ரோஹித் - கோலி, கில், ராகுல், பும்ரா: வெஸ்ட் இண்டீஸ் தொடர் இந்தியாவுக்கு உணர்த்திய 4 விஷயங்கள்

இந்தியா மற்றும் மேற்கு இந்திய தீவுகள் (வெஸ்ட் இண்டீஸ்) அணிகள் மோதிய ஒருநாள் தொடரின் மூன்றாவது போட்டியில் 5 விக்கெட்டுகள் வித்தியாசத்தில் வெற்றி பெற்றிருக்கிறது மேற்கு இந்திய தீவுகள் அணி. இந்தப் போட்டியில் தோற்றிருந்தாலும் 3 போட்டிகள் கொண்ட இந்தத் தொடரை 2-1 என இந்திய அணி வென்றிருக்கிறது.

நியூ சண்டிகரில் நடந்த இந்தப் போட்டியில் முதலில் பேட்டிங் செய்த இந்திய அணி 7 விக்கெட்டுகளை இழந்து 351 ரன்கள் எடுத்தது. இந்தியா 4/2 என மூன்றாவது ஓவரிலேயே தடுமாற, ரோஹித் ஷர்மா - ருதுராஜ் கெய்க்வாட் கூட்டணி அணியை சரிவிலிருந்து மீட்டது.

ரோஹித் 92 ரன்களிலும், ருதுராஜ் 57 ரன்களிலும் ஆட்டமிழந்தனர். இந்தத் தொடரில் முதல் முறையாகக் களமிறங்கிய கேஎல் ராகுல் தன் சிறப்பான ஆட்டத்தால் இந்திய அணியின் ரன்ரேட்டை அதிகப்படுத்தி இந்தியா அந்த பெரிய ஸ்கோரை எட்ட உதவினார். கடைசி வரை ஆட்டமிழக்காமல் இருந்த அவர் 87 பந்துகளில் 129 ரன்கள் எடுத்தார்.

பெரிய இலக்கை சேஸ் செய்த மேற்கு இந்திய தீவுகள் அணி 48.2 ஓவர்களில் 5 விக்கெட்டுகளை மட்டும் இழந்து இலக்கை எட்டியது. இந்தப் போட்டியில் தொடக்க வீரராகக் களமிறங்கிய கேப்டன் ஷாய் ஹோப் கடைசி வரை ஆட்டமிழக்காமல் 162 ரன்கள் குவித்து தன் அணியை வெற்றி பெறவைத்தார்.

பல பெரிய பெரிய சேஸ்கள் அரங்கேறிய இந்த ஒருநாள் தொடர் உணர்த்திய சில முக்கியமான விஷயங்களை இங்கே அலசுவோம்.

சிறந்த ஃபார்மில் 'ரோ - கோ'

இந்தத் தொடர் தொடங்குவதற்கு முன்பு ரோஹித் ஷர்மா, விராட் கோலி ஆகியோரின் செயல்பாடு மீது பெரும் எதிர்பார்ப்பு ஏற்பட்டிருந்தது. இருவரும் ஒருநாள் போட்டிகளில் மட்டுமே விளையாடி வருகிறார்கள் என்பதால் ஆவலும், அவர்கள் ஃபார்மின் மீது கேள்வியும் சேர்ந்தே இருந்தது. ஆனால், எந்தக் கேள்வியும் எழுப்ப முடியாத வகையில் அவர்கள் இருவரின் செயல்பாடும் இருந்தது

இந்தத் தொடரின் 3 போட்டிகளில் மொத்தம் 225 ரன்கள் குவித்திருக்கிறார் ரோஹித் ஷர்மா. கவுஹாத்தியில் 406 என்ற மிகப் பெரிய இலக்கை சேஸ் செய்தபோது சதமடித்து இந்தியாவுக்கு மிகச் சிறந்த தொடக்கத்தை ஏற்படுத்திக்கொடுத்தார். நியூ சண்டிகரில் இந்தியா 4/2 என தடுமாறியபோதும் நிலைத்து நின்று விளையாடி 92 ரன்கள் சேர்த்தார் ரோஹித்.

குறிப்பாக நியூ சண்டிகரில் ஆடுகளம் தொடக்கத்தில் வேகப்பந்துவீச்சுக்கு சாதகமாக இருந்தபோது அதை சிறப்பாகக் கையாண்டு விக்கெட் வீழ்ச்சியைத் தடுத்தார். அதோடு நிற்காமல் ரன்ரேட் பாதித்துவிடாத வகையில் பின்னர் அதிரடியையும் கையில் எடுத்து நல்ல அடித்தளம் அமைத்துக்கொடுத்தார்.

அதேபோல்தான் விராட் கோலியும். திருவனந்தபுரத்தில் தன் வழக்கமான முறையில் இந்தியாவுக்கு ஆட்டத்தை வென்று கொடுத்தார் அவர். ஒருநாள் போட்டிகளில் 15,000 ரன்களைக் கடந்து சாதனை படைத்த அவர், தன் அதிரடி ஆட்டத்தையும் அடுத்த கட்டத்துக்கு எடுத்துச் சென்றிருக்கிறார். நியூ சண்டிகரில் ஜேய்டன் சீல்ஸ் வீசிய ஒரு மிகச் சிறந்த பந்தில் ஆட்டமிழந்தாரே தவிர, மற்றபடி அவருடைய ஃபார்ம் சிறப்பாகவே இருந்தது.

2027 உலகக் கோப்பைக்கான அட்டவணை வெளியாகியிருக்கும் இந்த நேரத்தில் இந்த இரண்டு முன்னணி வீரர்களின் ஃபார்மும் இந்திய ரசிகர்களுக்கு பெரும் நம்பிக்கை கொடுத்திருக்கிறது. தென்னாப்பிரிக்க போன்ற ஆடுகளங்களில் அவர்களின் அனுபவம் பெருமளவு கைகொடுக்கும் என்று எதிர்பார்க்கப்படும் நிலையில், தங்களால் இந்தக் காலகட்டத்திலும் ஆட்டத்தை மாற்றும் இன்னிங்ஸ்கள் ஆட முடியும் என்று இருவரும் நிரூபித்திருக்கிறார்கள்.

கேப்டன் கில் - சேஸிங்கில் இனி புதிய நம்பிக்கை

3 போட்டிகளில் 334 ரன்கள் - ஒரு சதம், ஒரு இரட்டைச் சதம் என இந்தத் தொடரின் தொடர் நாயகனாக உருவெடுத்திருக்கிறார் இந்திய அணியின் கேப்டன் சுப்மன் கில். என்னதான் அதிரடி காட்டினாலும் கில்லின் ஆட்டத்தில் ஒரு நிலைத்தன்மை இருக்கிறது. அது அவரை அச்சுறுத்தலான பேட்டராக உருவாக்கிக்கொண்டிருக்கிறது.

கோலி எப்படி சேஸிங்கில் இந்தியாவின் பெரும் நம்பிக்கையாகத் திகழ்ந்தாரோ அதுபோல் இனி வரும் காலங்களில் இந்தியாவுக்குப் போட்டியை முடித்துக் கொடுப்பார் என்ற நம்பிக்கையை கில் கொடுத்திருக்கிறார். 406 என்ற மிகப் பெரிய இலக்கை நோக்கி தன்னுடைய இரட்டைச் சதம் மூலம் இந்தியாவை இலகுவாக அழைத்துச் சென்றார் அவர்.

முதல் போட்டியில் சதமடித்தும் கூட, ஆட்டத்தை முடித்துக்கொடுக்க முடியவில்லை என்று வருத்தம் தெரிவித்தார் கில். என்னதான் ரன் எடுத்தாலும், ஒரு கேப்டனாக ஆட்டத்தை முடித்துக்கொடுக்கவேண்டும் என்பதை தன்னுடைய பொறுப்பாகக் கருதுகிறார் அவர். அதை அடுத்த போட்டியிலேயே நிகழ்த்தியும் காட்டினார்.

சில ஆண்டுகள் முன்பு அவர்முன் ஒரு கேள்வி வைக்கப்பட்டது. டெஸ்ட் போட்டிகளில் முதல் இன்னிங்ஸை விட இரண்டாவது இன்னிங்ஸில் எப்படி சிறப்பாக ஆடுகிறார் என்று கேட்டதற்கு, தனக்கு இலக்கு என்னவென்று தெரியும்போது தன்னால் இன்னும் சிறப்பாக செயல்பட முடியும் என்று கூறினார் அவர். அதைத்தான் இந்தத் தொடரிலும் அவர் காட்டியிருக்கிறார். மூன்றாவது போட்டியில் இந்தியா முதலில் பேட்டிங் செய்தபோது ஒரு ரன்னில் ஆட்டமிழந்திருந்தாலும், சேஸ் செய்த இரண்டு போட்டிகளில் 333 ரன்கள் குவித்து மிரட்டியிருக்கிறார் கில்.

சேஸ் மாஸ்டர் என்று அழைக்கப்படும் கோலி உலகக் கோப்பையோடு ஓய்வு பெற்றுவிடலாம் என்று பேசப்படும் நிலையில், போட்டியை முடித்துக்கொடுக்கும் அந்தப் பெரும் வேலையை கேப்டன் கில் தன் தோள்களில் எளிதாக சுமந்துவிடுவார் என்ற நம்பிக்கை கிடைத்திருக்கிறது.

எதற்கும் எப்போதும் தயாராக இருக்கும் கேஎல் ராகுல்

இந்திய டாப் ஆர்டர் முதல் இரு போட்டிகளிலும் மிகச் சிறப்பாக சேஸ் செய்துவிட, ராகுலுக்கு பேட்டிங் செய்யும் வாய்ப்பே கிடைக்கவில்லை. இருந்தாலும் மூன்றாவது போட்டியில் கடினமான சூழலில் ஒரு வாய்ப்பு கிடைத்தபோது அதை மிகச் சிறப்பாகப் பயன்படுத்திக்கொண்டார் ராகுல்.

87 பந்துகளில் 129 ரன்கள். 10 பவுண்டரிகளும் 6 சிக்ஸர்களும் விளாசி இந்திய அணி பெரும் ஸ்கோரை எடுக்க உதவினார் அவர். இந்திய அணி 300 ரன்களைக் கடக்குமா என்ற கேள்வி எழுந்திருந்த நிலையில், மறுபக்கம் இந்தியாவின் டெய்லெண்டர்களை வைத்துக்கொண்டு 350 ரன்களையே கடக்க உதவினார் அவர்.

இந்த ஐபிஎல் சீசன் தன்னுடைய ஸ்டிரைக் ரேட் பற்றிய கேள்விகளுக்கெல்லாம் ஒட்டுமொத்தமாக பதில் சொல்லிய அவர், இந்த ஒருநாள் போட்டியிலும் அதே பாணியில் ஆரம்பம் முதலே விளையாடினார்.

எப்போதுமே ராகுல் பற்றி குறிப்பிடும்போது ஓர் அணிக்கு என்ன தேவைப்பட்டாலும் அதைச் செய்ய அவர் தயாராக இருப்பார் என்று சொல்லப்படும். எப்போதுமே, எதற்குமே அவர் தயாராகவே இருப்பார். அதைத்தான் இந்தப் போட்டியிலும் அவர் காட்டியிருக்கிறார். 5வது வீரராகவும் சரி, ஓப்பனராகவும் சரி இந்திய அணிக்கு ஒவ்வொரு போட்டியிலும் தேவையானதை தன்னால் கொடுக்க முடியும் என்று காட்டியிருக்கிறார் அவர்.

பும்ரா இல்லாமல் தடுமாறும் இந்திய வேகப்பந்துவீச்சு

இந்திய அணியின் வேகப்பந்துவீச்சு இந்தத் தொடரில் சற்று தடுமாறவே செய்தது. முதல் போட்டியில் குல்தீப் யாதவின் பந்துவீச்சால் தான் மேற்கு இந்திய தீவுகள் அணியை இந்தியாவால் 300 ரன்களுக்குள் கட்டுப்படுத்த முடிந்தது. இரண்டாவது போட்டியிலோ எதிரணியை 400 ரன்களுக்கு மேல் எடுக்க விட்டது இந்திய அணி. மூன்றாவது போட்டியில் 352 என்ற இலக்கை மேற்கு இந்திய தீவுகள் சேஸ் செய்யவும் காரணமாக அமைந்தது.

கடந்த சில தொடர்களாகவே, ஒருநாள் மற்றும் டி20 ஃபார்மட்களில் பும்ரா இல்லாமல் இந்தியாவின் வேகப்பந்துவீச்சு தடுமாறிக்கொண்டிருக்கிறது. இந்திய அணி குர்னூர் பிரார், அன்ஷுல் கம்போஜ், ஆகிப் நபி போன்ற வீரர்களை உலகக் கோப்பைக்கு முன் சோதித்துப் பார்க்கிறார்கள். ஆனால், ஒரு குழுவாக பலவீனமாக இருக்கும்போது அந்த புதிய வீரர்களுக்கு அது நெருக்கடியாகவே அமைகிறது. இதுவொரு முக்கியமான சோதனை என்று தெரியும்போது அது வீரர்களுக்கு இன்னும் அதிகம் நெருக்கடியை ஏற்படுத்திவிடுகிறது.

ஹர்திக் பாண்டியாவைப் போல் மற்றொரு வேகப்பந்துவீச்சு ஆல்ரவுண்டரான நித்திஷ் குமார் ரெட்டியும் தொடர்ந்து காயத்தால் அவதிப்படுகிறார். போக, அவரை பவர்பிளேவில் பந்துவீச வைத்த சோதனை முயற்சியுமே வெற்றி பெறவில்லை.

இந்தத் தொடர் மட்டுமல்ல, ஜூலை மாதம் இங்கிலாந்தில் நடந்த ஒருநாள் தொடரிலுமே பும்ராவைத் தவிர மற்ற வீரர்கள் சோபிக்கத் தவறினார்கள். இந்திய வேகப்பந்துவீச்சின் இந்த செயல்பாடு தொடர்ந்துகொண்டிருக்கும் நிலையில், தென்னாப்பிரிக்காவில் நடக்கும் உலகக் கோப்பையில் அவர்களால் சோபிக்க முடியுமா என்ற பெரிய கேள்வியை அது எழுப்புகிறது.

- இது, பிபிசிக்காக கலெக்டிவ் நியூஸ்ரூம் வெளியீடு