Trump oo beeniyay inuu Iran u bandhigay qorshe uu nabad uga baddelanayo cunnaqabateynta Iran saaran iyo Caraqji oo sugayo jawaabta kama dambaysta ah ee Washington

Tebin toos ah

1. 29 Sebtembar 2026Kumaan u dhashay Burundi ka hayaamay Kenya, dibna ugu laabtay dalkooda

   

   Xigashada Sawirka, BBC SWIHILI

   Waxaa la sheegay in ku dhowaad 7,000 muwaadin oo Burundi ah ay dib ugu laabteen dalkooda, kaddib howlgallo lagu bartilmaameedsanayo ajaanibta ka ganacsata ganacsiyada yaryar ee Kenya, kuwaas oo billowday horraantii bishan.

   Intii lagu guda jiray shir jaraa’id oo ay Talaadadii qabteen wakiillo ka socday hay’adaha dowladda, Carine Nduwayo oo ka tirsan Wasaaradda Arrimaha Dibadda Burundi ayaa sheegtay in ilaa hadda dalka dib ugu laabteen 6,309 rag ah, 593 haween ah iyo 86 carruur ah oo da’doodu ka yar tahay shan sano.

   Howlgallada oo la filayay inay billowdaan 7-dii Sebtembar, ayaa daba socday amar uu bixiyay Madaxweyne William Ruto, kaas oo kulan hore ka sheegay in ay jiraan ganacsiyo loogu talagalay oo keliya dadka Kenyanka ah.

   Hase yeeshee, dowladda Kenya ayaa markii dambe caddeysay in ajaanibta ganacsiyada ku wata si waafaqsan sharciga ay xor u yihiin inay dalka ganacsi ka sameystaan.

   Caddeyntan ayaa timid kaddib markii boqolaal muwaadiniin Burundi ah ay horey u bilaabeen inay qaataan dukumentiyada safarka, iyadoo aan la hubin inay sii joogi karaan Kenya iyo in kale.

   Akhrin dheeraad ah

   Netanyahu oo loo banneeyey hoolka golaha QM, xilli uu jeedin rabay khudbaddiisa

   Nin iska baarayay dhalmo la'aanta oo ilmo-galeen laga helay - xaalad aad u naadir ah

   'Safarkii qarsoodiga ahaa ee Netanyahu uu ku tagay Imaaraadka iyo kulankii uu la yeeshay Maxamed bin Zayed'

2. 29 Sebtembar 2026Golaha Garsoorka Iraan oo Maraykanka ku xukumay $48 bilyan oo ah magdhowga dilkii Qassem Soleimani

   Afhayeen u hadlay garsoorka Iraan ayaa sheegay in dacwadda la xiriirta dilkii Qassem Soleimani, oo ahaa taliyihii hore ee Ciidanka Quds ee Ilaalada Kacaanka Iraan, mas’uuliyiin ka tirsan dowladda Maraykanka lagu xukumay inay bixiyaan $48 bilyan oo magdhow ah.

   Ali Kazemi ayaa sheegay in dacwaddu ay hadda gashay marxaladda fulinta xukunka, isla markaana ay leedahay 3,173 dacwoodayaal. Waxa uu intaas ku daray in qaybta ciqaabta ee dacwadda 73 qof, kuwaas oo lagu raad joogo. Faahfaahin dheeraad ah kama uusan bixin.

   Qassem Soleimani ayaa lagu dilay weerar ay Maraykanku ka fuliyeen duleedka magaalada Baagdaad, muddo xillieedkii kowaad ee Donald Trump.

   Trump ayaa markii dambe sheegay in xilliga uu dagaalka Iraan bilowday uu ahaa markii uu bixiyay amarka lagu dilay Qassem Soleimani.

   Akhrin dheeraad ah

   Netanyahu oo loo banneeyey hoolka golaha QM, xilli uu jeedin rabay khudbaddiisa

   Nin iska baarayay dhalmo la'aanta oo ilmo-galeen laga helay - xaalad aad u naadir ah

   'Safarkii qarsoodiga ahaa ee Netanyahu uu ku tagay Imaaraadka iyo kulankii uu la yeeshay Maxamed bin Zayed'

3. 29 Sebtembar 2026Sacuudiga iyo Imaaraadka oo kulmay kaddib bilo ay isku khilaafsanaayeen arrinta Yeman

   

   Xigashada Sawirka, Courtesy of Saudi Royal Court/Reuters

   Hoggaamiyeyaasha Sacuudi Carabiya iyo Imaaraadka Carabta ayaa ku kulmay magaalada Riyadh, kaddib bilo ay labada dal isku khilaafsanaayeen arrinta Yeman.

   Ku dhawaad hal sano, Sacuudi Carabiya ayaa Imaaraadka ku eedeysay inuu khatar ku yahay amniga qaranka Sacuudiga, kaddib markii ay taageereen kooxo fallaago ah oo ka dagaallama Yemen.

   Kulanka maanta ayaa dhex maray Dhaxal-sugaha Sacuudiga, Maxamed bin Salmaan, iyo Sheekh Mansour bin Zayed Al Nahyan, oo ah madaxweyne ku-xigeenka Imaaraadka Carabta. Sida ay sheegtay Wakaaladda Wararka Sacuudiga ee rasmiga ah, Wasiirka Difaaca Sacuudiga, Khalid bin Salmaan, ayaa sidoo kale kulanka ka qeyb galay.

   Sacuudi Carabiya ayaa toddobaadyadii u dambeeyay wadatashi la lahayd xulafadeeda caalamiga ah, si ay uga hesho taageero ku aaddan sidii ay uga hortagi lahayd Xuutiyiinta.

   Xuutiyiinta oo xulafo la ah Iran ayaa weli wada xannibaad dhinaca badda ah oo ay ku hayaan Sacuudiga, waxayna weerarro ku qaadaan maraakiibta dalkaas ee ku sugan Badda Cas.

   Isbahaysiga milatari ee uu Sacuudigu hoggaamiyo ayaa toddobaadyadii u dambeeyay marar badan duqeeyay goobaha ay Xuutiyiintu ku sugan yihiin.

   Akhrin dheeraad ah

   Netanyahu oo loo banneeyey hoolka golaha QM, xilli uu jeedin rabay khudbaddiisa

   Nin iska baarayay dhalmo la'aanta oo ilmo-galeen laga helay - xaalad aad u naadir ah

   'Safarkii qarsoodiga ahaa ee Netanyahu uu ku tagay Imaaraadka iyo kulankii uu la yeeshay Maxamed bin Zayed'

4. 29 Sebtembar 2026War deg deg ah, Markabkii labaad oo ay soo furtayn Ciidanka Ilaalada xeebaha Puntland

   Ilaalada xeebaha ee maamul-goboleedka Puntland ayaa sheegtay inay soo badbaadiyeen markab shidaal qaada oo burcad-badeeddu afduubteen bishii Abriil.

   Markabka Honour 25 ayaa noqonaya markabkii labaad ee ay ciidamada badda ee Puntland ka soo furtaan burcad-badeedda bishan. Bayaan ka soo baxay ilaalada xeebaha ayaa sheegay in markabka oo sitay calanka Palau uu siday shixnad ay lahaayeen ganacsato Soomaaliyeed ayaa soo furteyn

   Jimcihii, ciidamada Puntland ayaa sheegay inay soo badbaadiyeen markab shidaal qaada, ayna qabteen 41 burcad-badeed ah. Hase yeeshee, markii dambe waxaa soo baxday in 28 ka mid ah ay baxsadeen, iyadoo la sheegay inay ka heleen caawimaad booliis.

   Akhrin dheeraad ah

   Netanyahu oo loo banneeyey hoolka golaha QM, xilli uu jeedin rabay khudbaddiisa

   Nin iska baarayay dhalmo la'aanta oo ilmo-galeen laga helay - xaalad aad u naadir ah

   'Safarkii qarsoodiga ahaa ee Netanyahu uu ku tagay Imaaraadka iyo kulankii uu la yeeshay Maxamed bin Zayed'

5. 29 Sebtembar 2026Iiraan oo dowladda Qatar ku eedeesay in wax xog ka soo saarin saddex duuliye oo Iranian ah

   Afhayeen u hadlay milatariga Iraan ayaa sheegay in ciidanka iyo dowladda Qatar aysan wax xog cusub ah ka bixin xaaladda saddex duuliye oo Iranian ah oo la la’yahay.

   Mohammad Akraminia ayaa telefishanka Al-Alam ee afka Carabiga ku baxa u sheegay in ciidanka iyo dowladda Qatar aysan Iraan siin wax xog cusub ah, isla markaana ay si joogto ah u sheegayaan inaysan wax war ah ka hayn xaaladda duuliyayaashan.

   Wuxuu yiri: “Waxaan filaynaa in si masuuliyad dheeraad ah la iska saaro arrintan, isla markaana sida ugu dhaqsaha badan loo caddeeyo xaaladda saddexdan qof ee qaaliga ah.”

   Guddiga Ciidamada Qalabka Sida ee Iraan u qaabilsan raadinta dadka la la’yahay ayaa bishii Juun sheegay in laba diyaaradood oo dagaal oo ka tirsanaa ciidanka Iraan, kuwaas oo hawlgal uga baxay saldhigga diyaaradaha ee Shiraz bishii Maarso, laba maalmood kaddib markii ay bilowdeen weerarradii isku mar ay Israa’iil iyo Maraykanku ku qaadeen Iran, ay “khasaare weyn gaarsiiyeen saldhigga Maraykanka ee Qatar”, balse markii ay soo laabanayeen ay cadowgu ku weeraray Gacanka Faaris. Meydka mid ka mid ah duuliyayaashii, Majid Kazemi, ayaa 28-kii Agoosto lagu aasay Iran.

   Qatar ayaa sheegtay inay heshay meydka duuliyaha, isla markaana ay ku wareejisay mas’uuliyiinta Iraan.

   Ururka Bisha Cas ee Iraan ayaa warqad u diray madaxa Guddiga Caalamiga ah ee Laanqayrta Cas, isaga oo ka codsaday in laga caawiyo caddeynta xaaladda saddexda duuliye ee la sheegay in la qabtay.

6. 29 Sebtembar 2026War deg deg ah, Muxuu ku saabsan yahay safarka Madaxweynaha Soomaaliya uu ku joogo Itoobiya?

   

   Xigashada Sawirka, SONNA

   Madaxweynaha dowladda Federaalka Soomaaliya, Xasan Sheekh Maxamuud ayaa gaaray magaalada Addis Ababa ee dalka Itoobiya, halkaas oo la sheegay inuu u joogo safar hal maalin.

   Ra’iisul Wasaaraha Itoobiya, Mudane Abiy Axmed ayaa kusoo dhaweeyey caasimadda, iyaga oo kula yeeshay.

   Sida ay qortay wakaaladda wararka Somaaliya (SONNA) kulanka ayaa diiradda lagu saaray xoojinta xiriirka soo jireenka ah ee Soomaaliya iyo Itoobiya, iyo ka wada hadalka xaaladda amni iyo siyaasadeed ee gobolka. “Labada hoggaamiye ayaa sidoo kale carrabka ku adkeeyay muhiimadda ay leedahay xoojinta iskaashiga gobolka si loo ilaaliyo nabadda iyo xasilloonida Geeska Afrika”, ayey qortay SONNA.

   Safarkaan ayaa kusoo aadaya, iyada oo gobollada waqooyi ee Itoobiya ay ka socdaan dagaallo iyo iska hor imaadyo u dhexeeya ciidanka dowladda iyo xoogagagga TPLF.

7. 29 Sebtembar 2026Maxaa loo damiintay dadka looga shakisanaa dhacdadii RAF Fairford?

   

   Xigashada Sawirka, Getty Images

   Waxaa jira xeer u ogolaanaya booliiska in codsadaan mudo kordhin addii qof lagu xiro Sharciga La-dagaallanka Argagixisada, booliisku waxay marka hore hayn karaan ilaa 48 saacadood iyaga oo aan dacwad ku soo oogin. Waxa kale oo ay codsan karaan in muddadaas loo kordhiyo ilaa 14 maalmood.

   Kiiskan, raggii la qabtay waxaa lagu xiray Sharciga Booliiska iyo Caddeymaha Dambiyada (PACE), kaas oo u oggolaanaya in qof damiin lagu sii daayo inta baaritaanku socdo, iyadoo lagu soo rogi karo shuruudo adag.

   Nick Aldworth oo la hadlay BBC Radio Wiltshire, horena usoo ahaa isku-duwihii Qaranka ee La-dagaallanka Argagixisada, ayaa sheegay in go’aanka shanta qof ee looga shakisan yahay in damiin lagu sii daayo, kaddib qiyaastii 36 saacadood, uusan ahayn go’aan si fudud loo gaaray.

   “Waxaan u malaynayaa in dadku ay filayeen in xaaladdu si kale noqon doonto, laakiin shuruudaha waxaa = lagu dalban karaa damiin waa kuwo cad oo sharci ku dhisan; ma aha arrin si weyn ugu xiran go’aanka qofka. Haddii qof uu xaq u leeyahay damiin, waa la sii daynayaa. Haddii uusan xaq u lahaynna, lama sii daynayo ayuu yiri.

   Dhanka kale waxa uu intaas ku daray “Anigu waxaan ku qanacsanahay in go’aannadaas si taxaddar leh looga fiirsaday, gaar ahaan marka la tixgeliyo heerka ay gaarsiisan tahay indha-indheynta caalamiga ah ee arrintan.”

8. 29 Sebtembar 2026War deg deg ah, War cusub oo ka soo kordhay raggii damiinta lagu sii daayay

   

   Xoghayaha Arrimaha Dibadda Mareykanka Marco Rubio ayaa sheegay in dhacdadii ka dhacday saldhigga ciidamada cirka Britain ee RAF Fairford, oo ay ciidamada Mareykanku isticmaalaan, ay si cad u muujisay in dad ama dhinac shisheeye ay ku lug lahaayeen.

   Rubio oo la hadlay Fox News ayaa sheegay in maalmaha soo socda la filayo in la helo faahfaahin dheeraad ah.

   Hase yeeshee, Wasiirka Difaaca Britain ayaa horay u sheegay in ay weli tahay xilli hore in la xaqiijiyo in dad shisheeye ay ku lug lahaayeen dhacdada.

   Madaxweynaha Mareykanka Donald Trump ayaa sidoo kale dhaleeceeyay go’aanka booliska la dagaallanka argagixisada Britain ay shanta nin ugu sii daayeen damiin. Shanta nin oo dhammaantood ah muwaadiniin British ah ayaa weli baaritaan lagu hayaa.

   RAF Fairford ayaa ka mid ah saldhigyada ay ciidamada Mareykanku u adeegsadaan howlgallada ka dhanka ah Iran. Dowladda Iran ayaa beenisay inay wax lug ah ku leedahay dhacdada, halka baaritaanka Britain uu weli socdo.

9. 29 Sebtembar 2026War deg deg ah, Iran oo war ka soo saartay xayiraadda diyaaradaheeda lagu soo rogay

   

   Xigashada Sawirka, Getty Images

   Afhayeenka dowladda Iran ayaa shir jaraa’id ku sheegay in xayiraadda lagu soo rogay duulimaadyada diyaaradaha Iran ay tahay “caddeyn muujinaysa cadaadiska Mareykanka”.

   Fatemeh Mohajerani ayaa sheegtay in Iran ay hay’adaha caalamiga ah u gudbisay cabasho, isla markaana ay waddo tallaabooyin sharci iyo kuwo diblomaasiyadeed.

   Madaxa Hay’adda Duulista Rayidka ee Iran, Abuzar Shiroudi, ayaa Isniintii sheegay inuu cabasho rasmi ah u gudbiyay Hay’adda Duulista Rayidka ee Qaramada Midoobay, ee ICAO, isagoo farta ku fiiqay xayiraadaha lagu soo rogay duulimaadyada Iran.

   Shiroudi ayaa sheegay in cabashada lagu lifaaqay dukumentiyo faahfaahinaya saameynta xayiraaddu ku yeelatay duulimaadyada Iran.

   Tan iyo toddobaadkii hore, markii cunaqabateyn cusub oo Mareykanku saaray shirkadaha diyaaradaha Iran ay dhaqan gashay, garoomo diyaaradeed oo ku yaalla dalal dhowr ah ayaa joojiyay ama xaddiday duulimaadyada shirkadaha Iran.

10. 29 Sebtembar 2026War deg deg ah, Koox xiriir la leh al-Qaacida oo iskaashi la yeeshay koox kale oo aan Islaam ahayn

    

    Xigashada Sawirka, Getty Images

    Dhacdooyinkii dhowaan ka dhacay Mali, halkaas oo JNIM oo ah garabka Al-Qaacida ee Saaxilka uu iskaashi la sameeyay koox gooni-u-goosad ah oo aan Islaami ahayn, si ay weerarro waaweyn u qaadaan bilihii Abriil iyo Luulyo, ayaa dhaliyay su’aalo ku saabsan xiriirka kooxda iyo Al-Qaacida, iyo suurtagalnimada inay ka go’do ururkaas, xitaa haddii ay ahaan lahayd mid dhinaca rasmiga ah oo keliya.

    JNIM ayaa weli muujinaysa awood dhanka dagaalka ah. Kooxdu waxay dhowaan sheegatay mas’uuliyadda weerar weyn oo 10-kii Sebtembar lagu qaaday saldhig militari oo ku yaalla bartamaha Mali, kaas oo la sheegay in lagu dilay in ka badan 100 askari.

    Kooxdan oo magaceeda oo buuxa yahay Jama'at Nusrat al-Islam wal-Muslimin (JNIM), ayaa weli si rasmi ah uga tirsan Al-Qaacida, waxaana ay ka mid tahay labada garab ee ugu awoodda badan ururkaas, iyadoo tan kale ay tahay Al-Shabaab oo ka howlgasha Soomaaliya.

    Hase yeeshee, maanta JNIM uma eka Al-Qaacida sidii ay ahaan jirtay, marka loo eego muuqaalka kooxda iyo farriimaha ay gudbiso. Arrintan waxaa ka mid ah qaabka ay warbaahinta u adeegsato, sida ay u dhisato sumcadda iyo noocyada farriimaha ay bulshada u gudbiso.

    Inkasta oo garabyada Al-Qaacida ay inta badan weerarradooda ku bartilmaameedsadaan goobaha ay ka howlgalaan ama meelaha u dhow, haddana qaabka farriimaha JNIM uu gudbiyo aad ayuu uga duwan yahay fikirkii dhaqanka ahaa ee Al-Qaacida ee jihaadka caalamiga ah.

11. 29 Sebtembar 2026Ma isleedahay waxaad cuntaa cayayaan ogaansho la'aan?

    

    Xigashada Sawirka, JIM WEST/SCIENCE PHOTO LIBRARY

    Waxaa laga yaabaa in aad ka yaqyaqsootid marka aad maqashi dad cuna cayayaanka, balse xaqiiqda ayaa waxa ay tahay in aad cuntay cayayaanka marar badan adiga oo aanan ka war haynin.

    Tani waxaa ugu wacan in maadada cuntada lagu midabeeyo ee carmine loo yaqaano laga sameeyo nooc ka mid ah cayayaanka oo la riiqay.

    Carmine waxaa lagu daraa cuntooyin aad u badan jalaatada, yoghurts-ka oo caanaha laga sameeyo, iyo waliba cabitaanka fudud.Cayayaankan waxaa laga helaa geedaha tiinka ee ka baxa Latin Amerika.

    Sii akhri: Ma isleedahay waxaad cuntaa cayayaan ogaansho la'aan.

12. 29 Sebtembar 2026War deg deg ah, Putin oo kordhiyay tirada ciidamada Ruushka

    

    Xigashada Sawirka, Reuters

    Madaxweynaha Ruushka Vladimir Putin ayaa digreeto cusub ku kordhiyay tirada guud ee ciidamada qalabka sida ee dalka.

    Digreetada ayaa dhigaysa in tirada guud ee shaqaalaha ciidamada ay noqoto 2,441,630 qof, oo ay ku jiraan 1,550,500 askari.

    Digreeto hore oo bishii Juun la soo saaray ayaa tirada guud ku sheegay 2,399,130 qof, oo ay ku jireen 1,510,000 askari.

    Sidaas darteed, digreetada cusub waxay tirada guud kordhisay 42,500 qof, halka tirada askartana lagu kordhiyay 40,500 qof.

13. 29 Sebtembar 2026War deg deg ah, Warar dheeraad ah oo ka soo baxaya khasaaraha ka dhashay weerarro ka dhacay Ukraine

    

    Xigashada Sawirka, t.me/dsns_telegram

    Adeegga Gurmadka Degdegga ah ee Ukraine ayaa sheegay in dhismayaal la deggan yahay iyo xarun lagu xanaaneeyo xoolaha ay waxyeello kasoo gaartay weerar.

    Sidoo kale, waxaa waxyeello soo gaartay warshad wax-soo-saar, bakhaarro, xarun jimicsi iyo hoy ay dadku deggan yihiin.

14. 29 Sebtembar 2026War deg deg ah, Xuutiyiinta Yemen oo ka hadlay weerarradii ugu dambeyay

    

    Xigashada Sawirka, Getty Images

    Afhayeenka militariga Xuutiyiinta Yemen, Yahya Saree, ayaa sheegay in diyaaradaha Sacuudigu 24-kii saac ee la soo dhaafay 38 duqeyn cirka iyo gantaallo ah ka fuliyeen gobollada Taiz, Saada iyo Xajjah.

    Saree ayaa sheegay in weerarrada ay waxyeello ka soo gaartay dad rayid ah, oo ay ku jiraan haween iyo carruur. Wuxuu sheegay in diyaaradaha F-15 iyo Typhoon ay ka duuleen saldhigyada Khamis Mushait iyo Taif, halka gantaalladana laga soo riday Najran iyo Jizan.

    Sida uu sheegay Saree, tirada guud ee duqeymaha iyo gantaallada Sacuudiga tan iyo markii ay xiisaddu billowday ayaa gaartay 1,123.

    Sheegashooyinkan si madax-bannaan looma xaqiijin, Sacuudiguna kama uusan hadlin tirada duqeymaha ee Xuutiyiintu sheegayaan.

15. 29 Sebtembar 2026War deg deg ah, Dad u badan haween oo la afduubtay oo warkooda la la'yahay

    

    Xigashada Sawirka, AFP

    In ka badan 80 qof, oo u badan haween, ayaa la la’yahay kaddib laba dhacdo oo afduub ah oo toddobaadkan ka dhacay waqooyiga Nigeria.

    Kooxo hubeysan ayaa weeraray bulshooyin beeraley ah oo ku nool gobollada Niger iyo Zamfara.

    Ugu yaraan 47 beeraley ah ayaa Sabtidii laga afduubtay gobolka Niger xilli ay goosanayeen laws. Maalintii xigtay, ku dhawaad 40 haween ah ayaa lagu afduubtay gobolka deriska la ah ee Zamfara.

    Dadka deegaanka ayaa sheegay in dhowr guri la gubay, waxayna ka digeen in tirada dadka la la’yahay ay intaas ka badan tahay.

    Kooxaha hubeysan ee ka howlgala waqooyiga Nigeria ayaa muddooyinkii dambe kordhiyay afduubyada iyo weerarrada ay ku qaadaan tuulooyinka, iyagoo inta badan dalbada madax-furasho si ay u sii daayaan dadka ay afduubtaan.

16. 29 Sebtembar 2026War deg deg ah, Dowladda Ingiriiska oo isku dayaysa inay ka hortagto tallaabo Trump uu doonayo inuu qaado

    

    Xigashada Sawirka, EPA

    Dowladda Britain ayaa sheegtay inay wada-hadallo kula jirto Mareykanka oo ku saabsan suurtagalnimada in la mamnuuco dhoofinta naaftada, iyadoo sidoo kale diyaargarow sameyneysa haddii tallaabadaas la dhaqan geliyo.

    Wasiirka Maaliyadda Britain, John Healey, ayaa sheegay in dowladda ay la xiriirayso mas’uuliyiinta Mareykanka, isla markaana ay hubineyso in dalka uu haysto keyd naafto oo ku filan.

    Qiimaha naaftada Britain ayaa Isniintii gaaray heerkii ugu sarreeyay abid, iyadoo litirku celcelis ahaan marayay 199.18 pence, sababo la xiriira cadaadiska ku yimid sahayda shidaalka ee ka dhashay dagaallada Bariga Dhexe iyo Ukraine.

    Madaxweynaha Mareykanka Donald Trump ayaa sheegay inuu si dhab ah uga fiirsanayo in la xaddido ama la mamnuuco dhoofinta naaftada Mareykanka, si loo yareeyo qiimaha shidaalka gudaha dalka.

    Britain waxay ku tiirsan tahay Mareykanka qayb weyn oo ka mid ah naaftada ay dibadda ka soo dejiso, sidaas darteed falanqeeyayaasha ayaa ka digaya in xayiraad dhoofintu ay sii kordhin karto qiimaha shidaalka Britain.

17. 29 Sebtembar 2026War deg deg ah, Xaaladda ka taagan magaalada Baydhabo oo walaac hor-leh abuurtay

    

    Xigashada Sawirka, SOCIAL MEDIA

    Ururda Bulshada rayidka ah ee Koonfur Galbeed Soomaaliya, ayaa walaaca ka muujinaya khilaafka iyo dagaallada soo laa-laabtay ee ka jira magaalada Baydhabo ee gobolka Bay.

    Iska horimaadyada ka dhaca Baydhabo waxaa ka dhashay khasaare xooggan oo naf iyo maalba-leh, waxaana kii ugu dambeyay ee shalay ku dhintay ugu yaraan 20 qof.

    Ururada Bulshada rayidka ah ayaa ku baaqay in dagaalka la joojiyo isla markaana khilaafka lagu xalliyo hannaan wadahadal ah, si meesha looga saaro dagaallada iyo rabshadaha joogtada ka noqday deegaannadaas si gaar ah magaalada Baydhabo.

    Dagaallada soo noqnoqday ayaa u dhaxeeya ciidamada maamulka Koonfur Galbeed iyo kuwo taabacsan maamulkii hore.

18. 29 Sebtembar 2026War deg deg ah, Faahfaahin cusub oo ka soo baxaysa dab ka kacay meel u dhow buurta Kilimanjaro ee dalka Tanzania

    

    Xigashada Sawirka, TANAPA

    Hay’adda Seerayaasha Qaranka Tanzania ayaa si ku-meel-gaar ah u xirtay waddooyinka Lemosho iyo Londorosi ee loo maro buurta Kilimanjaro, kaddib markii dab cusub uu ka kacay gudaha seeraha.

    TANAPA waxay sheegtay in dabku ka kacay deegaanka Sangarini-Kamwanga, isla markaana uu ku sii fidayay dhanka Shira.

    Dalxiisayaasha qorsheynayay inay isticmaalaan labada waddo ayaa loo sheegay inay adeegsadaan waddooyinka Machame, Marangu ama Rongai.

    Dadaallada lagu daminayo dabka ayaa socda, waxaana iska kaashanaya ciidamada dab-damiska, adeegga kaymaha Tanzania, maamulka duurjoogta Enduimet, ciidamada kaydka, dadka deegaanka iyo dhinacyada dalxiiska.

    Dabkan cusub ayaa yimid toddobaadyo kaddib dab kale oo 3-dii Sebtembar ka kacay meel u dhow xadka Tanzania iyo Kenya, kaas oo in ka badan 90 boqolkiiba la xakameeyay laba maalmood kaddib.

    TANAPA waxay sheegtay in badbaadada dalxiisayaasha, shaqaalaha iyo dadka kale ee ku lugta leh ay tahay mudnaanta koowaad.

19. 29 Sebtembar 2026War deg deg ah, Shan nin oo la xiray weerarro halis ah oo hadda la sii daayay

    

    Xigashada Sawirka, Getty Images

    Booliska Britain ayaa sheegay in shan nin oo lagu xiray meel u dhow saldhigga ciidamada cirka Mareykanka ee Fairford lagu sii daayay damiin.

    Madaxa booliska la dagaallanka argagixisada, Lawrence Taylor, ayaa sheegay in tani aysan ka dhignayn in baaritaanku dhammaaday, iyadoo ragga lagu soo rogay shuruudo adag oo damiin ah.

    Shanta nin ayaa dhammaantood ah muwaadiniin British ah, waxayna ku nool yihiin London, da’dooduna waxay ka yar tahay 30 sano.

    Taylor ayaa sheegay in baaritaanku eegayo dhammaan dhinacyada, oo ay ku jirto suurtagalnimada in falka ay fuliyeen wakiillo ama shaqsiyaad si ogaal ama ogaal la’aan ah ugu shaqeynayay dal shisheeye.

    Ra’iisul Wasaaraha Britain, Andy Burnham, ayaa isugu yeeray kulan degdeg ah xukuumaddiisa, si loo helo xog dhammaystiran oo ku saabsan dhacdadaan.

20. 29 Sebtembar 2026War deg deg ah, Maxaa ka jira in Trump arrimahaan u bandhigay Iran oo ay ka diidday?

    

    Xigashada Sawirka, Reuters

    Madaxweynaha Maraykanka Donald Trump ayaa beeniyay war ay baahisay Axios oo sheegayay inuu diyaar u yahay in Iran laga fududeeyo cunaqabateynta, isla markaana loo sii daayo lacagaha laga xannibay, haddii Tehran ay tanaasulaad ka sameyso barnaamijkeeda nukliyeerka.

    Trump ayaa bartiisa Truth Social ku sheegay in warkaasi uusan run ahayn, isagoo yiri: “Waxba uma aanan bandhigin Iran.”

    Axios ayaa, iyaduna, soo xigatay saraakiil Maraykan ah oo sheegay in Trump uu diyaar u yahay fududeynta cunaqabateynta haddii Iran ay qaaddo tallaabooyin la taaban karo oo ku saabsan barnaamijkeeda nukliyeerka.

    Dhanka kale, Wasiirka Arrimaha Dibadda Iran, Cabbaas Caraqji, ayaa sheegay in Tehran ay fikrado kala hadashay dhexdhexaadiyeyaasha Qadar, kuwaas oo loo gudbin doono Maraykanka.

    Caraqji ayaa sheegay in Iran ay sugayso jawaabta Washington oo loo soo marin doono dhexdhexaadiyaha oo ah Qadar, iyadoo la filayo in jawaabta kama dambaysta ah la helo Talaadada maanta.