அபிஷேக் வாண வேடிக்கை: பாகிஸ்தானை வீழ்த்தி ஆசிய விளையாட்டில் தங்கம் வென்றது இந்தியா

ஆசிய விளையாட்டுப் போட்டிகளில் அபிஷேக் சர்மா மற்றும் திலக் வர்மா ஆகியோரின் அதிரடி அரைசதங்களின் உதவியுடன் பாகிஸ்தானை 19 ரன்கள் வித்தியாசத்தில் வீழ்த்தி இந்தியா தங்கம் வென்றது.

டாஸ் வென்று முதலில் பேட்டிங் செய்யத் தீர்மானித்த இந்தியா நிர்ணயிக்கப்பட்ட 20 ஓவர்களில் 6 விக்கெட் இழப்பிற்கு 211 ரன் என்ற வலுவான ஸ்கோரை எட்டியது; தொடக்க ஆட்டக்காரரான அபிஷேக் 28 பந்துகளில் 61 ரன்கள் (7 சிக்ஸர்கள் உட்பட) விளாசினார்.

அருமையான தொடக்கம் காரணமாக, நடப்புச் சாம்பியனான இந்தியா 'பவர்-பிளே' முடிவில் 81-2 என்ற சிறப்பான நிலையை எட்டியது; பாகிஸ்தான் பந்துவீச்சை துவம்சம் செய்த அபிஷேக் சர்மா எட்டாவது ஓவரில் ஆட்டமிழந்தார்.

இருப்பினும் இந்திய அணியின் ரன் குவிப்பு தொடர்ந்தது; திலக் வர்மா 22 பந்துகளில் ஆட்டமிழக்காமல் 51 ரன்கள் குவித்தார். அதில் மூன்று பவுண்டரிகள் மற்றும் நான்கு சிக்ஸர்கள் அடங்கும். அவரது அதிரடி ஆட்டம் இந்தியாவின் இன்னிங்ஸ் முடியும் வரை அணியின் ரன் குவிக்கும் வேகத்தைத் தக்கவைத்தது.

இலக்கை நோக்கி ஆடிய பாகிஸ்தான் ஆரம்பத்திலேயே தடுமாறியது; ஒரு கட்டத்தில் 39 ரன்களுக்குள் 3 விக்கெட்டுகளை இழந்து தடுமாறிய பாகிஸ்தான் அணி, ஹசன் நவாஸின் சிறப்பான ஆட்டத்தால் நிமிர்ந்தது. எனினும் அவருக்கு பாகிஸ்தான் தரப்பில் பிற வீரர்களிடம் இருந்து சரியான ஒத்துழைப்பு கிடைக்கவில்லை. இதனால், ஹசன் நவாஸ் அபாரமாக ஆடி 96 ரன் குவித்த போதிலும், பாகிஸ்தான் அணி வெற்றிக்குத் தேவையான ரன்களை எட்ட முடியாமல் தோல்வியடைந்தது.

தனி ஆளாக பாகிஸ்தான் வெற்றிக்காக போராடிய நவாஸ் 7 சிக்ஸர்களை விளாசினார். போட்டியின் கடைசி பந்தில் அவர் ஆட்டமிழக்க, பாகிஸ்தான் அணி 6 விக்கெட் இழப்பிற்கு 192 ரன் என்ற ஸ்கோருடன் ஆட்டத்தை நிறைவு செய்தது.

இந்தியா தரப்பில் சுழற்பந்து வீச்சாளர்களான அக்சர் படேல், வாஷிங்டன் சுந்தர், ஆல்-ரவுண்டர் சிவம் துபே ஆகியோர் தலா 2 விக்கெட்டுகளை வீழ்த்தினர்.

ஆசிய விளையாட்டில் நான்கு ஆண்டுகளுக்கு முன்பு சீனாவின் ஹாங்சூவில் நடைபெற்ற ஆடவர் கிரிக்கெட்டின் அறிமுகப் போட்டியிலேயே வெற்றி பெற்ற இந்தியா, தற்போது தொடர்ந்து இரண்டாவது முறையாகத் தங்கப் பதக்கத்தை வென்றுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு