருடன் திரும்ப முடியாமல் போகலாம்' - அச்சத்தில் அவசர மருத்துவ உதவியை நாடியுள்ள இம்ரான் கான்

'உயிருடன் திரும்ப முடியாமல் போகலாம்' என்ற அச்சத்தில் அவசர மருத்துவ உதவியை நாடியுள்ள இம்ரான் கான்
    • எழுதியவர், கரோலின் டேவிஸ்
    • பதவி, பாகிஸ்தான் செய்தியாளர்
    • எழுதியவர், கெல்லி என்ஜி
    • பதவி, ‎
  • பிரசுரிக்கப்பட்டது
  • வாசிக்கும் நேரம்: 2 நிமிடங்கள்

சிறையில் இருக்கும் பாகிஸ்தானின் முன்னாள் பிரதமர் இம்ரான் கான், தனது உடல்நிலையும் தனது மனைவியின் உடல்நிலையும் தொடர்ந்து மோசமடைந்து வருவதாகக் கூறி, அவசர மருத்துவச் சிகிச்சை அளிக்குமாறு கோரிக்கை விடுத்துள்ளார்.

கிரிக்கெட் நட்சத்திரமும் அரசியல்வாதியுமான இம்ரான் கான், "74 வயதான தன்னை இடைவிடாமல் இத்தகைய சூழலில் வைத்திருப்பது, உயிருடன் திரும்ப முடியாத ஒரு நிலைக்கு தன்னைத் தள்ளிக் கொண்டிருப்பதாக" தனது வழக்கறிஞர் சல்மான் சஃப்தர் மூலமாக வெளியிட்ட கடிதத்தில் குறிப்பிட்டுள்ளார்.

இஸ்லாமாபாத்தில் உள்ள அதிகாரிகள், இம்ரான் கானை மருத்துவர்கள் வாரந்தோறும் பரிசோதித்து வருவதாகவும், அவரது உடல்நிலை "திருப்திகரமாக" இருப்பதாக மருத்துவர்கள் மதிப்பிட்டுள்ளதாகவும் தெரிவிக்கின்றனர்.

நூற்றுக்கும் மேற்பட்ட குற்றச்சாட்டுகளை எதிர்கொண்டுள்ள இம்ரான் கான், 2023 ஆகஸ்ட் மாதம் முதல் சிறையில் வைக்கப்பட்டுள்ளார். அவரது மனைவி புஷ்ரா பீபியும் கடந்த ஆண்டு அவருடன் சிறையில் அடைக்கப்பட்டார். ஊழல் முதல் அரசாங்க பரிசுப் பொருட்களை விற்பனை செய்தது வரையிலான தங்கள் மீதான வழக்குகள் அனைத்தும் அரசியல் உள்நோக்கம் கொண்டவை என்று இம்ரான் கான் வாதிட்டு வருகிறார்.

கடந்த ஓராண்டாக இம்ரான் கானின் உடல்நிலை குறித்த கவலைகள் அதிகரித்து வருகின்றன. சிறை அதிகாரிகள் உரிய நடவடிக்கை எடுக்கத் தவறியதால், அவரது வலது கண்ணின் பார்வையில் பெரும்பகுதியை அவர் இழந்துவிட்டதாக அவரது குடும்பத்தினர் தெரிவிக்கின்றனர்.

 பாகிஸ்தானின் முன்னாள் பிரதமர்
படக்குறிப்பு, தனக்கு "மூளை ரத்தக் கசிவு மற்றும் மாரடைப்பு ஏற்படுவதற்கு அதிக வாய்ப்புள்ளது" என மருத்துவர்கள் எச்சரித்துள்ளதாக பாகிஸ்தானின் முன்னாள் பிரதமர் இம்ரான் கான் தெரிவித்துள்ளார்

தனக்கு "மூளை ரத்தக் கசிவு மற்றும் மாரடைப்பு ஏற்படுவதற்கு அதிக வாய்ப்புள்ளது" என்றும், தனது இதயம் ஏற்கெனவே "பாதிக்கப்பட்டுவிட்டது" என்றும் மருத்துவர்கள் கூறியதாக இம்ரான் கான் தனது கடிதத்தில் எழுதியிருந்தார். தனது மனைவி புஷ்ரா பீபியின் உடல்நிலை குறித்தும் அவர் கவலை தெரிவித்துள்ளார். கடந்த ஏப்ரல் மாதம் அவருக்கு விழித்திரை விலகல் ஏற்பட்டதாகவும், ரகசியமாக அறுவை சிகிச்சை மேற்கொள்ளப்பட்டதாகவும் அவர் கூறியுள்ளார்.

மேலும், கூடுதல் அறுவை சிகிச்சை மேற்கொள்ளப்படாவிட்டால் அவர் பார்வையை இழக்க நேரிடும் என்று அஞ்சுவதாகவும் இம்ரான் கான் தெரிவித்துள்ளார்.

"எண்ணற்ற வழக்குகளில் சாத்தியமற்றதாகத் தோன்றிய சட்டப் போராட்டங்களை நான் எதிர்கொண்டுள்ளேன். நான் ஒருபோதும் பின்வாங்கவில்லை. ஆனால், இந்த அமைப்பு எனக்கு நீதி வழங்குவதை நிறுத்திவிட்டது" என்று அவர் எழுதியுள்ளார்.

தினமும் 22 மணிநேரம் வரை தனிமைச் சிறையில் அடைக்கப்பட்டு இருப்பதாகவும், அங்கு தனது குடும்பத்தினரைச் சந்திக்கவோ, புத்தகங்கள் மற்றும் தொலைக்காட்சியைப் பயன்படுத்தவோ அனுமதிக்கப்படுவதில்லை என்றும் அவர் தெரிவித்துள்ளார். இதனால் தனது மனநலம் "கடுமையாகப் பாதிக்கப்பட்டுள்ளதாகவும்" அவர் குறிப்பிட்டுள்ளார்.

கடந்த ஓராண்டில் தனது வழக்கறிஞர்களை நான்கு முறை மட்டுமே சந்தித்ததாகவும் அவர் கூறியுள்ளார். "நான் உயிருடன் இருந்தால் மட்டுமே நான் நிரபராதி என்பதை நிரூபிக்கும் நிலையில் தொடர்ந்து இருக்க முடியும்" என்றும் அவர் எழுதியுள்ளார்.

இம்ரான் கானின் இந்தக் குற்றச்சாட்டுகளை பாகிஸ்தான் நாடாளுமன்ற விவகாரங்கள் துறை அமைச்சர் தாரிக் ஃபசல் சௌத்ரி மறுத்துள்ளார். சிறையில் இம்ரான் கானுக்கு "அவர் விரும்பும் உணவு உள்ளிட்ட அனைத்து வசதிகளும் வழங்கப்படுகின்றன" என்று அவர் தெரிவித்துள்ளார். "தற்போது பாகிஸ்தானில் மிக அதிகமான வசதிகள் வழங்கப்படும் கைதி அவர்தான்" என்று அமைச்சர் செய்தியாளர்களிடம் கூறினார்.

இம்ரான் கான்
வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

மேலும், ஒரு வாரத்திற்கு முன்பு கண்ணில் ஊசி செலுத்துவதற்காக இம்ரான் கான் அரசு மருத்துவமனைக்கு அழைத்துச் செல்லப்பட்டதாகவும், அங்கு மருத்துவர்கள் அவரது உடல்நிலை "மருத்துவ ரீதியாகச் சீராக உள்ளது" என்று தெரிவித்ததாகவும் அதிகாரிகள் கூறுகின்றனர்.

இதற்கு முன்பு பாகிஸ்தான் தேசிய கிரிக்கெட் அணியின் கேப்டனாக செயல்பட்ட இம்ரான் கான், 2018 முதல் 2022 வரை அந்நாட்டின் பிரதமராகப் பதவி வகித்தார். 2023 மே மாதம் அவர் கைது செய்யப்பட்டதைத் தொடர்ந்து, அவரது ஆதரவாளர்கள் பெரிய அளவிலான வன்முறைப் போராட்டங்களில் ஈடுபட்டனர்.

லாகூரில் உள்ள ராணுவப் படைப்பிரிவுத் தளபதியின் இல்லத்திற்குள் புகுந்த அவர்கள், அங்கிருந்த சரவிளக்குகளை உடைத்து, மரச் சாமான்கள், ஓவியங்கள், மயில்கள் உள்ளிட்ட பலவற்றையும் கொள்ளையடித்துச் சென்றனர். இந்தப் போராட்டங்களில் குறைந்தது எட்டு பேர் உயிரிழந்தனர். வன்முறையைக் கட்டுப்படுத்த ராணுவம் வரவழைக்கப்பட்டது.

சிறையில் இருந்தாலும், பாகிஸ்தான் அரசியலில் இம்ரான் கான் தொடர்ந்து முக்கிய சக்தியாகத் திகழ்கிறார். அவரை விடுதலை செய்யக் கோரி, அக்டோபர் மாதத் தொடக்கத்தில் ஆயிரக்கணக்கான ஆதரவாளர்கள் பல நாட்கள் நீடித்த பேரணியில் பங்கேற்று வீதிகளில் திரண்டனர்.

இதைத் தொடர்ந்து, போராட்டங்களைக் கட்டுப்படுத்த அதிகாரிகள் கடுமையான நடவடிக்கைகளுக்கு உத்தரவிட்டதுடன், இம்ரான் கானின் கட்சிக்கு வலுவான ஆதரவு உள்ள கைபர் பக்துன்க்வா மாகாணத்தில் அவசர நிலையையும் அறிவித்தனர்.

முன்னாள் சர்வதேச கிரிக்கெட் அணி கேப்டன்கள், இம்ரான் கானுக்கு உரிய மருத்துவச் சிகிச்சை அளிக்க வேண்டும் என்று வலியுறுத்தி, பாகிஸ்தான் பிரதமர் ஷெபாஸ் ஷெரீஃபுக்கு சமீபத்திய மாதங்களில் பலமுறை கோரிக்கை விடுத்துள்ளனர்.

- இது, பிபிசிக்காக கலெக்டிவ் நியூஸ்ரூம் வெளியீடு