ஃப்ளைதுபை தாக்குதல்: துணை விமானி மற்றும் அவரது நோக்கம் பற்றி சர்வதேச ஊடகங்கள் கூறுவது என்ன?
பட மூலாதாரம், AFPTV/AFP via Getty Images
துபையில் இருந்து இஸ்ரேலின் டெல் அவிவ் நகருக்குச் சென்ற ஃப்ளைதுபை விமானத்தில், இந்திய கேப்டனை தாக்கி விமானத்தைக் கட்டுப்பாட்டுக்குள் கொண்டு வர முயன்றதாகக் குற்றம் சாட்டப்பட்ட துணை விமானி குறித்து தற்போது பல தகவல்கள் வெளியாகிக் கொண்டிருக்கின்றன.
விமானத்தை விபத்துக்கு உள்ளாக்க துணை விமானி முயன்றதாகக் குற்றம் சாட்டப்பட்டுள்ளது. துணை விமானி ஓமன் நாட்டைச் சேர்ந்தவர் என்று இஸ்ரேல் பிரதமர் பெஞ்சமின் நெதன்யாகு தெரிவித்துள்ளார்.
இருப்பினும், துணை விமானியின் குடியுரிமை குறித்து ஃப்ளைதுபை நிறுவனம் இதுவரை அதிகாரபூர்வமாக எதுவும் தெரிவிக்கவில்லை. ஆனால், சர்வதேச ஊடகங்கள் துணை விமானி குறித்துப் பல்வேறு தகவல்களை வெளியிட்டு வருகின்றன.
ஏபிசி நியூஸ் இதுகுறித்த செய்தியில், "துணை விமானி ஓமன் நாட்டைச் சேர்ந்தவர். இவர் ஓமன் ஏர் நிறுவனத்தால் பாதுகாப்பு அச்சுறுத்தலாக அடையாளம் காணப்பட்டு, விமானம் இயக்கத் தடை விதிக்கப்பட்டவர்" என்று தெரிவித்துள்ளது.
மேலும், அந்தச் செய்தி, "2024இல் ஓமன் ஏர் நிறுவனத்தில் பயிற்சி துணை விமானியாகப் பணியாற்றியபோது, ஹமாம் அல்-ஹமாமி என்ற இந்தத் துணை விமானியிடம் தீவிர கருத்து கொண்ட ஆவணங்கள் இருப்பது கண்டறியப்பட்டதாக அதிகாரிகள் தெரிவித்தனர். இருப்பினும், அவருக்கு அந்த விமான நிறுவனத்திலேயே நிர்வாக ரீதியிலான பணியில் தொடர அனுமதி அளிக்கப்பட்டது என்று வட்டாரங்கள் தெரிவிப்பதாக" குறிப்பிடுகிறது.
இந்தச் சம்பவம் குறித்து அதிகாரிகள் விசாரணை நடத்தி வருவதாகக் கூறும் ஏபிசி செய்தி, சந்தேகத்திற்குரிய தாக்குதல் நடத்தியவர் பின்னர் எவ்வாறு ஃப்ளைதுபை நிறுவனத்தில் பறப்பதற்கான அனுமதியைப் பெற்றார் என்றும் இஸ்ரேல் செல்லும் விமானத்தின் காக்பிட்டில் முதல் அதிகாரியாக எவ்வாறு நுழைந்தார் என்பதையும் கண்டறிய முயன்று வருகின்றனர்" என்று அதிகாரபூர்வ வட்டாரங்களை மேற்கோள் காட்டி தெரிவிக்கிறது.
அதிகாரபூர்வ வட்டாரங்களின் தகவல்படி, அல் ஹமாமி வியாழக்கிழமை சௌதி அரேபியாவில் இருந்து ஐக்கிய அரபு எமிரேட்ஸுக்கு கொண்டு வரப்பட்டார். விசாரணை குறித்து அறிந்த வட்டாரங்கள் கூறுகையில், அவர் இந்தச் சம்பவம் குறித்து விசாரணை நடத்தும் அதிகாரிகளுக்கு "ஒத்துழைப்பு" அளித்து வருவதாகவும், விமானத்தை இஸ்ரேலில் மோதி விபத்துக்கு உள்ளாக்கத் திட்டமிட்டு இருந்ததாக உணர்த்தியுள்ளதாகவும் தெரிவித்தனர்.
ஃப்ளைதுபை, ஓமன் ஏர், ஓமன் தூதரகத்தின் பிரதிநிதிகளிடம் ஏபிசி நியூஸின் கருத்து கோரியபோது அவர்கள் உடனடியாகப் பதிலளிக்கவில்லை.
பட மூலாதாரம், Getty Images
குற்றச்சாட்டுக்கு உள்ளான துணை விமானி இதற்கு முன் எங்கு பணிபுரிந்தார்?
ஃப்ளைதுபை நிறுவனம் வெள்ளிக்கிழமை முன்னதாகத் தனது தலைமை நிர்வாக அதிகாரியை மேற்கோள்காட்டி அறிக்கை ஒன்றை வெளியிட்டிருந்தது. அதில், அதிகாரிகளின் வேண்டுகோளின் பேரில், ஃப்ளைதுபை டெல் அவிவ் நகருக்கான விமான சேவைகளை மறு அறிவிப்பு வரும் வரை தற்காலிகமாக நிறுத்தி வைத்துள்ளதாகத் தெரிவிக்கப்பட்டுள்ளது.
அந்த அறிக்கையில், "சம்பந்தப்பட்ட அதிகாரிகளின் தலைமையில், ஃப்ளைதுபையின் முழு ஒத்துழைப்புடன் அதிகாரபூர்வ விசாரணை நடைபெற்று வருகிறது. விமானத்தின் கேப்டன் சுமித் மச்சர், தாக்குதல் நடத்தியவரை எதிர்த்துப் போராடியதாலும், பல பயணிகள் அவரை அடக்கியதாலும் ஒரு பெரிய பேரழிவு தவிர்க்கப்பட்டது. தாக்குதல் நடத்தியவர் ஏற்கெனவே விமானத்தை வேகமாகக் கீழே இறக்கத் தொடங்கியிருந்தார்" என்றும் கூறப்பட்டுள்ளது.
வால்ஸ்ட்ரீட் ஜர்னல் இதைப் பற்றி வெளியிட்ட செய்தியில், "தடை விதிக்கப்பட்டிருந்த போதிலும், அந்த விமானி ஃப்ளைதுபை நிறுவனத்தால் பணியமர்த்தப்பட்டுள்ளார் எனக் கூறப்படுகிறது. ஐக்கிய அரபு எமிரேட்ஸ், இஸ்ரேல் இடையிலான முக்கியமான வழித்தடத்தில் பறக்க அவர் அனுமதிக்கப்பட்டார். விசாரணை குறித்து அறிந்த மற்றவர்கள், குற்றம் சாட்டப்பட்ட நபர் ஹமாம் அல்-ஹமாமி என்ற ஓமன் நாட்டவர் என்று தெரிவித்தனர். விமானியின் போக்கு குறித்த தனது கவலைகளை ஓமன் பிற நாடுகளுடனோ அல்லது விமான நிறுவனங்களுடனோ பகிர்ந்து கொண்டதா என்பது தெரியவில்லை. அவரது போக்கின் தன்மையும் அறியப்படவில்லை" என்று கூறியுள்ளது.
வால்ஸ்ட்ரீட் ஜர்னலின் செய்திப்படி, இந்தச் சம்பவத்திற்கான விசாரணையை ஐக்கிய அரபு எமிரேட்ஸ் தலைமை தாங்கி நடத்தி வருகிறது. தாக்குதல் நடத்தியவருடைய ஓமனில் இருந்த கடந்த காலப் பதிவுகள் குறித்து கருத்து தெரிவிக்க ஐக்கிய அரபு எமிரேட்ஸின் செய்தித் தொடர்பாளர் மறுத்துவிட்டார். அவ்வாறு செய்வது விசாரணையின் முடிவை முன்முடிவு செய்வதையோ அல்லது அதன் நடைமுறையில் தலையிடுவதையோ தவிர்க்கவே என்றும் அவர் விளக்கினார்.
பட மூலாதாரம், Getty Images
வெள்ளிக் கிழமை, ஐக்கிய அரபு எமிரேட்ஸ் அதிபரின் மூத்த ராஜாங்க ஆலோசகர் அன்வர் முகமது கர்காஷ், ஃப்ளைதுபை விமானத்தைக் கடத்த முயன்ற சம்பவத்தை முதல்முறையாக ஒரு பயங்கரவாதச் செயல் என்று விவரித்தார்.
"முதன்மை விமானியான சுமித் மச்சர் பாராட்டுக்குரியவர். கடுமையான பயங்கரவாத அச்சுறுத்தல் மற்றும் சாத்தியமான பேரழிவை எதிர்கொண்ட போதிலும், அவர் உண்மையான தைரியத்தையும் பொறுப்பையும் வெளிப்படுத்தினார்," என்று கர்காஷ் எக்ஸ் பக்கத்தில் பதிவிட்டுள்ளார்.
"நிகழ்வுகளின் எளிமைப்படுத்தப்பட்ட விளக்கங்கள் அல்லது சதிக் கோட்பாடுகளின் பரவலுக்கு அப்பால், பயங்கரவாத அச்சுறுத்தல்களைக் கையாள்வதில் விழிப்புணர்வுடனும் எச்சரிக்கையுடனும் செயல்படுவது அவசியம்," என்றும் கர்காஷ் கூறினார்.
இஸ்ரேல் பிரதமர் நெதன்யாகு, "தாக்குதல் நடத்தியவர் இஸ்லாமிய அடிப்படைவாதத்தில் ஈர்ப்பு கொண்டவர். விமானத்தில் இருந்த பயணிகளுடன் சேர்த்து அதை விபத்துக்கு உள்ளாக்கும் எண்ணத்துடன் வந்திருந்தார்" என்றார்.
விமானப் பாதுகாப்பு ஆய்வாளர்கள், இந்தச் சம்பவம் பாதுகாப்பு அமைப்பிலுள்ள ஒரு தீவிர குறைபாட்டைப் பிரதிபலிப்பதாகக் கூறியுள்ளனர். சோதனையில் ஏற்பட்ட தவறு ஓர் ஆயுதம் விமானத்தை அடைய அனுமதித்திருக்கலாம், ஆனால் தாக்குதல் நடத்தும் எண்ணம் கொண்ட ஒரு நபரை விமான நிலையத்தை அடைவதற்கு முன்பே அடையாளம் கண்டு தடுத்திருக்க வேண்டும் என்று அவர்கள் கூறினர்.
பட மூலாதாரம், Joe Raedle/Getty Images
விமான பயணத்தின்போது என்ன நடந்தது என்பதற்கான பார்வை இப்போது தெளிவாகி வருவதாக நெதன்யாகு கூறினார். தாக்குதல் நடத்தியவர் ஓமன் நாட்டவர் என்று கூறிய நெதன்யாகு, அவரது அடையாளம் தொடர்பான பிற விவரங்கள் இன்னும் தெளிவாகத் தெரியவில்லை என்றார்.
தாக்குதல் நடத்திய விமானி தனியாகச் செயல்பட்டாரா அல்லது வேறு யாருடனாவது சேர்ந்து பணியாற்றினாரா என்பது குறித்து இஸ்ரேல் விசாரித்து வருவதாகவும் அவர் தெரிவித்தார்.
வெள்ளிக்கிழமை, கேப்டன் சுமித் மச்சர் இந்திய பிரதமர் நரேந்திர மோதியிடம் பேசுகையில், துணை விமானி தன் மீது தொடர்ந்து தாக்குதல் நடத்தியபோது, தான் தரையில் படுத்தபடியே காக்பிட் கதவைத் திறந்ததாகத் தெரிவித்தார்.
"அந்த நிமிடத்தில், என் உயிரைக் காப்பாற்ற நான் போராடிக் கொண்டிருந்தேன். நான் மிகவும் பலத்த காயமடைந்ததால் கீழே விழுந்துவிட்டேன், என்னால் எழ முடியாவிட்டால் என்னவாகும் என்று யோசித்தது நினைவிருக்கிறது. அந்த நிமிடத்தில், நான் தள்ள வேண்டும் என்று மட்டுமே எனக்குத் தெரிந்திருந்தது. கதவு அங்கேயே இருந்தது. பின்னர் நான் அதைத் திறந்தேன், அனைவரும் உள்ளே வந்தார்கள்," என்று சுமித் மச்சர் கூறினார்.
விமானத்தின் கேப்டன் மற்றும் துணை விமானி வியாழக்கிழமை சௌதி அரேபியாவில் இருந்து ஐக்கிய அரபு எமிரேட்ஸுகு கொண்டு வரப்பட்டனர். விமானம் சௌதி அரேபியாவில் அவசரமாகத் தரையிறக்கப்பட்டது. தாக்குதல் நடத்திய நபரை விசாரணை செய்ய முடியும் என இஸ்ரேல் நம்புகிறது.
பட மூலாதாரம், Narendramodi/X
சிஎன்என் செய்தியில் தெரிய வந்த புதிய தகவல்
அமெரிக்க செய்தி நிறுவனமான சிஎன்என் வெளியிட்ட செய்தியில் புதிய தகவல் இடம்பெற்றுள்ளது. "ஃப்ளைதுபை விமானத்தில் கேப்டனை தாக்கியதாக சந்தேகிக்கப்படும் விமானி, ஓமனின் தேசிய விமான நிறுவனத்தில் அவர் வகித்த வேலையில் இருந்து நீக்கப்பட்டுள்ளார். அவரது பயங்கரவாதக் கருத்துகள் குறித்த கவலைகள் எழுந்ததைத் தொடர்ந்து இந்த நடவடிக்கை எடுக்கப்பட்டதாக இந்த விவகாரம் குறித்து அறிந்த இரண்டு வட்டாரங்கள் சிஎன்என் சேனலிடம் தெரிவித்தன."
"அதிகாரபூர்வ வட்டாரத்தின்படி, அந்த விமானி ஹமாம் அல்-ஹமாமி, ஓமன் நாட்டைச் சேர்ந்தவர். அவர் ஐக்கிய அரபு எமிரேட்ஸில் ஓர் ஓமனிய தந்தைக்கும் சிரியாவை சேர்ந்த தாய்க்கும் பிறந்தவர். அவர் தனது வாழ்வின் பல ஆண்டுகளை ஐக்கிய அரபு எமிரேட்ஸில் கழித்தார். ஓர் இஸ்ரேலிய அதிகாரியும் அல்-ஹமாமியின் அடையாளத்தை உறுதி செய்துள்ளார். சௌதி அரேபியாவின் அரசு ஊடகமும் அவரது அடையாளத்தை உறுதி செய்துள்ளது" என்று சிஎன்என் செய்தி தெரிவிக்கிறது.
மேலும் அந்தச் செய்தியில், "ஹமாம் அல்-ஹமாமி என்ற பெயரிலான லிங்கட்இன் கணக்கின்படி, அவர் ஓமன் ஏர் நிறுவனத்தில் ஏழு ஆண்டுகள் பணிபுரிந்து பிப்ரவரி 2025இல் விலகினார். பின்னர் ஜூன் 2025இல் ராயல் ஏர் மாரோக் நிறுவனத்தில் இணைந்து ஜனவரி 2026இல் விலகினார். அதில் ஃப்ளைதுபை பற்றிய குறிப்புகள் எதுவும் இல்லை" என்றுள்ளது.
அந்தச் செய்தியின்படி, புதன்கிழமை நடந்த சம்பவத்தில் தொடர்புடைய ஃப்ளைதுபை விமானிக்குச் சொந்தமானதுதான் அந்தக் கணக்கு என்பதை ஒரு வட்டாரம் உறுதிப்படுத்தியது. அந்தக் கணக்கு தற்போது நீக்கப்பட்டுள்ளது. இது தொடர்பாக மேலும் கருத்து கேட்க லிங்க்ட்இன் நிறுவனத்தை சிஎன்என் தொடர்பு கொண்டுள்ளது.
இதற்கிடையில், இந்த விவகாரத்தை அறிந்த பிராந்திய ராஜதந்திர வட்டாரம் ஒன்று சிஎன்என் சேனலிடம் பேசியபோது, சந்தேக நபர் தனது பயங்கரவாதக் கருத்துகள் காரணமாக விமானப் பயிற்சியில் இருந்து நீக்கப்பட்டு, ஓமனின் தேசிய விமான நிறுவனத்தில் வேறு பொறுப்பு வழங்கப்பட்டதாகக் கூறியது.
சிஎன்என் செய்தியின்படி, "அந்த லிங்க்ட்இன் கணக்கில் இரண்டு பதிவுகள் மட்டுமே போடப்பட்டுள்ளன, மேலும் இரண்டும் புதன்கிழமை சம்பவம் நடந்த சுமார் ஒன்பது மணிநேரத்திற்குப் பிறகு குறுகிய இடைவெளியில் வெளியிடப்பட்டுள்ளன. இந்தப் பதிவுகளை யார் வெளியிட்டார்கள் அல்லது அவை முன்கூட்டியே திட்டமிடப்பட்டு பதிவிடப்பட்டவையா என்பது தெளிவாகத் தெரியவில்லை. முதல் பதிவில் போயிங் 737 மேக்ஸ் (Boeing 737 Max) விமானத்தின் காக்பிட்டில் எடுக்கப்பட்ட பல காணொளிகள் இடம்பெற்றிருந்தன. புதன்கிழமை சம்பவத்தில் சௌதி அரேபியாவுக்கு திருப்பி விடப்பட்ட விமானம் ஃப்ளைதுபை 737 மேக்ஸ் 8 ரக விமானமாகும்."
துபை சர்வதேச விமான நிலையத்தில் இருந்து சிஎன்என் பெற்ற ஒரு காணொளியில், வீடியோ எடுத்தவர் இஸ்ரேலிய விமான நிறுவனமான எல் அல் (El Al) நிறுவனத்திற்குச் சொந்தமான விமானத்தைப் பெரிதாக்கி (zoom) காட்டுகிறார்.
"காணொளியில் உள்ள காக்பிட் திரையானது OMA624 என்ற விமான எண் மற்றும் அக்டோபர் 11, 2023 என்ற தேதியைக் காட்டியது. இந்த விமான எண் வழக்கமாக துபையில் இருந்து மஸ்கட் செல்லும் விமானங்களைக் குறிக்கிறது. இந்தத் தேதி அவர் ஓமன் ஏர் நிறுவனத்தில் பணிபுரிந்த காலகட்டத்துடன் ஒத்துப் போகிறது. காணொளியில் உள்ள பிற துணுக்குகள் மேலும் பல எல் அல் விமானங்களையும், ஆர்கியா என்ற மற்றொரு இஸ்ரேலிய விமான நிறுவனத்திற்குச் சொந்தமான விமானத்தையும் காட்டுகின்றன."
பட மூலாதாரம், Getty Images
ஓமன் நாட்டவருக்கு அனுமதி கிடைத்தது எப்படி?
இஸ்ரேலை அங்கீகரிக்காத ஓமன் நாட்டின் குடிமகன் ஒருவர், டெல் அவிவ் செல்லும் விமானத்தில் விமானியாகப் பணியாற்ற எவ்வாறு அனுமதிக்கப்பட்டார் என்ற கேள்விகள் எழுப்பப்படுகிறது.
ஐக்கிய அரபு எமிரேட்ஸின் அதிகாரபூர்வ செய்தி நிறுவனமான WAM-இன் படி, இந்த விமானம் ஐக்கிய அரபு எமிரேட்ஸில் பதிவு செய்யப்பட்டுள்ளதால், இந்தச் சம்பவத்தை விசாரிக்க ஐக்கிய அரபு எமிரேட்ஸுக்கு அதிகாரம் உள்ளது. ஐக்கிய அரபு எமிரேட்ஸ் சட்டத்தின்படி, அதன் விமானங்களில் செய்யப்படும் குற்றங்கள், நாட்டின் எல்லைக்கு வெளியே நடந்திருந்தாலும், ஐக்கிய அரபு எமிரேட்ஸ் சட்டத்திற்கு உட்பட்டவை.
நெதன்யாகு புதன்கிழமை பிற்பகுதியில் சிஎன்என் சேனலின் ஜிம் சியூட்டோவிடம் பேசுகையில், விமானம் அவசரமாகத் திருப்பி விடப்பட்ட சௌதி அரேபியாவில் வைத்துத் தாக்குதல் நடத்தியவரிடம் விசாரணை நடத்தப்பட்டதாகத் தெரிவித்தார். இந்த விசாரணையில் இஸ்ரேலும் ஈடுபட்டுள்ளதாக அவர் கூறினார்.
"நான் ஐக்கிய அரபு எமிரேட்ஸ் அதிபர் ஷேக் முகமது பின் சயீத்திடம் பேசினேன். விசாரணையில் இஸ்ரேல் ஈடுபடும் என்பதற்கு அவர் ஒப்புக் கொண்டார்," என்று அவர் கூறினார். மேலும், "சந்தேகத்திற்குரிய ஓமனிய விமானி எவ்வாறு விமானத்தில் ஏறினார் என்று நெதன்யாகுவிடம் கேட்கப்பட்டபோது, இஸ்ரேலுடன் ராஜதந்திர உறவு இல்லாத நாடுகளைச் சேர்ந்த விமானிகள் பொதுவாக இஸ்ரேலில் பறக்க அனுமதி வழங்கப்படுவதில்லை என்று கூறினார்.
மேலும் அவர், "தெளிவாக, இங்கு விதிமுறைகளில் ஒரு குறைபாடு இருந்துள்ளது, அதை நாங்கள் பிற விஷயங்களுடன் சேர்த்துச் சரிசெய்து வருகிறோம். இதில் எமிரேட்ஸ் அரசிடம் இருந்து எங்களுக்கு முழு ஆதரவு கிடைத்து வருகிறது. இது மீண்டும் நிகழாமல் இருப்பதை உறுதி செய்யவே நாங்கள் விரும்புகிறோம்" என்றார்.
ஐக்கிய அரபு எமிரேட்ஸை போலன்றி, ஓமன் இஸ்ரேலுடன் முறைப்படி ராஜதந்திர உறவுகளை ஏற்படுத்திக் கொள்ளவில்லை.
- இது, பிபிசிக்காக கலெக்டிவ் நியூஸ்ரூம் வெளியீடு
