Moja kwa moja , Trump ataka makubaliano ya kudumu na Iran

Akizungumza na waandishi wa habari katika Ikulu ya White House Ijumaa, Trump alisema Marekani inataka makubaliano ya kweli na Iran, akidai kuwa licha ya Tehran kutaka kufanya mazungumzo, masharti inayotaka hayawezi kukubalika kwake.

Moja kwa moja

Na Yusuph Mazimu

  1. Bruno Fernandes asitisha mazungumzo ya mkataba mpya Manchester United

    .

    Nahodha wa Manchester United, Bruno Fernandes, amesema klabu hiyo imempa ofa ya mkataba mpya, lakini ameamua kusitisha mazungumzo kwa sasa akiamini kuwa si wakati mwafaka kujadili mustakabali wake.

    Kiungo huyo mwenye umri wa miaka 32 anatarajiwa kumaliza mkataba wake mwishoni mwa msimu huu, ingawa Manchester United ina kipengele kinachoiruhusu kuongeza mkataba wake kwa mwaka mmoja zaidi, hadi mwaka 2028.

    Fernandes amesema hakuna mazungumzo yanayoendelea kwa sasa na amekanusha madai kwamba amekuwa akitaka kuongezewa mshahara au muda wa mkataba.

    Amesema kama angekuwa anatafuta fedha nyingi zaidi, angeondoka Manchester United kutokana na nafasi alizokuwa nazo za kujiunga na klabu nyingine ambazo zingemlipa zaidi.

    Ameongeza kuwa katika misimu kadhaa iliyopita, ikiwemo majira ya kiangazi miaka miwili na mitatu iliyopita pamoja na msimu uliopita, alikuwa na nafasi ya kuondoka, lakini aliamua kubaki Old Trafford.

    Mkurugenzi Mtendaji wa Manchester United, Omar Berrada, hivi karibuni alithibitisha kuwa klabu ilikuwa na mazungumzo kuhusu mkataba mpya wa Fernandes, lakini akasema angependa suala hilo libaki kuwa la siri.

    Fernandes alijiunga na Manchester United akitokea Sporting mwaka 2020 na tangu wakati huo amefunga mabao 75 katika Ligi Kuu England. Msimu uliopita pia aliweka rekodi ya kutoa pasi nyingi za mabao katika msimu mmoja wa ligi hiyo.

    Hata hivyo, kiwango chake kimeonekana kushuka msimu huu, wakati Manchester United ikianza vibaya ligi.

    Akizungumzia mazungumzo ya mkataba, Fernandes amesema suala hilo lilianza kujadiliwa mwishoni mwa msimu uliopita na kuendelea mwanzoni mwa msimu huu, lakini aliamua kuliweka pembeni kutokana na hali ya klabu na timu kwa ujumla.

    Amesisitiza kuwa kwa sasa si wakati mzuri kwake wala kwa klabu kuendelea na mazungumzo hayo.

  2. COP31 yaingia siku ya pili huku makubaliano yakikwama

    .

    Mkutano wa Umoja wa Mataifa kuhusu mabadiliko ya tabianchi (COP31) umeingia siku ya pili ya majadiliano ya nyongeza nchini Uturuki, huku nchi zinazoshiriki zikihangaika kufikia makubaliano na kuzuia mazungumzo hayo kuvunjika.

    Mkutano huo uliokuwa umepangwa kumalizika Ijumaa, sasa unaendelea mjini Antalya huku wajumbe wakijadili rasimu mpya ya makubaliano katika jitihada za kuafikiana kuhusu hatua za kukabiliana na mabadiliko ya tabianchi.

    Moja ya masuala yanayozua mvutano ni pendekezo la kujumuisha tena ahadi ya nchi kuachana hatua kwa hatua na matumizi ya nishati za zinazoharibu mazingira, ikiwemo mafuta na gesi.

    Umoja wa Ulaya (EU) na baadhi ya nchi nyingine zinataka ahadi hiyo irejeshwe kwenye makubaliano, lakini nchi zinazozalisha mafuta zikiongozwa na Saudi Arabia zinapinga hatua hiyo na kutaka iondolewe.

    Pia, bado hakuna mwafaka kuhusu fedha zitakazotolewa kusaidia nchi zinazoendelea kukabiliana na athari za mabadiliko ya tabianchi.

    Wakati huohuo, Umoja wa Ulaya unajadili uwezekano wa kuukataa kabisa mkataba unaopendekezwa, baada ya baadhi ya wajumbe wake kueleza kutoridhishwa na rasimu mpya.

    Mjumbe wa Ufaransa amesema maandishi yaliyowasilishwa na wenyeji wa mkutano huo Jumapili asubuhi ni dhaifu zaidi kuliko rasimu iliyotangulia, licha ya Umoja wa Ulaya kufanya kazi usiku kucha kutafuta mwafaka.

    Iwapo mazungumzo yataendelea hadi baada ya saa nane mchana kwa saa za Uturuki (11:00 GMT), COP31 itakuwa mkutano wa muda mrefu zaidi katika historia ya mikutano hiyo, na kuvunja rekodi iliyowekwa COP25 mjini Madrid.

    Ikiwa nchi zitashindwa kufikia makubaliano, mazungumzo yanaweza kusimamishwa hadi mwakani. Hali hiyo imetokea mara moja tu katika historia ya mikutano ya COP.

  3. Pete ya manusura wa ajali ya Titanic yauzwa kwa zaidi ya dola 190,000

    .

    Pete ya almasi iliyokuwa ikivaliwa na mmoja wa manusura maarufu wa ajali ya meli ya Titanic iliyozama mwaka 1912, imeuzwa kwa zaidi ya dola 190,000 katika mnada.

    Thamani ya pete hiyo ni zaidi ya shilingi milioni 506 za Tanzania, kiasi kinachoweza kununua pikipiki mpya za biashara zipatazo 182 kwa wastani wa bei ya Tsh 3mil kwa pikipiki moja.

    Pete hiyo yenye almasi iliyokatwa kwa mtindo wa single-cut, ilikuwa mali ya Lucy Lady Duff Gordon, mmoja wa abiria wa meli hiyo iliyozama na kusababisha vifo vya karibu watu 1,500.

    Inaaminika kuwa pete hiyo ilikuwa zawadi ya uchumba kwa Lady Duff Gordon.

    Lady Duff Gordon na mumewe walikuwa miongoni mwa abiria wa daraja la kwanza ndani ya Titanic na walinusurika katika ajali hiyo baada ya kuokolewa kwa kutumia boti namba moja ya uokoaji.

    Pete hiyo iliuzwa katika mnada na mmoja wa wazao wa moja kwa moja wa familia ya Lady Duff Gordon, lakini jina la mnunuzi halikutajwa.

  4. Chanzo cha moto ulioteketeza hoteli 6 Zanzibar bado chachunguzwa

    .

    Mamlaka za usalama Zanzibar zinaendelea kuchunguza chanzo cha moto ulioteketeza hoteli sita katika eneo la Nungwi, Mkoa wa Kaskazini Unguja, huku baadhi ya taarifa zikielekeza uwezekano wa hitilafu ya umeme au jenereta.

    Moto huo ulizuka mchana wa Ijumaa, Novemba 21, 2026, na kusababisha uharibifu mkubwa wa mali katika hoteli kadhaa pamoja na maduka ya wafanyabiashara wadogo waliokuwa wakiuza vinyago.

    Mkuu wa Upelelezi wa Polisi Mkoa wa Kaskazini Unguja, Omary Abdallah, amenukuliwa na vyombo vya habari vya ndani akisema chanzo cha moto huo bado kinachunguzwa.

    Akizungumza na AyoTV kwa njia ya simu, Katibu wa Sheha wa Nungwi, Khamis Kibata, alisema baadhi ya majengo ya hoteli hizo yalikuwa yamejengwa kwa makuti, hali iliyochangia moto kusambaa kwa kasi.

    Aidha, njia finyu katika eneo hilo ziliripotiwa kuwa changamoto kwa magari ya Jeshi la Zimamoto na Uokoaji kufika eneo la tukio kwa urahisi.

    Jeshi la Zimamoto na Uokoaji lilifanikiwa kuudhibiti moto huo, huku hakuna vifo wala majeruhi vilivyoripotiwa.

    Kwa upande mwingine, Kamisheni ya Utalii Zanzibar pamoja na uongozi wa wilaya waliandaa malazi mbadala kwa wageni walioathirika na tukio hilo.

    Hii si mara ya kwanza kwa hotel nyingi Zanzibar kuungua kwa wakati mmoja. Hili ni tukio la tatu kwa miaka 5 iliyopita, ambapo kwa miaka hiii karibu hotel 13 ziliteketea.

    Ukiacha 6 za sasa, mwaka 2023, hoteli tano zenye wastani wa vyumba sita hadi 16 na nyumba ya kulala wageni huko Paje Wilaya ya Kusini Unguja, Mkoa wa Kusini Unguja ziliungua kwa moto. Hotel hizo ni Cristal Resort, Merak, Maisha Matamu, Drifters na The Next Boutique Resort.

    Tukio lingine lilitokea mwaka 2021 ambapo hotel mbili zingine za Toptube Hotel na Oceanic Paradise ziliteketea katika matukio ambayo yote hata hivyo hayakusababisha vifo.

  5. Mexico yamkamata kinara wa dawa za kulevya aliyekuwa akisakwa na FBI

    .

    Mmoja wa vinara wa biashara ya dawa za kulevya nchini Mexico, aliyekuwa kwenye orodha ya watu 10 wanaosakwa zaidi na Shirika la Upelelezi la Marekani (FBI), amekamatwa baada ya majibizano ya risasi kati ya vikosi vya usalama na washukiwa wa uhalifu nchini humo.

    Fausto Isidro Meza Flores, anayefahamika kwa jina la utani la "Chapo Isidro", alikamatwa Ijumaa pamoja na watu wengine saba na vikosi maalumu vya jeshi la Mexico katika eneo la Guasave, jimbo la Sinaloa.

    Kwa mujibu wa Wizara ya Ulinzi ya Mexico, washukiwa wengine saba waliuawa katika operesheni hiyo, pamoja na wanajeshi wanne waliokuwa safarini kwenda kuongeza ulinzi katika eneo la Guasave.

    Meza Flores alikuwa akitafutwa nchini Mexico kwa tuhuma za kujihusisha na uhalifu wa kupangwa, huku FBI ikimtuhumu kusafirisha kwa wingi dawa za kulevya aina ya fentanyl, cocaine, heroini na nyingine hatari kwenda Marekani. Marekani inataka akabidhiwe ili akabiliwe na mashtaka.

    Mexico imeongeza juhudi za kupambana na biashara ya dawa za kulevya kufuatia shinikizo kutoka kwa Rais wa Marekani Donald Trump tangu arejee madarakani.

    Meza Flores, anayeongoza kundi la Meza Flores Organisation, linalojulikana pia kama Guasave Cartel, anadaiwa kujihusisha na biashara ya usafirishaji wa dawa za kulevya tangu miaka ya 1990. Hata hivyo, aliweza kukwepa vyombo vya usalama kwa muda mrefu kwa kutojiweka sana hadharani.

  6. Indonesia yasaka watu 36 baada ya moto kiwandani kuua watatu

    .

    Waokoaji nchini Indonesia wanaendelea na juhudi za kuwatafuta wafanyakazi 36 ambao hawajulikani walipo, kufuatia moto mkubwa uliotokea katika kiwanda cha kutengeneza pipi na kusababisha vifo vya watu watatu na wengine wanne kujeruhiwa.

    Moto huo ulizuka Jumamosi jioni katika kiwanda kilichopo Cikande, wilayani Serang, mkoani Banten, magharibi mwa kisiwa cha Java.

    Kwa mujibu wa taarifa za mamlaka, watu 15 waliweza kunusurika katika tukio hilo, huku wanne kati yao wakipelekwa katika vituo vya matibabu kwa ajili ya kupata huduma.

    Timu za uokoaji zinaendelea kukagua maeneo mbalimbali ya jengo lililoharibiwa na moto, wakiamini huenda baadhi ya wafanyakazi waliokuwa ndani wamenasa kwenye vifusi.

    Hadi mapema leo Jumapili, wazima moto walikuwa bado wakifanya kazi ya kupoza maeneo ya kiwanda hicho baada ya kubaini kuwa baadhi ya sehemu bado zilikuwa na mabaki ya moto na joto kali.

    Mamlaka bado hazijatoa taarifa kuhusu chanzo cha moto huo.

  7. Trump ataka makubaliano ya kudumu na Iran

    .

    Rais wa Marekani Donald Trump amesema nchi yake inataka kufikia makubaliano ya kudumu na Iran, akisisitiza kuwa hataki makubaliano yasiyo na uhakika, huku akidokeza kuwa anaweza kusubiri hadi mwaka 2027 kabla ya kuamua hatua nyingine kuhusu vita kati ya nchi hizo.

    Akizungumza na waandishi wa habari huko Ikulu ya White House Ijumaa, Trump alisema Marekani inataka makubaliano ya kweli na Iran, akidai kuwa licha ya Tehran kutaka kufanya mazungumzo, masharti inayotaka hayawezi kukubalika kwake.

    " Wanataka kufanya makubaliano, lakini hawataki makubaliano ambayo mimi nitayakubali," alisema Trump.

    Aliongeza kuwa Iran imekuwa ikiidanganya Marekani kwa miaka 51.

    Katika mahojiano na kituo cha televisheni cha Israel siku ya Alhamisi, Trump alisema hana haraka ya kufanya uamuzi kuhusu hatua inayofuata katika vita dhidi ya Iran, na anaweza kusubiri hadi mwaka 2027.

    Hata hivyo, katika mahojiano na kituo cha Fox News Jumamosi, alisisitiza kuwa anataka makubaliano ya kudumu na utawala wa Iran.

    Wakati huo huo, taarifa zilizotolewa na vyanzo vinavyofahamu mazungumzo hayo zinaeleza kuwa Marekani na Israel zinafikiria uwezekano wa kuanzisha mashambulizi mapya dhidi ya Iran katika kipindi cha hivi karibuni.

    Kwa mujibu wa CBS, serikali ya Waziri Mkuu wa Israel Benjamin Netanyahu ina wasiwasi kuhusu kasi ambayo Iran inarejesha uwezo wake wa kuzalisha silaha.

    Kwa upande wake, Iran Alhamisi ilikanusha tuhuma za Trump kwamba huenda inatafuta kutengeneza silaha za kemikali au kibayolojia.

    Wizara ya Mambo ya Nje ya Iran ilisema madai ya Marekani kuhusu suala hilo yamekuwa yakibadilika mara kwa mara, na kuyafananisha na madai yaliyotumiwa na Marekani kuhalalisha uvamizi wa Iraq mwaka 2003.

    Tehran ilisema madai hayo yanafuata kile ilichokiita simulizi ya udanganyifu lililotumiwa na Washington wakati huo kuhalalisha vita dhidi ya Iraq.