ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
Air India ගුවන් නියමුවරයෙකු ගංජා භාවිත කළ බව හෙළි වීමෙන් පසු නියමුවන් සියල්ල පරීක්ෂාවට
Air India සමාගම වහාම ක්රියාත්මක වන පරිදි සිය නියමුවන් තහනම් උත්තේජක භාවිත කර ඇත්දැයි සොයා බැලීමේ පරීක්ෂණ ආරම්භ කිරීමට නියමිතය.
පසුගිය සතියේ පුකෙට් සිට දිල්ලි බලා පියාසර කළ ගුවන් යානයක් ක්ෂණිකව පහළට ඇදී යාමේ සිදුවීමක් මෙයට හේතු වී ඇත. මූලික වාර්තාවලට අනුව එහි සිටි ජ්යෙෂ්ඨ ගුවන් නියමුවාට නැවත වරක් තහනම් ද්රව්ය පරීක්ෂණයක් කිරීමට සිදු වූ අතර, ඔහු ගංජා භාවිත කර ඇති බවට එහිදී තහවුරු වී ඇති බව වාර්තා වේ.
ගුවන් සමාගමේ අරපිරිමැසුම්දායක ගුවන් සේවා අංශය වන Air India Express හි නියමුවන් ද බ්රහස්පතින්දා සිට මෙම පරීක්ෂණවලට යටත් වනු ඇත.
අගෝස්තු 4 වැනිදා සිදු වූ මෙම සිද්ධියේදී මගීන් 20 දෙනෙක් සහ කාර්ය මණ්ඩල සාමාජිකයින් සිව්දෙනෙක් තුවාල ලැබූහ.
ඒ වනවිට එයාර්බස් A320 ගුවන් යානයේ මගීන් 137 දෙනෙකු සහ කාර්ය මණ්ඩල සාමාජිකයින් අට දෙනෙකු සිට තිබේ.
දැනට පවතින නීතිරීති අනුව, ගුවන් නියමුවන්ගෙන් අවම වශයෙන් 10%ක් අහඹු ලෙස පරීක්ෂා කිරීමට අවශ්ය වේ.
BBC ය වෙත දකින්නට ලැබුණු නිල මෙමෝ පතකට අනුව, එයාර් ඉන්දියා සමාගම සඳහන් කර ඇත්තේ "පරීක්ෂණ කටයුතු තවදුරටත් පුළුල් කිරීම වැදගත්" බවයි.
නෛතික අවශ්යතාවලින්ද ඔබ්බට ගොස් ක්රියාත්මක කරන මෙම පියවර, ඉහළම ආරක්ෂාව සහ වෘත්තීයභාවය රැක ගැනීමට අප සතු දැඩි කැපවීම පෙන්වන්නකි. එමෙන්ම, මෙය අපගේ මගීන්, ව්යාපාරික හවුල්කරුවන් සහ සමස්ත සමාජය වෙත විශ්වාසය තහවුරු කිරීමක් ද වේ," යැයි එහි සඳහන් විය.
එයාර්බස් සමාගම සහ ප්රංශයේ ගුවන් ආරක්ෂක ඒජන්සිය සමඟ එක්ව ඉන්දීය බලධාරීන් මේ පිළිබඳව පරීක්ෂණ පවත්වයි.
විමර්ශනය අවසන් වන තුරු එම ගුවන් යානයේ නියමුවන් දෙදෙනාම රාජකාරිවලින් ඉවත් කර තිබේ.
ගුවන්සේවා රෙගුලාසි යටතේ තහනම් කර ඇති ද්රව්ය මෙන්ම ඖෂධ වර්ගද හඳුනාගැනීම සඳහා කෙරෙන මෙම පරීක්ෂණ, Air India ඇකඩමියේ පුහුණු සැසිවලට සමගාමීව මෙන්ම, ගුවන් නියමුවන් දැනුවත් කරන මධ්යස්ථාන සහ කාර්යාල ඇතුළු තවත් ස්ථාන කිහිපයකදීම සිදු කරනු ලබයි.
සිවිල් ගුවන් සේවා අමාත්ය රාම් මෝහන් නායිදු පැවසුවේ, ගුවන් අනතුරු විමර්ශන කාර්යාංශය (AAIB) මේ සම්බන්ධයෙන් පරීක්ෂණයක් සිදුකරමින් සිටින බවත්, අවසන් වාර්තාව නිකුත් වූ පසුව පමණක් තමාට නිශ්චිතව යමක් පැවසිය හැකි බවත්ය.
මෙම සිදුවීම මත්ද්රව්ය භාවිතය හා සම්බන්ධ එකක් බවත්, එහිදී පවතින නීති රීති උල්ලංඝනය කර ඇති බවත් තහවුරු වුවහොත්, අප ඊට එරෙහිව දැඩි පියවර ගන්නා බව රාම් මෝහන් නායිදු පැවසීය.
ගුවන් අනතුරු විමර්ශන කාර්යාංශය (AAIB) මෙම සිද්ධියට අදාළ තාක්ෂණික, මෙහෙයුම්මය, වෛද්යමය සහ මානව සාධක සියල්ල පිළිබඳව පරීක්ෂණයක් සිදුකරමින් සිටී.
අගෝස්තු 11 වැනිදා, ඉන්දියාවේ සිවිල් ගුවන් සේවා අමාත්යාංශය, පුකෙට්–දිල්ලි ගුවන් ගමනට සම්බන්ධ වූ මෙම සිද්ධිය සම්බන්ධයෙන්, ධුරයෙන් ඉවත්වීමට නියමිත Air India ප්රධාන විධායක නිලධාරී කැම්බල් විල්සන් කැඳවා ප්රශ්න කර තිබේ.
මාධ්ය වාර්තාවලට අනුව, AI - 2379 ගුවන් යානයේ ප්රධාන නියමුවා දෙවන මත්ද්රව්ය පරීක්ෂණයකට යොමු කරන බව ඉන්දීය රජය ඉරිදා නිවේදනය කළේය. නියමුවාගේ පළමු පරීක්ෂණයේ ප්රතිඵලය ඍණාත්මක වී තිබුණි. මෙය මූලික ක්ෂණික පරීක්ෂණයක් වන අතර, එහි ප්රතිඵලය අවසන් ප්රතිඵලය ලෙස සලකනු නොලැබේ.
එවැනි බරපතළ සිදුවීම් සම්බන්ධයෙන් පරීක්ෂණ සිදු කිරීමේදී, මනෝ ක්රියාකාරී උත්තේජක භාවිතය පිළිබඳව විමර්ශනය කිරීම අවශ්ය ක්රියාපටිපාටියකි.
පළමු පරීක්ෂණයේ ප්රතිඵලය ඍණාත්මක නොවුණහොත්, එය තහවුරු කිරීම සඳහා දෙවන පරීක්ෂණයක් සිදු කරනු ලැබේ. ඇමෙරිකානු මාධ්ය ආයතනයක් වන Bloomberg, මූලාශ්ර උපුටා දක්වමින්, නියමුවාගේ දෙවන පරීක්ෂණයේ ප්රතිඵලය ධනාත්මක වී ඇති බව වාර්තා කළේය.
Bloomberg තම වාර්තාවේ මෙසේ සඳහන් කළේය: "පරීක්ෂණයේ ප්රතිඵල රහසිගත බැවින්, ඔහු තම අනන්යතාව හෙළි නොකරන ලෙස ඉල්ලා සිටියේය. නියමුවාගේ මත්ද්රව්ය පරීක්ෂණයේ ප්රතිඵල සම්බන්ධයෙන් අදහස් දැක්වීම එයාර් ඉන්දියා ප්රකාශකයෙකු විසින් ප්රතික්ෂේප කරන ලදී. ගුවන් අනතුරු විමර්ශන කාර්යාංශය සිදුකරන පරීක්ෂණයට ප්රංශ ගුවන් යානා අනතුරු විමර්ශන ආයතනය සහ ප්රංශයේ එයාර්බස් සමාගමේ තාක්ෂණික විශේෂඥයින්ද සහාය ලබා දෙමින් සිටිති."
මෙම සිද්ධිය ටාටා සමූහයට අයත් Air India සමාගමට එල්ල වී ඇති තවත් අභියෝගයක් බවට පත්ව තිබේ.
ගුවන් සමාගම මාර්තු 31 වැනිදායින් අවසන් වූ මූල්ය වර්ෂය තුළ ඇමෙරිකානු ඩොලර් බිලියන 2.3කට ආසන්න වාර්තාගත පාඩුවක් වාර්තා කළේය.
2025 ජුනි මාසයේදී අහමදාබාද් සිට ලන්ඩන් බලා පියාසර කළ ගුවන් යානයක් ගුවන්ගත වී මද වේලාවකට පසු අනතුරට ලක්වීමෙන්, එහි ගමන් කළ පුද්ගලයන් 241 දෙනෙකු සහ භූමියේ සිටි පුද්ගලයන් 19 දෙනෙකු මිය යාමෙන් පසු, එම ගුවන් සමාගම දැනටමත් දැඩි විමර්ශනයකට ලක්ව සිටී. එම අනතුරින් දිවි ගලවා ගත්තේ එක් මගියෙකු පමණි.
පසුගිය සතියේ, හිටපු ඉතියෝපියානු ගුවන් සේවයේ ප්රධානී ටෙවෝල්ඩේ ගෙබ්රෙමරියම්, එයාර් ඉන්දියා සමාගමේ නව ප්රධාන විධායක නිලධාරියා බවට පත් කෙරුණි.