Trump oo ku hanjabay canshuuro cusub oo lagu soo rogo baabuurta Canada kadib markii wadahadalladii ganacsigu burbureen

Tebin toos ah

1. 25 Agoosto 2026Yaa maxkamadda geeyay dacwadda ka dhan ah doorashadii ka dhacday Galmudug?

   Maxkamadda Sare ee Soomaaliya ayaa maanta laashay natiijada doorashadii isku sidkanayd ee dhammaadkii bishii hore ka dhacday degmooyinka dawlad goboleedka Galmudug.

   Waxay maxkamaddu ku dhawaaqday in dib loogu laaban doono doorashada Galmudug, waxaana xukunka ku dhawaaqay gudoomiyaha Maxkamadda Sare, Baashe Yuusuf Axmed.

   Dacwadda lagu baabi'iyay natiijada doorashada Galmudug, waxaa gudbiyay urur siyaasadeedka Towfiiq oo kamid ahaa ururradii ka qaybagalay doorashada, sida uu BBC-da u xaqiijiyay Gudoomiyahooda Sheekh Maxamad Shaakir Cali Xasan oo wareysi siiyay BBC-da.

   Halkan ka akhri faahfaahinta

2. 25 Agoosto 2026Maraykanka oo Suuriya ka saaray liiska dalalka taageera argagaxisada

   Maraykanka ayaa Isniintii Suuriya ka saaray liiska dalalka taageera argagixisada, tallaabadaas oo Washington ku sheegtay inay gacan ka geysan karto kordhinta maalgashiga iyo xasilloonida dhaqaale ee Suuriya.

   Go’aanka ayaa dhaqan galay kadib markii uu dhammaaday 45 maalmood oo dib-u-eegis ah oo Congress-ka Maraykanku sameeyay. Madaxweyne Donald Trump ayaa 8-dii Luulyo si rasmi ah Congress-ka ugu wargeliyay qorshahan, kadib kulan uu Ankara kula yeeshay Madaxweynaha Suuriya, Ahmed al-Sharaa.

   Xoghayaha Maaliyadda Maraykanka Scott Bessent ayaa sheegay in go’aanku dhiirrigelin doono maalgashi badan oo Suuriya lagu sameeyo, taas oo gacan ka geysan karta xasilloonida siyaasadeed iyo dhaqaale.

   Xoghayaha Arrimaha Dibadda Marco Rubio ayaa sheegay in tallaabadan lagu qaaday iyada oo la tixgelinayo tallaabooyinka wanaagsan ee dowladda cusub iyo ballanqaadkeeda ah inay Suuriya ka fogeyso argagixisada caalamiga ah.

   Suuriya waxay liiska ku jirtay tan iyo 1979, markii Maraykanku ku eedeeyay dowladdii Hafez al-Assad inay taageerto kooxo hubaysan. Cunaqabatayntu waxay sii socotay xilligii wiilkiisa Bashar al-Assad, oo xukunka laga tuuray Diseembar 2024

3. 25 Agoosto 2026Muftigii Suuriya ee xilligii Assad oo xabsi daa'in lagu xukumay

   Maxkamad ku taalla Suuriya ayaa xabsi daa’im ku xukuntay Ahmed Hassoun, oo 77 jir ah, kaas oo ahaa wadaadka ugu sarreeyay dalkaas ama Muftigii Suuriya intii u dhaxaysay 2005 iyo 2021, xilligii madaxweynihii xilka laga tuuray Bashar al-Assad.

   Maxkamaddu waxay ku heshay dambiyo ay ka mid yihiin kicinta dagaal sokeeye iyo ku lug lahaanshaha dilal ula kac ah. Waxaa sida oo kale lagu eedeeyay in hay’addii diimeed ee uu hoggaaminayay loo adeegsaday in lagu qariyo ama lagu taageero hawlgalladii ciidamada iyo sirdoonka xukuumaddii Assad, oo ay ku jireen weerarro lagu adeegsaday bambooyin foosto.

   Hassoun, oo eedaha beeniyay, waa qofkii 10-aad ee ka tirsanaa xukuumaddii Assad ee lagu xukumo maxkamadaha maamulka ku-meelgaarka ah ee Suuriya.

   Kiiskan wuxuu la xiriiraa dagaalkii sokeeye ee ka dhashay kacdoonkii nabadeed ee 2011. Dagaalkaas ayaa sababay dhimashada in ka badan 600,000 qof, halka ku dhawaad 12 milyan oo qof ay guryahooda ka qaxeen.

4. 25 Agoosto 2026Maraykanka oo cunaqabatayn dhaqaale oo culus ku soo rogay Iran

   Maraykanka ayaa ku dhawaaqay cunaqabatayn dhaqaale oo cusub oo ballaaran oo ka dhan ah Iran, isagoo sidoo kale uga digay dalalka iyo shirkadaha taageera ama ganacsi la sameeya Iran.

   Xoghayaha Maaliyadda Maraykanka, Scott Bessent, ayaa tallaabadan ku tilmaamay “weerarkii dhaqaale ee ugu weynaa abid”. Wuxuu sheegay in Maraykanku doonayo inuu jaro xiriirrada dhaqaale ee Iran, isla markaana cid kasta oo dhaqaale ahaan la shaqaysa Iran ay la kulmi karto go'doon.

   Cunaqabatayntu waxay bartilmaameedsanaysaa shan qaybood oo ay ka mid yihiin hantida dijitaalka ah, tiknoolajiyadda, dahabka, duulista iyo maraakiibta. Ku dhawaad 60 shirkadood, shaqsiyaad iyo maraakiib ayaa sidoo kale lagu soo rogay cunaqabatayn.

   Bessent wuxuu sheegay in Maraykanku doonayo inuu xannibo ilaha dhaqaale ee Iran, gaar ahaan kuwa ay isticmaalaan Ilaalada Kacaanka Islaamiga ah ee Iran.

   Dhanka kale, Iran waxay ku hanjabtay inay joojin doonto dhammaan dhoofinta shidaalka ee gobolka haddii dagaalku sii socdo. Iran sidoo kale waxay maraakiibta uga digtay inay maraan Marinka Hormuz iyaga oo aan oggolaansho ka haysan.

   Marinka Hormuz waa marin muhiim ah oo caadi ahaan maraan qiyaastii shan meelood meel shidaalka iyo gaaska adduunka, sidaas darteed khilaafku wuxuu sababi karaa in qiimaha shidaalka caalamka uu sii kordho.

5. 25 Agoosto 2026Maxaa u danbeeyey dagaalkii ganacsi ee Maraykanka iyo Canada?

   Madaxweynaha Maraykanka Donald Trump ayaa ku hanjabay inuu 1-da Janaayo ku soo rogi doono canshuuro cusub baabuurta laga keeno Kanada.

   Dhanka kale, Ra’iisul Wasaaraha Kanada Mark Carney ayaa sheegay in hanjabaaddii ugu dambeysay ee Trump aysan ahayn wax lala yaabo, isla markaana shaqaalaha Maraykanka ay waxyeello ka soo gaadhi doonto canshuur kasta oo dheeraad ah oo lagu soo rogo baabuurta.

   Carney wuxuu diyaarinayaa jawaab ku aaddan canshuurihii cusub ee Maraykanku toddobaadkan dhammaadkiisa ku soo rogay badeecadaha Kanada, kaddib markii wada-hadalladii ganacsi ay burbureen.

   Carney wuxuu xaqiijiyay in Kanada ay Trump ugu jawaabi doonto canshuur “doollar-ka-doollar”, laga bilaabo 8-da Sebtembar, oo ay ku jiraan canshuuraha lagu soo rogay birta, waxyaabaha caanaha laga sameeyo, qalabka guryaha iyo elektaroonigga.

   Labada dalba waxay rajo ka qabeen in heshiis la gaaro, balse wada-hadalladii ayaa burburay, iyadoo labada dhinac midba midka kale ku eedeeyay inuu isbeddello sameeyay daqiiqadihii ugu dambeeyay.

   Wakiilka sare ee Maraykanka u qaabilsan wada-hadallada ganacsiga, Jamieson Greer, ayaa ku eedeeyay dhinaca Kanada inay doonayeen wax ka badan intii heshiiska ku jirtay.

6. 24 Agoosto 2026UK oo sii ballaadhinaysa taageeradeeda Ukraine xilli Ruushkii soo hanjabayo

   Andy Burnham, oo ah Ra’iisul Wasaaraha UK, ayaa sheegay in UK ay sii wadi doonto taageerada Ukraine inkastoo Ruushku soo jeedinaay hanjabaado culus.

   Booqashadan rasmiga ah ayaa noqonaysa tiisii ugu horraysay ee dal dibedda ah, isaga oo kula kulmay Madaxweynaha Volodymyr Zelensky.

   Burnham wuxuu guddoomiyay shirkii ugu horreeyay ee “coalition of the willing”, kaas oo UK iyo Faransiisku sameeyeen iyadoo hoggaamiyeyaasha 34 waddan ay wadahadal ku yeeshaan sidii Ukraine loo caawin lahaa.

   Burnham wuxuu sheegay in dalalku ay “samaynayaan wax kasta” oo suurtagal ah si ay u xoojiyaan difaaca cirka Ukraine, isla markaana ay mar kale kor ugu qaadayaan cadaadiska dhaqaalaha ee Ruushka. Waxa kale oo uu ku baaqay Congress-ka Mareykanka in uu “kor u qaado” cadaadiskaas. Dowladda UK waxay ogolaatay in la siiyo Ukraine xog iyo qorshayaal qaybaha ay ka samayso UK ee gantaalka Scalp, oo la mid ah Storm Shadow, si Ukraine ay u dhisi karto gantaaladan gudaheeda. Dhanka kale, Ruushka wuxuu dhaleeceeyay go’aanka UK.

7. 24 Agoosto 2026Madaxweyne xigeenka Maraykanka oo war ka soo saray canshuuraha dalkiisu ku soo rogay Canada

   Madaxweyne ku-xigeenka Maraykanka JD Vance ayaa sheegay in Canada ay leedahay “mid ka mid ah siyaasadaha ganacsi ee ugu xun adduunka.”

   Waxaa uu sheegay in ujeeddada maamulka Trump ay tahay in la helo “heshiis caddaalad ah” oo loogu talagalay gobollada ama dhinacyada ganacsi la sameeya Kanada.

   Isagoo wax yar ka hor ka hadlayay gobolka Maine ee Maraykanka, Vance wuxuu Kanada ku eedeeyay inay leedahay mid ka mid ah siyaasadaha ganacsi ee ugu xun, isagoo Shiinaha la barbar dhigay.

   “Shiinaha, dabcan waad filan kartaa. Waa tartamahayaga dhaqaale ee ugu weyn,” ayuu yiri Vance. “Laakiin taas kama aanan filayn Kanada.”

   Vance wuxuu intaas ku daray in Kanada ay maalgelin ku filan ku samayn ciidamadeeda, wuxuuna sheegay in haddii aysan jirin “dalladda ilaalinta ee uu Maraykanku bixiyo,” Kanada ay duullaan kala kulmi lahayd dal shisheeye.

   Isagoo ka hadlayay burburkii wadahadallada ganacsiga, wuxuu yiri Kanada waxay dhammaadkii wadahadallada la timid “dalabaadyo badan oo aan macquul ahayn oo daqiiqaddii ugu dambeysay ah.” Wuxuu sheegay inuu si dhab ah u malaynayay in labada dhinac ay heshiis gaareen.

   Vance wuxuu ku daray:

   “Waxaan u baahanahay inaan farriin cad oo aan mugdi ku jirin u dirno ra’iisul wasaaraha: joojiya ka faa’iidaysiga Maraykanka.”

8. 24 Agoosto 2026Sida masuuliyiin Canadian ah ugu falceliyeen canshuuraha Maraykanka

   Hoggaamiyayaal dhowr ah oo Canadian ah ayaa ka falcelinayay tan iyo markii wadahadalladii ganacsi ay burbureen Jimcihii.

   Ra’iisul Wasaaraha Kanada Mark Carney ayaa sheegay in Maraykanku soo bandhigay shuruudo “aan la aqbali karin” oo aad u xaddidan, oo ay ka mid tahay in la xaddido awoodda Canada ay kula geli karto heshiisyo ganacsi oo cusub dalal kale.

   Doug Ford, hoggaamiyaha gobolka Ontario oo ah gobolka ugu dadka badan Canada, ayaa taageeray Carney, wuxuuna sheegay in Trump “aan lagu kalsoonaan karin.”

   David Eby, guddoomiyaha ra’iisul wasaaraha British Columbia, ayaa sheegay in dalabka Maraykanka ee lagu xaddidayo awoodda Kanada ay heshiisyo ganacsi kale la gasho dalal kale uu “Kanada ka dhigi lahaa dhinaca dhaqaalaha wax u dhigma gobolkii 51-aad.”

   Hoggaamiyaha mucaaradka Conservative-ka, Pierre Poilievre, ayaa sidoo kale u muuqday inuu taageerayo Carney, isagoo canshuuraha cusub ee Maraykanka ku tilmaamay “aan wax cudurdaar ah lahayn.”

   Gudoomiyaha Quebec, Christine Fréchette, ayaa ka digtay in shaqooyin ay u badan tahay inay ku lumi doonaan canshuuraha cusub ee Maraykanka awgood, waxayna ballanqaadday in la qaadi doono tallaabooyin lagu taageerayo qaybaha dhaqaalaha ee ay saameeyeen.

   Dhanka kale, Danielle Smith, guddoomiyaha Alberta oo ah gobol hodan ku ah saliidda isla markaana dadaal ugu jiray inuu xiriir wanaagsan la sameeyo maamulka Trump, ayaa ugu baaqday labada dhinac inay dib u bilaabaan wadahadallada.

9. 24 Agoosto 2026Maxay tahay sababta uusan 100 sano ka dib isku beddelin maydka hoggaamiyahan mar laga yaqaanay Soomaaliya

   Xusuusta Vladimir Ilyich Lenin, hoggaamiyihii Kacaankii weynaa ee Ruushka, ayaa loogu dabaaldegay sannad-guuradii 100-aad ee ka soo wareegtay markii la aasaasay.

   Waxaa jira munaasabo lagu maamuuso oo la qabto kuwaas oo ay ku jiraan xus ciidan, ayadoo lagu qabto goobtiisa xasuusta.

   Mararkan oo kale waxaa meydka Lenin la soo saaraa goobta lagu ilaaliyo isaga iyo Joseph Stalin si loo maamuuso.

   Maydkiisa ayaa sanadkii 1970-kii lagu dahaaray goobta uu yaallo muraayado an xabadu karin. Halka maydkiisu yaallo ayaa mararka qaar la furaa si loogu ogolaado dadweynaha inay daawadaan.

   Markii dalkii hantiwadaaga ahaa ee Midowga Soofiyeeti uu burburay sagaashamaadkii, waxaa la codsaday in la soo saaro meydka Lenin oo la aaso.

   Halkan ka sii akhri sheekada

10. 24 Agoosto 2026Trump oo hanjabaad cusub u jeediyey Canada

    Madaxweyne Trump ayaa sheegay inuu canshuuraha lagu soo rogo baabuurta, gawaarida xamuulka fudud iyo qaybaha baabuurta ee Canada kordhin doono ilaa 50% laga bilaabo Janaayo, halka ay hadda yihiin 25%.

    Wuxuu Canada ku eedeeyay inay sannado badan “khiyaanaysay” ama si aan caddaalad ahayn uga faa’iidaysanaysay Maraykanka, isla markaana ay canshuuro “si aan macquul ahayn u sarreeya” ku soo rogto beeraleyda Maraykanka. Waxa kale oo uu Canada ku tilmaamay inay ka mid tahay “dalalka ugu xun adduunka ee lala macaamilo.”

    Trump ayaa bartiisa bulshada ee Truth Social ku qoray: “Ku soo saara baabuurta Maraykanka, canshuurna ma jiri doono.” Wuxuuna intaas ku daray: “Canada mar dambe loola dhaqmi maayo sida gobol!”

    Sheekooyinka kale ee aad sii akhrin karto:

    Waakuwee goobaha gaaska ee ugu wayn adduunka?

    Islaxafladda qalin-jebinta ayaa lagu siiyay saddex abaal-marin iyo shaqo

    Denmark oo qorsheysay inay qarxiso dhabbaha diyaaradaha Greenland haddii uu Mareykanku qabsado

11. 24 Agoosto 2026Waftigii Pakistan oo gaaray Tehran xilli Maraykanku wali wado hanjaabo ka dhan ah Iran

    Taliyaha ciidamada Pakistan, Asim Munir, ayaa Tehran kula kulmay saraakiil sare oo Iiraani ah, taas oo qayb ka ah dadaallada lagu doonayo in dib loo soo nooleeyo wada-hadalladii nabadeed ee u dhexeeyay Iiraan iyo Maraykanka.

    Booqashadiisu waxay ku soo beegmaysaa xilli Washington ay isu diyaarinayso inay ku dhawaaqdo cunaqabateyn dhaqaale oo dheeraad ah oo ka dhan ah Iiraan. Xoghayaha Maaliyadda Maraykanka, Scott Bessent, ayaa tallaabooyinkan ku tilmaamay “weerarkii dhaqaale ee ugu weynaa abid ee loo diyaariyo cadow.”

    Iiraan ayaa hanjabaaddaas ku tilmaantay calaamad muujinaysa quus ka jirta Washington, waxayna uga digtay dalalka kale inay ku biiraan ololaha dhaqaale ee ka dhanka ah Iiraan.

    Sheekooyinka kale ee aad sii akhrin karto:

    5 kiis oo siyaasadeed oo Afrikaan ah oo qaatay sanado badan si xal looga gaaro

    Waa kuwee goobaha gaaska ee ugu wayn adduunka?

    Islaxafladda qalin-jebinta ayaa lagu siiyay saddex abaal-marin iyo shaqo

    Denmark oo qorsheysay inay qarxiso dhabbaha diyaaradaha Greenland haddii uu Mareykanku qabsado

12. 24 Agoosto 2026Ra’iisul Wasaaraha UK oo ku tilmaamay hanjabaadaha Ruushka kuwo “xad-dhaaf ah oo aan la aqbali karin.”

    Ra’iisul Wasaaraha cusub ee Britain, Andy Burnham, oo booqasho ku jooga Kyiv, ayaa ballanqaaday in Britain ay sii wadi doonto taageerada ay siiso Ukraine, inkastoo uu ku tilmaamay hanjabaadaha Ruushka kuwo “xad-dhaaf ah oo aan la aqbali karin.”

    Wuxuu hadalkan ka sheegay munaasabad lagu xusayay Maalinta Madax-bannaanida Ukraine.

    Burnham ayaa sheegay in Britain, iyadoo ay weheliyaan xulafadeeda kale, ay Ukraine ka caawin doonto horumarinta teknoolojiyado cusub, isla markaana ay taageeri doonto dadaallada lagu burburinayo gantaallada Ruushka ka hor inta aan la ridin.

    Waxaa la filayaa inuu xaqiijiyo in Britain ay Ukraine siin doonto naqshadaha farsamo ee ay u baahan tahay si ay gudaha dalka ugu soo saarto tiro badan oo ah gantaallada cruise-ka ee riddada dheer.

    Madaxweynaha Ukraine, Volodymyr Zelensky, ayaa isaguna khudbad adag jeediyay, isagoo sheegay in dadka reer Ukraine aysan noqon doonin “ dhagaxaanta lagu dul socdo.”

    Sheekooyinka kale ee aad sii akhrin karto:

    Waa kuwee goobaha gaaska ee ugu wayn adduunka?

    Isla xafladda qalin-jebinta ayaa lagu siiyay saddex abaal-marin iyo shaqo

    Denmarkoo qorsheysay inay qarxiso dhabbaha diyaaradaha Greenland haddii uu Mareykankuqabsado

13. 24 Agoosto 2026Daraasad "xal waara" u heshay bidaarta

    Burooyinka yaryar ee maqaarka dadka ayaa suurta gal ah in uu leeyahay fursad lagu daweyn karo bidaarta, sida lagasoo xigtay daraasad toddobaadkan lagu daabacay joornaalka Nature.

    Ku dhawaad toban sano, saynisyahano ka tirsan Jaamacadda California, Irvine waxay baranayeen burooyinka maqaarka si ay u fahmaan sababta ay ugasoo baxaan timaha dhaadheer. daraasadda cusub waxay muujineysaa in burooyinka noocan oo kale ah ay ka kooban yihiin unugyo gaar ah oo kor u qaada koritaanka timaha.

    “Waxaan timaha burooyinka ka dul baxa ka helnay tixraac,” ayuu yiri Maksim Plikus oo ah madaxa daraasadda isla markaana ah barfasoore ka ah jaamacadda California, Irvine kana dhiga samaysanka unugyada bayoolajiga.

    Dadku sida caadiga ah waxay lumiyaan inta u dhaxaysa 50 iyo 100 xabbo oo timo ah maalintii, ka dibna unugyada gunta tinta ayaa soo saara kuwo cusub. Laakiin shakhsiyaadka leh bidaarta ama ay hadda kusoo socoto - waxa ay dhakhaatiirtu u yaqaanaan ‘alopecia’ ama ‘alopecia androgenic’ oo ah unugyada asliga ah ayaa jiifa, sidaas darteed ayeysan timo cusub usoo baxeyn.

    Sida lagu helay Tijaabooyin loo adeegsaday jiir, Plikus iyo kooxdiisa cilmi-baaristu waxay muujiyeen in nooc ‘molecule ah’ oo loo yaqaan ‘osteopontin’, oo si gaar ah ugu badan burooyinka maqaarka ee timaha leh, uu kicin karo unugyada tarma ee timaha, kuwaas oo markii hore hurday.

    Halkan ka soo akhirso sheekada

14. 24 Agoosto 2026Shiinaha oo baaq ka soo saarey xaaladda Bariga Dhexe

    Wasiirka Arrimaha Dibadda Shiinaha, Wang Yi, ayaa sheegay in Bariga Dhexe iyo gobolka Gacanka Faaris ay gaareen meel aad u xasaasi ah, wuxuuna ugu baaqay dhinacyada ku lugta leh inay sida ugu dhakhsaha badan ugu laabtaan wadahadal iyo wada-xaajood.

    Sida lagu sheegay bayaan kasoo baxay Wasaaradda Arrimaha Dibadda Shiinaha, Wang ayaa hadalkan sheegay intii uu kulan kula lahaa Wasiirka Arrimaha Dibadda Kuwait, Sheikh Jarrah Jaber Al-Ahmad Al-Sabah, magaalada Beijing.

    Wang ayaa kulanka ka sheegay in “qaabkii hore ee colaadaha soo noqnoqday aan dib loo celin karin”, isagoo xusay in mudnaanta koowaad ay tahay in xiisadda la dejiyo.

    Wuxuu sheegay in Shiinuhu diyaar u yahay inuu xoojiyo iskaashiga iyo isku-duwidda uu la leeyahay Kuwait, isla markaana uu sii wadi doono dadaallada uu ku taageerayo nabadda iyo xasilloonida gobolka.

    Kulanka ayaa dhacay xilli Mareykanku Iran ugu hanjabay “weerarkii dhaqaale ee ugu weynaa taariikhda”, kaas oo lagu bartilmaameedsanayo dalalka iyo shirkadaha ganacsi ee la shaqeeya Iran.

    Iran ayaa sheegtay inay joojin doonto dhammaan dhoofinta shidaalka ee ka baxda Gacanka Faaris haddii waxa ay ugu yeertay “dagaalka dhaqaale” uu sii socdo.

    Iran ayaa sidoo kale soo saartay digniin cusub oo ay ku sheegtay in maraakiibta aysan mari karin Marinka Hormuz iyaga oo aan fasax ka haysan Iran.

    Sheekooyinka kale ee aad sii akhrin karto:

    Waa kuwee goobaha gaaska ee ugu wayn adduunka?

    Isla xafladda qalin-jebinta ayaa lagu siiyay saddex abaal-marin iyo shaqo

    Denmark oo qorsheysay inay qarxiso dhabbaha diyaaradaha Greenland haddii uu Mareykanku qabsado

15. 24 Agoosto 2026Ma taqaanaa gantaalka ugu halista badan ee yalla Afrika xilligaan?

    Ciidanka Aljeeriya ayaa markii ugu horreysay xaqiijiyay inay haystaan ​​gantaalada Iskander ee hypersonic, iyagoo sii daayay muuqaallo muujinaya gantaalka oo la ridayo intii lagu jiray tababar.

    Gantaalkan waxaa la rumeysan yahay inay haysteen militariga dalka sannado badan, inkastoo xaqiijin la'aanta hore ay muujinayso u janjeersiga militariga Aljeeriya ee ah inaysan ku dhawaaqin iibsashada hub cusub.

    Iskander waxaa loo arkaa gantaalka ballistic-ga ugu awoodda badan adduunka waxaana la ogyahay in loo dhoofiyay Armenia iyo Aljeeriya oo keliya iyaga oo ka helay Ruushka, halka Kuuriyada Waqooyi iyo Koonfurta Kuuriya ay soo rideen gantaallo la mid ah iyada oo loo maleynayo inay ka faa'iideysanayaan tignoolajiyada Ruushka.

    Gantaalkan wuxuu gaaraa masaafo dhan 500 oo kiiloomitir iyo isaga oo leh bartilmaameedyo saxnaan sare leh iyo dhaqdhaqaaqa awooddiisa ee uu ku safri karo xawaare sare, taa oo adkeyneysaa in la qabto.

    Soo bandhigidda Iskander waxay ka dambeysay markii uu qarxay dagaal heer hoose ah oo u dhexeeya Ciidanka Morocco iyo kooxaha fallaagada ah ee kala duwan.

    Halkan ka sii akhri sheekada

16. 24 Agoosto 2026Labada waddan ee Afrikaan ah ee haysta diyaaradda laga baqo ee F-16

    Guud ahaan qaaradda Afrika, waxaa jira laba waddan oo haysta diyaaradda F-16 ee caanka ku ah duqaymaha cirka, inta la ogyahay.

    Wadamadaas ayaana waxa ay heshiis iib la galeen dowladda Maraykanka, taas oo usoo daabushaay gudaha wadamadooda.

    Sida ay qortay wakaaladda wararla ee Reuters sanadkii 2015 kii, dowladda Maraykanka ayaa sideed diyaaradood oo ah nuuca F-16 waxay u daabulayeen dalka Masar.

    Xilligaas ayaa waxaa soo hagaagayay xiriirka ka dhaxeeya labada dal, kadib markii milatarigu ay xilka ka tuureen madaxweynihii dalkaas Mohamed Mursi, kadib dibadbaxyo xoogan oo dalka ka dhacay, waxaana si habsami leh u hagaagay xiriirkii Mraykanka kala dhaxeeyay Abdel Fattah al-Sisi, oo badalay Mohamed Mursi.

    ligaas soo saartay safaaradda Maraykanka ee dalka Masar, ayaa lagu sheegay in saanad milatari oo xanibaad laga qaaday ay gaari doonto waddanka Masar laba maalin gudahood.

    Waxaa lagu sheegay warkaas in saanadda ay ka mid ahayd, afar diyaaradda dagaalka ee F-16.

    Waddanka kale ee Afrikaanka ah ee la aaminsan yahay in uu haysto diyaaradda F-16 ayaa ah dalka Morocco, kaas oo heshiis hub la galay dalka Maraykanka.

    Sidoo kale 2019 kii ayaa mar kale Morocco waxay heshiis diyaarado iibsi ah la gashay dowladda Maraykanka, kaa oo ay doonaysay in ay ku iibsato diyaarado cusub oo F-16 ah, iyo sidoo kale in loo dayactiro kuwii ay horay uga iibsatay Maraykanka.

    heshiiskaas ayaa ku kacayay ku dhawaad $4 billion oo doolarka Maraykanka ah.

    Inta la ogyahay labadaan waddan ayaa Afrika oo idil ka haysta diyaaradaha dagaalka ee F-16.

    Iyada oo loo naqshadeeyay qaab yar, oo hadana fudayda ka dhigaya kuna haboon dagaalka hawada, F-16 waxay qaadatay doorar aad u badan oo kala duwan, laga bilaabo weerarada dhulka ilaa iyo kuwa looga hortagga maraakiibta iyo xita doorarka qaadista sawirada sahaminta ganista gantaalaha hawada isaga kala goosha. Tan iyo 2015, waxay ahayd tiradii ugu badnayd ee diyaaradaha milatariga adduunka; in ka badan 2,000 ayaa loo malaynayaa inay weli si firfircoon uga faa'iidaystaan caalamku maanta.

17. 24 Agoosto 2026War deg deg ah, Degdeg: Maxkamadda Sare ee Soomaaliya oo go'aan ka soo saartay doorashadii Galmudug

    Maxkamadda Sare ee Soomaaliya ayaa laashay natiijooyinkii doorashadii dhawaan ka dhacday maamulka Galmudug, iyadoo lagu sababeeyay eedo la xiriira musuqmaasuq iyo khaladaad dhacay xiligii doorashada, iyadoo amartay in doorashada dib loo qabto.

    Go'aamada maxkamadda ayaa u dhacay sidatan:

    1. "Iyadoo lagu saleynayo qodobka 82-aad ee sharciga doorashooyinka iyo mabaa'diida dastuuriga ah ee doorasho xor, xalaal iyo cadaalad ah. Maxkamaddu waxay go'aamisay in doorashooyinkii isku sidkanaa ee golaha wakiilada iyo goleyaasha deegaanka ee 30-ka Luulyo ka dhacay dowlad goboleedka Galmudug aan loo maamulin ama aan loo qabanin si waafaqsan dastuurka iyo sharciga doorashooyinka dalka, sidaas darteedna natiijadu ay tahay mid aan ansax ahayn oo waxba kama jiraan ah"

    2. "Iyadoo lagu saleynayo qodobka 27-aad ee sharciga doorashooyinka iyo waajibka guddiga ka saaran meel marinta iyo ku dhaqanka sharciga, maxkamaddu waxay go'aamisay in khaladaadkii dhacay ay ahaayeen kuwo aan la saxi karin isla markaana dhaawac weyn u geystay hufnaanta xornimada iyo xalaalnimada doorashooyinka, saameyn badanna ku yeeshay natiijadooda"

    3.Iyadoo la ilaalinayo xaqa ay muwaadiniinta u leeyihiin doorashooyin toos ah, xor iyo xalaal ah, isla markaana la fulinayo waajibaadka sharci ee ku xusan sharciga doorashooyinka, maxkamaddu waxay amartay Guddiga Madaxa banaan ee doorashooyika qaranka iyo soohdimaha inuu ku qabto wakhtiga ugu dhow doorashooyinka macquulka ah ee doorashooyinka goleyaasha deegaanka ee dolad-goboleedka Galmudug isagoo si dhameystiran u raacaya dastuurka dalka, sharciga doorashooyinka,sharciga dhismaha guddiga, iyo xeerka ururada iyo xisbiyada siyaasadda"

    4. "Iyadoo la tix-gelinayo danta guud ee maamulka iyo kahortagga firaaq maamul oo dhaawici kara adeegyada maamul, iyo xasiloonida dowlad-goleedka Galmudug, maxkamaddu waxay amartay in hay'adaha hadda jira ay sii hayaan xilka inta ay ka bedelayaan kuwa ku yimaada doorasho cusub oo loo qabtay si waafaqsan sharciga".

18. 24 Agoosto 2026War deg deg ah, Mareykanka oo weerar kale ku qaaday doon daroogo looga shakiyay

    Milatariga Mareykanka ayaa sheegay inuu weerar kale oo dhimasho sababay ku fuliyay doon looga shakisan yahay inay siday daroogada, taas oo ku suganayd bariga Badweynta Baasifigga, waxaana weerarkaas lagu dilay laba qof.

    Taliska Mareykanka ee Koonfurta, ayaa sheegay in xogta sirdoonku muujisay in doontu si firfircoon ugu lug lahayd waxa Washington ugu yeerto shabakadaha “narco-terrorist”, oo loola jeedo shabakado isku xira tahriibinta daroogada iyo argagixisada.

    Weerarkan ayaa daba socda weerarro la mid ah oo isdaba joog ah oo dhacay horaantii sanadkan, kuwaas oo lagu bartilmaameedsaday doonyo mara waddooyinka "tahriibinta" ee u dhexeeya Koonfurta Ameerika iyo Waqooyiga Ameerika.

    Ururrada u dooda xuquuqda aadanaha ayaa su’aal geliyay ogolaanshiyaha sharci ee weerarradan, iyadoo qaar ay ku doodayaan inay u dhigmaan dilal aan maxkamad iyo hannaan sharci ah loo marin.

    Mas’uuliyiinta Mareykanka ayaa ku adkaysanaya in weerarradu ay carqaladeynayaan hawlgallada kooxaha daroogada ka ganacsada, isla markaana ay ilaalinayaan amniga gobolka.

19. 24 Agoosto 2026Wasiirka Arrimaha Dibadda Cumaan oo Talaadada booqanaya Tehran

    Afhayeenka Wasaaradda Arrimaha Dibadda Iran, Esmail Baghaei, ayaa sheegay in Wasiirka Arrimaha Dibadda Cumaan, Badr bin Hamad Al Busaidi, uu Talaadada, 25-ka Agoosto 2026, booqan doono Tehran.

    Booqashadan waxaa lagu wadaa inuu kulan la yeesho Wasiirka Arrimaha Dibadda Iran, Abbas Araghchi.

    Wasaaradda Arrimaha Dibadda Iran ma aysan faahfaahin ajandaha kulanka, balse waxay sheegtay in laga wada hadli doono arrimaha labada dal iyo xaaladaha gobolka.

    Labada wasiir ayaa sidoo kale ka wada hadli doona xaaladda Marinka Hormuz, oo ah marin muhiim u ah maraakiibta ganacsiga iyo gaadiidka tamarta.

    Iran iyo Cumaan ayaa muddooyinkii dambe waday wadahadallo ku saabsan sidii loo fududeyn lahaa isu-socodka maraakiibta ee marinka.

    Baghaei wuxuu sheegay inuu rajeynayo in wada-hadallada u dhexeeya labada dal ee deriska la ah Marinka Hormuz ay gacan ka geystaan xoojinta nabadda iyo amniga gobolka.

    Booqashada Busaidi waxay ku soo beegmaysaa xilli uu Tehran joogo Taliyaha Ciidanka Pakistan, Field Marshal Asim Munir, kaas oo Iran u tegay dadaallo diblomaasiyadeed oo la xiriira xaaladda gobolka iyo wadahadallada u dhexeeya Iran iyo Mareykanka.

    Sidoo kale akhri

    Maxay saxaafadda Faransiisku ku haysataa Maxamed Bin Salman?

    Nolosha qarsoodiga ah ee hoggaamiyaha Iiran iyo shaki laga muujiyay xaaladdiisa nololeed

    Sawirka muranka dhaliyay ee muujinaya afhayeenka baarlamaanka Iran iyo dhiggiisa Ciraaq

20. 24 Agoosto 2026Turkiga oo soo saaray waaran lagu xirayo Netanyahu

    Turkiga ayaa sheegay inuu codsan doono ogeysiis cas oo Interpol ah si loo soo xiro Ra'iisul Wasaaraha Israa'iil Benjamin Netanyahu, taas oo qayb ka ah kiis dambiyeed gudaha Turkiga ah oo la xiriira weerar lagu qaaday dad u dhaqdhaqaaqa xuquuqda aadanaha oo doonayay inay gargaar bani'aadamnimo gaarsiiyaan Gaza.

    Turkiga oo xubin ka ah NATO ayaa ka mid ah dalalka sida weyn u dhaleeceeya duqeymaha iyo howlgallada Israa'iil ee Gaza, waxaana horey uu waaranno gudaha ah uga soo saaray Netanyahu sababo la xiriira dagaalka halkaas ka socda. Ankara ayaa marar badan ku baaqday in tallaabooyin caalami ah laga qaado Israa'iil, iyadoo ku eedeysay inay ku xadgudubtay xuquuqda aadanaha iyo sharciga caalamiga ah. Israa'iil ayaa beenisay eedeymahaas.

    Bishii May, ciidamada Israa'iil ayaa rasaas ku furay ugu yaraan laba dooni oo ka tirsanaa Global Sumud Flotilla, kuwaas oo ku sii jeeday Gaza, xilli ay mar kale isku dayayeen inay gargaar gaarsiiyaan dhulkaas, kadib markii Israa'iil ay horey u dhexgashay oo u joojisay howlgallo kale oo ka dhacay biyaha caalamiga ah.

    Qoraal uu barta X soo dhigay Wasiirka Caddaaladda Turkiga Akin Gurlek ayaa sheegay in waaranno lagu soo xirayo Netanyahu iyo qof kale oo looga shakisan yahay dambiyo ay ka mid yihiin xasuuq, dambiyo ka dhan ah aadanaha iyo jirdil, kuwaas oo qayb ka ah kiis ka dhan ah 35 qof oo la xiriira faragelintii Israa'iil ku samaysay doonyaha ku jiray biyaha caalamiga ah.

    "Iyadoo la raacayo waarannada lagu soo xirayo Benjamin Netanyahu iyo kuwa kale, wasaaradda caddaaladdu waxay ka codsatay wasaaradda arrimaha gudaha inay soo saarto ogeysiisyo cas oo Interpol ah, si caalamka looga raadiyo," ayuu yiri Gurlek

    Sii akhri