ஆந்திராவில் கரை ஒதுங்கிய 7 தமிழக மீனவர்களின் உடல்கள் அடையாளம் காணப்பட்டன - நிலவரம் என்ன?

சென்னை காசிமேடு துறைமுகத்தில் இருந்து கடலுக்குச் சென்ற 9 தமிழக மீனவர்கள் அண்மையில் வீசிய முரசு புயலில் சிக்கி காணாமல் போயினர். இந்த நிலையில் ஆந்திர மாநிலம் கொத்தப்பட்டினம் கடற்கரையில் மீட்கப்பட்ட ஏழு உடல்கள் தமிழக மீனவர்களுடையவை என உறுதி செய்யப்பட்டுள்ளது. எஞ்சிய இருவரின் உடல்களைத் தேடும் பணி நடைபெற்று வருகிறது.
கொத்தப்பட்டினத்தில் உடல்கள் கரை ஒதுங்கியதாக தகவல் கிடைத்ததைத் தொடர்ந்து தமிழக நிதி அமைச்சர் மரிய வில்சன் மற்றும் அதிகாரிகள் கொண்ட ஒரு குழு ஆந்திராவின் ஓங்கோல் பகுதிக்கு விரைந்தனர். காணாமல் போன மீனவர்களின் உறவினர்களையும் அவர்கள் அழைத்துச் சென்றிருந்தனர். அங்குள்ள அரசு பொது மருத்துவமனையில் வைக்கப்பட்டிருந்த 5 உடல்களை உறவினர்களின் உதவியுடன் அடையாளம் கண்டனர். உயிரிழந்தவர்கள் சே. மோகன் (47), ஆ. முருகன் (48), சி. விஜயகாந்த் (44), படகோட்டி பக்கிரிசாமி (49), மற்றும் இல. குப்புசாமி(58) என அடையாளம் காணப்பட்டுள்ளது.
ஓங்கோலில் நேற்றிரவு (05-11-2026) செய்தியாளர்களிடம் பேசிய தமிழக நிதி அமைச்சர் மரிய வில்சன், உடல்கள் சிதைந்துள்ளதால் உரிய பாதுகாப்பு நடைமுறைகளுடன் அவற்றைச் சொந்த ஊருக்குக் கொண்டு செல்ல நடவடிக்கை எடுக்கப்படும் எனத் தெரிவித்தார். எஞ்சிய மீன்வர்களை கண்டுபிடிப்பதற்காகத் தொடந்து மீட்பு நடவடிக்கைகள் எடுக்கப்பட்டு வருவதாகவும் அவர் தெரிவித்தார்.

இந்த நிலையில் இன்று காலை கரை ஒதுங்கிய மேலும் இரண்டு உடல்கள் அடையாளம் காணப்பட்டுள்ளன. அது சென்னை தண்டையார்பேட்டையை சேர்ந்த அ. அரவிந்த்(40) மற்றும் ம. குப்பன்(47) என உறவினர்கள் அடையாளம் கண்டுள்ளனர்.
இந்தத் துயரச் சம்பவத்திற்கு இரங்கல் தெரிவித்துள்ள தமிழக முதல்வர் சி. ஜோசப் விஜய், உயிரிழந்த மீனவர்களின் குடும்பங்களுக்கு தலா 7 லட்சம் ரூபாய் நிதி உதவி அளிக்கப்படும் என அறிவித்துள்ளார்.
காசிமேடு மீனவர்கள் காணாமல் போன விவகாரத்தில் இதுவரை நடந்தது என்ன?
சென்னை காசிமேடு மீன்பிடித் துறைமுகத்தில் இருந்து செல்வழகன் என்பவருக்குச் சொந்தமான படகு கடந்த மாதம் 29-ஆம் தேதி மீன் பிடிப்பதற்காக கடலுக்குச் சென்றது.
பத்து நாட்களுக்குத் தேவையான உணவுப் பொருட்களுடன் சூர்யா என்பவர் படகை ஓட்டிச் சென்றுள்ளார். அவருடன் எட்டு மீனவர்கள் பயணம் செய்துள்ளனர். கடந்த அக்டோபர் 31-ஆம் தேதி ஆந்திர மாநிலம் நிஜாம் பட்டணம் அருகே இவர்கள் மீன் பிடித்துக் கொண்டிருந்தனர்.
அப்போது புயல் தொடர்பான எச்சரிக்கையை வானிலை ஆய்வு மையம் விடுத்திருந்தது. இதனை அறிந்து படகை பாதுகாப்பான இடத்துக்குக் கொண்டு சென்று நிறுத்துமாறு தான் அறிவுறுத்தியதாக படகின் உரிமையாளர் செல்வழகன் பிபிசி தமிழிடம் தெரிவித்தார்.

'எச்சரித்தேன்... கேட்கவில்லை' - படகின் உரிமையாளர்
மீண்டும் படகை ஓட்டுநர் சூர்யா ஓட்டிச் சென்றுள்ளார். அப்போது நடந்த விவரங்கள் தொடர்பாக செல்வழகனிடம் கேட்டபோது, " வானிலை எச்சரிக்கை விடப்பட்டுள்ளது குறித்து படகில் இருந்த குப்பன் என்பவரிடம் பேசினேன். அவரோ, படகை ஓர் இடத்தில் நங்கூரம் போட்டு நிறுத்தியுள்ளதாகக் கூறினார்" என்கிறார்.
நவம்பர் 2-ஆம் தேதி மாலை சுமார் 6 மணியளவில் படகில் இருந்தவர்களுடன் செல்வழகன் பேசியுள்ளார்.
"படகை ஓட்டுவதாக இருந்தால் ராமாயப்பட்டணம் நோக்கிச் செல்லுமாறு கூறினேன். வானிலை எச்சரிக்கை குறித்து ஓட்டுநர் சூர்யாவிடம் கூறியபோது, அவர் அதைப் பொருட்படுத்தவில்லை" எனக் கூறுகிறார் செல்வழகன்.
இதையடுத்து, படகில் இருந்த குப்பன் என்பவரிடம் தான் பேசியதாகக் கூறும் அவர், "கொடா என்ற பகுதி காற்று பெரிதாக வீசாத பாதுகாப்பான பகுதி என்பதால் அங்கு சென்று நிறுத்துமாறு கூறினேன். ஆனால், படகை நங்கூரம் போட்டு நிறுத்தியுள்ளதாகக் கூறினர்" என்கிறார்.
"நவம்பர் 3-ஆம் தேதி அதிகாலை சுமார் 3 மணியளவில் படகில் தண்ணீர் ஏறுவதாக மற்றொரு படகுக்கு வயர்லெஸ் கருவி மூலமாக தகவல் தெரிவித்துள்ளனர். அதன்பிறகு எனது படகில் இருந்து எந்தத் தகவலும் கிடைக்கவில்லை. ஓட்டுநர் உள்பட யாரையும் தொடர்பு கொள்ள முடியவில்லை" எனக் கூறுகிறார் செல்வழகன்.

'வான்வழித் தேடல்' - மீன்வளத்துறை கடிதம்
ஒன்பது மீனவர்களுடன் சென்ற விசைப்படகு குறித்த எந்தத் தகவலும் கிடைக்காததால் மீன்வளத்துறை அதிகாரிகளின் கவனத்துக்கு இந்த விவகாரத்தை மீனவர் சங்க பிரதிநிதிகள் கொண்டு சென்றனர்.
இதையடுத்து, சென்னை நேப்பியர் பாலம் அருகில் இயங்கி வரும் கடலோரக் காவல் படையின் கடல்சார் மீட்பு ஒருங்கிணைப்பு மையத்துக்கு தமிழ்நாடு அரசின் மீன்வளத் துறை உயர் அதிகாரி கடிதம் ஒன்றை எழுதியுள்ளார்.
படகில் இருந்த மீனவர்களை பாதுகாப்பாக மீட்கவும் படகைக் கண்டறியவும் வான்வழித் தேடலுக்கான ஏற்பாடுகளைச் செய்யுமாறு மீன்வளத்துறையின் கடிதத்தில் கூறப்பட்டிருந்தது.
இதுதவிர, படகின் உரிமையாளர் செல்வழகனின் ஏற்பாட்டில் இரண்டு விசைப்படகுகள், கடைசியாக படகின் ஓட்டுநர் சூர்யாவிடம் இருந்த தகவல் வந்த திசையை நோக்கி தேடுதல் பணியில் ஈடுபட்டன.
'தேடுதல் முயற்சிகளுக்குப் பிறகும் காணாமல் போன படகையோ அதில் இருந்த பணியாளர்களையோ குறிப்பிட்ட இடத்தில் கண்டறிய முடியவில்லை' என மீன்வளத் துறை தெரிவித்திருந்தது.
இதே தகவலை பிபிசி தமிழிடம் தெரிவித்த செல்வழகன், "மீனவர்களைத் தேடும் பணியில் நான்கு படகுகள் ஈடுபட்டிருந்தன. எனது தரப்பில் இருந்து இரண்டு படகுகள் அனுப்பப்பட்டன. ஆனால், படகு கடைசியாக இருந்த இடத்தில் தேடியபோது எதுவும் தென்படவில்லை" என்கிறார்.
மீன்பிடிக்கச் சென்று காணாமல் போன ஒன்பது மீனவர்களின் குடும்பத்தினரும் காசிமேட்டில் உள்ள மீன்வளத்துறையின் உதவி இயக்குநர் அலுவலகத்தில் கடந்த இரண்டு நாட்களாக குவிந்தனர்.

பட மூலாதாரம், Getty Images
சாலை மறியல்... வாக்குவாதம்
இந்தநிலையில், ஆந்திர மாநிலம் கொத்தபட்டணம் கடற்கரையில் மீனவர்களின் உடல்கள் கரையொதுங்கியுள்ளதாகவும் படகு ஒன்று கவிழ்ந்த நிலையில் உள்ளதாகவும் வியாழக்கிழமை மதியம் மீன்வளத்துறை அதிகாரிகளுக்குத் தகவல் கிடைத்துள்ளது.
இதனையறிந்து மீனவர்களின் குடும்பத்தினர் கதறி அழுதனர். தொடர்ந்து அப்பகுதியில் சாலை மறியலில் அவர்கள் ஈடுபட்டனர். மீன்வளத்துறை அதிகாரிகளிடம் அவர்கள் வாக்குவாதம் செய்தனர்.
அவர்களிடம் பேசுவதற்காக மீன்வளத்துறை உதவி இயக்குநர் அலுவலகத்துக்கு ஆர்.கே.நகர் தொகுதி எம்.எல்.ஏவும் நிதி அமைச்சருமான மரியவில்சன் வந்தார்.
அப்போது நிதி அமைச்சரிடம் பேசிய மீனவர்களின் குடும்பத்தினர், "படகில் போதுமான பாதுகாப்பு உபகரணங்கள் இல்லை. 13 பேர் செய்ய வேண்டிய வேலைக்கு ஒன்பது பேரை கட்டாயப்படுத்தி அனுப்பி வைத்துள்ளனர்" எனக் குற்றச்சாட்டுகளை சுமத்தினர். இந்தக் காட்சிகள் இணையதளங்களில் பரவின.
விசைப்படகில் இருந்து தகவல் கிடைத்த பிறகு அதிகாரிகள் விரைவாக செயல்பட்டிருந்தால் மீனவர்களைக் காப்பாற்றியிருக்க முடியும் எனவும் அவர்கள் தெரிவித்தனர்.
'கரை ஒதுங்கியுள்ள மீனவர்கள் காசிமேட்டைச் சேர்ந்தவர்கள்தானா?' என்பதை அடையாளம் கண்டறிவதற்கு அவர்களின் குடும்பத்தினருடன் ஓங்கோலில் உள்ள அரசு மருத்துவமனைக்குச் சென்று கொண்டிருப்பதாக, சென்னை (வடக்கு) மீன்வளத்துறையின் உதவி இயக்குநர் ஜான் பெக்கர் பிபிசி தமிழிடம் தெரிவித்தார்.

அதிகாரிகளுடன் ஆந்திராவுக்கு விரைந்த அமைச்சர்
மீனவர்களின் உடல்கள் கரை ஒதுங்கியதாகத் தகவல் கிடைத்ததைத் தொடர்ந்து தமிழக அரசின் சார்பில் தமிழக நிதித்துறை அமைச்சர் மரிய வில்சன் ஓங்கோலுக்கு விரைந்தார். அங்கு அரசு மருத்துவமனையில் வைக்கப்பட்டிருந்த உடல்களைப் பார்வையிட்ட அமைச்சர் பின்னர் மீட்பு நடவடிக்கைகள் குறித்து செய்தியாளர்களிடம் பேசினார்.
அப்போது, "காவல்துறையின் விசாரணை நடைமுறைகள் இன்னும் நடந்து வருவதாகவும் விசாரணை முடிந்ததும், உடற்கூறாய்வுக்காக மருத்துவக் குழுவிடம் ஒப்படைக்கப்படும். அதன் பிறகு, உடல்கள் சொந்த ஊர்களுக்குக் கொண்டு செல்லப்படும்" எனத் தெரிவித்தார். உடல்கள் சிதைந்துள்ளதால், உடல்களைப் பாதுகாப்பாகக் கொண்டு செல்ல அனைத்து நடைமுறைகளையும் பின்பற்றி வருவதாகவும் அவர் தெரிவித்தார். கடலோர காவல்படை மற்றும் பிற குழுக்களுடன் ஆலோசிக்க இருப்பதாகவும் மீதமுள்ள நான்கு உடல்களையும் விரைவில் மீட்பதற்கான மீட்புப் பணிகள் தொடங்கப்படும் எனவும் தெரிவித்தார்.
அப்போது உடன் இருந்த பிரகாசம் மாவட்ட ஆட்சியர் ராஜா பாபு, "ஒன்பது பேரில் மீதமுள்ள நான்கு உடல்கள் படகிற்குள் சிக்கியிருக்கலாம் என நம்பப்படுகிறது. அதற்காக தீவிர தேடுதல் வேட்டை நடத்தப்படும், தேவைப்பட்டால் டைவிங் குழுவினரும் ஈடுபடுத்தப்படுவர்," எனத் தெரிவித்தார்.
முன்னதாக பிபிசி தமிழிடம் பேசிய தமிழக மீன்வளத்துறை உதவி இயக்குநர் விஜய காத்திகேயன் மீனவர்களின் உடல்களைக் கொண்டு வருவதற்கு குழு ஒன்றை அமைத்துள்ளதாகத் தெரிவித்தார். "மீன்வளத் துறையின் உதவி இயக்குநர், மீன்வளத் துறை உதவி ஆய்வாளர் உள்ளிட்டோர் குழுவில் உள்ளனர். மீனவர்களின் குடும்பத்தினருக்கு வாகனம் ஏற்பாடு செய்யப்பட்டு அனுப்பி வைக்கப்பட்டுள்ளனர்" என்று அவர் தெரிவித்தார்.
"கடலோரக் காவல் படையில் கடல்சார் மீட்பு ஒருங்கிணைப்பு மையம் மூலமாக இரண்டு முறை வான்வழியாகத் தேடுதல் பணி நடந்தது. கவிழ்ந்த நிலையில் படகு இருந்ததை அவர்கள் கண்டறிந்துள்ளனர்" என்றும் அவர் தெரிவித்திருந்தார்.
- இது, பிபிசிக்காக கலெக்டிவ் நியூஸ்ரூம் வெளியீடு
































