தமிழகத்தின் சிறு பண்ணைகளில் '45% கால்நடைகளுக்கு மலட்டுத்தன்மை' - விளைவு என்ன?

தமிழகத்தின் கோவை, ஈரோடு, திருப்பூர், திண்டுக்கல் மாவட்டங்களில் சிறு, குறு, நடுத்தர அளவிலான பால் பண்ணைகளில் மேற்கொள்ளப்பட்ட ஆய்வில், "கால்நடைகளில் கிட்டத்தட்ட 45% மலட்டுத்தன்மையுடன் இருப்பதும், ஐந்தில் ஒரு பங்குக்கு மேற்பட்ட கால்நடைகள் அடிக்கடி செயற்கை கருவூட்டல் செய்தும்கூட கருவுறாமல் இருப்பதும்" தெரிய வந்துள்ளது.

பால் உற்பத்தி மற்றும் விவசாயிகளின் வருவாயை பாதிக்கும் முக்கியமான இனப்பெருக்க சிக்கல் இருப்பதை அந்த ஆய்வு சுட்டிக்காட்டுகிறது. 2023 முதல் 2025 வரை 30 கிராமங்களில் 579 விவசாயிகளுக்குச் சொந்தமான 2,254 கால்நடைகளை உள்ளடக்கி நடத்தப்பட்ட இந்த ஆய்வில், 1,318 கால்நடைகளிடம் மலட்டுத்தன்மை குறித்த ஆய்வு செய்யப்பட்டது.

அவற்றில் 589, அதாவது 44.7%, மலட்டுத்தன்மை கொண்டவையாக வகைப்படுத்தப்பட்டன. தனியாக 1,207 கால்நடைகளில் நடத்தப்பட்ட ஆய்வில் 246, அதாவது 20.4%, 'தொடர் சினை பிடிக்காத கால்நடைகளாக' (repeat breeders) இருந்தது தெரிய வந்துள்ளது.

குமரகுரு லிபரல் கலை மற்றும் அறிவியல் கல்லூரி, குமரகுரு தொழில்நுட்ப கல்லூரி, எடின்பர்க் பல்கலைக் கழகத்தின் வெப்பமண்டல கால்நடைகளுக்கான மரபியல் மற்றும் நல்வாழ்வு ஆராய்ச்சி மையம் (Centre for Tropical Livestock Genetics and Health), குமரகுரு வேளாண் நிறுவனம், கால்நடைக் கல்லூரி உள்ளிட்ட நிறுவனங்களின் ஆய்வாளர்கள் மேற்கொண்ட ஆய்வு வெப்பமண்டல விலங்கு ஆரோக்கியம் மற்றும் உற்பத்தி (Tropical Animal Health and Production) என்ற ஆய்விதழில் மே 20, 2026 அன்று வெளியானது.

இந்த ஆய்வில், வழக்கமான சினைச் சுழற்சி இருந்தும், இனப்பெருக்கப் பாதையில் வெளிப்படையான பிரச்னை இல்லாத நிலையில், தொடர்ந்து மூன்று அல்லது அதற்கு மேற்பட்ட செயற்கை கருவூட்டல்களுக்குப் பிறகும் கருவுறாத நிலையாக 'repeat breeding' என்பது வரையறுக்கப்பட்டுள்ளது.

அதே நேரத்தில், 16 மாதங்களுக்கும் அதிகமான கன்று ஈனும் இடைவெளியுடன் கர்ப்பமாகாத கால்நடைகள், மூன்று வயதுக்கு மேல் இருந்தும் கர்ப்பமாகாத கிடாரி (கன்றீனா இளம் பசு, heifers) மற்றும் தொடர்ந்து சினை பிடிக்காத கால்நடைகள் 'மலட்டுத்தன்மை' என்று வகைப்படுத்தப்பட்டன.

எருமைகளில் அதிக பிரச்னை

ஜெர்சி கலப்பினம் 57.8%, ஹோல்ஸ்டெய்ன் – ஃப்ரிசயன் (Holstein-Friesian) கலப்பினம் 26.4% என்ற அளவில் கால்நடைகளிடையே இந்த ஆய்வு மேற்கொள்ளப்பட்டது. அதோடு, இதில் நாட்டு மாடுகள் 9.6%, எருமைகள் 6.2% என்ற விகிதத்தில் ஆய்வுக்கு உட்படுத்தப்பட்டன.

மலட்டுத்தன்மை விகிதத்தில் மாடுகளைவிட எருமைகள் அதிகமாக இருந்தன. கலப்பின எருமைகளில் அதிகபட்சமாக 62.5% இருந்தது. ஹோல்ஸ்டெய்ன் – ஃப்ரிசயன் கலப்பின வகையில் 46.9%, ஜெர்சி கலப்பின வகையில் 42.29%, நாட்டு மாடுகளில் 41.09% இருந்தன.

எருமைகளிலேயே தொடர் சினை பிடிக்காதவை அதிகமாக இருந்தன. எருமைகளில் இது 30%-ஆக இருந்த நிலையில், மாடுகளில் 19.87%-ஆக இருந்தது. வயது அதிகரிக்கும்போது சினை பிடிக்காத தன்மையும் அதிகரிக்கும் போக்கு காணப்பட்டது: நான்கு வயது வரை உள்ள கால்நடைகளில் 16.48%-ஆக இருந்த சினை பிடிக்காத தன்மை, 4.1 முதல் 6 வயது வரை 22.92%, ஆறு வயதுக்கு மேல் 22.67% இருந்தது.

பால் உற்பத்தியிலும் இந்தத் தொடர்பு காணப்பட்டது. நாளொன்றுக்கு நான்கு லிட்டர் அல்லது அதற்கும் குறைவாக பால் கொடுத்த கால்நடைகளில் தொடர் சினை பிடிக்காத தன்மை 25.82%-ஆக இருந்தது. 4.1 முதல் 8 லிட்டர் வரை பால் கொடுத்தவற்றில் இது 18.43 சதவிகிதமாகவும், எட்டு லிட்டருக்கு மேல் பால் கொடுத்தவற்றில் 17.11 சதவிகிதமாகவும் இருந்தது.

இந்த நிலைமை ஏற்படுவது ஏன்?

ஆய்வாளர்கள் இதற்குப் பல்வேறு காரணங்கள் இருப்பதாகக் குறிப்பிடுகின்றனர். ஊட்டச்சத்துக் குறைபாடு, சமச்சீரற்ற தீவனமிடுதல், விட்டமின் ஏ மற்றும் இ, செலினியம், துத்தநாகம், தாமிரம் போன்ற சத்துகளின் பற்றாக்குறை ஆகியவை இனப்பெருக்கத் திறனை பாதிக்கக்கூடுமென ஆய்வு குறிப்பிடுகிறது. வெப்பம், ஈரப்பதம் அதிகரிப்பதும் கருத்தரித்தல் விகிதத்தைக் குறைத்து, ஆரம்பகட்ட கரு இழப்பை அதிகரிக்கக்கூடும்.

விவசாயிகள் சினை அறிகுறிகளை சரியாகக் கண்டறியாதது, சரியான நேரத்தில் செயற்கைக் கருவூட்டல் செய்யாததும் ஆகியவையும் முக்கியக் காரணமாக இருப்பதாக இந்த ஆய்வு குறிப்பிடுகிறது.

தமிழ்நாடு கால்நடை மருத்துவ அறிவியல் பல்கலைக்கழக முன்னாள் ஓய்வுபெற்ற பேராசிரியர் கோபி ஹரிஹரன் பருவத்தில் இருக்கும் மாடுகளைக் கண்டறிவதற்கான அறிகுறிகளைக் குறிப்பிடுகிறார்.

"பருவத்தில் இருக்கும் மாடுகள் ஒரு விதமாகக் கத்தும், பக்கத்தில் இருக்கும் மாடு மீது தாவும், அதன் பிறப்புறுப்பில் இருந்து கண்ணாடி போன்ற திரவம் வெளியேறும். இந்த அறிகுறிகளைப் பார்த்தவுடனேயே செயற்கைக் கருவூட்டல் செய்ய வேண்டும். எருமைகளில் பருவ அறிகுறிகள் வெளிப்படையாக இருக்காது. பால் உற்பத்தி குறையும் என்ற நோக்கில் நெடுநாட்கள் செயற்கைக் கருவூட்டலை காலம் தாழ்த்துவது மலட்டுத்தன்மைக்கு வழிவகுக்கும்" என்றார்.

இதன் காரணமாக விவசாயிக்கு இழப்பு ஏற்படும் என்று பேராசிரியர் கோபி ஹரிஹரன் குறிப்பிடுகிறார். "பருவம் எய்தி 150 நாட்கள் காலம் தாழ்த்தி செயற்கைக் கருவூட்டல் செய்தால், ஒரு ஈத்து குறைந்துவிடும், அதனால் விவசாயிக்கு 4500 முதல் 6000 லிட்டர் பால் இழக்க நேரிடும்." என்கிறார்.

புரதச் சத்தை பருவமெய்திய காலத்தில் வழங்காமல் இருப்பதும் கால்நடைகளின் கருவுற்றல் ஆரோக்கியத்தை பாதிக்கும் என்று சுட்டிக் காட்டுகிறார் அவர். எருமைகளில் அறிகுறிகள் இல்லாத நிலை முக்கிய சவாலாக இருக்கலாம். இதனால் சினையை சரியான நேரத்தில் கண்டறிவது கடினமாகி, செயற்கைக் கருவூட்டல் தாமதமாகி தொடர் சினை பிடிக்காத தன்மை ஏற்பட வாய்ப்பு இருப்பதாக ஆய்வு விளக்குகிறது.

இதற்கிடையே, வெப்பமும் ஒரு சவாலாக மாறி வருவதாக பேராசிரியர் கோபி ஹரிஹரன் குறிப்பிடுகிறார். "வெப்பம் அதிகமாக இருக்கும் காலத்தில் கால்நடைகள் பருவம் எய்தாது. கிட்டத்தட்ட ஆண்டு முழுக்க வெப்பம் அதிகமாக இருப்பதால், வெப்பத்தைத் தணிக்கும் வழிகளை விவசாயிகளுக்கு எடுத்துரைக்கிறோம். தொடர்ந்து தண்ணீரை மெல்லிய அளவில் தெளிக்கும் முறை, மின் விசிறி வைப்பது, பச்சைப் புல் வழங்குவது ஆகியவற்றை வலியுறுத்துவதாக" கூறினார்.

சிறு விவசாயிகளிடம் மலட்டுத்தன்மை 38.87 சதவிகிதமாக இருந்த நிலையில், நடுத்தர விவசாயிகளிடம் 47.40 சதவிகிதமாகவும், பெரிய விவசாயிகளிடம் 45.36 சதவிகிதமாகவும் இருந்தது. இதற்கு சிறு பண்ணைகளில் கால்நடைகளை நெருக்கமாகக் கவனிப்பது ஒரு காரணமாக இருக்கலாம் என ஆய்வாளர்கள் கருதுகின்றனர்.

தமிழகத்தில் இதற்கு முன்பும் சுட்டிக்காட்டப்பட்ட பிரச்னை

தமிழ்நாடு கால்நடை மருத்துவ அறிவியல் பல்கலைக் கழக ஆய்வாளர்கள் 2019இல் காஞ்சிபுரம் மாவட்டத்தின் 27 கிராமங்களில் 729 ஜெர்சி கலப்பின மாடுகளை ஆய்வு செய்தனர். இதில் 450 மாடுகள் தொடர் சினை பிடிக்காதவை என அடையாளம் காணப்பட்டன.

அந்த ஆய்வில் கால்நடை மருத்துவ அறிவியல் பல்கலைக்கழகம் தாது கலவை வழங்கியதுடன் சரியான நேரத்திற்கு செயற்கைக் கருவூட்டல் செய்யப்பட்டது. 45 நாட்களுக்குப் பிறகு பரிசோதித்ததில் 312 மாடுகள் கர்ப்பமாகியிருந்தன; இதில் கருவுற்றல் விகிதம் 69.32%-ஆக இருந்தது.

பால் உற்பத்தியைத் தாண்டிய தாக்கம்

தொடர் சினை பிடிக்காத தன்மை மற்றும் மலட்டுத்தன்மை காரணமாக கன்று ஈனும் இடைவெளி நீள்கிறது. இதனால் ஒரு கால்நடையின் வாழ்நாளில் கிடைக்கும் கன்றுகளும், மொத்த பால் உற்பத்தியும் குறையலாம். அதே நேரத்தில், அடிக்கடி கருவூட்டல் செய்ய வேண்டி இருப்பதால் விவசாயிக்கு செலவும் அதிகரிக்கும். கடுமையான நிலைகளில் உற்பத்தி குறைந்த கால்நடைகள் முன்கூட்டியே விற்பனை செய்யப்படுவதும் முதலீட்டு இழப்பை ஏற்படுத்தும் என ஆய்வு குறிப்பிடுகிறது.

ஆய்வாளர்கள் சமச்சீரான உணவு, சரியான நேரத்தில் சினை கண்டறிதல், நம்பகமான செயற்கைக் கருத்தரித்தல், கால்நடை கண்காணிப்பு முறைகள் ஆகியவற்றை வலியுறுத்துகின்றனர். இந்த முடிவுகளை தமிழ்நாடு முழுவதற்குமான மலட்டுத்தன்மை விகிதமாக கருதக்கூடாது என்கிற ஆய்வாளர்கள், இந்த ஆய்வின் வரம்புகளைச் சுட்டிக் காட்டியுள்ளனர்.

- இது, பிபிசிக்காக கலெக்டிவ் நியூஸ்ரூம் வெளியீடு